Lefitiko

15 Jehofa o ne a tswelela a bua le Moshe le Arone a re: 2 “Buang le Baiseraele mme lo ba reye lo re, ‘Fa monna a tswa boladu mo serweng sa gagwe sa tsalo,* boladu joo bo tla dira gore a itshekologe.+ 3 O tla itshekologa ka ntlha ya boladu joo, le fa bo ka tswa bo elela mo serweng sa gagwe bo sa kgaotse kgotsa bo thibile serwe sa gagwe.

4 “‘Bolao bope jo motho yo o tswang boladu a lalang mo go jone bo tla itshekologa, le selo sepe fela se a nnang mo go sone se tla itshekologa. 5 Motho yo o kgomang bolao jwa gagwe o tshwanetse go tlhatswa diaparo tsa gagwe, a tlhape mme o tla itshekologa go fitlha maitseboa.+ 6 Ope fela yo o nnang mo selong se motho yoo a neng a ntse mo go sone a tlhatswe diaparo tsa gagwe, a tlhape mme o tla itshekologa go fitlha maitseboa. 7 Ope fela yo o kgomang nama ya motho yo o tswang boladu joo a tlhatswe diaparo tsa gagwe, a tlhape mme o tla itshekologa go fitlha maitseboa. 8 Fa motho yo o tswang boladu joo a kgwela mongwe yo o itshekileng mathe, motho yoo o tshwanetse go tlhatswa diaparo tsa gagwe, a tlhape mme o tla itshekologa go fitlha maitseboa. 9 Sale epe e motho yo o tswang boladu joo a nnang mo go yone e tla itshekologa. 10 Ope fela yo o kgomang sepe se a neng a ntse mo go sone o tla itshekologa go fitlha maitseboa mme ope fela yo o tsayang dilo tseo, o tla tlhatswa diaparo tsa gagwe, a tlhape mme o tla itshekologa go fitlha maitseboa. 11 Fa motho yo o tswang boladu+ a tshwara mongwe a sa tlhapa diatla, motho yoo o tshwanetse go tlhatswa diaparo tsa gagwe, a tlhape mme o tla itshekologa go fitlha maitseboa. 12 Sejana sa letsopa se motho yo o tswang boladu a se kgomang se thubiwe mme sejana sepe sa logong sone se tlhatswiwe ka metsi.+

13 “‘Fa boladu joo bo kgaotsa mme motho yoo a sa tlhole a itshekologile ka ntlha ya jone, o tla bala malatsi a le supa a go itshekisiwa ga gagwe, mme o tshwanetse go tlhatswa diaparo tsa gagwe, a tlhape ka metsi a motswedi mme o tla itsheka.+ 14 Mo letsatsing la borobedi, a tseye maeba a mabedi kgotsa maphoi a mannye a le mabedi+ mme a tle fa pele ga ga Jehofa kwa kgorong ya tente ya bokopanelo a bo a a naya moperesiti. 15 Mme moperesiti o tla a a ntsha setlhabelo, le lengwe e le setlhabelo sa boleo mme le lengwe e le setlhabelo se se fisiwang, mme moperesiti o tla mo phepafatsa* fa pele ga ga Jehofa ka ntlha ya boladu jo bo neng bo tswa mo go ene.

16 “‘Jaanong fa monna a tswa peo, a a tlhape mmele otlhe wa gagwe ka metsi mme o tla itshekologa go fitlha maitseboa.+ 17 O tshwanetse go tlhatswa seaparo sengwe le sengwe, le sengwe le sengwe se se dirilweng ka letlalo se se tshelegetsweng ke peo mme di tla itshekologa go fitlha maitseboa.

18 “‘Fa monna a tlhakanela dikobo le mosadi a bo a tswa peo, ba tshwanetse go tlhapa mme ba tla itshekologa go fitlha maitseboa.+

19 “‘Fa mosadi a elela madi mo mmeleng wa gagwe ka gonne a le mo kgweding, o tla tswelela a itshekologile malatsi a le supa.+ Ope fela yo o mo kgomang o tla itshekologa go fitlha maitseboa.+ 20 Sepe fela se a robalang mo go sone a sa ntse a itshekologile ka gonne a le mo kgweding se tla itshekologa, le sengwe le sengwe se a nnang mo go sone se tla itshekologa.+ 21 Ope fela yo o kgomang bolao jwa gagwe a tlhatswe diaparo tsa gagwe, a tlhape mme o tla itshekologa go fitlha maitseboa. 22 Ope fela yo o kgomang selo sepe se a neng a ntse mo go sone a tlhatswe diaparo tsa gagwe, a tlhape mme o tla itshekologa go fitlha maitseboa. 23 Ope fela yo o kgomang bolao kgotsa sengwe se mosadi yoo a neng a ntse mo go sone, o tla itshekologa go fitlha maitseboa.+ 24 Mme fa monna a tlhakanela dikobo le mosadi yoo a bo a itshekololwa ke madi a gagwe ka gonne a le mo kgweding,+ foo monna yoo o tla itshekologa malatsi a le supa mme bolao bope jo a lalang mo go jone bo tla itshekologa.

25 “‘Fa mosadi a elela madi malatsi a le mantsi+ mme e se nako ya gagwe e e tlwaelegileng ya gore a nne mo kgweding+ kgotsa fa a tswa madi lobaka lo loleele go feta nako e e tlwaelegileng ya fa a le mo kgweding, o tla itshekologa malatsi otlhe a fa a elela madi, fela jaaka fa go direga mo malatsing a fa a le mo kgweding. 26 Bolao bope fela jo a robalang mo go jone mo malatsing a fa a elela madi ka tsela e e sa tlwaelegang, bo tla tshwana le bolao jo bo seng phepa ka nako ya fa a le mo kgweding,+ mme selo sepe fela se a nnang mo go sone se tla leswafala fela jaaka go direga ka nako ya fa a le mo kgweding. 27 Ope fela yo o di kgomang o tla itshekologa, mme o tshwanetse go tlhatswa diaparo tsa gagwe, a tlhape mme o tla itshekologa go fitlha maitseboa.+

28 “‘Le fa go ntse jalo, fa a itshekile a sa tlhole a elela madi, o tla bala malatsi a le supa mme morago ga moo o tla itsheka.+ 29 Mo letsatsing la borobedi, a tseye maeba a mabedi kgotsa maphoi a mannye a le mabedi,+ mme a a ise kwa moperesiting kwa kgorong ya tente ya bokopanelo.+ 30 Moperesiti o tla ntsha setlhabelo sa boleo ka le lengwe a bo a ntsha setlhabelo se se fisiwang ka le lengwe, mme moperesiti o tla mo phepafatsa fa pele ga ga Jehofa ka ntlha ya boitshekologo jwa gagwe jwa go elela madi.+

31 “‘Ka jalo, lo tshwanetse go thusa Baiseraele gore ba nne phepa, mme ga ba kitla ba swa ka ntlha ya go leswafatsa motlaagana wa me o o mo gare ga bone.+

32 “‘Ono ke molao o o amanang le monna yo o tswang boladu mo serweng sa tsalo, monna yo o itshekologileng ka ntlha ya go tswa peo,+ 33 mosadi yo o itshekologileng ka gonne a le mo kgweding,+ monna yo o tswang boladu mo serweng sa tsalo kgotsa mosadi yo o elelang madi ka tsela e e sa tlwaelegang+ le monna yo o tlhakanelang dikobo le mosadi yo o itshekologileng.’”