Daniele

6 Dario o ne a bona go le molemo gore a tlhome babusi ba dikgaolo ba le 120 gore ba okamele bogosi jwa gagwe jotlhe.+ 2 Ba ne ba okametswe ke badiredibagolo ba le bararo, mme Daniele e ne e le mongwe wa bone;+ babusi ba dikgaolo+ ba ne ba tle ba ise pego kwa go bone gore kgosi e se ka ya latlhegelwa. 3 Jaanong Daniele o ne a tlhomologile go gaisa badiredibagolo ba bangwe le babusi ba dikgaolo, ka gonne go ne go na le moya o o sa tlwaelegang mo go ene,+ mme kgosi e ne e ikaeletse go mo tlhatlosa maemo gore a okamele bogosi jotlhe.

4 Ka nako eo, badiredibagolo le babusi ba dikgaolo ba ne ba batla sengwe se ba ka se dirisang go latofatsa Daniele ka dikgang tsa puso,* mme ba ne ba sa kgone go bona lebaka lepe kgotsa sepe se se bosula, ka gonne o ne a ikanyega, a dira sengwe le sengwe se a neng a laelwa go se dira e bile ga go a ka ga fitlhelwa sepe se se bosula mo go ene. 5 Foo banna bano ba ne ba re: “Ga re kitla re bona sepe se re ka latofatsang Daniele ka sone, ntle le fa re ka mo latofatsa ka sengwe se se amanang le tsela e a obamelang Modimo wa gagwe ka yone.”+

6 Ka jalo, badiredibagolo bano le babusi ba dikgaolo ba ne ba ya kwa kgosing ba le setlhopha, mme ba mo raya ba re: “Wena kgosi Dario, e kete o ka tshela ka bosakhutleng. 7 Badiredi botlhe ba puso, baokamedi, babusi ba dikgaolo, badiredibagolo ba puso le balaodi, ba dumalane gore go tlhomiwe molao wa segosi le gore go dirwe thibelo ya gore mo malatsing a le 30 ope fela yo o rapelang modimo mongwe kgotsa motho mongwe ntle le wena kgosi, o tshwanetse go latlhelwa mo khuting e e nang le ditau.+ 8 Jaanong wena kgosi, e kete o ka tlhoma molao wa bo wa o saena,+ gore o se ka wa fetolwa go dumalana le molao wa Bameda le Baperesia o o ka se kang wa dirololwa.”+

9 Ka jalo, Kgosi Dario o ne a saena molao oo le thibelo eo.

10 Le fa go ntse jalo, fela fa Daniele a sena go itse gore molao o ne o saenilwe, o ne a ya kwa ntlong ya gagwe, e difensetere tsa ntlwana ya yone e e kwa borulelong di neng di bulegetse kwa ntlheng ya Jerusalema.+ Mme o ne a khubama gararo ka letsatsi a rapela e bile a baka Modimo wa gagwe, fela jaaka a ne a dira ka metlha pele ga seno. 11 Ka yone nako eo, banna bao ba ne ba itatlhela* mo ntlong ya ga Daniele mme ba mo fitlhela a rapela e bile a kopa gore Modimo wa gagwe a mo utlwele botlhoko.

12 Ka jalo, ba ne ba ya kwa kgosing ba bo ba e gopotsa jaana ka thibelo ya segosi e e dirilweng: “A ga o a saena thibelo e e tlhalosang gore mo malatsing a le 30 ope fela yo o rapelang modimo mongwe kgotsa motho mongwe ntle le wena kgosi, o tshwanetse go latlhelwa mo khuting e e nang le ditau?” Kgosi e ne ya ba araba ya re: “Kgang eno e boammaaruri go dumalana le molao wa Bameda le Baperesia o o ka se kang wa fetolwa.”+ 13 Ka yone nako eo ba ne ba raya kgosi ba re: “Daniele, mongwe wa batshwarwa ba ba tswang kwa Juda,+ ga a go tlotla wena kgosi, e bile ga a ikobela thibelo e o e saenneng, le fa go ntse jalo, o rapela gararo ka letsatsi.”+ 14 Fela fa kgosi e sena go utlwa seno, e ne ya tshwenyega thata mme ya leka go akanya kafa e ka gololang Daniele ka gone; e ne ya dira sotlhe se e ka se kgonang go fitlha letsatsi le phirima gore e mo golole. 15 La bofelo banna bao ba ne ba ya kwa kgosing e le setlhopha, mme ba ne ba raya kgosi ba re: “Gakologelwa wena kgosi, gore molao wa Bameda le Baperesia ke gore thibelo epe kgotsa molao ope o kgosi e o tlhomang ga o a tshwanela go fetolwa.”+

16 Ka jalo, kgosi e ne ya ntsha taelo ya gore ba tlise Daniele, mme ba ne ba mo tlisa ba bo ba mo latlhela mo khuting e e nang le ditau.+ Kgosi e ne ya raya Daniele ya re: “Modimo wa gago yo o nnang o mo direla o tla go golola.” 17 Go tswa foo, go ne ga tlisiwa leje le bo le bewa mo kgorong* ya khuti eo, mme kgosi e ne ya le tshwaya ka palamonwana ya yone e e tshwayang le ka palamonwana e e tshwayang ya batlotlegi ba yone, gore go se ka ga fetolwa sepe mo kgannyeng ya ga Daniele.

18 Morago ga moo, kgosi e ne ya ya kwa ntlong ya yone ya segosi. E ne ya fetsa bosigo jotlhe e itima dijo, e bile e gana mofuta ope fela wa boitlosobodutu,* mme e ne ya tlhorega boroko.* 19 Fa lesedi la moso le tlhaga, kgosi e ne ya tsoga e bo e itlhaganelela kwa khuting e e nang le ditau. 20 Fa e ntse e atamela khuti eo, e ne ya goela kwa go Daniele ka lentswe le le hutsafetseng. Kgosi e ne ya botsa Daniele jaana: “Daniele, wena motlhanka wa Modimo yo o tshelang, a Modimo wa gago yo o nnang o mo direla o kgonne go go golola mo ditaung?” 21 Ka yone nako eo, Daniele o ne a raya kgosi a re: “Wena kgosi, e kete o ka tshela ka bosakhutleng. 22 Modimo wa me o ne a romela moengele wa gagwe a bo a tswala molomo wa ditau,+ mme ga di a mpolaya,+ ka gonne o ne a bona gore ga ke na molato; e bile ga ke a go direla sepe se se phoso wena kgosi.”

23 Kgosi e ne e itumetse thata, mme e ne ya laela gore Daniele a ntshiwe mo khuting. Fa Daniele a ntshiwa mo khuting eo, o ne a sa gobala gotlhelele, ka gonne o ne a ikantse Modimo wa gagwe.+

24 Go tswa foo, kgosi e ne ya ntsha taelo ya gore banna ba ba neng ba latofaditse Daniele* ba tlisiwe, mme ba ne ba tlisiwa ba bo ba latlhelwa mo khuting e e nang le ditau, mmogo le bomorwaabone le basadi ba bone. Ditau di ne tsa ba tlhasela mme tsa robaganya marapo otlhe a bone pele ga ba ka fitlha kwa tlase mo khuting eo.+

25 Morago ga moo, Kgosi Dario o ne a kwalela ditšhaba tsotlhe, merafe yotlhe le batho botlhe ba ba buang dipuo tse di farologaneng ba ba nnang mo lefatsheng lotlhe a re:+ “E kete lo ka nna le kagiso e ntsi! 26 Ke ntsha taelo ya gore mo kgaolong nngwe le nngwe ya bogosi jwa me, batho ba boife Modimo wa ga Daniele+ ba bo ba mo tlotle, ka gonne ke Modimo yo o tshelang e bile o nnetse ruri. Bogosi jwa gagwe ga bo kitla bo senngwa, le puso* ya gagwe ke ya bosakhutleng.+ 27 O a golola,+ o a boloka e bile o dira ditshupo le dikgakgamatso kwa magodimong le mo lefatsheng,+ ka gonne o golotse Daniele mo maroong a ditau.”

28 Ka jalo, dilo di ne tsa tsamaela Daniele sentle mo bogosing jwa ga Dario+ le mo bogosing jwa ga Kurose wa Moperesia.+