“Go Itsise Leina la ga Jehofa”

BATHO mo lefatsheng lotlhe, ba anaanela thata makasine wa Tora ya Tebelo le molekane wa yone e leng Tsogang!, ka ntlha ya dilo tsa semoya tse di mo go tsone le ka ntlha ya tsela e di rutang ka yone. Bosheng jaana mmadi mongwe wa kwa Fora o ne a kwala jaana mo lekwalong le le latelang fa a tlhalosa ka tsone:

“Ke kgarebe e e tswang kwa Afrika e e sa rutegang. Bosheng jaana ke ne ka simolola go bala dimakasine tsa lona. E re ka ke ne ke ngokilwe ke ditlhogo tsa tsone, ke lemogile botlhokwa jwa go bala. Ke leboga thata go bo lo ile lwa nthusa gore ke tokafatse tlotlofoko ya me e bile ke kgona go kwala lekwalo le le se nang diphoso tse dintsi.

“Ke kgatlhiwa ke tsela e lo kwalang ka teng ka sengwe le sengwe se se amanang le batho, polanete le Mmopi. Go motlhofo thata go tlhaloganya ditlhogo tseno mo e leng gore di dira gore motho a batle go nna mmadi yo o tlhoafetseng. Ga go na ope yo o kgonang go ruta batho ba mefuta yotlhe ka nako e le nngwe fela jaaka lona.

“Ke kgatlhwa gape ke go bona gore ga lo dire seno sotlhe ka go bo lo batla go dira kgwebo mme ke ka go bo lo batla go itsise batho ka leina la ga Jehofa. Ke a itse gore o itumelela se lo se dirang, mme ke batla go lo leboga. E kete Mmopi a ka tswelela pele a lo nonotsha gore lo rute batho.”

Gone jaanong Basupi ba ga Jehofa ba dira tiro ya bone ya go ruta batho Baebele mo dinageng di le 235. Makasine wa Tora ya Tebelo o gatisiwa ka dipuo di le 148 mme wa Tsogang! one ka dipuo di le 87. Makwalopaka ano ga a gatisiwe go galaletsa motho ope. Kgakololo e e theilweng mo Baebeleng le tshedimosetso e e mo nakong e e mo go one e kwaletswe go tlotlomatsa Mmopi yo o bolelang jaana: “Nna Jehofa, ke . . . Yo ke go rutang gore o solegelwe molemo.” (Isaia 48:17) E kete o ka solegelwa molemo ke go bala Dikwalo Tse di Boitshepo ka metlha o dirisa dikgatiso tseno tse di re thusang go ithuta Baebele.