Thuto 5

Boikaelelo Jwa Modimo ke Eng ka Lefatshe?

Ke eng fa Jehofa a ne a bopa lefatshe? (1, 2)

Ke ka ntlha yang fa gone jaanong lefatshe e se paradaise? (3)

Go tla diragalang ka batho ba ba bosula? (4)

Ke eng se Jesu a tla se direlang balwetse? batsofe? le baswi mo nakong e e tlang? (5, 6)

Ke eng se o tshwanetseng go se dira gore le wena o bone masego ano a isagwe? (7)

1. Jehofa o ne a bopa lefatshe leno gore batho ba tle ba itumelele go tshela mo go lone ka bosakhutleng. O ne a batla gore ka metlha lefatshe le agiwe ke batho ba ba siameng ba ba itumetseng. (Pesalema 115:16; Isaia 45:18) Le ka motlha lefatshe le ka se ka la fedisiwa; le tla nnela ruri.—Pesalema 104:5; Moreri 1:4.

2. Pele ga fa Modimo o bopa motho, O ne a tlhopha karolo e nnye mo lefatsheng mme a e dira paradaise e ntle. O ne a e bitsa tshimo ya Etene. Ke koo a ileng a baya monna wa ntlha le mosadi wa ntlha e bong Atame le Efa gone. Modimo o ne o ikaeletse gore ba nne le bana mme ba tlatse lefatshe lotlhe. Fa nako e ntse e tsamaya ba ne ba tla dira lefatshe lotlhe paradaise.—Genesise 1:28; 2:8, 15.

3. Atame le Efa ba ne ba leofa ka go tlola molao wa Modimo ka boomo. Ka jalo, Jehofa o ne a ba koba mo tshimong ya Etene. Paradaise e ne e latlhegile. (Genesise 3:1-6, 23) Mme lefa go ntse jalo, Jehofa ga a lebala maikaelelo a gagwe ka lefatshe leno. O solofetsa go le dira paradaise e batho ba tla nnang mo go yone ka bosakhutleng. O tla dira seno jang?—Pesalema 37:29.

4. Pele ga lefatshe leno le nna paradaise, batho ba ba bosula ba tshwanetse go tlosiwa mo go lone. (Pesalema 37:38) Se se tla diragala ka Haramagetone e e leng ntwa ya Modimo e a tla fedisang boikepo ka yone. Morago ga foo, Satane o tla golegwa ka dingwaga di le 1 000. Seno se raya gore ga go na batho bape ba ba bosula ba ba tla lesiwang go senya lefatshe. Ke batho ba Modimo fela ba ba tla falolang.—Tshenolo 16:14, 16; 20:1-3.

5. Morago ga foo, Jesu Keresete o tla busa jaaka Kgosi mo lefatsheng leno ka dingwaga di le 1 000. (Tshenolo 20:6) O tla tlosa boleo ka bonya ka bonya mo megopolong ya rona le mo mebeleng ya rona. Re tla nna batho ba ba itekanetseng fela jaaka Atame le Efa ba ne ba ntse pele ga ba leofa. Mme go tla bo go sa tlhole go na le bolwetse, botsofe le loso. Batho ba ba lwalang ba tla fodisiwa mme batho ba ba tsofetseng ba tla nna basha gape.—Jobe 33:25; Isaia 33:24; Tshenolo 21:3, 4.

6. Ka nako ya Puso ya Dingwaga Tse di Sekete ya ga Jesu, batho ba ba ikanyegang ba tla dira lefatshe lotlhe paradaise. (Luke 23:43) Mme gape go tla tsosiwa dimilione tsa batho ba ba suleng gore ba tshele mo lefatsheng. (Ditiro 24:15) Fa ba dira se Modimo a batlang gore ba se dire, ba tla tswelela pele ba tshelela ruri mo lefatsheng. Fa ba sa dire jalo, ba tla nyelediwa ruri.—Johane 5:28, 29; Tshenolo 20:11-15.

7. He, boikaelelo jwa Modimo jwa ntlha ka lefatshe bo tla bo bo diragaditswe. A o ka rata go itumelela masego ano a isagwe? Fa e le gore go ntse jalo, o tshwanetse gore o ithute ka Jehofa le go ikobela melao ya gagwe. Go nna teng kwa dipokanong kwa Holong ya Bogosi ya Basupi ba ga Jehofa e e mo lefelong la lona go tla go thusa go dira jalo.—Isaia 11:9; Bahebere 10:24, 25.

[Setshwantsho mo go tsebe 10]

Paradaise e e latlhegileng

[Ditshwantsho mo go tsebe 11]

Morago ga Haramagetone, lefatshe le tla fetolwa paradaise