Dipotso Tse Di Tswang go Babadi

◼ A Jesu mo go Mathaio 10:21, o ne a tlhagisa gore bakaulengwe bangwe mo phuthegong ba ne ba tla tsogologela bakaulengwe ba bone ba semoya?

Nnyaa, tlhagiso ya ga Jesu ga e rialo, mme e balega jaana: “Me motho o tla neèla morwa rragwe mo loshuñ, le rra motho ñwana oa gagwè: bana ba tla cogologèla batsadi ba bōnè, ba ba bolaea.”—Mathaio 10:21.

Ditemana tse di dikologileng eno di bontsha gore Jesu o ne a bolelela baaposetoloi ba ba 12 seno fa a ne a ba roma go ya go rera mo Iseraele. Bontsi jwa seo a neng a se bolela bo ne bo kaya sengwe se segolo mo baaposetoloing. Ka sekai, o ne a bolela gore ba ne ba neilwe maatla a go fodisa ka kgakgamatso, go leleka meya ya badimo, le eleng go tsosa baswi. (Mathaio 10:1, 8; 11:1) Hisitori e supa gore ga se Bakeresete botlhe ba ba neng ba amogela maatla a a ntseng jalo a go dira dikgakgamatso, seo se gatelelang gore Jesu o ne a bua le batho ba le bangwe ba ba neng ba le foo—baaposetoloi ba gagwe.

Lefa go le jalo, dingwe tsa dilo tseo Jesu a neng a di bolela di ama le dilo tse dingwe tse di fetang loeto loo lwa go rera. O ne a ba bolelela jaana: “Me lo itisè mo bathuñ: . . . lo tla isiwa ha pele ga balaodi le dikgosi ka ntlha ea me, go tla lo nna chupō mo go bōnè le mo go Badichaba.” (Mathaio 10:17, 18) Mo loetong loo, go bonala ekete ba ba 12 ba ne ba kopana le baganetsi, mme ga go sepe se se supang fa ba ne ba “isiwa ha pele ga balaodi le dikgosi” go neela “Badichaba” bosupi.a Mo dingwageng tse di neng tsa tla kwa morago, baaposetoloi ba ne ba isiwa fa pele ga babusi, jaaka bo Kgosi Herode Ageripa I le II, Seregio Paulo, Galeo, le eleng Mmusi Nero. (Ditihō 12:1, 2; 13:6, 7; 18:12; 25:8-12; 26:1-3) Ka gone, mafoko a ga Jesu a ne a diragala moragonyana.

Kgakololo ya ga Jesu e ne ya tswelela ka tlhagiso eno e e reng: “Motho o tla neèla morwa rragwè mo loshuñ.” O ne a sa bue ka bakaulengwe ba semoya, fela jaaka a ne a sa bue ka borre ba semoya kana bana ba semoya mo mafokong ano a gagwe a a latelang mo temaneng ya 21: “Rra motho [o tla neela] ñwana oa gagwè: bana ba tla cogologèla batsadi ba bōnè, ba ba bolaea.” Jesu o ne a kaya gore baaposetoloi ba ne ba ka lebelela gore ba tla ilwa kana ba ganediwa le eleng ke bamasika a bone.—Mathaio 10:35, 36.

Baaposetoloi ba ne ba tla tlhoka go itshoka mo loetong loo lwa go rera. Jesu o ne a tswelela jaana: “Me lo tla ilwa ke batho botlhe ka ntlha ea leina ya me: me eo o ichōkèlañ bokhutloñ, èna o tla bolokwa.”—Mathaio 10:22.

Dingwe tsa dilo tseo Jesu a neng a di bolela ka nako eo di botlhokwa thata mo go rona jaaka Basupi ba ga Jehofa gompieno. Re gatelela Bogosi thata fa re rera. Re rera kwantle ga go duedisa batho mme re batla batho ba ba kgatlhegelang molaetsa kana bao o ba tshwanelang. Re tshwanetse go nna kelotlhoko. Baganetsi ba bantsi. Ka dinako tse dingwe balosika, baagelani, kana batho ba re dirang le bone ba re direla mathata a magolo tota, segolobogolo bao ba santseng ba simolola go latela tsela ya Bokeresete jwa boammaaruri. Jesu o ne a boeletsa tlhagiso ya gagwe kaga baganetsi fa a ne a tlhalosa “seshupō” sa go nna gone ga gagwe. (Mathaio 24:3, 9, 10; Luke 21:16, 17) O ne a bolela gape gore re tlhoka go ‘itshoka go fitlha kwa bokhutlong gore re tle re bolokwe.’ Ee, re tlhoka go itshoka go fitlha kwa bokhutlong jwa botshelo jwa rona jwa jaanong kana go fitlha tsamaiso eno ya dilo e khutla mme re kgona go tsena mo lefatsheng le lesha.—Mathaio 24:13.

[Ntlha e e kwa tlase]