Bathesalonika wa Bobedi

2 Le fa go ntse jalo, bakaulengwe, mo kgannyeng ya go nna gone ga Morena wa rona Jesu Keresete+ le go phuthelwa ga rona kwa go ene,+ re lo kopa 2 gore lo se ka lwa letla ope a fetola tsela e e siameng e lo akanyang ka yone kgotsa a lo tlhakanya tlhogo a lo raya a re letsatsi la ga Jehofa*+ le gorogile. Lo se ka lwa tshoga le fa go twe molaetsa oo o tswa kwa Modimong*+ kgotsa go twe ke lekwalo le re le kwadileng.

3 A ope a se ka a lo faposa ka mokgwa ope, ka gonne letsatsi leo ga le kitla le tla pele ga botlhanogi+ bo nna gone le monna yo o se nang molao a senolwa,+ ene yo o tlileng go senngwa.+ 4 O a ganetsa e bile o ikgodisetsa mongwe le mongwe yo o bidiwang modimo kgotsa sengwe se se obamelwang,* mo e leng gore o nna mo tempeleng ya Modimo gore a bontshe mongwe le mongwe gore ke modimo. 5 A ga lo gakologelwe gore ke ne ke tle ke lo bolelele dilo tseno fa ke ne ke na le lona?

6 Mme jaanong, lo a itse gore ke eng se se thibelang gore a se ka a lemogiwa, gore a tle a senolwe ka nako e e mo tshwanetseng. 7 Ke boammaaruri gore monna yoo yo o se nang molao o dira dilo tse di bosula mo sephiring,+ mme bosula jwa gagwe bo tla tswelela e le sephiri go fitlha yo o mo thibelang a sa tlhole a le gone. 8 Go tswa foo, eleruri o tla senolwa fa Morena Jesu a mo tlosa ka maatla a a tswang mo molomong wa gagwe+ a bo a mo nyeletsa ka nako ya fa go nna gone ga gagwe go itsiwe.+ 9 Mme yo o se nang molao o gone ka maatla a ga Satane.+ Satane o mo naya maatla a go dira ditshupo le dikgakgamatso di le dintsi tsa maaka+ 10 le dilo tsotlhe tse di sa siamang gore a tsietse batho+ ba ba tla otlhaiwang ka go fedisiwa ka gonne ba sa rate boammaaruri jo bo neng bo tla dira gore ba bolokwe. 11 Ka jalo, Modimo o ba letla gore ba tsiediwe ka dithuto tsa maaka mme ba dumele maaka ano,+ 12 gore botlhe ba atlholwe ka gonne ba ne ba se ka ba dumela boammaaruri mme ba itumelela se se sa siamang.

13 Le fa go ntse jalo, ka metlha re patelesega go leboga Modimo ka lona, bakaulengwe ba Jehofa* a ba ratang, ka gonne Modimo o ne a lo tlhopha go tswa kwa tshimologong+ gore lo bolokwe ka go lo dira boitshepo+ ka moya wa gagwe ka gonne lo dumela boammaaruri. 14 O ne a lo biletsa seno a dirisa dikgang tse di molemo tse re di rerang, gore lo galalediwe fela jaaka Morena wa rona Jesu Keresete.+ 15 Ka jalo bakaulengwe, tswelelang lo nonofile mo tumelong+ e bile lo tshwarelele mo dilong tse lo neng lwa di rutiwa,+ e ka tswa e ne e le ka molaetsa o o builweng kgotsa ka lekwalo le re le kwadileng. 16 Mo godimo ga moo, Rara wa rona e bong Modimo o a re rata+ mme e re ka a le pelonomi, ga a kgaotse go re gomotsa le go re naya tsholofelo.+ Re rapelela gore Ene le Morena wa rona Jesu Keresete, 17 ba lo gomotse ba bo ba lo nonotshe gore lo kgone go bua le go dira tiro nngwe le nngwe e e molemo.