Samuele wa Bobedi

16 Fa Dafide a sena go feta setlhoa go se kae,+ motlhokomedi wa ga Mefiboshethe+ e bong Siba,+ o ne a le foo a tlile go mo kgatlhantsha a na le ditonki di le pedi di belesitswe disale mme mo godimo ga tsone go ne go na le dinkgwe di le 200, dikuku tse di dirilweng ka morara* o o swabisitsweng di le 100, dikuku tsa maungo* di le 100 le nkgo e kgolo ya beine.+ 2 Foo kgosi e ne ya raya Siba ya re: “Goreng o tlisitse dilo tseno fano?” Siba o ne a araba a re: “Ditonki ke tsa ba lelapa la kgosi gore ba di palame, senkgwe le maungo ke tsa makawana gore a je, mme beine ke ya ba ba tla lapang mo nageng gore ba nwe.”+ 3 Jaanong kgosi e ne ya re: “Mme morwa* mong wa gago o kae?”+ Siba o ne a raya kgosi a re: “O setse kwa Jerusalema, ka gonne o ne a re, ‘Gompieno Baiseraele ba tla busetsa puso ya segosi ya ga rre mo go nna.’”+ 4 Foo kgosi e ne ya raya Siba ya re: “Sengwe le sengwe sa ga Mefiboshethe ke sa gago.”+ Siba o ne a araba a re: “Ke ikoba fa pele ga gago. E kete nka bona kamogelo mo matlhong a gago, morena wa me kgosi.”+

5 Fa Kgosi Dafide a goroga kwa Bahurime, monna mongwe wa losika lwa ga Saulo yo o bidiwang Shimei,+ morwa Gera, o ne a tswa a tla kwa go ene a ntse a mo hutsa.+ 6 O ne a konopa Dafide le batlhanka botlhe ba ga Kgosi Dafide ka maje, mmogo le batho botlhe le banna ba ba maatla ba ba neng ba le ka fa mojeng wa gagwe le ka fa molemeng wa gagwe. 7 Shimei o ne a bua jaana fa a ntse a mo hutsa: “Tswa, tswa wena monna yo o nang le molato wa madi! Wena monna yo o se nang mosola! 8 Jehofa o buseditse molato otlhe wa madi a lelapa la ga Saulo mo go wena, yo o neng wa busa o le kgosi mo boemong jwa gagwe, le fa go ntse jalo Jehofa o tsenya bogosi mo seatleng sa ga Abesalome morwao. Jaanong o tletswe ke masetlapelo ka gonne o monna yo o nang le molato wa madi!”+

9 Go tswa foo, Abishai morwa Seruia+ o ne a raya kgosi a re: “Goreng ntša eno e e suleng+ e tshwanetse go hutsa morena wa me kgosi?+ Tsweetswee, mma ke ye kwa go ene, mme ke mo kgaole tlhogo.”+ 10 Mme kgosi e ne ya re: “Goreng lo itsenya mo kgannyeng eno, lona bomorwa Seruia?+ Mo tlogeleng a mphutse,+ ka gonne Jehofa o mo reile a re,+ ‘Hutsa Dafide!’ Ka jalo, ke mang yo o ka reng, ‘Ke ka ntlha yang fa o dira seno?’” 11 Go tswa foo, Dafide o ne a raya Abishai le batlhanka botlhe ba gagwe a re: “Bonang, morwaake yo o duleng mo mmeleng wa me, o batla go mpolaya,+ mme jaanong go tweng ka Mobenjamine!+ Mo tlogeleng a mphutse, ka gonne Jehofa o mmoleletse gore a dire jalo! 12 Gongwe Jehofa o tla bona pogisego ya me,+ mme Jehofa o tla mpusetsa molemo mo boemong jwa diphutso tse ke di boleletsweng mo letsatsing leno.”+ 13 Foo Dafide le banna ba gagwe ba ne ba tswelela ba tsamaya mo tseleng fa Shimei ene a ntse a tsamaya fa thoko ga thaba a lebagane le ene, a mo hutsa,+ a mo konopa ka maje e bile a mo gasa ka lorole lo lontsi.

14 La bofelo kgosi le batho botlhe ba ba nang le yone ba ne ba goroga ba lapile kwa lefelong le ba neng ba ya kwa go lone, mme ba ne ba ikhutsa.

15 Mo nakong eo, Abesalome le banna botlhe ba Iseraele ba ne ba goroga mo Jerusalema, mme Ahitofele+ o ne a na le ene. 16 Fa Hushai+ wa Moareka,+ tsala* ya ga Dafide, a tsena kwa go Abesalome, Hushai o ne a raya Abesalome a re: “A kgosi e tshele lobaka lo loleele!+ A kgosi e tshele lobaka lo loleele!” 17 Foo Abesalome o ne a raya Hushai a re: “A lono ke lorato lo lo sa kgaotseng lo o lo bontshang tsala ya gago? Ke ka ntlha yang fa o sa tsamaya le tsala ya gago?” 18 Ka jalo, Hushai o ne a raya Abesalome a re: “Nnyaa, ke ka fa letlhakoreng la motho yo o tlhophilweng ke Jehofa, yo o tlhophilweng ke batho bano le ke banna botlhe ba Iseraele. Ke ene yo ke tla nnang le ene. 19 Mme ke bua gape ke re, Ke tshwanetse go direla mang? A ga ke a tshwanela go direla morwawe? Fela jaaka ke ne ke direla rrago, ke tla go direla.”+

20 Go tswa foo, Abesalome o ne a raya Ahitofele a re: “Nkgakololeng.+ Re dire eng?” 21 Ahitofele o ne a raya Abesalome a re: “Tlhakanela dikobo le bagadingwana ba ga rrago,+ ba a ba tlogetseng gore ba tlhokomele ntlo.*+ Foo Iseraele yotlhe e tla utlwa gore o itirile sebodu se se nkgelang rrago, mme botlhe ba ba go emang nôkeng ba tla nonofa.” 22 Ka jalo, ba ne ba tlhomela Abesalome tente mo borulelong,+ mme Abesalome o ne a tlhakanela dikobo le bagadingwana ba ga rraagwe+ fa pele ga matlho a Iseraele yotlhe.+

23 Mo metlheng eo, kgakololo ya ga Ahitofele+ e ne e tsewa jaaka* lefoko la Modimo wa boammaaruri. Ke kafa Dafide mmogo le Abesalome ba neng ba tseela kgakololo yotlhe ya ga Ahitofele kwa godimo ka teng.