Bakorintha wa Bobedi

13 Ke lekgetlo la boraro ke ipaakanyetsa go tla kwa go lona. “Kgang nngwe le nngwe e tshwanetse go tlhomamisiwa gore e boammaaruri ka bosupi jwa batho ba le babedi kgotsa ba le bararo.”+ 2 Le fa ke se na le lona gone jaanong, go ntse jaaka e kete ke na le lona gape. Ke gone ka moo ke tlhagisang go sa gale ba ba leofileng mo nakong e e fetileng le lona lotlhe ke re: Fa go ka direga gore ke tle gape, ga nkitla ke tlogela batho bape ba ba dirang dilo tse di bosula ba sa kgalemelwa. 3 Fa ke dira jalo, ke tla bo ke lo bontsha gore Keresete o bua a dirisa nna. Mme Keresete ga a bokoa mo go lona, mme o bontsha maatla a gagwe a magolo. 4 Eleruri o ne a bolaelwa mo koteng fa a ne a le bokoa, mme gone o a tshela ka ntlha ya maatla a Modimo.+ Ke boammaaruri gore le rona re bokoa fela jaaka a ne a le bokoa, le fa go ntse jalo, re tla tshela le ene+ ka ntlha ya maatla a Modimo a a mo go lona.+

5 Nnang lo itlhatlhobe gore a lo mo tumelong; nnang lo itshupe gore lo batho ba ba ntseng jang.+ Kgotsa a ga lo itse gore Jesu Keresete o seoposengwe le lona? Le fa go ntse jalo, Keresete o ne a se kitla a nna seoposengwe le lona fa Modimo a sa lo amogele. 6 Ruri ke solofela gore lo a itse gore Modimo o a re amogela.

7 Jaanong re rapela Modimo gore lo se ka lwa dira sepe se se phoso. Maikaelelo a rona ga se gore re amogelwe ke batho, go na le moo, re batla gore lo dire se se siameng tota le fa batho ba sa re amogele. 8 Gonne ga re ka ke ra dira sepe se se ganetsanang le boammaaruri, fa e se fela go se direla boammaaruri. 9 Nako epe fela fa re le bokoa mme lona lo le maatla, re a itumela. Mme re rapelela gore lo dire diphetogo tse di tlhokegang. 10 Ke gone ka moo ke kwalang dilo tseno, gore fa ke tla, ke se ka ka galefa fa ke dirisa taolo e Morena a mphileng yone,+ gore ke nonotshe tumelo ya lona, e seng go e koafatsa.

11 Kwa bokhutlong bakaulengwe, tswelelang lo itumetse, lo dira diphetogo tse di tlhokegang, lo gomotsega,+ lo dumalana,+ lo tshela ka kagiso;+ mme Modimo wa lorato le wa kagiso+ o tla nna le lona. 12 Dumedisanang ka lorato.* 13 Botlhe ba ba boitshepo ba a lo dumedisa.

14 A bopelonomi jo bogolo* jwa Morena Jesu Keresete, lorato lwa Modimo le masego a moya o o boitshepo di nne le lona lotlhe.