Bafilipi

3 La bofelo bakaulengwe ba me, tswelelang lo itumela mo tirelong ya Morena.+ Ga go ntshwenye go bo ke lo kwalela dilo tse ke setseng ke lo kwaletse tsone, ka gonne ke dira jalo gore ke lo sireletse.

2 Itlhokomeleng mo dintšeng; itlhokomeleng mo bathong ba ba dirang dilo tse di bosula; itlhokomeleng mo bathong ba ba batlang gore lo rupe.*+ 3 Gonne ke rona ba tota re rupileng,+ rona ba re direlang Modimo re kaelwa ke moya wa gagwe, rona ba re ikgantshang ka se Keresete Jesu+ a se dirileng e bile re sa ikanye dilo tse batho ba di ikanyang.* 4 Mo bathong botlhe, ke nna ke nang le lebaka la go ikanya dilo tse batho ba di ikanyang.*

Fa e le gore go na le mongwe yo o nang le lebaka la go ikanya dilo tseo, nna ke na le mabaka a a fetang a gagwe: 5 ke rupisitswe ka letsatsi la borobedi,+ ke wa setšhaba sa Iseraele, wa lotso lwa Benjamine, Mohebera yo o tshotsweng ke Bahebera;+ go ya ka Molao wa ga Moshe ke Mofarasai;+ 6 e re ka ke ne ke tlhagafetse thata, ke ne ke bogisa phuthego;+ ke ne ke supa gore ga ke na molato ka go dira dilo tse di siameng tse di mo Molaong wa ga Moshe. 7 Le fa go ntse jalo, dilo tse ke neng ke di tsaya di le botlhokwa, ke di tsaya di se na mosola* ka ntlha ya ga Keresete.+ 8 Tota e bile, ke tsaya dilo tsotlhe di se na mosola fa di bapisiwa le kitso ya maemo a a kwa godimo ya ga Keresete Jesu Morena wa me. Ke tlogetse dilo tsotlhe ka ntlha ya gagwe e bile ke di tsaya e le matlakala, gore Keresete a tle a nkamogele 9 le gore ke nne wa gagwe. Ga ke tsewe ke siame ka gonne ke dirile sengwe se se siameng go ya ka Molao, mme ke ka gonne ke dumela+ mo go Keresete.+ Mme Modimo o ntsaya ke siame ka ntlha ya tumelo.+ 10 Ke eletsa go itse Keresete le maatla a ene yo o mo tsositseng.+ Ke batla go boga jaaka a ne a boga+ e bile ke ikemiseditse go swa jaaka ene,+ 11 ka tsholofelo ya gore ke tla tsosiwa mo tsogong ya ntlha ya baswi.+

12 Ga ke ise ke amogele tuelo eo e bile ga ke ise ke fitlhelele se ke se ikemiseditseng. Le fa go ntse jalo, ke dira ka natla+ gore ke bone se Keresete Jesu a se ntlhophetseng.*+ 13 Bakaulengwe, ga ke tseye gore ke setse ke amogetse tuelo ya me. Mme gone ke tlhatswegile pelo ka selo se le sengwe: Ke lebala dilo tse di kwa morago+ mme ke gagamalela dilo tse di kwa pele.+ 14 Ke leka ka natla gore ke fitlhelele se ke se ikaeletseng,+ e leng gore ke bone tuelo ya pitso ya kwa legodimong+ ya Modimo ka Keresete Jesu. 15 Ka jalo, a rona rotlhe ba re nonofileng mo tumelong,+ re akanye go dumalana le dilo tseno tse ke di umakileng. Mme fa lo sa akanye ka tsela eno, Modimo o tla lo thusa gore lo akanye jalo. 16 Le fa go ntse jalo, a re tsweleleng re tsamaya ka mokgwa ono go ya ka tsela e re gatetseng pele ka yone.

17 Bakaulengwe, lekang go etsa sekao sa me,+ e bile lo etse le ba ba latelang sekao se re lo tlhometseng sone. 18 Go na le batho ba le bantsi ba ba nyatsang go bo Keresete a swetse mo koteng ya tlhokofatso.* Ke ne ke tlhola ke lo bolelela ka bone, mme gone jaanong ke bua ka bone ke lela. 19 Kwa bofelong ba tla nyelediwa; modimo wa bone ke mpa ya bone; ba ikgantsha ka dilo tse di tlhabisang ditlhong tse ba di dirang; ba akanya fela ka dilo tse di mo lefatsheng.+ 20 Mme magodimo ke legae la rona,+ e bile re letetse mmoloki wa rona ka tlhoafalo, e bong Morena Jesu Keresete yo o kwa legodimong.+ 21 O tla dirisa maatla a gagwe a magolo a a a neilweng go laola dilo tsotlhe+ mme o tla fetola mmele wa rona o o bokoa gore o tshwane* le mmele wa gagwe o o galalelang.+