Kgaolo Ya Bobedi

Godisa Jehofa Jaaka Modimo yo o Esi wa Boammaaruri

 1. Modimo yo o esi wa boammaaruri ke mang?

BAEBELE e bolela gore le fa go na le ba bantsi ba go tsewang e le medimo, “mo go rona go na le Modimo a le mongwe e bong Rara.” (1 Bakorintha 8:5, 6) “Modimo a le mongwe” yoo ke Jehofa, Mmopi wa dilo tsotlhe. (Duteronome 6:4; Tshenolo 4:11) Jesu o ne a mmitsa ‘Modimo wa me le Modimo wa lona.’ (Johane 20:17) O ne a dumalana le Moshe, yo o neng a boletse jaana pelenyana: “Jehofa ke Modimo wa boammaaruri; ga go na ope yo mongwe kwantle ga gagwe.” (Duteronome 4:35) Jehofa o mogolo thata go feta dilo dipe tse di obamelwang, tse di jaaka medingwana, batho ba ba dirilweng medimo, kgotsa mmaba wa gagwe, Satane Diabolo, “modimo wa tsamaiso eno ya dilo.” (2 Bakorintha 4:3, 4) Go fapaana le medimo eno yotlhe, Jehofa, jaaka Jesu a ne a mmitsa, ke “Modimo yo o esi wa boammaaruri.”—Johane 17:3.

 2. Fa re ntse re ithuta ka Modimo, matshelo a rona a tshwanetse a amega jang?

² Batho ba ba anaanelang ba ba ithutang ka dinonofo tse di molemo tsa Modimo, mmogo le se a se re diretseng, le se a sa ntseng a tla se re direla, ba ikutlwa ba mo rata. Fa lorato lo ba ratang Jehofa ka lone lo ntse lo gola, ba ikutlwa ba tlhotlhelediwa go mo godisa. Jang? Tsela e nngwe ke ka go bolelela batho ba bangwe ka ga gagwe. Baroma 10:10 ya re: “Motho o . . . dira polelo phatlalatsa ka molomo go bona poloko.” Tsela e nngwe ke ka go mo etsa ka se re se buang le se re se dirang. Baefeso 5:1 ya re: “Nnang baetsi ba Modimo, jaaka bana ba ba rategang.” Gore re dire jalo ka botlalo, re tshwanetse ra itse gore tota Jehofa o ntse jang.

 3. Dinonofo tsa Modimo tsa konokono ke dife?

³ Mo Baebeleng yotlhe go na le dipolelo di le dintsi tse di bolelang dinonofo tsa Modimo tse di tlhomologileng. Dinonofo tsa gagwe tse nnè tsa konokono ke botlhale, tshiamiso, maatla le lorato. “O na le botlhale.” (Jobe 12:13) “Ditsela tsotlhe tsa gagwe di tshiamiso.” (Duteronome 32:4) O na le “nonofo e kgolo.” (Isaia 40:26) “Modimo ke lorato.” (1 Johane 4:8) Le fa go ntse jalo, mo dinonofong tsa Modimo tse nnè tsa konokono, ke efe e e tlhomologileng go feta tse dingwe, e e bontshang go feta tse dingwe tsotlhe gore ke Modimo wa mofuta ofe?

“Modimo ke Lorato”

 4. Ke efe ya dinonofo tsa Modimo e e neng ya mo rotloetsa go bopa lobopo le ditshedi tsotlhe?

⁴ Akanya ka se se tlhotlheleditseng Jehofa go bopa lobopo le dibopiwa tse di botlhale tsa semoya le tse e leng batho. A e ne e le botlhale jwa gagwe kgotsa maatla a gagwe? Nnyaa, gonne le fa Modimo a ne a di dirisa, ga se tsone di mo tlhotlheleditseng. Mme tshiamiso ya gagwe e ne e sa tlhoke gore a neye ope mpho ya botshelo. Go na le moo, lorato lo logolo lwa Modimo lo ne lwa mo rotloetsa gore a neye ba bangwe botshelo gore ba tshele e le ditshedi tse di botlhale mmogo le ene. Lorato lo ne lwa mo tlhotlheletsa gore a ikaelele gore batho ba ba kutlo ba tshelele ruri mo Paradaiseng. (Genesise 1:28; 2:15) Lorato lo ne lwa dira gore a rulaganye gore katlholo e e tliseditsweng batho ka ntlha ya molato wa ga Adame e tlosiwe.

 5. Go ya ka Baebele, Jehofa ke mothofatso ya nonofo efe, mme ka ntlha yang?

⁵ Ka gone, mo dinonofong tsotlhe tsa Modimo, e e tlhomologileng thata ke lorato lwa gagwe. Ke se a leng sone. Le fa botlhale, tshiamiso le nonofo tsa gagwe di le botlhokwa jaana, Baebele ga e ke e re Jehofa ke nngwe ya tsone. Mme gone ya re ke lorato. Ee, Jehofa ke mothofatso ya lorato. Lono ke lorato lo lo kaelwang ke molaomotheo e seng ke maikutlo. Lorato lwa Modimo lo laolwa ke melaometheo ya boammaaruri le tshiamo. Ke mofuta o o tlhomologileng thata wa lorato, o o bonalang sentle mo go Jehofa Modimo ka boene. Lorato lo lo ntseng jalo lo bontsha go tlhoka bopelotshetlha gotlhelele mme ka metlha lo a bo lo ntse lo patilwe ke ditiro tse e leng bosupi jo bo lo bontshang sentle.

 6. Ke eng se se dirang gore re kgone go etsa Modimo le fa a le mogolo mo go rona?

⁶ Nonofo eno e e molemolemo ya lorato ke yone e dirang gore re kgone go etsa Modimo yo o ntseng jalo. E re ka re le batho ba maemo a a kwa tlase, ba ba sa itekanelang, ba ba dirang diphoso, re ka nna ra akanya gore re ka se ka ra kgona go dira jalo. Mme sekai se sengwe sa lorato lo logolo lwa ga Jehofa ke seno: O lemoga go tlhaela ga rona e bile ga a lebelela gore re dire dilo jaaka batho ba ba itekanetseng. O a itse gore gone jaanong ga re a itekanela le e seng. (Pesalema 51:5) Ke gone ka moo Pesalema 130:3, 4 e reng: “Fa nkabo o lebelela ditlolo, wena Jah, Jehofa, ke mang yo o neng a ka ema? Gonne o na le boitshwarelo jwa boammaaruri.” Ee, Jehofa ke “Modimo yo o kutlwelobotlhoko le yo o pelontle, yo o bonya go galefa le yo o nang le bopelonomi jo bogolo jwa lorato.” (Ekesodo 34:6) “Wena, Jehofa, o molemo e bile o iketleeleditse go itshwarela.” (Pesalema 86:5) A bo seo se gomotsa jang ne! A bo go lapolosa jang ne go direla Modimo yono yo o molemolemo le go tlhokomelwa ke ene ka tsela e e lorato le pelotlhomogi!

 7. Lorato lwa ga Jehofa lo ka bonwa jang mo ditirong tsa gagwe tsa popo?

⁷ Lorato lwa ga Jehofa lo ka bonwa le mo ditirong tsa gagwe tsa popo. Akanya ka dilo tse dintsi tse di molemo tse Jehofa a re fileng tsone gore re di itumelele, tse di jaaka dithaba tse dintle, dikgwa, makadiba le mawatle a mantle. O re neile dijo ka mefutafuta ya tsone e e gakgamatsang gore di re itumedise le go re boloka re tshela. Gape, Jehofa o dirile mefuta e mentsi ya dithunya tse dintle tse di nkgang monate mmogo le diphologolo tse di kgatlhang. O dirile dilo tse di neng di tla itumedisa batho le fa a ne a sa patelesege go dira jalo. Ee gone, e re ka re tshela mo lefatsheng leno le le boikepo re sa itekanela, ga re kgone go itumelela popo ya gagwe ka botlalo. (Baroma 8:22) Mme akanya fela ka se Jehofa a tla se re direlang kwa Paradaiseng! Mopesalema o re tlhomamisetsa jaana: “O bula seatla sa gago o kgotsofatse keletso [e e tshwanetseng] ya setshedi sengwe le sengwe.”—Pesalema 145:16.

 8. Sekai se segolo go gaisa tsotlhe sa kafa Jehofa a re ratang ka teng ke sefe?

⁸ Sekai se segolo thata se se bontshang kafa Jehofa a ratang batho ka teng ke sefe? Baebele e tlhalosa jaana: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Johane 3:16) A Jehofa o dirile seno ka gonne motho a dirile molemo mongwe? Baroma 5:8 e araba jaana: “Modimo o supa lorato lwa gagwe mo go rona ka tsela ya gore, fa re ne re sa ntse re le baleofi, Keresete o ne a re swela.” Ee ruri, Modimo o rometse Morwawe yo o itekanetseng mo lefatsheng gore a ntshe botshelo jwa gagwe setlhabelo sa thekololo gore a re rekolole mo boleong le mo losong. (Mathaio 20:28) Seno se ne sa bulela batho ba ba ratang Modimo tsela ya gore ba bone botshelo jo bo sa khutleng. Se se itumedisang ke gore Modimo o rata batho botlhe ba ba batlang go dira thato ya gagwe, gonne Baebele e re bolelela jaana: “Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.”—Ditiro 10:34, 35.

 9. Lebaka la go bo Jehofa a re neile Morwawe go re rekolola le tshwanetse la re tlhotlheletsa jang?

⁹ Lebaka la go bo Jehofa a ntshitse Morwawe go re rekolola, a re bulela tsela e e yang botshelong jo bo sa khutleng, le tshwanetse la tlhotlheletsa jang tsela e re dirisang matshelo a rona ka yone gone jaanong? Le tshwanetse la nonotsha lorato lo re ratang Modimo wa boammaaruri, Jehofa ka lone. Gape, le tshwanetse la dira gore re batle go reetsa Jesu, yo o emelang Modimo. “[Jesu] o ne a swela botlhe gore ba ba tshelang ba tle ba se ka ba tlhola ba itshelela, mme ba tshelele ene yo o neng a ba swela.” (2 Bakorintha 5:15) A bo go itumedisa jang ne go tsamaya mo dikgatong tsa ga Jesu, ka gonne o ne a re tlhomela sekao ka go etsa lorato le kutlwelobotlhoko ya ga Jehofa! Seno se bontshiwa ke se Jesu a neng a se raya baikokobetsi: “Tlang mo go nna, lona lotlhe ba lo dirang ka natla le ba lo imelwang, mme ke tla lo lapolosa. Rwalang jokwe ya me mme lo ithute mo go nna, gonne ke bonolo e bile ke boikokobetso mo pelong, mme lo tla bonela meya ya lona tapologo. Gonne jokwe ya me e bopelonomi le morwalo wa me o motlhofo.”—Mathaio 11:28-30.

Go Bontsha ba Bangwe Lorato

10. Ditsela dingwe tse re ka bontshang Bakeresete ka rona lorato ka tsone ke dife?

¹⁰ Re ka bontsha jang gore re rata Bakeresete ka rona ka lorato lo Jehofa le Jesu ba re ratang ka lone? Ela tlhoko ditsela tse dintsi tse re ka dirang seo ka tsone: “Lorato lo pelotelele e bile lo pelonomi. Lorato ga lo fufege, ga lo ikgantshe, ga lo ikgogomose, ga lo itshware ka tsela e e sa tshwanelang, ga lo ipatlele melemo ya lone fela, ga lo gakatsege. Ga lo nnele go gopola kutlwisobotlhoko. Ga lo ipelele tshiamololo, mme lo ipela le boammaaruri. Lo emelana le dilo tsotlhe, lo dumela dilo tsotlhe, lo solofela dilo tsotlhe, lo itshokela dilo tsotlhe. Lorato ga lo ke lo fela.”—1 Bakorintha 13:4-8; 1 Johane 3:14-18; 4:7-12.

11. Re tshwanetse go rata le bomang gape, mme re dire jalo jang?

¹¹ Ke bomang gape ba re tshwanetseng go ba rata, mme re ka dira jalo jang? Jesu o ne a re: “Jalo tsamayang mme lo dire batho ba ditšhaba tsotlhe barutwa, lo ba kolobetse mo leineng la Rara le la Morwa le la moya o o boitshepo, lo ba rute go boloka dilo tsotlhe tse ke di lo laetseng.” (Mathaio 28:19, 20) Seno se akaretsa go bolelela batho ba ba iseng ba nne Bakeresete ka rona dikgang tse di molemo tsa lefatshe le lesha le le tlang la Modimo la sekaparadaise. Jesu o ne a bontsha sentle gore ga re a tshwanela go rata fela batho ba ba dumelang mmogo le rona, ka gonne o ne a re: “Fa lo rata ba ba lo ratang [fela], lo na le maduo afe? A bakgethisi le bone ga ba dire sone seo? Mme fa lo dumedisa bakaulengwe ba lona fela, ke eng se se sa tlwaelegang se lo se dirang? A batho ba ditšhaba le bone ga ba dire sone seo?”—Mathaio 5:46, 47; 24:14; Bagalatia 6:10.

“Tsamaya mo Leineng la ga Jehofa”

12. Ke eng fa leina la Modimo le ka dira mo go ene fela?

¹² Karolo e nngwe ya botlhokwa ya go godisa leina la Modimo wa boammaaruri ke go itse, go dirisa, le go ruta ba bangwe leina la gagwe le le sa tshwaneng le lepe, Jehofa. Mopesalema o ne a bolela keletso eno e e tswang pelong jaana: “Gore batho ba tle ba itse gore wena, yo leina la gago e leng Jehofa, wena o le esi o Mogodimodimo yo o okametseng lefatshe lotlhe.” (Pesalema 83:18) Leina Jehofa le kaya “O Dira Gore go Diragale.” Ke ene Modiragatsamaikaelelo yo Mogolo, yo ka dinako tsotlhe a dirang gore maikaelelo a gagwe a wele ka katlego. Mme Modimo wa boammaaruri ke ene fela a nang le tshwanelo ya go bidiwa ka leina leo, ka gonne batho ga ba ke ba itse gore a maiteko a bone a tla atlega. (Jakobe 4:13, 14) Jehofa ke ene fela a ka bolelang gore lefoko la gagwe “ruri le tla atlega” mo go se a le rometseng kwa go sone. (Isaia 55:11) Batho ba le bantsi ba a kgatlhega fa ba simolola go bona leina la Modimo mo Dibaebeleng tsa bone ba bo ba utlwa gore le kaya eng. (Ekesodo 6:3) Mme kitso eno e tla ba solegela molemo fela fa ba “tsamaya mo leineng la ga Jehofa . . . ka bosaengkae.”—Mika 4:5.

13. Go itse leina la ga Jehofa le go tsamaya mo leineng la gagwe go akaretsa eng?

¹³ Pesalema 9:10 e bolela jaana malebana le leina la Modimo: “Ba ba itseng leina la gago ba tla go ikanya.” Seno ga se kgang fela ya go itse ka leina la Jehofa, ka gonne seo ka bosone fela ga se reye gore re a mo ikanya. Go itse leina la Modimo go kaya go tlhaloganya gore Jehofa ke Modimo wa mofuta ofe, go tlotla bolaodi jwa gagwe, go utlwa ditaolo tsa gagwe, go mo ikanya mo dilong tsotlhe. (Diane 3:5, 6) Ka tsela e e tshwanang, go tsamaya mo leineng la ga Jehofa go kaya go ineela mo go ene le go mo emela jaaka mongwe wa baobamedi ba gagwe, go dirisa botshelo jwa rona go dumalana le thato ya Modimo tota. (Luke 10:27) A o dira jalo?

14. Fa re batla go direla Jehofa ka bosakhutleng, go tlhokega eng kwantle ga go dira fela ka gonne re ikutlwa re tshwanetse go dira jalo?

¹⁴ Fa re batla go direla Jehofa ka bosakhutleng, ga re a tshwanela go dira fela ka gonne re ikutlwa re tshwanetse go dira jalo. Moaposetoloi Paulo o ne a rotloetsa Timotheo jaana, yo o neng a ntse a direla Jehofa ka dingwaga di le dintsi: “Ithapise, mokgele wa gago e le boineelo jwa bomodimo.” (1 Timotheo 4:7) Boineelo bo tswa mo pelong e e tletseng kanaanelo ka motho yo go ineetsweng mo go ene. “Boineelo jwa bomodimo” bo bontsha tlotlo e e tseneletseng ka Jehofa ka boene. Bo bontsha go mo rata ka ntlha ya gore o mo tseela kwa godimo tota e bile o tseela le ditsela tsa gagwe kwa godimo. Bo dira gore re batle gore mongwe le mongwe a tseele leina la gagwe kwa godimo. Re tshwanetse ra nna le boineelo jwa bomodimo mo matshelong a rona fa re batla go tsamaya mo leineng la ga Jehofa, Modimo yo o esi wa boammaaruri, ka bosakhutleng.—Pesalema 37:4; 2 Petere 3:11.

15. Re ka naya Modimo boineelo jo bo feletseng jang?

¹⁵ Fa re batla go direla Modimo ka tsela e a e amogelang, re tshwanetse ra obamela ene fela, ka gonne ke “Modimo yo o batlang boineelo jo bo feletseng.” (Ekesodo 20:5) Re ka se ka ra rata Modimo mme gape ra rata lefatshe le le boikepo le Satane e leng modimo wa lone. (Jakobe 4:4; 1 Johane 2:15-17) Jehofa o a itse gore tota mongwe le mongwe wa rona o leka go nna motho wa mofuta mang. (Jeremia 17:10) Fa ruri re rata tshiamo, o a bona mme o tla re thusa go itshokela diteko tsa rona tsa letsatsi le letsatsi. O tla re thusa go fenya boikepo jo bo tletseng jaana mo lefatsheng leno, a re tshegetsa ka moya wa gagwe o o boitshepo o o maatla. (2 Bakorintha 4:7) Gape o tla re thusa gore re nne re na le tsholofelo e e nonofileng ya go tshelela ruri mo lefatsheng la paradaise. A bo e le tsholofelo e e molemo jang ne! Re tshwanetse ra e anaanela tota mme re iketleetse go direla Modimo wa boammaaruri, Jehofa, yo o re fang yone.

16. O tshwanetse wa batla go kopanela le batho ba bangwe ba le dimilione mo go direng eng?

¹⁶ Dimilione tsa batho mo lefatsheng lotlhe ba ile ba amogela ka boitumelo taletso ya mopesalema yo o neng a kwala jaana: “Godisang Jehofa le nna, a re godiseng leina la gagwe mmogo.” (Pesalema 34:3) Jehofa o go laletsa gore o nne gareng ga boidiidi jo bo ntseng bo gola mo ditšhabeng tsotlhe jo bo dirang jalo.

Motlotlo wa Poeletso

• Jehofa ke motho wa mofuta ofe? Re solegelwa molemo jang fa re tlhaloganya dinonofo tsa gagwe sentle?

• Re ka thusa batho ba bangwe jang go ithuta boammaaruri ka Modimo?

• Go itse leina la ga Jehofa le go tsamaya mo leineng la gagwe go akaretsa eng?

[Ditshwantsho mo go tsebe 14]

Jehofa ka lorato lwa gagwe lo logolo, ‘o tla bula seatla sa gagwe a kgotsofatse keletso ya setshedi sengwe le sengwe’