Samuele wa Bobedi

14 Jaanong Joabe morwa Seruia+ o ne a lemoga gore pelo ya kgosi e ne e tlhologeletswe Abesalome.+ 2 Ka jalo, Joabe o ne a roma mongwe kwa Tekoa+ gore a ye go bitsa mosadi yo o botlhajana koo mme o ne a mo raya a re: “Tsweetswee, itire e kete o hutsafatse, o apare diaparo tsa go hutsafala, mme o se ka wa itshasa leokwane.+ O itshware jaaka mosadi yo o ntseng a hutsafetse ka lobaka lo loleele ka ntlha ya mongwe yo o suleng. 3 Go tswa foo, o tsene kwa kgosing mme o bue le yone ka tsela eno.” Foo Joabe o ne a mmolelela se a tshwanetseng go se bua.*

4 Mosadi wa Motekoa o ne a ya kwa kgosing mme a wela fa fatshe ka sefatlhego a bo a ikoba mme a re: “Nthuse, tlhe kgosi!” 5 Kgosi e ne ya mo araba ya re: “Bothata ke eng?” Foo o ne a re: “Ruri ke motlholagadi; monna wa me o sule. 6 Mme nna, lelata la gago, ke ne ke na le barwa ba le babedi, mme boobabedi ba ne ba lwa kwa nageng. Go ne go se na ope yo o ka ba kgaoganyang, mme yo mongwe o ne a itaya yo mongwe a mo latlhela fa fatshe a bo a mmolaya. 7 Jaanong lelapa lotlhe le nkemeletse, nna lelata la gago, mme ba re, ‘Tlisa yo o bolaileng morwarraagwe, gore re mmolaye ka ntlha ya botshelo jwa ga morwarraagwe yo a mmolaileng,+ tota le fa seno se raya gore moruaboswa o tla nyelediwa!’ Ba tla tima legala la bofelo le le tukang le ke setseng ka lone* mme ga ba kitla ba tlogelela monna wa me leina kgotsa mofalodi* mo lefatsheng.”

8 Go tswa foo, kgosi e ne ya raya mosadi yoo ya re: “Ya kwa legaeng la gago, mme ke tla rarabolola kgang eno.” 9 Foo mosadi wa Motekoa o ne a raya kgosi a re: “Ao tlhe morena wa me kgosi, a molato o nne mo go nna le mo lelapeng la ga rre, fa kgosi le setulo sa yone sa bogosi ba se na molato.” 10 Morago ga moo, kgosi e ne ya re: “Fa mongwe a ka tswelela a bua le wena, o mo tlise kwa go nna, mme ga a kitla a go tshwenya gape.” 11 Le fa go ntse jalo, mosadi yoo o ne a re: “Tsweetswee, mma kgosi e gakologelwe Jehofa, Modimo wa yone, gore mmusolosi wa madi+ a se ka a tlisa tshenyo mme a nyeletsa morwaake.” Foo kgosi e ne ya re: “Ke ikana ka Jehofa Modimo yo o tshelang,+ ga go na le fa e le moriri o le mongwe wa ga morwao o o tla welang fa fatshe.” 12 Jaanong mosadi yoo o ne a re: “Tsweetswee, mma ke bue le wena morena wa me kgosi.” Ka jalo, o ne a re: “Bua!”

13 Mosadi yoo o ne a re: “Goreng jaanong o ile wa akanya go dira batho ba Modimo selo se se ntseng jaana?+ Fa kgosi e bua ka tsela eno, go raya gore e molato, ka gonne kgosi ga e buse morwa wa yone yo o lelekilweng.+ 14 Ruri re tla swa re bo re nna jaaka metsi a a tshololetsweng fa fatshe, a a ka se kang a gelelwa gape. Mme Modimo ga a ka ke a tsaya botshelo bope, e bile o sekaseka mabaka a gore ke ka ntlha yang fa yo o lelekilweng a sa tshwanela go lelekelwa ruri mo go ene. 15 Ke tlile fano go tla go bolelela morena wa me kgosi seno, ka gonne batho ba ne ba dira gore ke boife. Ka jalo, nna lelata la gago ke ne ka re, ‘Tsweetswee, mma ke bue le kgosi. Gongwe kgosi e tla dira sengwe ka kopo ya me. 16 E kete kgosi e ka reetsa ya bo ya golola lelata la yone mo seatleng sa monna yo o batlang go nyeletsa nna le morwaake yo o esi, a re ntsha mo bosweng jo Modimo a re bo neileng.’+ 17 Foo lelata la gago le ne la re, ‘Tsweetswee, e kete lefoko la morena wa me kgosi le ka dira gore ke imologe,’ ka gonne morena wa me kgosi o tshwana le moengele wa Modimo wa boammaaruri ka go farologanya se se molemo mo go se se bosula. E kete Jehofa, Modimo wa gago a ka nna le wena.”

18 Jaanong kgosi e ne ya araba mosadi yoo ya re: “Tsweetswee, o se ka wa mphitlhela sepe se ke se go botsang.” Mosadi yoo o ne a araba a re: “Tsweetswee, a morena wa me kgosi a bue.” 19 Foo kgosi e ne ya mmotsa jaana: “A Joabe ke ene a rileng o dire seno sotlhe?”+ Mosadi o ne a araba a re: “Ke ikana ka wena morena wa me kgosi, go ntse fela jaaka* o bua, ka gonne motlhanka wa gago Joabe ke ene a neng a mpolelela se ke tshwanetseng go se bua.* 20 Motlhanka wa gago Joabe o dirile seno gore a fetole tsela e dilo di lebegang ka yone, le fa go ntse jalo, morena wa me o na le botlhale jo bo tshwanang le jwa moengele wa Modimo wa boammaaruri e bile o itse sotlhe se se diregang mo lefatsheng.”

21 Morago ga moo, kgosi e ne ya raya Joabe ya re: “Go siame, ke tla dira jalo.+ Tsamaya mme o ye go tsaya lekawana Abesalome.”+ 22 Foo Joabe o ne a oba sefatlhego a bo a ikobela fa fatshe a bo a baka kgosi. Joabe o ne a re: “Gompieno nna motlhanka wa gago ke a itse gore o nkamogetse, wena morena wa me kgosi, ka gonne o dirile sengwe ka kopo ya me.” 23 Go tswa foo, Joabe o ne a tsamaya a ya kwa Geshure+ mme a tlisa Abesalome mo Jerusalema. 24 Le fa go ntse jalo, kgosi e ne ya re: “A a ye kwa ntlong ya gagwe, mme ga a kitla a bona sefatlhego sa me.” Ka jalo, Abesalome o ne a ya kwa ntlong ya gagwe, mme ga a ka a bona sefatlhego sa kgosi.

25 Jaanong mo Iseraele yotlhe, go ne go se na monna ope yo o neng a bakwa thata ka ntlha ya bontle jwa gagwe jaaka Abesalome. Go tloga kwa patong ya lonao lwa gagwe go ya kwa phogong ya tlhogo ya gagwe, go ne go se na bogole bope mo go ene. 26 O ne a tshwanelwa ke go beola meriri ya tlhogo ya gagwe kwa bofelong jwa ngwaga mongwe le mongwe ka gonne e ne e mo imela thata, mme moriri wa gagwe o ne o le bokete jwa dishekele di le 200* go ya ka selekanyabokete sa leje sa segosi.* 27 Abesalome o ne a tsholelwa barwa ba le bararo+ le morwadi a le mongwe, yo leina la gagwe e neng e le Tamare. E ne e le mosadi yo montle thata.

28 Mme Abesalome o ne a tswelela a nna mo Jerusalema dingwaga di le pedi tse di tletseng, le fa go ntse jalo ga a ka a bona sefatlhego sa kgosi.+ 29 Ka jalo, Abesalome o ne a bitsa Joabe gore a mo rome kwa kgosing, mme Joabe o ne a se ka a tla kwa go ene. Foo o ne a roma mongwe gape lekgetlo la bobedi gore a ye go mmitsa, mme le mo lekgetlong leno o ne a gana go tla. 30 La bofelo o ne a raya batlhanka ba gagwe a re: “Tshimo ya ga Joabe e bapile le ya me, mme o na le barele* koo. Tsamayang mme lo ye go e tshuba ka molelo.” Ka jalo, batlhanka ba ga Abesalome ba ne ba tshuba tshimo eo ka molelo. 31 Foo Joabe o ne a tsamaya mme a ya kwa ntlong ya ga Abesalome a bo a mo raya a re: “Ke ka ntlha yang fa batlhanka ba gago ba tshubile tshimo ya me ka molelo?” 32 Abesalome o ne a araba Joabe a re: “Ke ne ka romela molaetsa ono kwa go wena ke re, ‘Tla kwano mme ke go rome kwa kgosing gore o mmotse jaana: “Ke tswetse eng kwa Geshure?+ Go ka bo go nnile botoka mo go nna gore ke nne koo. Jaanong mma ke bone sefatlhego sa kgosi, mme fa go na le molato mo go nna, foo kgosi e mpolaye.”’”

33 Ka jalo, Joabe o ne a ya kwa kgosing mme a e bolelela. Foo e ne ya bitsa Abesalome, yo a neng a tsena kwa kgosing a bo a obama fa pele ga yone, a wela fa fatshe ka sefatlhego fa pele ga kgosi. Go tswa foo, kgosi e ne ya suna Abesalome.+