Lebaka La go Bo re Tshwanetse go Bereka

KE ENG se o se ratang thata, a ke go bereka kgotsa go tshameka?— Tota ga go sepe se se phoso ka go tshameka. Baebele ya re Jerusalema e ne e “tlala basimane le basetsana ba tshameka mo dipatlelong.”—Sekarea 8:5.

Morutisi yo Mogolo o ne a itumelela go lebelela bana ba tshameka. Pele ga a tla mo lefatsheng, o ne a re: “Ke ne ke le fa thoko ga [Modimo] ke le modiri yo o setswerere . . . ke itumela fa pele ga gagwe ka dinako tsotlhe.” Ela tlhoko gore Jesu o ne a bereka le Jehofa kwa legodimong. Mme fa a le koo, o ne a re: “Dilo tse ke neng ke di rata di ne di na le bomorwa batho.” Ee, jaaka re ithutile pelenyana, Morutisi yo Mogolo o ne a rata mongwe le mongwe, le bana.—Diane 8:30, 31.

A o akanya gore Jesu o ne a tshameka fa e ne e le ngwana?— Gongwe o ne a tshameka. Mme ka gonne e ne e le “modiri yo o setswerere” kwa legodimong, a o ne a bereka le fa a ne a le mo lefatsheng?— Jesu o ne a bidiwa “morwa mmetli wa dikgong.” Mme gape o ne a bidiwa “mmetli wa dikgong.” Seno se bontsha eng?— Se bontsha gore Josefa, yo o neng a godisitse Jesu e le morwawe, o tshwanetse a bo a ne a mo rutile. Ka jalo Jesu le ene o ne a nna mmetli wa dikgong.—Mathaio 13:55; Mareko 6:3.

Jesu e ne e le mmetli wa dikgong yo o ntseng jang?— E re ka e ne e le modiri yo o setswerere kwa legodimong, a ga o akanye gore o ne a nna mmetli yo o setswerere wa dikgong mo lefatsheng?— Akanya fela gore go tshwanetse ga bo go ne go le thata jang go nna mmetli wa dikgong ka nako eo. Gongwe Jesu o ne a tshwanetse go ya go rema setlhare, a se sege, a rwale dikgong a di ise gae, a bo a betla legong go dira ditafole, ditulo le dilo tse dingwe.

A o akanya gore tiro eno e ne e itumedisa Jesu?— A wena o ne o tla itumela fa o ne o kgona go dira ditafole, ditulo le dilo tse dingwe tse dintle tse batho ba neng ba kgona go di dirisa?— Baebele ya re go molemo gore motho a “ipele mo ditirong tsa gagwe.” Tiro e dira gore motho a itumele go feta kafa a ka itumelang ka gone fa a tshameka.—Moreri 3:22.

Tota tiro e siametse tlhaloganyo ya rona le mebele ya rona. Bana ba le bantsi ba nna fela ba lebeletse thelebishene kgotsa ba tshameka metshameko ya bidio. Go tswa foo ba a nona, ba nna bokoa mo mmeleng, mme ga ba itumele. E bile ga ba dire gore ba bangwe ba itumele. Re tshwanetse go dirang gore re itumele?—

Re ithutile mo go Kgaolo 17 ya buka eno gore go aba le go direla ba bangwe dilo go lere boitumelo. (Ditiro 20:35) Baebele e re Jehofa ke “Modimo yo o itumetseng.” (1 Timotheo 1:11) Mme fa re bala mo go Diane, Jesu o ne a “itumela fa pele ga gagwe ka dinako tsotlhe.” Ke ka ntlha yang fa Jesu a ne a itumetse?— O ne a bolela lebaka fa a ne a re: “Rre o ntse a dira go fitlha jaanong, le nna ke ntse ke a dira.”—Johane 5:17.

Fa Jesu a ne a le mo lefatsheng ga a ka a nna mmetli wa dikgong botshelo jotlhe jwa gagwe. Jehofa Modimo o ne a mo naya tiro e e kgethegileng gore a e dire mo lefatsheng. A o itse gore tiro eo e ne e le efe?— Jesu o ne a re: “Ke tshwanetse go bolela dikgang tse di molemo tsa bogosi jwa Modimo, ka gonne ke ne ka romelwa ka ntlha ya seno.” (Luke 4:43) Ka dinako tse dingwe fa Jesu a ne a rerela batho, ba ne ba mo dumela ba bo ba bolelela ba bangwe dilo tse a di buileng, jaaka mosadi yo o mmonang fano wa Mosamarea a ne a dira.—Johane 4:7-15, 27-30.

Jesu o ne a ikutlwa jang ka tiro e a neng a e dira? A o akanya gore o ne a batla go e dira?— Jesu o ne a re: “Dijo tsa me ke gore ke dire thato ya yo o nthomileng le go wetsa tiro ya gagwe.” (Johane 4:34) O ikutlwa jang fa o ja dijo tse o di ratang thata?— Seno se go bontsha fela kafa Jesu a neng a ikutlwa ka gone ka tiro e Modimo a neng a mo neile yone.

Modimo o re dirile ka tsela e e dirang gore re itumele fa re ithuta go bereka. O ne a re mpho e A e neileng motho ke gore “a ipele mo tirong ya gagwe ya bonatla.” Ka jalo fa o ithuta go bereka o sa le monnye, o tla itumela botshelo jotlhe jwa gago.—Moreri 5:19.

Seno ga se reye gore ngwana a ka kgona go dira tiro ya motho yo o godileng, mme gone rotlhe re kgona go dira tiro nngwe. Gongwe batsadi ba gago ba ya tirong letsatsi le letsatsi gore ba nne le madi a go rekela lelapa la lona dijo le legae. Mme jaaka o itse, go na le tiro e ntsi e e tlhokang go dirwa mo lapeng gore go nne go le phepa.

Ke tiro efe e o ka kgonang go e dira e e ka solegelang lelapa lotlhe molemo?— O ka nna wa thusa ka go baakanya tafole fa go tla go jewa, go tlhatswa dijana, go latlha matlakala, go phepafatsa kamore ya gago le go phutha dilo tse o tshamekang ka tsone. Gongwe o setse o dira dingwe tsa dilo tseno. Go dira jalo ruri go tla solegela lelapa molemo.

A re bone kafa go dira ditiro tseo go solegelang molemo ka gone. Fa o sena go tshameka, phutha dilo tse o neng o tshameka ka tsone. Ke ka ntlha yang fa go dira jalo go le botlhokwa?— Seno se dira gore legae le nne le le phepa, mme gape go ka thibela dikotsi. Fa o sa phuthe dilo tse o tshamekang ka tsone, mmè wa gago a ka nna a tla a kukile dilo a bo a gata sengwe sa tsone. A ka nna a kgopiwa, a wa, mme a gobala. A ka nna a bo a tshwanelwa ke go isiwa sepatela. A wa bona gore go kotsi go le kana kang?— Ka jalo fa o phutha dilo tsa gago tsa go tshameka fa o fetsa ka tsone o tla bo o thusitse botlhe.

Go na le tiro e nngwe gape e bana ba tshwanetseng go e dira. Ka sekai, ba na le tiro ya sekolo. Kwa sekolong o ithuta go bala. Bana ba bangwe ba itumelela go bala, mme ba bangwe ba re go thata. Le fa go ka bonala go le thata kwa tshimologong, go ithuta go bala sentle go tla go solegela molemo. O ka ithuta dilo tse dintsi tse di kgatlhang fa o kgona go bala. O ka kgona le go ipalela buka ya Modimo, Baebele. Ka jalo a o bona gore go dira tiro ya gago ya sekolo sentle go tla go thusa jang?—

Go na le batho ba bangwe ba ba sa rateng go bereka. Gongwe o itse mongwe yo o ntseng jalo. Mme e re ka Modimo a re dirile gore re bereke, re tshwanetse go ithuta go rata tiro. Morutisi yo Mogolo o ne a rata tiro ya gagwe go le kana kang?— E ne e tshwana le go ja dijo tse a di ratang thata. Mme o ne a bua ka tiro efe?— Ya go bolelela ba bangwe ka Jehofa Modimo le kafa ba ka bonang botshelo jo bo sa khutleng ka gone.

A re bone gore o ka dira jang gore o itumelele tiro. Ipotse, ‘Ke ka ntlha yang fa tiro eno e tshwanetse go dirwa?’ Go motlhofo go dira sengwe fa o itse gore go botlhokwa go le kana kang go se dira. Mme le fa tiro eo e le e ntsi kgotsa e le nnye, e dire sentle. Fa o e dira sentle, o tla itumelela tiro e o e dirileng fela jaaka Morutisi yo Mogolo a ne a e itumelela.