Ditiragalo wa Bobedi

6 Ka yone nako eo, Solomone o ne a re: “Jehofa, o ne wa re o tla nna mo lefifing le lentshontsho.+ 2 Jaanong ke go agetse ntlo e ntle thata, lefelo le le tlhomameng gore o nne mo go lone ka bosakhutleng.”+

3 Go tswa foo, kgosi e ne ya retologa mme ya leba Baiseraele botlhe ba ba neng ba eme foo, mme e ne ya ba segofatsa.+ 4 E ne ya re: “E kete Jehofa, Modimo wa Iseraele a ka bakwa, ene yo o solofeditseng rre e bong Dafide ka molomo wa gagwe le yo o diragaditseng ka diatla tsa gagwe, a re, 5 ‘Go tloga mo letsatsing le ke ntshitseng batho ba me kwa lefatsheng la Egepeto ka lone, ga ke a ka ka tlhopha motse ope mo ditsong tsotlhe tsa Iseraele o ke tla agang ntlo mo go one gore leina la me le tswelele le le mo go one,+ e bile ga ke a ka ka tlhopha motho ope gore a nne moeteledipele wa batho ba me ba Iseraele. 6 Le fa go ntse jalo, ke tlhophile Jerusalema+ gore leina la me le tswelele le le koo, e bile ke tlhophile Dafide gore a okamele batho ba me ba Iseraele.’+ 7 Mme Dafide rre, o ne a eleditse ka pelo yotlhe go agela leina la ga Jehofa, Modimo wa Iseraele ntlo.+ 8 Mme Jehofa o ne a raya rre a re, ‘O ne wa eletsa go agela leina la me ntlo, mme o dirile sentle ka go eletsa seno mo pelong ya gago. 9 Le fa go ntse jalo, ga o kitla o nkagela ntlo, mme morwao yo o tla mo tsholelwang* ke ene yo o tla agelang leina la me ntlo.’+ 10 Jehofa o ne a diragatsa tsholofetso e a e dirileng, ka gonne ke ne ka tlhatlhama rre mme ka nna mo setulong sa bogosi sa Iseraele,+ fela jaaka Jehofa a solofeditse.+ Gape ke agetse leina la ga Jehofa, Modimo wa Iseraele ntlo, 11 mme ke ne ka baya Letlole koo le le nang le kgolagano+ e Jehofa a neng a e dira le batho ba Iseraele.”

12 Go tswa foo, o ne a ema fa pele ga sebeso sa ga Jehofa fa pele ga phuthego yotlhe ya Iseraele a bo a otlololela diatla tsa gagwe kwa magodimong.+ 13 (Gonne Solomone o ne a dirile serala sa kopore mme a se baya fa gare ga lolwapa.*+ Se ne se le boleele jwa disentimetara di ka nna 223,* bophara jwa disentimetara di ka nna 223 le bogodimo jwa disentimetara di le 134;* mme o ne a ema mo godimo ga sone.) Mme o ne a khubama fa pele ga phuthego yotlhe ya Iseraele a bo a otlololela diatla tsa gagwe kwa magodimong,+ 14 mme o ne a re: “Wena Jehofa, Modimo wa Iseraele, ga go na Modimo ope yo o tshwanang le wena kwa magodimong kwa godimo kgotsa mo lefatsheng fa tlase, wena yo o bolokang kgolagano le yo o bontshang batlhanka ba gago ba ba tsamayang fa pele ga gago ka pelo yotlhe ya bone lorato lo lo sa kgaotseng.+ 15 O diragaditse tsholofetso e o e diretseng motlhanka wa gago, e bong Dafide rre.+ O ne wa dira tsholofetso ka molomo wa gago, mme mo letsatsing leno o e diragaditse ka seatla sa gago.+ 16 Mme jaanong, tlhe Jehofa, Modimo wa Iseraele, diragatsa tsholofetso e o neng wa e direla Dafide motlhanka wa gago e bong rre, fa o ne o re: ‘Ka metlha go tla nna go na le monna wa losika lwa gago mo setulong sa bogosi sa Iseraele, fa fela bomorwao ba ka ela tlhoko tsela ya bone mme ba tsamaya mo molaong wa me,+ fela jaaka o tsamaile fa pele ga me.’+ 17 Mme jaanong tlhe Jehofa, Modimo wa Iseraele, diragatsa tsholofetso e o e diretseng Dafide motlhanka wa gago.

18 “A mme gone Modimo o tla nna le batho mo lefatsheng?+ Magodimo, tota legodimo la magodimo, le ka se go tshole;+ mme ruri ntlo eno e ke e agileng e nnye tota go ka go tshola.+ 19 Jaanong tlhe Jehofa, Modimo wa me, reetsa thapelo ya me le kopo ya me ya gore o nkamogele, mme o reetse selelo sa me sa go kopa thuso le thapelo e ke e rapelang fa pele ga gago. 20 E kete matlho a gago a ka leba mo ntlong eno bosigo le motshegare, mo lefelong le o neng wa re o tla baya leina la gago mo go lone,+ gore o reetse thapelo e ke e rapelang ke lebile mo lefelong leno. 21 Mme o reetse dikopo tsa me nna motlhanka wa gago tsa gore o nkamogele le dikopo tse di dirwang ke batho ba gago ba Iseraele fa ba rapela ba lebile mo lefelong leno,+ mme e kete o ka utlwa o le kwa lefelong le o nnang kwa go lone kwa magodimong;+ e kete o ka utlwa o bo o re itshwarela.+

22 “Fa mongwe a leofela motho yo mongwe mme a laelwa gore a dire maikano* a bo a patelesega go diragatsa maikano* ao, mme fa a tla fa pele ga sebeso sa gago mo ntlong eno ka nako ya fa a sa ntse a le mo maikanong* ao,+ 23 foo e kete o ka utlwa o le kwa magodimong mme o dire sengwe o bo o atlhola batlhanka ba gago ka go otlhaela motho yo o bosula se a se dirileng,+ le ka go bolela gore yo o siameng ga a na molato* o bo o mo duela go ya ka tshiamo+ ya gagwe.

24 “Fa batho ba gago ba Iseraele ba fenngwa ke mmaba ka gonne ba ne ba ntse ba go leofela,+ mme ba boela kwa go wena, ba galaletsa leina la gago,+ ba rapela+ ba bo ba kopa gore o ba amogele mo ntlong eno,+ 25 foo e kete o ka utlwa o le kwa magodimong+ mme o itshwarele boleo jwa batho ba gago ba Iseraele mme o ba busetse mo lefatsheng le o neng wa le naya bone le borraabonemogolo.+

26 “Fa magodimo a tswetswe mme go se na pula+ epe ka gonne ba ne ba nna ba go leofela,+ mme ba rapela mo lefelong leno, ba galaletsa leina la gago ba bo ba boa mo boleong jwa bone ka gonne o ba kokobeditse,*+ 27 foo e kete o ka utlwa o le kwa magodimong mme wa itshwarela boleo jwa batlhanka ba gago, jwa batho ba gago ba Iseraele, ka gonne o tla ba ruta tsela e e molemo e ba tshwanetseng go tsamaya+ mo go yone; mme o nese pula+ mo lefatsheng la gago le o le neileng batho ba gago gore e nne boswa jwa bone.

28 “Fa go ka nna le leuba mo lefatsheng+ kgotsa bolwetse jwa leroborobo,+ mogote o o babolang, mouta,+ lesogodi la tsie kgotsa tsie+ e e senyang* kgotsa fa baba ba bone ba ba tlhasela mo motseng ope fela wa lefatshe leo*+ kgotsa fa go nna le mofuta ope fela wa petso kgotsa bolwetse,+ 29 thapelo+ epe fela, kopo epe fela ya go bona kamogelo+ e e ka nnang ya dirwa ke motho ope kgotsa ke batho botlhe ba gago ba Iseraele (ka gonne mongwe le mongwe o itse petso ya gagwe le botlhoko jwa gagwe)+ fa ba otlololela diatla tsa bone ntlheng ya ntlo+ eno, 30 foo e kete o ka utlwa o le kwa magodimong, e leng lefelo le o nnang kwa go lone,+ mme e kete o ka itshwarela;+ mme o duele mongwe le mongwe go ya ka ditsela tsotlhe tsa gagwe, ka gonne o itse pelo ya gagwe (wena o le esi o itse pelo ya motho mongwe le mongwe ka botlalo),+ 31 gore ba go boife ka go tsamaya mo ditseleng tsa gago malatsi otlhe fa ba ntse ba tshela mo lefatsheng le o le neileng borraaronamogolo.

32 “Gape, fa motswakwa yo e seng mongwe wa batho ba gago ba Iseraele e bile a tswa kwa lefatsheng le le kgakala ka ntlha ya leina la gago le legolo*+ le ka seatla sa gago se se nonofileng le ka letsogo la gago le le otlolotsweng, mme a tla a bo a rapela a lebile mo ntlong eno,+ 33 foo e kete o ka reetsa o le kwa magodimong, e leng lefelo le o nnang kwa go lone, mme o dire sotlhe se motswakwa a se kopang mo go wena, gore ditšhaba tsotlhe tsa lefatshe di tle di itse leina la gago+ mme di go boife fela jaaka batho ba gago ba Iseraele ba dira, le gore ba tle ba itse gore leina la gago le bidiwa mo ntlong eno e ke e agileng.

34 “Fa batho ba gago ba ya go lwa le baba ba bone ka tsela e o ba romang ka yone,+ mme ba go rapela+ ba lebile ntlheng ya motse ono o o o tlhophileng le ntlheng ya ntlo eno e ke e agetseng leina la gago,+ 35 foo o utlwe thapelo ya bone o le kwa magodimong le kopo ya bone ya gore o ba amogele mme o ba lwele.+

36 “Fa ba go leofela (ka gonne ga go na motho ope yo o sa leofeng),+ mme o ba galefela thata o bo o ba tsenya mo seatleng sa mmaba yo o tla ba isang botshwarwa kwa lefatsheng le le kgakala kgotsa le le gaufi,+ 37 mme fa ba itharabologelwa ba le kwa lefatsheng le ba neng ba isitswe botshwarwa kwa go lone, ba bo ba boela kwa go wena mme ba kopa gore o ba amogele ba le kwa lefatsheng le ba leng batshwarwa kwa go lone, ba re, ‘Re leofile e bile re dirile phoso; re dirile bosula,’+ 38 mme fa ba boela kwa go wena ka pelo+ ya bone yotlhe le ka moya wa bone otlhe ba le kwa lefatsheng le ba isitsweng botshwarwa+ kwa go lone, mme ba go rapela ba lebile ntlheng ya lefatshe la bone le o neng wa le naya borraabonemogolo le kwa motseng o o o tlhophileng+ le kwa ntlong e ke e agetseng leina la gago, 39 foo o ntse o le kwa magodimong, e leng lefelo le o nnang kwa go lone, o utlwe thapelo ya bone le kopo ya bone ya gore o ba utlwele botlhoko, mme o tlhomamise gore ba direlwa tshiamiso+ o bo o itshwarele batho ba gago ba ba go leofetseng.

40 “Jaanong wena Modimo wa me, tsweetswee, e kete matlho a gago a ka bulega le ditsebe tsa gago di ka reetsa thapelo e e rapelwang mo* lefelong leno.+ 41 Mme jaanong Jehofa Modimo, lefelo leno ke la gago la boikhutso,+ wena le Letlole le le bontshang maatla a gago. A baperesiti ba gago, tlhe Jehofa Modimo, ba apare poloko, mme a batho ba gago ba ba ikanyegang ba itumele ka ntlha ya molemo wa gago.+ 42 Ao tlhe Jehofa Modimo, o se ka wa ntatlha,* ke motlodiwa wa gago.+ E kete o ka gakologelwa lorato lwa gago lo lo sa kgaotseng lo o lo bontshitseng motlhanka wa gago e bong Dafide.”+