Kgaolo 26

Tlhotlheletso ya go Itshwaratshwara Dirwe tsa Tlhakanelo-Dikobo—Ke Ka Lwantshana Nayo Jang?

“GO TSHWAKGOLA fela thata,” go bolela jalo lekawana lengwe leo le neng la lwantshana le go itshwaratshwara dirwe tsa tlhakanelo-dikobo mo dingwageng tse di fetang 15. “Go ka tshwakgola fela jaaka seokobatsi sengwe le sengwe kana seno se se tagang.”

Lefa go ntse jalo, moaposetoloi Paulo o ne a seka a letlelela dikeletso tsa gagwe go nna mong wa gagwe yo o bogale. Phapaanong le seo, o ne a kwala jaana: “Ke ikgōba mmele [dikeletso tsa senama], ke o baea mo taoloñ.” (1 Bakorintha 9:27) O ne a itshwara makgwakgwa fela thata! Motho ope fela o ka kgona go tlogela go itshwaratshwara dirwe tsa tlhakanelo-dikobo fa a dira boiteko jo bo tshwanang.

“Baakanyetsang Megopolo ya Lona Tiro”

Ba le bantsi ba itshwaratshwara dirwe tsa tlhakanelo-dikobo go ritibatsa kgagamalo ya mogopolo le tlhodiego. Lefa go le jalo, go itshwaratshwara dirwe tsa tlhakanelo-dikobo ke tsela ya bongwana ya go dirisana le mathata. (Bapisa 1 Bakorintha 13:11.) Selo se se botoka ke gore motho a itshupe gore o na le “kicō le pharologanyō” mme a tlhasele bothata ka bojone. (Diane 1:4) Fa mathata le dikhidiego di lebega e le tseo di bayang motho mo tlalelong, ‘latlhela tlhobaelo yotlhe ya gago mo Modimong.’—1 Petere 5:6, 7.

A re re ka tshoganetso fela o bona kana o utlwa sengwe seo se dirang gore o eletse go tlhakanela dikobo? Bibela e akantsha jaana: “Baakanyetsang megopolo ya lona tiro; lo itshware.” (1 Petere 1:13, New International Version) Tlhoafalang mo megopolong mme lo gane go akanya ga boitsholo jo bo sa siamang. Go ise go e kae kgotelo eo e tla kokobela.

Lefa go le jalo, go gana dikakanyo tse di bosula go bokete segolo bogolo fa motho a le nosi bosigo. Mosadi mongwe yo mmotlana o ne a gakolola jaana: “Selo se se botoka go se dira ke go tswa mo bolaong mme o bo o iperekisa tiro nngwe, kana gongwe o je sengwe, e le gore mogopolo wa gago o tle o akanye ka dilo di sele.” Ee, ipateletse go ‘akanyetsa dilo tse di tshwanetseng go tlotlwa, tse di siameng, tse di itshekileng, tse di rategang, le tseo di bolelwang molemo.’—Bafilipi 4:8.

Fa o na le bothata jwa go thulamela, leka go etsa Kgosi Dafide yo o neng a ikanyega yo o neng a kwala ka go re: “Mogañ ke gu gakologèlwañ [Modimo] ke le mo bolaoñ yoa me, me ke gu akanya mo ditishoñ tsa bosigo.” (Pesalema 63:6) Gantsi fa o pateletsa mogopolo wa gago go akanyetsa kwa teng kaga Modimo le dinonofo tsa gagwe seo se tla kgaosetsa kgogedi. Selo se sengwe gape seo se thusang ke go nna o akanya kafa Modimo o lebang ka teng tlwaelo eno e e maswe.—Pesalema 97:10.

Ikele Tlhoko

“Motho eo o bonokopela o bōna boshula, me a iphitlhe; me ba ba sa tlhalehañ ba hete hèla, me ba utlwe botlhoko gōna,” go ne ga kwala jalo monna yo o bonokopela yo o neng a tlhotlheleditswe. (Diane 22:3) O ka itshupa fa o le botlhale ka go akanyetsa dilo kwa pele. Ka sekai, fa o bona gore go dira ditiro dingwe, go apara diaparo tse di gagamatsang, kana go ja dijo tse di rileng go go dira gore o eletse go tlhakanela dikobo, he tila dilo tsa go nna jalo ka ditsela tsotlhe. Ka sekai, dino tsa tagi di ka dira gore motho a repe mme a ketefalelwe ke go itshwara. Gape, tila jaaka o ne o ka dira ka sebetso se se rileng go bala, go lebelela dithulaganyo tsa TV, kana dibaesekopo tsa ditlhogo tse di jesang pelo monate. Mopesalema o ne a rapela ka go re, “Haposa matlhō a me mo go lebeñ boithamakō.”—Pesalema 119:37.

Gape motho o ka ikela tlhoko mo dinakong tseo segolo bogolo go leng motlhofo gore a ineele. Mosadi yo mmotlana o ka nna a fitlhela gore dikeletso tsa gagwe tsa tlhakanelo-dikobo di nna dikgolo fela thata ka dinako tse di rileng mo kgweding. Kana motho a ka tswa a kgopisegile kana a le pelo e botlhoko. “Ha u idibala mo motlheñ oa pitlaganō, nonohō ea gago e be e le pōtlana,” go tlhagisa jalo Diane 24:10. Jalo tila go nna nosi ka lobaka lo loleele. Rulaganyetsa go dira ditiro tseo di agang tseo di tla bolokang mogopolo wa gago o tshwaregile mo go direng ditiro tse di gwetlhang, seo se tla dirang gore o seka wa nna le seabe sa go raelesega go akanya dikakanyo tsa boitsholo jo bo sa siamang.

Tlhabano ya Semoya

Monna mongwe wa dingwaga tse 27 yoo o neng a ile a lwantshana le tlwaelo eno fa esale a le dingwaga tse 11 o ne a kgona kgabagare go e fenya. “Go ne ga ntlhoka gore ke tlhabane,” a tlhalosa jalo. “Ke ne ka bala Bibela, bobotlana dikgaolo di le pedi letsatsi lengwe le lengwe ke sa tlodise lepe.” O kgonne go dira seno ka katlego mo dingwageng tse di fetang tse tharo. Gape Mokeresete yo mongwe o gakolola jaana: “Pele ga o ya go robala, bala sengwe seo se amanang le dilo tsa semoya. Go botlhokwa thata gore selo se o se akanyang labofelo mo letsatsing e be e le sa semoya. Gape ka nako eno thapelo e thusa fela thata.”

‘Go totafala mo tirong ya Morena,’ mo go tshwanang le go ruta ba bangwe Bibela, le gone go a thusa. (1 Bakorintha 15:58) Mosadi mongwe yo o neng a fenya bothata jwa go itshwaratshwara dirwe tsa tlhakanelo-dikobo o ne a tlhalosa jaana: “Selo seo jaanong se nthusang fela thata go tila tlwaelo eno ke gore jaaka moefangele wa nako e e tletseng mogopolo wa me le dinonofo tsa me di tlhomame mo go thuseng ba bangwe go nna le botsalano jo bo amogelesegang le Modimo.”

Le wena fa o rapela go tswa pelong o ka kopa Modimo go go naya ‘nonofo e e fetang e e tlwaelesegileng.’ (2 Bakorintha 4:7) “Tshèlañ dipelo tsa lona ha pele ga [Modimo].” (Pesalema 62:8) Mosadi mongwe yo mmotlana o bolela jaana: “Thapelo ke nonofo e kgolo e motho o ka e bonang mo nakong e khutshwane. Go thusa eletota fa o rapela ka nako eo keletso e tsogang ka yone.” Gape, fa o tsoga le mo letsatsing lotlhe, bolelela Modimo seo e leng boikaelelo jwa gago mme o mo lope go go naya moya wa gagwe o o boitshepo o o nonotshang.—Luke 11:13.

Thuso e e Tswang go ba Bangwe

Fa maiteko a gago a sa atlege, buisana le mongwe yo o ka kgonang go go thusa, yo o tshwanang le motsadi wa gago kana mogolwane wa Mokeresete. Basadi ba babotlana ba ka fitlhela go thusa go ipolelela mosadi mongwe yo o godileng wa Mokeresete. (Tito 2:3-5) Lekawana lengwe leo le neng le tloga le itlhoboga le bua jaana: “Ke ne ka buisana mo sephiring le rre mo maitsiboeng mangwe kaga gone.” O bolela jaana: “Ke ne ka tlhoka go dira maiteko a magolo gore ke mmolelele. Ke ne ke ntse ke lela fa ke mmolelela, ke tlhabiwa ke ditlhong fela thata. Mme ga ke kitla ke lebala seo a neng a se bua. O ne a bua jaana, a nyenya ka mo go kgothatsang: ‘O dira gore ke ipelafatse fela thata ka wena.’ O ne a itse gore ke ne ke dirile maiteko a a kana kang go tla go fitlha mo seemong seno. Mafoko ao a ne a nkgothatsa le go oketsa boikemisetso jwa me go gaisa ape fela.

“Go tswa foo rre o ne a mpontsha dikwalo di le mmalwa go nthusa go bona gore ke ne ke ‘sa ya kgakala thata,’” mosha yoo o ne a tswelela jalo, “me go tswa foo a mpontsha dikwalo tse dingwe a tlhomamisa gore ke ne ke tlhaloganya bomasisi jwa tsela ya me e e phoso. O ne a nthaya a re ‘ke ipoloke ke le phepa’ go fitlha ka nako e e rileng eo re neng re tla buisana gape ka gone. O ne a nthaya a re ke seka ka itetlelela go kgobega marapo fa ke tlhaela, gore fa go diragala jalo ke goge lobaka lo loleele ke sa ineela gape.” Morago ga lekawana leo le sena go fenya bothata joo ka botlalo, o ne a oketsa jaana: “Gore mongwe a bo a itse ka bothata jwa me le go nthusa ga gagwe go ne ga ntsholegela molemo fela thata.”

Go Dirisana le go Tlhaela

Morago ga mosha mongwe a sena go dira ka natla go fenya tlwaelo eo, o ne a tlhaela. O ipolela jaana: “Go ne ga tshwana jaaka ekete ke ne ke imelwa ke morwalo mongwe o o bokete. Ke ne ka ikutlwa ke sena mosola gotlhelele. Go tswa foo ke ne ka akanya jaana: ‘Ke ile kgakala. Ga ke sa tlhole ke ratiwa ke Jehofa, jalo ke ka ntlhayang fa ke itshokodisa?’” Lefa go ntse jalo, fa motho a tlhaela ga go reye gore o reteletswe. Mosetsana mongwe wa dingwaga tse 19 o gakologelwa jaana: “Fa go ne go simologa go ne go ntiragalela bosigo bongwe le bongwe, mme go tswa foo ke ne ka simolola go ikaega ka Jehofa fela thata, mme ka thuso ya moya wa gagwe jaanong ke retelelwa gongwe garataro ka ngwaga fela. Ke ikutlwa ke swabile fela thata kwa morago, mme nako le nako fa ke retelelwa, fa ke raelesega gape, ke a bo ke nonofile go emelana le gone fela thata.” Jalo o fenya bothata jwa gagwe ka bonya ka bonya.

Fa o tlhaela, akanyetsa seo se gogetseng kwa tlhaelong eo. Mosha mongwe o bolela jaana: “Ke akanya ka seo ke a bong ke ntse ke se bala kana ke akanya ka sone. Mo e ka nnang ka metlha ke kgona go tomola lebaka la go bo ke ne ka raelesega. Ka tsela eno ke kgona go emisa go tlhola ke dira jalo mme ke bo ke baakanye.”

Dituelo tsa Tlhabano e e Molemo

Mosha mongwe yo o neng a fenya bothata jwa go itshwaratshwara dirwe tsa tlhakanelo-dikobo o bolela jaana: “Fa esale ke fenya bothata joo, ke kgona go nna le segakolodi se se phepa fa pele ga ga Jehofa, mme seo ke selo seo ke sa kakeng ka se ananya le sepe!”

Ee, segakolodi se se molemo, boikutlo jo bo tokafaditsweng jwa go ikutlwa o na le mosola, nonofo e kgolwane ya go itshwara sentle le botsalano jo bo atamalaneng le Modimo tsotlhe ke dituelo tsa ntwa e e molemo eo motho a e loleng kgatlhanong le go itshwaratshwara dirwe tsa tlhakanelo-dikobo. Mosadi mongwe yo mmotlana yoo kgabagare a neng a fenya bothata jwa go itshwaratshwara dirwe tsa tlhakanelo-dikobo o bolela jaana: “Eleruri, go fenya tlwaelo eno go tshwanela boiteko bongwe le bongwe jo motho a ka bo dirang.”

Dipotso tsa Puisano Kgaolo 26

◻ Ke ka ntlhayang fa go le diphatsa go nna o akantse ka dilo tsa lorato? Mosha o ka dira eng gore a nne a akantse ka dilo di sele?

◻ Mosha o ka nna a ikela tlhoko jang e le gore go tle go seka ga nna motlhofo gore a raelesege go itshwaratshwara dirwe tsa tlhakanelo-dikobo?

◻ Ke ka ntlhayang fa go thusa go tlhabana ka tsela ya semoya?

◻ Thapelo e na le seabe sefe mo go fenyeng tlwaelo eno?

◻ Ke ka ntlhayang fa go thusa go ipolelela mongwe fa go na le bothata malebana le seno?

[Lebokoso/Setshwantsho mo go tsebe 208, 209]

Ditshwantsho Tse Di Hepisetsang Tlhakanelo-Dikobo—Di A Tshwakgola Ebile Di Diphatsa!

“Ditshwantsho tse di hepisetsang tlhakanelo-dikobo di gongwe le gongwe: fa o tsamaya mo mmileng—o fitlhela di supilwe phatlalatsa mo mafelong a kanamiso ya dikgang,” go gakologelwa jalo Ronald wa dingwaga tse 19. “Bangwe ba barutabana ba rona ba a tle ba tle sekolong ba di tshotse, ba di balele mo didesekeng tsa bone fa ba santse ba emetse go ruta tlelase e nngwe.” Ee, batho ba le bantsi ba dingwaga tse di farologaneng, ba matshelo a a farologaneng, le ba thutego e e farologaneng ke babadi ba ba tlhoafetseng ba dibuka tsa ditshwantsho tse di hepisetsang tlhakanelo-dikobo. Mosha mongwe yo o bidiwang Mark o ne a re: “Fa ke ne ke bala makasine wa basadi ba ba tshwanang fela lefa ba sa tswala mme ke leba ditshwantsho tse di hepisetsang tlhakanelo-dikobo ke ne ke tsholetsega maikutlo fela thata! . . . Ke ne ke lebelela pele ditokololong tse disha tsa dimakasine tseno ka gonne fa ke ne ke bala tseo ke neng ke setse ke di badile ke ne ke sa je monate ka tsela e e tshwanang. Go a tshwakgola.” A mme ke tlwaelo e e molemo?

Ditshwantsho tse di hepisetsang tlhakanelo-dikobo di na le molaetsa o mogolo thata o o reng: ‘Tlhakanelo-dikobo ke selo seo motho a ikgotsofatsang ka sone fela.’ Bontsi jwa tsone bo tletse ka petelelo le tlhakanelo-dikobo e e sokameng ya dikgoka. Batho ba le bantsi bao ba di lebelelang ka bokhutshwane fela ba fitlhela gore mefuta “e e seng maswe thata ya tsone” (tse di sa tsenelelang thata) ga di sa tlhole di ba gotetsa mme jalo ba batle ditshwantsho kana dibaesekopo tseo di leng maswe le eleng go feta! Fela jaaka Ernest van den Haag, mothusa-moporofesa wa New York University a ne a bolela: “Ditshwantsho tse di hepisetsang tlhakanelo-dikobo di re kgothaletsa go leba batho ba bangwe fela jaaka dirwe tsa nama, jaaka dilo tseo re ka di dirisetsang maikutlo a rona a go ijesa monate.”

Ditshwantsho tse di hepisetsang tlhakanelo-dikobo gape di dira gore motho a lebe tlhakanelo-dikobo ka tsela e e sokameng, jaaka modimo wa disetwa seo gantsi se gogelang mo mathateng a lenyalo. Mosadi mongwe yo mmotlana yo o nyetsweng o bolela jaana: “Fa ke ne ke bala dibuka tsa ditshwantsho tseo di hepisetsang tlhakanelo-dikobo go ne ga dira gore nna le monna wa me re eletse dilo tse di sa tlwaelesegang tseo di neng di bontshiwa mo dibukeng tseno. Seno se ne sa gogela mo go reng re khidiege le go kgobega marapo nako le nako fa re ne re tlhakanela dikobo.” Go ne ga dirwa patlisiso ka 1981 gareng ga basadi ba le makgolo a le mmalwa malebana le diphelelo tsa dibuka tsa ditshwantsho tse di hepisetsang tlhakanelo-dikobo mo tseleng eo ba dirisanang ka yone le banna bao ba ratanang nabo bao ba di balang. E ka nna sephatlo sa bone ba ne ba bega gore di ne di baka mathata a a masisi. Ebile tota di ne di senya manyalo mangwe le dipeelelano. Mosadi mongwe yo o nyetsweng o ne a bua jaana ka khutsafalo: “Ke tsaya fela gore ga ke kgone go kgotsofatsa se se tlhokwang le go elediwa ke [monna wa me] mo tlhakanelong-dikobo ereka a rata ditshwantsho tse di hepisetsang tlhakanelo-dikobo . . . Ke rapela Modimo gore ekete ke ka bo ke le mosadi yo o ka kgonang go mo kgotsofatsa, mme o rata go lebelela ditshwantsho le go bala dibuka tseo di hepisetsang tlhakanelo-dikobo mme seo a se tlhokang se nkoafaditse ka tsela nngwe. . . . Ditshwantsho tse di hepisetsang tlhakanelo-dikobo ga di . . . bontshe lorato . . . Di maswe fela thata, di setlhogo, ebile di a senya.”

Lefa go ntse jalo, seo basha ba Bakeresete ba tshwenyegileng ka sone thata ke lebaka la go bo ditshwantsho tse di hepisetsang tlhakanelo-dikobo di le kgatlhanong ka tlhamalalo le maiteko a motho a go nna phepa mo ponong ya Modimo. (2 Bakorintha 6:17–17:1) Bibela e bontsha gore batho bangwe mo metlheng ya bogologolo “ka go kgwaralala ga dipelo tsa bōnè” ba ne ba ‘helelwa ke maikutlo’ mme ba “ineèla mo bopepeñ, go diha mashwe aotlhe ka bopelotshètlha.” (Baefesia 4:18, 19) A o ka batla go itshenya ka tsela e e ntseng jalo? Gakologelwa, le eleng fa motho ka sewelo fela a lebelela ditshwantsho tse di hepisetsang tlhakanelo-dikobo seo se ka gobatsa segakolodi sa gagwe ka tsela nngwe. Go dirile gore basha bangwe ba Bakeresete ba itshwaratshware dirwe tsa tlhakanelo-dikobo mme, seo ebileng se le maswe go feta, ba dira boitsholo jo bo sa siamang jwa tlhakanelo-dikobo. Selo se se botlhale, he, ke go dira ka natla go sa amaneng ka gope le ditshwantsho tse di hepisetsang tlhakanelo-dikobo.

“Gantsi matlho a me a lebana ka tlhamalalo le ditshwantsho tse di hepisetsang tlhakanelo-dikobo,” go bolela jalo Darryl yo mmotlana. “Jalo ke patelesega go latlhela matlho a me mo go tsone; mme ga ke tlhoke go di leba labobedi.” Ee, gana go leba koo di supilweng teng phatlalatsa, gape gana go letlelela balekane ba gago ba sekolo go go kgarameletsa go di leba. Fela jaaka Karen wa dingwaga tse 18 a ne a akanya: “Jaaka motho yo o sa itekanelang, go bokete fela thata go leka go ipoloka ke akantse ka dilo tseo di itshekileng le tse di tlotlegang. A mme go tla bo go sa ketefaletse dilo kwa pele fa ka boomo ke bala dibuka tsa ditshwantsho tseo di hepisetsang tlhakanelo-dikobo?”

[Setshwantsho mo go tsebe 206]

“Thapelo ke nonofo e kgolo e motho o ka e bonang ka nako e khutshwane. Go thusa eletota fa o rapela ka nako eo keletso e tsogang ka yone”