Dikgosi wa Ntlha

12 Rehoboame o ne a ya kwa Shekema, ka gonne Baiseraele botlhe ba ne ba ile kwa Shekema+ gore ba mo dire kgosi.+ 2 Mme Jeroboame morwa Nebate o ne a utlwela ka seo (o ne a sa ntse a le kwa Egepeto ka gonne o ne a tshabile Kgosi Solomone mme o ne a nna kwa Egepeto).+ 3 Go tswa foo, ba ne ba laela gore a ye go bidiwa. Morago ga moo, Jeroboame le phuthego yotlhe ya Iseraele ba ne ba tla kwa go Rehoboame mme ba mo raya ba re: 4 “Rrago o ne a dira gore jokwe ya rona e nne boima.+ Mme fa o ka dira gore tirelo e e thata ya ga rrago e nne motlhofo o bo o dira gore jokwe e e boima* e a neng a e beile mo go rona e nne motlhofo, re tla go direla.”

5 Foo o ne a ba raya a re: “Tsamayang malatsi a le mararo; morago ga moo lo boeleng mo go nna.” Ka jalo, batho ba ne ba tsamaya.+ 6 Go tswa foo, Kgosi Rehoboame o ne a buisana le banna ba ba godileng* ba ba neng ba direla rraagwe e bong Solomone fa a ne a sa ntse a tshela, a re: “Lo ka nnaya kgakololo efe gore ke arabe batho bano?” 7 Ba ne ba mo araba jaana: “Fa gompieno o ka nna motlhanka wa batho bano mme wa reetsa se ba se kopang wa bo wa ba araba ka tsela e e molemo, ba tla tswelela e le batlhanka ba gago.”

8 Le fa go ntse jalo, o ne a tlhokomologa kgakololo e banna ba ba godileng* ba neng ba mo e neile, mme o ne a buisana le makawana a a neng a godile le ene, a jaanong e neng e le batlhokomedi ba gagwe.+ 9 O ne a ba botsa a re: “Lo ka nnaya kgakololo efe? Re ka araba jang batho bano ba ba neng ba nthaya ba re, ‘Dira gore jokwe e rrago a e beileng mo go rona e nne motlhofo’?” 10 Makawana a a neng a godile le ene a ne a mo raya a re: “Seno ke se o tla se bolelelang batho bano ba ba neng ba go raya ba re, ‘Rrago o ne a dirile jokwe ya rona boima, mme wena dira gore e nne motlhofo mo go rona’; seno ke se o tla se ba bolelelang, ‘Monwana wa me o monnye o tla nna mokima go feta dinôka tsa ga rre. 11 Rre o ne a lo pega jokwe e e boima, mme nna ke tla oketsa jokwe ya lona. Rre o ne a lo otlhaya ka dime, mme nna ke tla lo otlhaya ka dime tse di nang le mafuto.’”

12 Jeroboame le batho botlhe ba ne ba tla mo go Rehoboame mo letsatsing la boraro, fela jaaka kgosi e ne e ba reile ya re: “Lo boeleng mo go nna mo letsatsing la boraro.”+ 13 Le fa go ntse jalo, kgosi e ne ya araba batho ka bogale, mme e ne ya tlhokomologa kgakololo e banna ba ba godileng* ba neng ba e mo neile. 14 O ne a bua le bone go ya ka kgakololo ya makawana, a re: “Rre o ne a dira jokwe ya lona boima, mme nna ke tla oketsa jokwe ya lona. Rre o ne a lo otlhaya ka dime, mme nna ke tla lo otlhaya ka dime tse di nang le mafuto.” 15 Ka jalo, kgosi e ne ya se ka ya reetsa batho, ka gonne Jehofa ke ene a neng a dirile gore ditiragalo tseno di direge,+ gore go diragale lefoko le Jehofa a neng a le boleletse Jeroboame morwa Nebate a dirisa Ahija+ wa Moshilo.

16 E rile Baiseraele botlhe ba bona gore kgosi e ne e gana go ba reetsa, batho ba ne ba araba kgosi ba re: “Re na le kabelo efe mo go Dafide? Ga re na boswa bope mo go morwa Jese. Yang kwa medimong ya lona, lona Baiseraele. Jaanong lona ditlogolwana tsa ga Dafide, itlhokomeleng!” Ka jalo, Baiseraele ba ne ba boela kwa magaeng* a bone.+ 17 Le fa go ntse jalo, Rehoboame o ne a tswelela a busa Baiseraele ba ba neng ba nna mo metseng ya Juda.+

18 Go tswa foo, Kgosi Rehoboame o ne a roma Adorame,+ yo o neng a okametse ba ba neng ba tlhophilwe gore ba berekele kgosi, mme Baiseraele botlhe ba ne ba mo kgobotletsa ka maje go fitlha a swa. Kgosi Rehoboame o ne a kgona go palama kara ya gagwe gore a tshabele kwa Jerusalema.+ 19 Baiseraele ba ne ba nna ba tlhanogela+ ditlogolwana tsa ga Dafide go tla go fitlha mo letsatsing leno.

20 Fela fa Baiseraele botlhe ba utlwa gore Jeroboame o ne a boile, ba ne ba phutha batho, go tswa foo ba ne ba laela gore a ye go bidiwa mme ba mo dira kgosi ya Iseraele yotlhe.+ Ga go na batho bape ba ba neng ba ema mo letlhakoreng la ditlogolwana tsa ga Dafide kwantle ga lotso lwa ga Juda.+

21 E rile Rehoboame a goroga mo Jerusalema, ka yone nako eo o ne a phutha batho botlhe ba Juda le ba lotso lwa ga Benjamine, batlhabani ba ba katisitsweng* ba le 180 000, gore ba ye go tlhabana le batho ba Iseraele e le gore ba tle ba busetse bogosi mo go Rehoboame morwa Solomone.+ 22 Foo Modimo wa boammaaruri o ne a raya Shemaia+ monna wa Modimo wa boammaaruri, a re: 23 “Raya Rehoboame morwa Solomone kgosi ya Juda le batho botlhe ba Juda le ba Benjamine le batho ba bangwe botlhe o re, 24 ‘Seno ke se Jehofa a se buang: “Ga lo a tshwanela go ya go tlhabana le bomorwarraalona ba Baiseraele. A mongwe le mongwe wa lona a boele kwa ntlong ya gagwe, ka gonne ke dirile gore seno se direge.”’”+ Ka jalo, ba ne ba ikobela lefoko la ga Jehofa mme ba boela gae, fela jaaka Jehofa a ne a ba boleletse.

25 Morago ga moo, Jeroboame o ne a aga* Shekema+ mo kgaolong e e dithaba ya Eferaime mme a nna koo. Fa a tswa koo, o ne a tsamaya mme a ya go aga* Penuele.+ 26 Jeroboame o ne a bua jaana mo pelong: “Jaanong bogosi bo tla boela kwa lelapeng la ga Dafide.+ 27 Fa batho bano ba tswelela ba ya go ntsha ditlhabelo kwa ntlong ya ga Jehofa kwa Jerusalema,+ pelo ya batho bano le yone e tla boela kwa moreneng wa bone, e bong Kgosi Rehoboame wa Juda. Ruri ba tla mpolaya ba bo ba boela kwa go Kgosi Rehoboame wa Juda.” 28 Fa Jeroboame a sena go batla kgakololo, o ne a dira dinamane+ tse pedi tsa gauta mme a raya batho a re: “Tota go ya kwa Jerusalema go a lo ketefalela. Modimo wa lona ke yono, lona Baiseraele, yo o lo ntshitseng kwa lefatsheng la Egepeto.”+ 29 Go tswa foo, o ne a baya namane e nngwe mo Bethele,+ mme e nngwe a e baya kwa Dana.+ 30 Seno se ne sa dira gore ba leofe,+ mme batho ba ne ba tsamaya go ya go fitlha kwa Dana ba ya go obamela namane e nngwe e e neng e le koo.

31 O ne a aga le matlo a kobamelo kwa mafelong a a kwa godimo a a boitshepo a bo a tlhoma baperesiti go tswa mo bathong ba e neng e se Balefi.+ 32 Gape Jeroboame o ne a tlhoma moletlo mo kgweding ya borobedi, mo letsatsing la bo15 la kgwedi, o o tshwanang le moletlo wa kwa Juda.+ O ne a ntshetsa dinamane tse a neng a di dirile setlhabelo mo sebesong se a neng a se dirile mo Bethele,+ mme o ne a tlhoma baperesiti gore ba direle mo mafelong ao a a kwa godimo a a neng a a dirile kwa Bethele. 33 Mme o ne a simolola go ntsha ditlhabelo mo sebesong se a neng a se dirile kwa Bethele mo letsatsing la bo15 mo kgweding ya borobedi, mo kgweding e a neng a e itlhophetse; mme o ne a tlhomela batho ba Iseraele moletlo a bo a tlhatloga a ya kwa sebesong gore a ntshe ditlhabelo mo go sone a bo a dira gore di kuise mosi.