Kgaolo 123

“Bōnañ, Monna Ke Eo!”

EREKA a ne a kgatlhilwe ke boitsholo jwa ga Jesu ebile a lemoga gore ga a na molato, Pilatwe o batla tsela e nngwe gape ya go mo golola. “Lona e ne e re go le Tlolaganyō,” o bolelela boiidiidi joo jwa batho, “lo na le tèmalō ea go re ke lo gololèlè moñwe.”

Barabase, mmolai yo o itsegeng thata le ene o mo kgolegelong, jalo Pilatwe o ba botsa a re: “Lo rata ka lo gololèla mañ? A Barabase, kgotsa Yesu eo go tweñ Keresete?”

Batho ka go tlhotlhelediwa ke baperesiti ba bagolo bao ba tsositseng kgoberego eno ba kopa gore go gololwe Barabase, mme Jesu a bolawe. Ka go sa ineele, Pilatwe o araba ka go ba botsa jaana: “Lo rata ka lo gololèla ohe mo bobediñ yo?”

Ba goa ba re, “Barabase.”

“Me hoñ, Yesu eo o bidiwañ Keresete ke tla mo reñ?” Pilatwe o botsa jalo a tlaletswe.

Ba araba jaana ka modumo o mogolo o o thibanyang ditsebe: “A a bapolwè.” “A a bapolwè, a a bapolwè.”

Pilatwe o ba kopa jaana ka a itse gore ba batla gore monna yo o senang molato yono a bolawe: “Ka ntlha ea eñ? Monna eo, o dihile boshula bohe? Ga kea bōna molato opè o o chwanetseñ losho mo go èna; ke gōna ke tla mo kgwathisañ, ke itse go mo golola.”

Go sa kgathalesege maiteko ao a a dirang, boidiidi joo jwa batho ba ba shakgetseng, bao ba tlhotlhelediwang ke baeteledipele ba bodumedi, bo nnela go tlhaeletsa ba re: “A a bapolwè.” Boidiidi joo jwa batho ba batla go tsholola madi gonne bo tlhakantswe tlhogo ke baperesiti. Mme go a gakgamatsa ka gore ke malatsi a le matlhano fela a a fetileng fa bangwe ba bone ba ne ba amogela Jesu jaaka Kgosi mo Jerusalema! Mo nakong yotlhe eno, barutwa ba ga Jesu, fa e le gore ba gone ba didimetse fela ebile ga ba bonale.

Fa Pilatwe a bona gore kopo ya gagwe ga e thuse sepe, mme go na le moo go tsoga khuduego, o tsaya metsi a bo a tlhapa diatla fa pele ga boidiidi joo jwa batho, a bo a ba raya a re: “Ga ke na molato mo madiñ a monna eo o siameñ eo: go itse go na le lona koñ.” Fa a rialo, batho ba araba ba re: “Madi a gagwè a a nnè mo go rona, le mo baneñ ba rona.”

Jalo, fa a dira go ya kafa ba batlang ka gone—le ka a ne a batla go kgotsofatsa boidiidi joo jwa batho go na le go dira seo a itseng gore se siame—Pilatwe o ba gololela Barabase. O tsaya Jesu mme o laela gore a apolwe mme a kgwathisiwe. Seno e ne e se go kgwathisiwa fela mo go tlwaelegileng. The Journal of the American Medical Association e tlhalosa tiro eno ya Baroma ya go kgwathisa jaana:

“Gantsi go ne go dirisiwa semenyana se sekhutshwane (kala ya setlhare) se se neng se na le dikgojana tse di sa otlhiwang kana tse di otlhilweng tsa letlalo tse di sa lekalekaneng ka boleele, tseo di neng di gokeletswe dikgolokwenyana tsa tshipi kana maratswana a a motsu a nku fale le fale. . . . Fa masole a Baroma a ne a betsa motho yo o molato ka maatla mo mokwatleng ka go latelelana, dikgolokwane tseo tsa tshipi di ne di dira matsadi a magolo, mme dikgojana le maratswana a nku di ne di phatlola letlalo le ditshikana tse di kafa tlase. Mme fa ba ntse ba itaya dintho tse di obogileng tseo di ne di gagoga go fitlha kwa mesifeng ya marapo ba bo ba tlogela motho a le dinama tse di lepeletseng tse di tshologang madi.”

Fa a sena go bediwa botlhoko jalo, Jesu o tsenngwa mo ntlong ya segosi ya mmusi yono, mme go bidiwa setlhopha se se feletseng sa masole. Fa a le koo masole a nnela go mo sotla ka go mo direla serwalo sa mitlwa ba bo ba se totometsa mo tlhogong ya gagwe. Ba mo tsenya letlhaka mo seatleng ba bo ba mo apesa seaparo se se bohibidu jo bo mokgona, mofuta wa seaparo se se aparwang ke batho ba segosi. Go tswa foo ba mo sotla ba re: “Dumèla Kgosi ea Bayuda!” Gape ba mo kgwela mathe ba bo ba mo itaya mo sefatlhegong. Ba tsaya letlhaka le le omileng leo mo seatleng sa gagwe, ba mo itaya mo tlhogong ka lone, ba dira gore a tlhajwe mo tlhogong ke mitlwa e e motsu ya “serwalō” se ba mo sotlang ka sone.

Seriti se se gakgamatsang le nonofo tsa ga Jesu tseo a di supang fa a ntse a sotliwa jaana di kgatlha Pilatwe mo a batlang go leka gape go mo golola. “Bōnañ, ke mo ntshetsa kwano go lona, gore lo itse ha ke sa bone molato opè mo go èna,” o bolelela boidiidi joo jwa batho jalo. Gongwe o akanya gore dipelo tsa bone di tla nolofala fa ba bona Jesu a bogisitswe ka tsela e e ntseng jalo. Fa Jesu a ntse a eme fa pele ga boidiidi joo jwa batho jo bo setlhogo, a rwele serwalo sa mitlwa le seaparo sa kafa ntle se se bohibidu jo bo mokgona le sefatlhego sa gagwe se se tshologang madi se le botlhoko ke ditlhabi, Pilatwe o tlhaeletsa jaana: “Bōnañ, monna ke eo!”

Lemororo a tletse matsadi ebile a beditswe botlhoko, fano go eme motho yo o tlhomologileng go gaisa botlhe mo hisitoring yotlhe, eleruri monna yo mogolo go gaisa botlhe yo a kileng a tshela! Ee, Jesu o itshupa e le motho yo o nang le seriti se segolo le yo o ritibetseng ka tsela e e dirang gore Pilatwe a dumele fa a le mogolo, gonne mafoko a gagwe a lebega a supa fa a tlotla ebile a le kutlwelobotlhoko. Yohane 18:39–19:5; Mathaio 27:15-17, 20-30; Mareko 15:6-19; Luke 23:18-25.

▪ Pilatwe o leka go golola Jesu ka tsela efe?

▪ Pilatwe o leka go tlosa boikarabelo mo go ene jang?

▪ Go kgwathisiwa ga gagwe go dirwa ka tsela e e ntseng jang?

▪ Jesu o sotliwa jang fa a sena go kgwathisiwa?

▪ Pilatwe o leka go dira maiteko afe gape go golola Jesu?