Kgaolo 54

“Senkgwè sa Amarure Se Se Cwañ Legodimong”

RURI letsatsi le le fetileng le ne le tletse ka ditiragalo. Jesu o ne a fepile diketekete tsa batho ka kgakgamatso a bile a falotse boiteko jwa batho jwa go mo dira kgosi. Bosigo joo o ne a tsamaya mo godimo ga Lewatle la Galilea le le nang le matsubutsubu; a falotsa Petere, yo o neng a setse a nwela fa a ne a tsamaya mo godimo ga metsi a a neng a kgaphasediwa ke diphefo; a ba a didimatsa makhubu go falotsa barutwa ba gagwe gore ba seka ba nwela ka sekepe.

Jaanong batho bao Jesu a neng a ile a ba fepa ka kgakgamatso kwa bokonebotlhaba jwa lewatle la Galilea ba mo fitlhela gaufi le Kaperenama ba bo ba botsa ka go re: “U tsile leñ kwano?” Fa a ba kgalemela, Jesu a re ba tlile go mmatla fela ka baka la gore ba ne ba solofetse go fiwa dijo tse dingwe tsa mahala. O ba kgothaletsa go berekela eseng dijo tse di nyelelang, mme eleng dijo tse di nnelang ruri ka botshelo jo bosakhutleng. Ka gone batho bao ba botsa ka go re: “Re na le go dihañ, gore re dihè ditihō tsa Modimo?”

Jesu o umaka tiro e le nngwe e e mosola thata. “Tihō ea Modimo ke e,” o a tlhalosa, “gore lo dumèlè mo go èna eo o mo romileñ.”

Lefa go ntse jalo, batho ga ba dumele mo go Jesu, go sa kgathalesege dikgakgamatso tsotlhe tse a di dirileng. Se se gakgamatsang, le eleng morago ga dilo tse di molemo tsotlhe tse a di dirileng, ba botsa ka go re: “Me u dihañ hèla se e leñ seshupō, gore re bōnè, re bè re dumèlè mo go wèna? U dihañ? Borra echo ba ne ba ya mana mo nageñ; yaka go kwadilwe, ga twe, O ba neile senkgwè se se cwañ legodimoñ go se ya.”

Fa Jesu a arabela go batla sesupo ga bone, o phepafatsa Motswedi wa go dira dikgakgamatso ga gagwe, a re: “E ne e se Moshe eo o lo neileñ senkgwè se se cwañ legodimoñ; me Rrè o lo naea senkgwè sa amarure se se cwañ legodimoñ; Gonne senkgwè sa Modimo ke se se hologañ se cwa legodimoñ, me se naea lehatshe botshelō.”

Batho ba re, “Morèna, re neè senkgwè seuō ka bosakhutleñ.”

“Ke nna senkgwè sa botshelō,” Jesu o a tlhalosa. “Eo o tlañ mo go nna ga a ketla a bolawa ke tlala, le eo o dumèlañ mo go nna ga a ketla a nyōrwa gopè. Me ke lo reile, ka re, Lo mponye, me leha go nntse yalo ga lo dumele. Botlhe ba Rara o ba nnaeañ ba tla tla mo go nna; me eo o tlañ mo go nna, ga nketla ke mo kgoromeletsa ntlè gopè. Gonne ke hologile kwa legodimoñ, ke sa tle go diha go rata ga me, ha e se go rata ga eo o nthomileñ. Me go rata ga eo o nthomileñ, ke go re, gotlhe mo o go nneileñ, ke se ka ka latlhègèlwa ke sepè, ha e se gore ke tlè ke se cosè mo letsatsiñ ya bohèlō. Gonne go rata ga Rrè ke mo, gore moñwe le moñwe eo o bōnañ Morwa Modimo, a mo dumèla, a bōnè botshelō yo bo sa khutleñ.”

Fa a rialo Bajuda ba simolola go ngongoregela Jesu ka go bo a rile, “Ke nna senkgwè se se hologileñ se cwa legodimoñ.” Ga ba mmone e le ope fela fa e se morwa yo batsadi ba gagwe eleng batho mme ka tsela e e tshwanang fela jaaka batho ba Nasaretha, ba ganana le seo ka go re: “Eo, a ga se Yesu, morwa Yosefe, eo bo rragwè le mmagwè re ba itseñ? o bua yañ gompiyeno, a re, Ke hologile ke cwa legodimoñ?”

“Se ñōñōregeñ mo go lona,” Jesu o arabela jalo. “Ga go motho opè eo o ka tlañ mo go nna, ha Rara eo o nthomileñ a sa mo goge: me ke tla mo cosa mo letsatsiñ ya bohèlō. Go kwadilwe mo baperofetiñ, ga twe, Me ba tla rutwa ke Modimo botlhe hèla. Moñwe le moñwe eo o utlwileñ mo go Rara, me a ithutile, o tla mo go nna. Ga se go re, moñwe o kile a bōna Rara, ha e se eo o cwañ kwa Modimoñ, ke èna eo o bonyeñ Rara. Amarure, amarure, kea lo raea, Eo o dumèlañ o na le botshelō yo bo sa khutleñ.”

Fa a tswelela, Jesu o bolela ka go re: “Ke nna senkgwè sa botshelō. Borra eno ba kile ba ya mana mo nageñ, me ba shule. Se ke shōna senkgwè se se hologañ se cwa legodimoñ, gore motho a se yè, me a se ka a swa. Ke nna senkgwè se se hologileñ se cwa legodimoñ: ha motho leha e le mañ a ya senkgwè se, o tla tshela ka bosakhutleñ.” Ee, ka go nna le tumelo mo go Jesu, yo o romilweng ke Modimo, batho ba ka bona botshelo jo bosakhutleng. Ga go na mana ape, kana senkgwe sepe fela se se ka nayang seno!

Go lebega motlotlo kaga senkgwe se se tswang legodimong o ile wa simologa moragonyana fela ga batho bano ba sena go fitlhela Jesu gaufi le Kaperenama. Mme o ne wa tswelela, wa ya magoletsa moragonyana fa Jesu a ne a ruta mo senagogeng mo Kaperenama. Yohane 6:25-51, 59; Pesalema 78:24; Isaia 54:13; Mathaio 13:55-57.

▪ Ke ditiragalo dife tse di ileng tsa salwa morago ke motlotlo wa ga Jesu malebana le senkgwe se se tswang legodimong?

▪ Mo ponong ya se Jesu a sa tswang go se dira, ke ka ntlhayang fa go kopa sesupo ga batho go sa utlwale?

▪ Ke ka ntlhayang fa Bajuda ba ngongoregela maiphako a ga Jesu a gore ke senkgwe sa boammaaruri se se tswang legodimong?

▪ Ke ko kae kwa motlotlo kaga senkgwe se se tswang legodimong o neng wa tshwarwa gone?