Kgopolo E E mo Bibeleng

Modimo O Itshwarela Ka Botlalo Go le Kana Kang?

“Ke na le boikutlo jwa gore Modimo ga o kitla o intshwarela dibe tsa me. Ga o kake wa bo wa nkamogela ka ntlha ya se ke se dirileng.”—Gloria.

GLORIA o ne a sena bothata go bolelela ba bangwe gore Jehofa o ka ba itshwarela dibe.a Mme fa Gloria a gopola ka diphoso tsa gagwe, o ne a ipona a ka se ka a itshwarelwa. Go ne go lebega e kete Jehofa ga a kake a mo itshwarela.

Go lemoga phoso e motho a e dirileng kana tsela e e phoso e motho a neng a e tsere mo botshelong go ka tshwenya segakolodi. Dafide o ne a kwala jaana fa a sena go leofa: “Ke ne ke koafaditswe ke go lela letsatsi lotlhe. Ke ne ke feletswe ke maatla gotlhelele.” (Pesalema 32:3, 4, Today’s English Version; bapisa Pesalema 51:3.) Se se itumedisang ke gore Jehofa o rata go itshwarela diphoso. O “iketleeditse go ichwarela.”—Pesalema 86:5; Esekiele 33:11.

Le gale, Jehofa o bona pelo. Maitshwarelo a gagwe ga a a ikaega ka gore o ikutlwa jang. (Ekesodo 34:7; 1 Samuele 16:7) Moleofi o tshwanetse go dumela gore o phoso, a ikwatlhae ka mmatota, a latlhe tsela ya gagwe e e maswe a e ile le go e tsaya jaaka selo se se ferosang sebete. (Pesalema 32:5; Baroma 12:9; 2 Bakorintha 7:11) Ke fela fa moleofi a dirile jalo a ka itshwarelwang le go bona “metlha ea thudishō” go tswa kwa go Jehofa.—Ditihō 3:19.

Bangwe ba sala ba ntse ba ikutlwa gore ke ditlhobogwa ba ka se itshwarelwe le fa ba sena go ikwatlhaya. A ba tshwanetse go nna ka mokgweleo wa go ipona molato botshelo jotlhe jwa bone? Bibela e gomotsa jang bao ba ba ileng ba ikwatlhaela dibe tsa bone, ba bo ba di tlogela, mme lefa go ntse jalo ba santse ba tshwenyegile mo dipelong?—Pesalema 94:19.

Go Sitlhamolola Morwalo

Dafide o ne a rapela Jehofa jaana, a tshwentswe thata ke diphoso tsa gagwe: “Sèkasèka patikègō ea me, le thekisègō ea me; me u [lebale] maleo a me aotlhe.” (Pesalema 25:18) Fano Dafide o ne a kopa gore Jehofa a dire se se fetang go mo itshwarela fela. O ne a kopa Jehofa gore a mo “lebalele” dibe tsa gagwe, gore a di tlose kana a di itshokele, a di mo role. Sebe se na le ditlamorago tse di maswe thata, mme ga go belaetse gore mo go Dafide seno se ne se akaretsa mokgweleo wa segakolodi se se tshwenyegileng.

Ngwaga le ngwaga Baiseraele ba ne ba gakololwa ka tiragalo nngwe e ba neng ba e bona gore Jehofa o ka kgona go tlosa boleo jwa setšhaba. Ka Letsatsi la Tetlanyo moperesiti yo mogolo o ne a baya podi diatla mo tlhogong, a bo a bolela maleo a batho, go tsweng foo a bo a e lesa e ya le naga. Mongwe le mongwe yo o neng a nna teng o ne a bona ka leitlho la mogopolo fa boleo jwa setšhaba bo tlosiwa.—Lefitiko 16:20-22.

Ka jalo batho ba ba ikwatlhaetseng dibe tsa bone ba ka gomotsega. Dithulaganyo tsa Letsatsi la Tetlanyo di ne di tshwantshetsa thulaganyo e kgolo ya go tlosa sebe—setlhabelo sa thekololo sa ga Jesu Keresete. Isaia o ne a kwala jaana a perofita kaga Jesu: “O na a rwele boleo yoa batho ba le bantsi.” (Isaia 53:12) Ka jalo dibe tsa nako e e fetileng ga di a tshwanela go tshwenya segakolodi sa motho. A mme go raya gore Jehofa o ka nna a gakologelwa dibe tseno mo nakong e e tlang?

Go Phimolwa ga Molato

Jesu o ne a bua jaana, mo thapelong ya gagwe ya sekao: “U re ichwarèlè melato ea rona.” (Mathaio 6:12) Lefoko la Segerika le le ranotsweng fano ka “ichwarèlè” ke mofuta wa lediri le le rayang “go lesa.” Ka jalo, go itshwarelwa ga dibe go tshwantshanngwa le go lesa, kana go phimola, molato o o rileng.—Bapisa Mathaio 18:23-35.

Petere o ne a tlatsa seno fa a ne a re: “Me ke gōna, ikwatlhaeeñ, lo shokologè, gore dibe tsa lona di phimolwè.” (Ditihō 3:19) “Di phimolwè” go raya go senngwa, kana go nyeletsa. Le na le bokao jwa go sutlha pego e e neng e kwadilwe, go phimola melato e motho a neng a ntse a na le yone.—Bapisa Bakolosa 2:13, 14.

Ka jalo, ba ba ikwatlhaileng ga ba a tshwanela go tshoga gore Modimo o tla batla tuelo ya molato o a o phimotseng. O bolela jaana: “Maleo a gago ga nketla ke a gakologèlwa.” (Isaia 43:25; Baroma 4:7, 8) Seno se rayang mo moleofing yo o ikwatlhaileng?

Go Ntshiwa ga Setshubaba

Jehofa o ne a bolela jaana ka moperofite Isaia: “Leha dibe tsa lona di hubitse bohibidu yo bo letlōlōlō, di tla nna dichweu yaka kapōkō; leha di le bohibidu yo bo mokgona, di tla nna yaka boboea yoa nku.”—Isaia 1:18.

Fa gongwe ga go kgonege go ntsha setshubaba mo seaparong. Fa gongwe se kgona go fokotswa fela mme se santse se bonala. A bo go gomotsa jang ne go itse gore Jehofa o ka kgona go tlosa dibe tse di hubitseng bohibidu jo bo letlhololo kana jo bo mokgona mme a bo a di dira di tshweu jaaka kapoko.—Bapisa Pesalema 51:7.

Ka jalo ga go tlhokege gore moleofi yo o ikwatlhaileng a tseye gore o tla nna a na le letshwao botshelo jotlhe jwa gagwe. Jehofa ga a fokotse diphoso fela, mo go ka dirang gore motho yo o ikwatlhaileng a tshelele mo ditlhonnyeng tse di sa feleng.—Bapisa Ditihō 22:16.

Thuso ya Ba Bangwe

Le mororo Jehofa a imolola morwalo, a phimola molato, le go tlosa setshubaba sa sebe, motho yo o ikwatlhaileng ka dinako tse dingwe o ka nna a ikutlwa a fekeediwa ke bohutsana. Paulo o ne a kwala ka modirabosula mongwe yo o neng a ikwatlhaya mo phuthegong ya Korintha yo o neng a itshwaretswe ke Modimo mme lefa go ntse jalo a ka nna a bo a ile a “nyèlèdiwa ke bogolo yoa bohutsana [“a hutsafetse mo a neng a ka nna a ineela gotlhelele,” TEV].”—2 Bakorintha 2:7.

Motho yono o ka thusiwa jang? Paulo o a tswelela: “Ke gōna, kea lo rapèla gore lo mo tlhōmamisetsè go mo rata ga lona.” (2 Bakorintha 2:8) Lefoko le Paulo a le diriseditseng go raya ‘tlhomamisetsa’ ke lefoko la semolao le le rayang “go supa fa go ntse jalo.” Ee, ba ba ikwatlhayang ba ba itshwaretsweng ke Jehofa ba tlhoka go tlhomamisediwa ke Bakeresete ka bone, kana go neelwa sesupo sa gore ba a amogelwa.

Ee, gone go boammaaruri gore seno se ka nna sa tsaya nako. Moikwatlhai o tshwanetse a lebala ditlhong tsa sebe sa gagwe mme a dire tse di siameng tse di tla tlhatswang ba bangwe pelo. O tshwanetse go itshokela ka bopelotelele maikutlo a bao ba ba ileng ba amiwa ka namana ke diphoso tse a kileng a di dira. Mme kafa letlhakoreng le lengwe, o ka tlhatswega pelo go itse gore Jehofa o itshwarela ka botlalo, fela jaaka Dafide: “Yaka botlhabatsatsi bo le kgakala le bophirimatsatsi, le èna [Jehofa] o re tloseditse ditlolō tsa rona bokgakala yo bo kalo.”—Pesalema 103:12.

[Ntlha e e kwa tlase]

[Motswedi wa Setshwantsho mo go tsebe 29]

Return of the Prodigal Son by Rembrandt: Scala/Art Resource, N.Y.