Kgaolo ya Borataro

Jehofa Modimo o Utlwela Masalela Botlhoko

Isaia 4:2-6

1, 2. Moporofeti Isaia o bolelela pele eng kaga Juda le Jerusalema?

KGAOLO e e nang le baagi ba bantsi e tlhaselwa ke pula ya matlakadibe. Diphefo tsa matsubutsubu, dipula tsa matsorotsoro, le merwalela e megolo e ralala naga, e senya magae, e senya dijalo, e bolaya batho. Go ise go ye kae pula eo ya matlakadibe e a feta, mme go sala go sisibetse. Ke nako ya gore batho ba ba falotseng ba tsosolose dilo ba bo ba age sesha.

² Moporofeti Isaia o bolelela pele sengwe se se tshwanang le seo malebana le Juda le Jerusalema. Maru a pula ya matlakadibe ya katlholo ya Modimo a ntse a atamela ka tsela e e tshosang—mme ka lebaka le le utlwalang! Molato wa setšhaba o mogolo. Babusi mmogo le batho ba dirile gore naga e tlale go tlhoka tshiamiso le tshololo ya madi. Jehofa o dirisa Isaia go senola molato wa Juda a bo a tlhagisa gore O tla diragatsa katlholo mo setšhabeng seo sa diganana. (Isaia 3:25) Lefatshe la Juda le tla sala le kgakgabetse gotlhelele ka ntlha ya pula eno ya matlakadibe. Go akanya gore seo se tla diragala go tshwanetse ga bo go hutsafatsa Isaia.

 3. Molaetsa o o tlhotlheleditsweng o o mo go Isaia 4:2-6 o tshwere dikgang dife tse di molemo?

³ Mme go na le dikgang tse di molemo! Pula ya matlakadibe ya katlholo ya ga Jehofa ya tshiamo e tla feta, mme masalela a tla falola. Ee, katlholo ya ga Jehofa mo Juda e tla bo e tswakantswe le kutlwelobotlhoko! Molaetsa wa ga Isaia o o tlhotlheleditsweng o o kwadilweng mo go Isaia 4:2-6 o bolelela pele ka nako eno e e monate. Go ntse jaaka e kete letsatsi le tlhaba mo marung; dilo tse di bonwang le tse di utlwiwang ga e tlhole e le tsa katlholo—tse di tlhalositsweng mo go Isaia 2:6–4:1—mme jaanong ke tsa lefatshe le batho ba ba ntšhafaditsweng bontle.

 4. Ke ka ntlha yang fa re tshwanetse go tlotla ka boporofeti jwa ga Isaia malebana le go tsosolosiwa ga masalela?

⁴ Boporofeti jwa ga Isaia malebana le go tsosolosiwa ga masalela le go bolokesega ga one morago ga moo bo diragadiwa le mo motlheng wa rona—“go ela kwa bofelong jwa metlha.” (Isaia 2:2-4) A re tlhatlhobeng molaetsa ono o o mo nakong, gonne ga se fela gore o na le bokao jwa boporofeti mme gape o re ruta kaga kutlwelobotlhoko ya ga Jehofa le kafa mongwe le mongwe wa rona a ka e amogelang ka teng.

‘Letlhogela la ga Jehofa’

5, 6. (a) Isaia o tlhalosa jang nako ya kagiso e e tlang morago ga setsuatsue se se tlang? (b) Polelwana “letlhogela” e kaya eng, mme seno se bolelang kaga lefatshe la Juda?

⁵ Jaanong Isaia o bua ka tsela e e monate fa a bua ka nako ya morago ga setsuatsue se se tlang fa go tla bo go le kagiso. O kwala jaana: “Mo letsatsing leo se Jehofa a se tlhogisang [“se se tlhogang (letlhogela) sa ga Jehofa,” ntlhanyana e e kwa tlase go NW] e tla nna sa mokgabiso le kgalalelo, mme maungo a lefatshe a tla nna sengwe se go ipelafadiwang ka sone le sengwe se sentle mo go ba ba falotseng ba Iseraele.”—Isaia 4:2.

⁶ Fano Isaia o bua kaga tsosoloso. Leina la Sehebera le le ranotsweng go twe “letlhogela” le kaya ‘se se tlhogang, letswela, kala.’ Le amana le katlego, koketsego, le masego a a tswang kwa go Jehofa. Ka gone Isaia o neela tsholofelo—tshwafatso e e tlang ga e kitla e nnela ruri. Ka tshegofatso ya ga Jehofa, lefatshe le le kileng la bo le atlegile la Juda le tla boa gape le ntsha maungo a mantsi.a—Lefitiko 26:3-5.

 7. Letlhogela la ga Jehofa e tla nna la “mokgabiso le kgalalelo” ka tsela efe?

⁷ Isaia o dirisa mafoko a a tlhalosang sentle fa a tlhalosa bogolo jwa phetogo e e sa ntseng e tla tla. Letlhogela la ga Jehofa e tla “nna [la] mokgabiso le kgalalelo.” Lefoko “mokgabiso” le re gopotsa bontle jwa Naga e e Solofeditsweng fa Jehofa a ne a e naya Iseraele makgolo a dingwaga pelenyana ga foo. E ne e le ntle mo e leng gore e ne e tsewa e le “mokgabiso [“leje le le tlhwatlhwakgolo,” New American Bible] wa mafatshe otlhe.” (Esekiele 20:6) Ka gone mafoko a ga Isaia a tlhomamisetsa batho gore lefatshe la Juda le tla busediwa mo kgalalelong le mo bontleng jwa lone jwa pele. Eleruri le tla nna jaaka leje le le tlhwatlhwakgolo le le kgabisang mo lefatsheng.

 8. Ke bomang ba ba tla bong ba le teng gore ba itumelele bontle jo bo buseditsweng jwa lefatshe, mme Isaia o tlhalosa maikutlo a bone jang?

⁸ Le fa go ntse jalo, ke bomang ba ba tla bong ba le teng go itumelela bontle jo bo buseditsweng jwa lefatshe? Isaia o kwadile gore ke “ba ba falotseng ba Iseraele.” Ee, bangwe ba tla falola tshenyo e e tlhabisang ditlhong e e setseng e boleletswe pele. (Isaia 3:25, 26) Masalela a ba ba falotseng a tla boela kwa Juda mme a nne le seabe mo go e tsosoloseng. Mo bathong bano ba ba boang—“bafalodi”—maungo a mantsi a lefatshe la bone le le tsosolositsweng a tla nna “sengwe se go ipelafadiwang ka sone le sengwe se sentle.” (Isaia 4:2; ntlhanyana e e kwa tlase go NW) Go tlhabisiwa ditlhong ke tshwafatso go tla latelwa ke go ikutlwa ba tlotlometse gape.

 9. (a) Fela jaaka Isaia a ne a boletse, go ne ga diragala eng ka 537 B.C.E.? (b) Ke ka ntlha yang fa go ka twe “bafalodi” ba akaretsa bangwe ba ba tsholetsweng kwa botshwarong? (Bona ntlhanyana e e kwa tlase.)

⁹ Pula ya matlakadibe ya katlholo e ne ya goroga ka 607 B.C.E. fa Bababelona ba ne ba senya Jerusalema mme ga swa Baiseraele ba le bantsi, fela jaaka Isaia a ne a buile. Bangwe ba ne ba falola mme ba isiwa botshwarwa kwa Babelona, mme fa e ne e se ka kutlwelobotlhoko ya Modimo, go ka bo go sa nna le bafalodi bape. (Nehemia 9:31) Kgabagare, Juda o ne a sala a swafetse gotlhegotlhe. (2 Ditiragalo 36:17-21) Go tswa foo, ka 537 B.C.E., Modimo wa kutlwelobotlhoko o ne a letla “bafalodi” gore ba boele kwa Juda gore ba tsosolose kobamelo ya boammaaruri.b (Esera 1:1-4; 2:1) Go ikwatlhaya go tswa pelong ga batshwarwa bano ba ba boang go tlhalosiwa ka tsela e ntle mo go Pesalema 137, e e tshwanetseng ya bo e kwadilwe ka nako ya fa ba isiwa botshwarwa kana nako e khutshwane fela morago ga foo. Kwa Juda ba ne ba fitlha ba lema mmu ba bo ba jala peo. Akanya fela gore ba tshwanetse ba bo ba ne ba ikutlwa jang fa ba bona gore Modimo o ne a ba segofatsa mo maitekong a bone, a go dira gore lefatshe le tlhoge jaaka “tshingwana ya Edene” e e ungwang thata!—Esekiele 36:34-36.

10, 11. (a) Baithuti ba Baebele ba ne ba le mo botshwarong mo “Babelona o Mogolo” ka tsela efe kwa tshimologong ya lekgolo la bo20 la dingwaga? (b) Jehofa o ne a segofatsa masalela a Iseraele wa semoya jang?

¹⁰ Go diragetse tsosoloso e e tshwanang mo motlheng wa rona. Kwa tshimologong ya lekgolo la bo20 la dingwaga, Baithuti ba Baebele, jaaka Basupi ba ga Jehofa ba ne ba itsiwe ka nako eo, ba ne ba tsena mo botshwarong jwa semoya mo “Babelona o Mogolo,” mmusomogolo wa lefatshe lotlhe wa bodumedi jwa maaka. (Tshenolo 17:5) Le fa Baithuti ba Baebele ba ne ba latlhile dithuto di le dintsi tsa bodumedi jwa maaka, ba ne ba sa ntse ba tshwaeditswe ke dikgopolo le mekgwa mengwe ya Babelona. Ka ntlha ya kganetso e e tlhotlhelediwang ke baruti, bangwe ba bone ba ne ba tsenngwa mo kgolegelong ka tsela ya mmatota. Lefatshe la bone la semoya—boemo jwa bone jwa bodumedi kana jwa semoya—bo ne jwa sala bo swafetse.

¹¹ Mme ka dikgakologo tsa 1919, Jehofa o ne a utlwela masalela ano a Baiseraele ba semoya botlhoko. (Bagalatia 6:16) O ne a bona boikwatlhao jwa bone le keletso ya bone ya go mo obamela ka boammaaruri, ka jalo o ne a dira gore ba gololwe mo kgolegelong ya mmatota, mme sa botlhokwa le go gaisa, a dira gore ba gololwe mo botshwarong jwa semoya. “Bafalodi” bano ba ne ba busediwa mo nageng ya bone ya semoya e ba e neilweng ke Modimo, e a neng a dira gore e ungwe thata. Naga eno ya semoya e ile ya nna le tebego e e gogelang, e ntle, e e ileng ya gogela dimilione tsa batho ba bangwe ba ba boifang Modimo gore ba kopanele le masalela mo kobamelong ya boammaaruri.

12. Mafoko a ga Isaia a bontsha jang kutlwelobotlhoko e Jehofa a nang le yone mo bathong ba gagwe?

¹² Mafoko a ga Isaia fano a bontsha kutlwelobotlhoko e Modimo a nang le yone mo bathong ba gagwe. Le fa Baiseraele jaaka setšhaba ba ile ba tlhanogela Jehofa, o ne a utlwela masalela a a ikwatlhayang botlhoko. Re ka gomodiwa ke go itse gore tota le batho ba ba leofang mo go masisi ba ka boela kwa go Jehofa ba na le tsholofelo. Batho ba ba ikwatlhayang ga ba a tshwanela go akanya gore Jehofa a ka se ka a ba utlwela botlhoko, gonne ga a gane pelo e e ngomogileng. (Pesalema 51:17) Baebele e re tlhomamisetsa jaana: “Jehofa o kutlwelobotlhoko e bile o pelontle, o bonya go galefa e bile o na le bopelonomi jo bogolo jwa lorato. Fela jaaka rre a bontsha bomorwawe kutlwelobotlhoko, Jehofa o bontshitse ba ba mmoifang kutlwelobotlhoko.” (Pesalema 103:8, 13) Eleruri Modimo yo o kutlwelobotlhoko jalo o tshwanelwa ke gore re mmake thata!

Masalela a Nna Boitshepo mo go Jehofa

13. Jaaka go kwadilwe mo go Isaia 4:3, Isaia o tlhalosa jang masalela a a neng a tla bontshiwa kutlwelobotlhoko ke Jehofa?

¹³ Re setse re boleletswe ka masalela a a neng a tla bontshiwa kutlwelobotlhoko ke Jehofa, mme jaanong Isaia o ba tlhalosa go ya pele. O kwala jaana: “Go tla direga gore go twe ba ba setseng mo Siona le ba ba tlogetsweng mo Jerusalema ba boitshepo mo go ene, mongwe le mongwe yo o kwaletsweng botshelo mo Jerusalema.”—Isaia 4:3.

14. “Ba ba setseng” le “ba ba tlogetsweng” ke bomang, mme ke ka ntlha yang fa Jehofa a tla ba utlwela botlhoko?

¹⁴ “Ba ba setseng” le “ba ba tlogetsweng” ke bomang? Ke bafalodi ba ba umakilweng mo temaneng e e fetileng—batshwarwa ba Bajuda ba ba tla letlelelwang go boela kwa Juda. Jaanong Isaia o bontsha lebaka la go bo Jehofa a tla ba utlwela botlhoko—ba tla nna “boitshepo mo go ene.” Boitshepo bo kaya “bophepa kana boitsheko jwa bodumedi.” Go nna boitshepo go akaretsa go nna phepa, kgotsa go itsheka, ka lefoko le ka ditiro, go diragatsa melao ya ga Jehofa ya se se siameng le se se tshwanetseng. Ee, Jehofa o tla utlwela botlhoko ba ba “boitshepo mo go ene,” mme o tla ba letla gore ba boele kwa ‘motseng o o boitshepo,’ Jerusalema.—Nehemia 11:1.

15. (a) Polelwana e e reng “kwaletsweng botshelo mo Jerusalema” e re gopotsa tlwaelo efe ya Bajuda? (b) Mafoko a ga Isaia a fa tlhagiso efe e e masisi?

¹⁵ A masalela ano a a ikanyegang a tla nna a le koo? Isaia o solofetsa gore ba tla ‘kwalelwa botshelo kwa Jerusalema.’ Seno se re gopotsa tlwaelo ya Bajuda ya go boloka direkoto tsa maina tsa malapa le ditso tsa Iseraele ka kelotlhoko. (Nehemia 7:5) Fa motho a kwadilwe mo direkotong tsa maina go ne go kaya gore o a tshela, gonne fa a swa, leina la gagwe le ne le tlosiwa. Mo mafelong a mangwe mo Baebeleng, re bala ka rekoto ya maina ya tshwantshetso, kana buka, e e nang le maina a batho ba Jehofa a ba duelang ka botshelo. Mme buka eno go kwalwa maina mo go yone ka mabaka mangwe, gonne Jehofa a ka ‘phimola’ maina mo go yone. (Ekesodo 32:32, 33; Pesalema 69:28) Ka jalo, mafoko a ga Isaia a na le tlhagiso e e masisi—batho ba ba boang ba ka tswelela pele ba tshela mo lefatsheng la bone le le tsosolositsweng fa fela ba tswelela ba le boitshepo mo matlhong a Modimo.

16. (a) Jehofa o ne a batla eng mo bathong ba ba neng ba letlelelwa go boela kwa Juda ka 537 B.C.E.? (b) Ke ka ntlha yang fa go ka bolelwa gore kutlwelobotlhoko ya ga Jehofa mo masaleleng a a tloditsweng le mo ‘dinkung tse dingwe’ e ne e se ya lefela?

¹⁶ Ka 537 B.C.E., masalela a a neng a boela Jerusalema a ne a dira jalo ka maitlhomo a a siameng—a go busetsa kobamelo e e itshekileng. Motho ope fela yo o neng a leswefaditswe ke mekgwa ya bodumedi ya boheitane kana boitsholo jo bo seng phepa jo Isaia a neng a tlhagisitse thata ka jone o ne a sa tshwanela go boa. (Isaia 1:15-17) Batho ba Jehofa a neng a ba leba ba le boitshepo ke bone fela ba neng ba ka boela kwa Juda. (Isaia 35:8) Ka tsela e e tshwanang, fa e sa le a gololwa mo botshwarong jwa semoya ka 1919, masalela a a tloditsweng, a jaanong a patilweng ke dimilione tsa “dinku tse dingwe”—tse di nang le tsholofelo ya go tshelela ruri mo lefatsheng—a dirile ka bojotlhe gore a nne boitshepo mo matlhong a Modimo. (Johane 10:16) A tlogetse dithuto le mekgwa ya kwa Babelona. Mongwe le mongwe wa bone o leka go dumalana le melao ya Modimo ya maemo a a kwa godimo ya boitsholo. (1 Petere 1:14-16) Kutlwelobotlhoko ya ga Jehofa mo go bone ga e a nna ya lefela.

17. Jehofa o kwala maina a bomang mo “bukeng ya botshelo” ya gagwe, mme re tshwanetse ra ititaya sehuba go dira eng?

¹⁷ Gakologelwa gore Jehofa o ne a lemoga bao kwa Iseraele ba neng ba le boitshepo mme a ‘kwalela maina a bone botshelo.’ Le gompieno, Jehofa o lemoga maiteko a rona a go nna phepa mo mogopolong le mo mmeleng fa re ntse re ‘isa mebele ya rona setlhabelo se se tshelang, se se boitshepo, se se amogelesegang mo Modimong.’ (Baroma 12:1) Gape Modimo o kwala botlhe ba ba latelang tsela e e ntseng jalo ya botshelo mo ‘bukeng ya gagwe ya botshelo’—rekoto ya tshwantshetso e e nang le maina a batho ba ba tlileng go amogela botshelo jo bo sa khutleng, e ka tswa e le kwa legodimong kana mo lefatsheng. (Bafilipi 4:3; Malaki 3:16) Ka gone, a re lekeng ka natla yotlhe gore re nne re ntse re le boitshepo mo matlhong a Modimo, gonne ke gone re tla kgonang go dira gore maina a rona a nne a le mo “bukeng” eo e e botlhokwa thata.—Tshenolo 3:5.

Go Solofediwa Tlhokomelo e e Lorato

18, 19. Go ya ka Isaia 4:4, 5, Jehofa o tla dira go phepafadiwa gofe, mme go tla diragadiwa jang?

¹⁸ Go tswa foo Isaia o bontsha kafa banni ba lefatshe le le tsosolositsweng ba tla nnang boitshepo ka gone le masego a a tla ba tlelang. A re: “Fa Jehofa a tla bo a tlhatswitse mantle a bomorwadia Siona a ba a tsokotsa le yone tshololo ya madi ya Jerusalema mo teng ga gagwe ka moya wa katlholo le ka moya wa go fisa, ruri Jehofa o tla dira leru motshegare le mosi, le phatsimo ya molelo o o tutumang bosigo mo godimo ga lefelo lengwe le lengwe le le tlhomameng la Thaba ya Siona le mo godimo ga lefelo la gagwe la kopano; ka gonne go tla nna le boitshireletso mo godimo ga kgalalelo yotlhe.”—Isaia 4:4, 5.

¹⁹ Pelenyana ga foo Isaia o ne a kgala “bomorwadia Siona,” ba ba neng ba bipile boitsholo jwa bone jo bo maswe ka mekgabisa ya bone ya go itshupa. Gape o ne a senola molato wa madi wa batho ka kakaretso, a ba rotloetsa gore ba tlhape. (Isaia 1:15, 16; 3:16-23) Le fa go ntse jalo, fano gone o lebile kwa pele kwa nakong e Modimo ka boene a tla bong a “tlhatswitse mantle,” kana leswe la boitsholo mme a ‘tlhatswitse dilabe tsa madi.’ (Isaia 4:4, New International Version) Go phepafadiwa mo go tla dirwa jang? Ka “moya wa katlholo” le ka “moya wa go fisa.” Tshenyo e e tlang ya Jerusalema le go isiwa botshwarwa kwa Babelona e tla bo e le bogale jwa katlholo ya Modimo le bogale jo bo tukelang setšhaba seno se se seng phepa. Masalela a a falolang masetlapelo ano a bo a boela gae a tla bo a kokobeditswe, a phepafaditswe. Ke gone ka moo ba tla bong ba le boitshepo mo go Jehofa mme ba amogele kutlwelobotlhoko.—Bapisa Malaki 3:2, 3.

20. (a) Dipolelwana tse di reng “leru,” “mosi,” le “molelo o o tutumang” di re gopotsa eng? (b) Ke ka ntlha yang fa batshwarwa ba ba phepafaditsweng ba se kitla ba boifa?

²⁰ Jehofa o dirisa Isaia go solofetsa gore masalela ano a a phepafaditsweng, o tla a tlhokomela ka lorato. Dipolelwana tse di reng “leru,” “mosi,” le “molelo o o tutumang” di re gopotsa kafa Jehofa a neng a tlhokomela Baiseraele ka gone fa ba se na go tswa kwa Egepeto. “Pilara ya molelo le leru” e ne e ba sireletsa mo Baegepetong ba ba neng ba ba setse morago; gape e ne e ba etelela pele mo nageng. (Ekesodo 13:21, 22; 14:19, 20, 24) Fa Jehofa a ne a iponatsha kwa Thabeng ya Sinai, thaba e ne ya “kua mosi gotlhe fela.” (Ekesodo 19:18) Ka gone, batshwarwa ba ba phepafaditsweng ga ba ne ba boifa. Jehofa o tla nna Mosireletsi wa bone. O tla nna le bone fa ba kokoana mo malwapeng a bone kana fa ba kopane mmogo mo dikopanong tse di boitshepo.

21, 22. (a) Gantsi loobo, kana mokgoro, o ne o agelwa eng? (b) Masalela a a phepafaditsweng a na le tsholofelo efe?

²¹ Isaia o konela tlhaloso ya gagwe ya kafa Modimo a sireletsang ka gone ka go bua ka botshelo jwa letsatsi le letsatsi. O kwala jaana: “Go tla nna le loobo lwa moriti motshegare go sireletsa mo mogoteng o o babolang, le go nna botshabelo le lefelo la go iphitlha mo puleng ya matsubutsubu le mo go nelweng.” (Isaia 4:6) Loobo, kana mokgoro, gantsi o ne o agiwa mo tshimong ya mofine kana mo masimong go sireletsa motho mo letsatsing le le fisang la paka ya selemo le mo serameng le mo dipuleng tsa matlakadibe tsa paka ya dipula.—Bapisa Jona 4:5.

²² Fa ba lebane le mogote o o babolang wa pogiso le dipula tsa matlakadibe tsa kganetso, masalela a a phepafaditsweng a tla fitlhela Jehofa e le Motswedi wa bone wa tshireletso, pabalesego, le botshabelo. (Pesalema 91:1, 2; 121:5) Ka jalo ba newa tsholofelo e ntle: Fa ba tlogela ditumelo le mekgwa e e seng phepa ya Babelona, ba ineela gore ba phepafadiwe ke katlholo ya ga Jehofa, mme ba leka go nna ba le boitshepo, ba tla nna ba bolokesegile, jaaka e kete ba mo ‘loobong’ lwa tshireletso ya Modimo.

23. Ke ka ntlha yang fa Jehofa a segofaditse masalela a a tloditsweng le balekane ba bone?

²³ Ela tlhoko gore go tla go phepafadiwa pele, mme go latele ditshegofatso. Seno se diragetse le mo motlheng wa rona. Morago kwa ka 1919, masalela a a tloditsweng a ne a ineela ka boikokobetso gore a phepafadiwe, mme Jehofa a “tlhatswa” leswe la bone. Fa e sa le ka nako eo, “boidiidi jo bogolo” jwa dinku tse dingwe le bone ba letlile gore Jehofa a ba phepafatse. (Tshenolo 7:9) Fa masalela le balekane ba bone ba phepafaditswe jalo, ba segofaditswe—Jehofa o simolotse go ba tlhokomela ka lorato. Ga a dire gore ka kgakgamatso mogote wa pogiso kana dipula tsa matlakadibe tsa kganetso di se ka tsa ba gatelela. Mme gone o a ba sireletsa, jaaka e kete o ba agela ‘loobo lwa moriti le lefelo la go iphitlha mo puleng ya matsubutsubu.’ Jang?

24. Go bonala jang gore Jehofa o segofaditse batho ba gagwe jaaka phuthego?

²⁴ Akanya ka seno: Mengwe ya mebuso e e maatla thata mo hisitoring e ile ya thibela tiro ya Basupi ba ga Jehofa ya go rera kana ya leka go ba fedisa gotlhelele. Le fa go ntse jalo, Basupi ba ntse ba nonofile mme ba ntse ba tswelela pele ba rera ba sa ineele! Ke ka ntlha yang fa mebuso e e maatla e sa kgona go emisa tiro ya setlhopha seno se sennye sa batho ba go lebegang ba sa sireletsega? Ka gonne Jehofa o beile batlhanka ba gagwe ba ba phepa mo ‘loobong’ lwa tshireletso lo go seng motho ope yo o ka lo senyang!

25. Go bo Jehofa e le Mosireletsi wa rona go ama mongwe le mongwe wa rona jang?

²⁵ Go tweng ka mongwe le mongwe wa rona? Go bo Jehofa e le Mosireletsi wa rona ga go reye gore re tshela re se na mathata mo tsamaisong eno ya dilo. Bakeresete ba le bantsi ba ba ikanyegang ba lebana le dipitlagano tse di masisi, tse di jaaka khumanego, masetlapelo a tlholego, ntwa, bolwetse, le loso. Fa re lebane le mathata a a ntseng jalo, a le ka motlha re se ka ra lebala gore Modimo wa rona o na le rona. O re sireletsa semoyeng, a re naya se re se tlhokang—tota le “maatla a a fetang a a tlwaelegileng”—gore re itshokele diteko ka boikanyegi. (2 Bakorintha 4:7) E re ka re babalesegile fa re na le ene, ga re a tshwanela go boifa. Kana e bile, fa fela re dira ka natla yotlhe gore re nne re le boitshepo mo matlhong a gagwe, ga go na sepe se se tla ‘kgonang go re kgaoganya le lorato lwa Modimo.’—Baroma 8:38, 39.

[Dintlha tse di kwa tlase]

[Setshwantsho mo go tsebe 63]

Juda o tlelwa ke pula ya matlakadibe ya katlholo ya Modimo