Timotheo wa Bobedi

2 Ka jalo ngwanaka,+ nna o kope Modimo gore a go neye maatla a dirisa bopelonomi jo bogolo* jo Keresete Jesu a re bo bontshang; 2 mme dilo tse o neng wa di utlwa mo go nna tse di neng tsa supelwa ke batho ba le bantsi,+ di neye banna ba ba ikanyegang, ba le bone ba tla tshwanelegang ka botlalo go ruta ba bangwe. 3 E re ka o le lesole la boammaaruri+ la ga Keresete Jesu, itshokele dikgwetlho tse o tla nnang le tsone.+ 4 Ga go na motho ope yo e reng e le lesole a bo a batla* ditiro tse dingwe tse a ka itshedisang ka tsone,* ka gonne o batla go itumedisa motho yo a mo kwadisitseng gore e nne lesole. 5 Tota le mo metshamekong, fa motho a gaisana mme a sa latele melao, ga a newe sekgele.*+ 6 Molemi yo o dirang ka natla o tshwanetse go nna wa ntlha go ja maungo. 7 Nna o akanya ka se ke se buang; Morena o tla go thusa go tlhaloganya dilo tsotlhe.

8 Gakologelwa gore go ya ka dikgang tse di molemo tse ke di rerang,+ Jesu Keresete o ne a tsosiwa mo baswing+ le gore e ne e le wa losika lwa ga Dafide.+ 9 Mme ke boga ka ntlha ya tsone e bile ke mo kgolegelong jaaka e kete ke dirile sengwe se se bosula.+ Le fa go ntse jalo, lefoko la Modimo ga le a golegwa.+ 10 Ke gone ka moo ke itshokelang dilo tsotlhe ka ntlha ya ba ba tlhophilweng,+ gore le bone ba tle ba bolokwe ka gonne ba le seoposengwe le Keresete Jesu le gore ba tle ba amogele masego a a nnelang ruri. 11 Mafoko ano a a ikanyega: Fa e le gore ruri re ne ra swa mmogo, gape re tla tshela mmogo;+ 12 fa re nna re itshokile, gape re tla busa mmogo re le dikgosi;+ fa re mo itatola, le ene o tla re itatola;+ 13 fa re sa ikanyege, o nna a ikanyega ka gonne ga a ka ke a nna se tota a seng sone.

14 Nna o ba gakolole ka dilo tseno, o ba laya fa pele ga Modimo gore ba se ka ba lwa ka mafoko, e leng selo se se se nang mosola ka gope ka gonne se utlwisa ba ba reeditseng botlhoko. 15 Dira bojotlhe gore o amogelwe ke Modimo, o le modiri yo o se nang sepe se se ka mo tlhabisang ditlhong, mme o rute o bo o tlhalose lefoko la boammaaruri sentle.+ 16 Tshaba dipuo tse di se nang mosola tse di tlontlololang Modimo,+ ka gonne dipuo tseno di tla felela ka ditiro tse Modimo a sa di rateng, 17 e bile di tla anama jaaka ntho e e oketsegang. Himenaeo le Fileto ke bangwe ba ba buang dipuo tseo.+ 18 Banna bano ba tlogetse boammaaruri mme ba dirile gore ba bangwe ba se ka ba tlhola ba nna le tumelo ka go ba raya ba re baswi ba setse ba tsositswe.+ 19 Le fa go ntse jalo, motheo o o tiileng wa Modimo o nna o eme, o na le letshwao leno, “Jehofa* o itse ba e leng ba gagwe,”+ le “A mongwe le mongwe yo o bitsang leina la ga Jehofa*+ a tlogele dilo tse di bosula.”

20 Jaanong mo ntlong e kgolo ga go na dijana tsa gauta le selefera fela mme gape go na le tsa logong le tsa letsopa, mme dingwe di dirisediwa dilo tsa botlhokwa mme tse dingwe ga di dirisediwe dilo tsa botlhokwa. 21 Ka jalo, fa motho a nnela kgakala le dijana tse di sa dirisediweng dilo tsa botlhokwa, o tla tshwana le dijana tse di dirisediwang dilo tsa botlhokwa; o tla dirwa boitshepo, o tla nna sejana sa botlhokwa mo go mong wa gagwe e bile o tla ipaakanyetsa go dira tiro nngwe le nngwe e e molemo. 22 Ka jalo, tshaba dikeletso tse basha ba nang le tsone mme leka go dira se se siameng, o nne le tumelo, lorato, kagiso mme o dire jalo o na le ba ba ikanyang Morena e bile ba na le pelo e e siameng.

23 Gape, o gane go tlotla ka dilo tsa boeleele le tsa botlhokakitso+ e re ka o itse gore di baka dintwa. 24 Gonne motlhanka wa Morena ga a tlhoke go lwa, mme o tlhoka go nna bonolo mo go botlhe,*+ a tshwanelega go ruta, a le pelotelele fa a sa tshwarwe sentle,+ 25 a laya ka bonolo ba ba sa dumalaneng le se a se rutang.+ Gongwe Modimo a ka ba letla gore ba ikwatlhaye* gore ba nne le kitso ya boammaaruri,+ 26 mme ba boe ba akanye ka tsela e e tshwanetseng gore ba tswe mo seraing sa ga Diabolo, ka gonne ba a lemoga gore o ba tshwere le gore ba dira thato ya gagwe.+