Dikgosi wa Ntlha

17 Jaanong Elija*+ wa Motisheba, moagi wa kwa Gileade,+ o ne a raya Ahabe a re: “Ke ikana ka Jehofa, Modimo yo o tshelang wa Iseraele yo ke mo direlang,* mo dingwageng tseno ga go kitla go nna le monyo kgotsa pula, fa e se ka lefoko la me!”+

2 Jehofa o ne a mo raya a re: 3 “Tloga fano, mme o ye kwa ntlheng ya botlhaba o bo o iphitlha kwa Mokgatšheng* wa Kerithe, kwa botlhaba jwa Joredane. 4 O tla nwa metsi mo molapong, mme ke tla laela magakabe gore a go tlamele ka dijo teng koo.”+ 5 Ka yone nako eo, o ne a tsamaya mme a dira go dumalana le se Jehofa a neng a se mmoleletse; o ne a tsamaya mme a nna fa Mokgatšheng* wa Kerithe, kwa botlhaba jwa Joredane. 6 Mme magakabe a ne a mo tlisetsa senkgwe le nama mo mosong le senkgwe le nama maitseboa, mme o ne a nwa metsi mo molapong.+ 7 Le fa go ntse jalo, morago ga malatsi a a rileng, molapo oo o ne wa kgala,+ ka gonne go ne go se na pula mo lefatsheng.

8 Foo Jehofa o ne a mo raya a re: 9 “Tsamaya o ye kwa Sarepate, e e mo kgaolong ya Sidona, mme o nne teng. Ke tla laela motlholagadi teng gore a go tlamele ka dijo.”+ 10 Ka jalo, o ne a tsamaya mme a ya kwa Sarepate. Fa a goroga fa kgorong ya motse, go ne go na le motlholagadi foo a rwalela dikgong. Ka jalo, Elija o ne a mo tlhaeletsa mme a re: “Tsweetswee, ntlela metsinyana ke nwe.”+ 11 Fa a tswa a ya go tla ka one, o ne a mo tlhaeletsa a re: “Tsweetswee, o ntlele le senkgwenyana.” 12 Foo o ne a re: “Ke ikana ka Jehofa Modimo wa gago, Modimo yo o tshelang. Ga ke na senkgwe, ke na le bupi jo bo lekanang seatla mo nkgong e kgolo le leokwane le lennye mo nkgong e nnye.+ Jaanong ke rwalela dikgong di le mmalwanyana, mme ke tla ya gae ke ya go direla nna le morwaake sengwe sa go ja. E tla bo e le tsone dijo tsa rona tsa bofelo, go tswa foo re tla swa.”

13 Go tswa foo, Elija o ne a mo raya a re: “O se ka wa boifa. Tsamaya mme o dire jaaka o buile. Le fa go ntse jalo, o ntirele pele senkgwenyana se se kgolokwe ka bupi jo bo leng teng, mme o se tlise kwa go nna. Morago ga moo, o ka nna wa direla wena le morwao sengwe se lo ka se jang. 14 Gonne seno ke se Jehofa, Modimo wa Iseraele a se buang: ‘Nkgo e kgolo ya bupi ga e kitla e kgaritlhega, le nkgo e nnye ya leokwane ga e kitla e kgaritlhega go fitlha ka letsatsi le Jehofa a nesang pula mo lefatsheng ka lone.’”+ 15 Ka jalo, o ne a tsamaya mme a dira jaaka Elija a buile, mme mosadi yoo mmogo le Elija le ba lelapa la mosadi yoo ba ne ba ja ka malatsi a le mantsi.+ 16 Nkgo e kgolo ya bupi ga e a ka ya kgaritlhega, le nkgo e nnye ya leokwane ga e a ka ya kgaritlhega, go ya ka se Jehofa a neng a se boleletse Elija.

17 Morago ga dilo tseno, morwa wa mosadi yo o neng a mo file boroko o ne a lwala, mme bolwetse jwa gagwe bo ne jwa nna maswe thata mo a neng a swa.+ 18 Foo mosadi yoo o ne a raya Elija a re: “Ke go dirile eng,* wena monna wa Modimo wa boammaaruri? A o tlile go nkgopotsa molato wa me le go bolaya morwaake?”+ 19 Le fa go ntse jalo, Elija o ne a mo raya a re: “Nneye morwao.” Go tswa foo, o ne a mo tsaya mo mabogong a mosadi yoo mme a mo isa kwa ntlwaneng e e kwa borulelong e a neng a nna kwa go yone, mme o ne a mo rapamisa mo bolaong jwa gagwe.+ 20 O ne a goela kwa go Jehofa a re: “Ao tlhe Jehofa, Modimo wa me,+ a o tlisa kutlobotlhoko le mo motlholagading yo ke nnang le ene ka go bolaya morwawe?” 21 Go tswa foo, o ne a namalala mo godimo ga ngwana gararo a bo a goela kwa go Jehofa a re: “Ao tlhe Jehofa, Modimo wa me, tsweetswee, dira gore botshelo jwa ngwana yono bo boele mo go ene.” 22 Jehofa o ne a reetsa kopo ya ga Elija,+ mme botshelo jwa ngwana bo ne jwa boela mo go ene mme o ne a tshela gape.+ 23 Elija o ne a tsaya ngwana mme a mo ntsha kwa ntlwaneng e e kwa borulelong a mo tsenya mo ntlong a bo a mo naya mmaagwe; mme Elija o ne a re: “Bona, morwao o a tshela.”+ 24 Foo mosadi yoo o ne a raya Elija a re: “Jaanong ke a itse gore ruri o monna wa Modimo+ le gore lefoko la ga Jehofa le o le buileng ke boammaaruri.”