A Lesedi la Lona le Phatsime!

KGABAGARE nako ya gore monnamogolo a bone Mesia yo o solofeditsweng e ne ya fitlha! Simeone o ne a itse gore o ne “a se ketla a swa a ise a bone Keresete wa Morena pele” gonne a ne a senoletswe ke Modimo. (Luke 2:26) Mme a bo Simeone a ne a itumela jang ne fa a ne a tsena mo tempeleng, mme Maria le Josefe ba mo naya ngwana Jesu! O ne a galaletsa Modimo, a re: “Morena, jaana o ka mma motlhanka wa gago a tsamaya ka kagiso . . . gonne matlho a me a bonye poloka ya gago . . . lesedi le le bonesang Baditšhaba, le kgalalelo ya Iseraele batho ba gago.”—Luke 2:27-32; bapisa Isaia 42:1-6.

Go tloga fa Jesu a ne a kolobediwa a na le dingwaga tse 30 go fitlha a swa, o ne a itshupa fa e le “lesedi” la lefatshe. Ka ditsela dife? O ne a phatsimisa lesedi la semoya ka go rera ka Bogosi jwa Modimo le maikaelelo a Gagwe. Gape o ne a senola dithuto tsa bodumedi jwa maaka a bo a senola ditiro tsa lefifi ka phepafalo. (Mathaio 15:3-9; Bagalatia 5:19-21) Ka jalo, Jesu o ne a tshwanela sentle go bua a re: “Ke nna lesedi la lefatshe.”—Johane 8:12.

Jesu o ne a bolawa ka ngwaga wa 33 C.E. A lesedi le ne la tima ka nako eo? Le eseng! Jesu o ne a bolelela barutwa ba gagwe jaana fa a santse a le mo lefatsheng: “A lesedi la lona le phatsime fa pele ga batho.” (Mathaio 5:16) Ka gone, morago ga loso lwa ga Jesu barutwa ba gagwe ba ne ba tswelela ba phatsimisa lesedi.

Fa ba etsa Jesu, gompieno Bakeresete ba phatsimisa lesedi la ga Jehofa ka go dira tiro ya go rera. Ba ‘sepela jaaka bana ba lesedi,’ ba itshupa e le dikao tse di phatsimang tsa go tshela ka tsela ya Bokeresete.—Baefeso 5:8.