Lekwalo la ga Jakobe

2 Bakaulengwe ba me, go tla jang gore fa lo sena go nna le tumelo mo go Morena wa rona Jesu Keresete yo o galaleditsweng, lo bo lo sa ntse lo tseela ba bangwe kwa godimo mme ba bangwe kwa tlase?+ 2 Fa monna yo o rweleng dipalamonwana tsa gauta e bile a apere diaparo tse dintlentle a tla mo phuthegong ya lona, mme monna yo o humanegileng yo o apereng diaparo tse di leswe le ene a tsena, 3 a lo tseela yo o apereng diaparo tse dintlentle kwa godimo lo bo lo re, “Wena nna fano mo lefelong le le molemo,” mme lo bo lo raya yo o humanegileng lo re, “Wena tswelela o eme foo,” kgotsa “Nna fale fa tlase ga sebeo sa dinao tsa me”?+ 4 A fa lo dira jalo ga lo tlhaole batho ba bangwe+ e bile a ga lo a itira baatlhodi ba ba dirang ditshwetso tse di bosula?+

5 Reetsang, bakaulengwe ba me ba ba rategang. A Modimo ga a tlhopha batho ba lefatshe le ba tsayang ba humanegile gore ba nne bahumi ka ntlha ya tumelo ya bone+ le gore ba nne baruaboswa ba Bogosi, jo a neng a bo solofetsa ba ba mo ratang?+ 6 Le fa go ntse jalo, lo tlontlolotse bahumanegi. A bahumi ga se bone ba ba lo gatelelang+ e bile ba lo gogagogela fa pele ga dikgotlatshekelo? 7 A ga ba tlhapatse leina le le molemo le lo bidiwang ka lone? 8 Jaanong, fa e le gore lo tswelela lo diragatsa molao wa segosi o o mo lokwalong lono, o o reng, “O tshwanetse go rata moagelani wa gago jaaka o ithata,”+ lo dira sentle tota. 9 Mme fa lo tswelela lo tseela ba bangwe kwa tlase,+ lo dira boleo, e bile molao o dira gore go bonale* gore lo molato.+

10 Gonne fa motho a ikobela Molao wa ga Moshe otlhe mme a bo a tlola taelo e le nngwe fela ya one, o tlodile molao otlhe.+ 11 Gonne yo o neng a re, “Ga o a tshwanela go dira boaka,”+ gape o ne a re, “Ga o a tshwanela go bolaya motho.”+ Jaanong, fa o sa dire boaka mme o bolaya motho, o tlodile molao. 12 Tswelelang lo bua e bile lo itshwara jaaka batho ba ba tlileng go atlholwa ka molao wa batho ba ba gololesegileng.*+ 13 Gonne motho yo o seng kutlwelobotlhoko, ga a kitla a utlwelwa botlhoko fa a atlholwa.+ Kutlwelobotlhoko e na le maatla go feta katlholo.

14 Bakaulengwe ba me, a go na le mosola gore motho a re o na le tumelo mme a sa e bontshe ka ditiro?+ A tumelo eo e ka mmoloka?+ 15 Fa go na le bakaulengwe kgotsa bokgaitsadi ba ba se nang diaparo* le dijo tse di lekaneng tsa letsatsi leo, 16 mme mongwe wa lona a bo a ba raya a re: “Tsamayang ka kagiso; e kete lo ka bona diaparo le dijo,” mme lo sa ba neye dilo tse ba di tlhokang,* go na le mosola wa eng?+ 17 Ka jalo, tumelo le yone, fa e se na ditiro, e sule.+

18 Le fa go ntse jalo, mongwe a ka re: “O na le tumelo, mme nna ke na le ditiro. Mpontshe tumelo ya gago e e se nang ditiro, mme nna ke tla go bontsha tumelo ya me ka ditiro tsa me.” 19 O dumela gore go na le Modimo a le mongwe, gakere? O dira sentle. Tota le madimona a a dumela e bile a a tshoga.+ 20 Mme wena seeleele, a o batla go itse gore tumelo e e se nang ditiro ga e na mosola? 21 A rraarona e bong Aborahame ga a ka a bolelwa a siame ka ntlha ya se a neng a se dira? Eleruri o ne a bolelwa a siame fa a sena go baya Isake morwawe mo sebesong.+ 22 Tumelo ya gagwe e ne ya bonala mo go se a neng a se dira; o ne a bontsha ka ditiro tsa gagwe gore ruri o na le tumelo,+ 23 mme lokwalo lono lo ne lwa diragadiwa lo lo reng: “Aborahame o ne a dumela mo go Jehofa,* mme a tsewa e le motho yo o siameng ka ntlha ya tumelo ya gagwe,”+ mme o ne a bidiwa tsala ya ga Jehofa.*+

24 Jaanong lo a lemoga gore motho o tla kaiwa a siame ka ntlha ya ditiro tsa gagwe, mme e seng ka tumelo fela. 25 Ka tsela e e tshwanang, a Modimo ga a ka a bolela gore Rahabe yo a neng a gweba ka mmele o ne a siame ka ntlha ya ditiro tsa gagwe fa a sena go amogela barongwa a bo a ba tshabisa ka tsela e nngwe?+ 26 Eleruri fela jaaka mmele o o se nang moya* o sule,+ tumelo e e se nang ditiro le yone e sule.+