Bahebera

5 Gonne moperesiti mongwe le mongwe yo mogolo yo o tswang mo bathong o tlhomiwa gore a dire tirelo ya Modimo mo boemong jwa batho,+ gore a ise dimpho le ditlhabelo a di ntshetsa maleo.+ 2 O kgona go tlhomogela pelo* ba ba se nang kitso le ba ba fapogang ka gonne o a lemoga gore le ene o na le makoa, 3 mme ka ntlha ya seo o tshwanelwa ke go ntshetsa maleo a gagwe ditlhabelo fela jaaka a di ntshetsa maleo a batho ba bangwe.+

4 Motho ga a ka ke a nna moperesiti yo mogolo ka boene, mme Modimo ke ene a mo tlhomang gore a nne moperesiti yo mogolo, fela jaaka a ile a tlhoma Arone.+ 5 Ka jalo, Keresete le ene ga a ka a ikgalaletsa+ ka go nna moperesiti yo mogolo, mme o ne a galalediwa ke yo o neng a bua jaana ka ene: “O morwaake; jaanong gompieno ke rrago.”+ 6 Gape golo gongwe a re, “O moperesiti ka bosakhutleng yo o tshwanang le Melekisedeke.”+

7 Fa Keresete a ne a le mo lefatsheng,* o ne a rapela ka tlhoafalo a rapela Ene yo o neng a kgona go mmoloka a mo ntsha mo losong, a kopa ka lentswe le le kwa godimo e bile a lela,+ mme dithapelo tsa gagwe di ne tsa utlwiwa ka gonne a boifa Modimo. 8 Le fa e ne e le morwa, o ne a ithuta go nna kutlo mo dilong tse di botlhoko tse di neng tsa mo diragalela.+ 9 Mme fa a sena go nna kutlo mo go sengwe le sengwe,*+ botlhe ba ba mo utlwang ba ka bolokwa ba bo ba newa botshelo jo bo sa khutleng ka ntlha ya gagwe,+ 10 ka gonne Modimo o mo tlhomile gore a nne moperesiti yo mogolo yo o tshwanang le Melekisedeke.+

11 Re na le dilo tse dintsi tse re ka di buang ka ene mme go thata go di lo tlhalosetsa, ka gonne lo tsaya nako go tlhaloganya. 12 Gone jaanong* lo tshwanetse go ka bo lo le barutisi, mme lo tlhoka mongwe go lo ruta dilo tsa ntlha+ tse di tswang mo lefokong la Modimo le le boitshepo; e bile lo tlhoka mashi jaaka bana, e seng dijo tse di tiileng. 13 Gonne mongwe le mongwe yo o nnang a nwa mashi ga a a tlwaelana le lefoko la Modimo le le re rutang se se siameng, ka gonne ke ngwana.+ 14 Mme dijo tse di tiileng ke tsa batho ba ba nang le tumelo e e nonofileng, ba ba katisitseng bokgoni jwa bone jwa go lemoga ka go bo dirisa, gore bo kgone go farologanya se se siameng le se se sa siamang.