Kgaolo ya Borobedi

“Jehofa o Kopa Eng mo go Wena?”

1, 2. Ke ka ntlha yang fa go kgothatsa go lemoga kafa Jehofa a neng a dira ka teng fa a bona boitsholo jo bo sa siamang jwa batho ba gagwe ba bogologolo?

AKANYA ka seemo seno: Mosetsana o tshosiwa ke modumo wa motho a kokota ka bogale. O boifa gore e ka tswa e le morekisi yo o bosula yo o batlang gore lelapa la gaabo le mo duele madi a le a mo kolotang. Morekisi yono o tsieditse batho ba le bantsi ka go dirisa dilekanyabokete tsa maaka le go bitsa morokotso o o seng kafa molaong. E le gore a se ka a otlhaelwa ditiro tseno, o naya baeteledipele ba motse pipamolomo, gore ba tlhokomologe batho ba ba tsieditsweng fa ba ikuela. Mosetsana yono o mo tlalelong; rraagwe o latlhile lelapa a ya go nna le mosadi o sele yo mmotlana. Go ka nna ga direga gore mosetsana yono le mmaagwe ba rekisiwe gore ba nne makgoba.

² Tiragalo eno e akaretsa mengwe ya mekgwa e baporofeti ba ba 12 ba neng ba e kgala. (Amose 5:12; 8:4-6; Mika 6:10-12; Sefania 3:3; Malaki 2:13-16; 3:5) Fa o ka bo o ne o tshela mo metlheng eo, o ka bo o ile wa dira eng? Le fa seemo seno se ka lebega se kgoba marapo, o ka kgothadiwa ke tsela e e molemo e Jehofa a neng a dirisana le batho ba gagwe ka yone mo metlheng ya baporofeti bao. Ee, dibuka tseo tse 12 di bontsha gore Modimo o ne a bua thata ka dinonofo le maikutlo a a rategang. Kgothatso ya gagwe e ka go thusa go nna le mekgwa e mentle ya boitsholo, ya go rotloetsa go dira molemo ya ba ya go tlhotlheletsa go mmaka. E re ka letsatsi la ga Jehofa la katlholo le ntse le atamela ka bofefo, fa o lemoga molaetsa o o kgothatsang o o mo dibukeng tseno, o ka nna le lesedi malebana le se Modimo a se kopang mo go wena. Simolola ka go sekaseka ditiragalo tsa motlha wa ga Mika, mo lekgolong la borobedi la dingwaga B.C.E.

JEHOFA O KOPA ENG MO GO WENA?

3, 4. (a) Jehofa o ikuela a reng mo bukeng ya ga Mika? (b) Potso e e mo go Mika 6:8 e go ama jang wena ka namana?

³ Fa o simolola go bala buka ya ga Mika, o ka nna wa akanya gore ke motseletsele fela wa ditatofatso kgatlhanong le Baiseraele ba ba tsuologang. Ee gone, Jehofa o ne a bona sentle boitsholo jo bo sa siamang jwa batho bano ba ba ineetseng mo go ene, go akaretsa le ba a neng a ba bitsa a re ke “batlhoi ba se se molemo le barati ba bosula.” (Mika 3:2; 6:12) Le fa go ntse jalo, mo godimo ga kgalemo eo, go na le kgakololo e e leng nngwe ya tse di kgatlhang thata le tse di rotloetsang tse di mo Baebeleng. Mika o bua thata ka yo e leng Motswedi wa melao ya tshiamo mme o botsa potso eno e e fatang maikutlo: “Jehofa o kopa eng mo go wena fa e se gore o dire tshiamiso le go rata bopelonomi le go nna boingotlo fa o tsamaya le Modimo wa gago?”—Mika 6:8.

⁴ A o kgona go lemoga fano tsela e Mmopi wa rona a ikuelang ka yone? O re gopotsa ka lorato ka ga maikutlo a a siameng a re ka nnang le one mo boemong jwa go itetla go faposiwa ke boikepo jo bo leng teng. Jehofa o itse gore e re ka re le batho ba ba ikanyegang, re batla go nna le dinonofo tse di siameng, mme ga a re tlhoboge. O ne o ka araba jang fa o ne o ka bodiwa jaana: ‘Jehofa o kopa eng mo go wena?’ A go na le dilo dingwe tse o ka di kayang mo botshelong jwa gago tse di tlhotlhelediwang ke melao ya Modimo ya boitsholo—kgotsa tse e tshwanetseng e ka bo e di tlhotlheletsa? Kamano ya gago le Modimo e tla tokafala thata e bile o tla tshela botshelo jo bo botoka fa o ntse o latela melao eo. E re ka paradaise ya lefatshe lotlhe e le gaufi, o ka kgothadiwa ke mafoko ano: “Ijaleleng peo mo tshiamong; robang tumalanong le bopelonomi jwa lorato. Itlhagoleleng lefatshe le le siametseng go lengwa, fa go na le nako ya go batla Jehofa go fitlha a tla mme a lo ruta ka tshiamo.” (Hosea 10:12) Jaanong a re sekasekeng dintlha dingwe tsa konokono mo kgakololong e e molemo ya Mika 6:8.

“NNA BOINGOTLO”

 5. Ke ka ntlha yang fa go le botlhokwa go “nna boingotlo” fa re ntse re tsamaya le Modimo?

⁵ Selo sa botlhokwa ke gore Mika a re Jehofa o re kopa gore re ‘nne boingotlo fa re tsamaya’ le Ene. Go nna boingotlo go ka re solegela molemo fela ka gonne “botlhale bo na le ba ba boingotlo.” (Diane 11:2) Go nna boingotlo go akaretsa go lemoga gore re na le makoa ka ntlha ya boleo jwa ga Adame. Go dumela gore re tsholetswe mo boleong ke kgato ya ntlha e e botlhokwa fa re ntse re leka go tila boleo bope jwa ka boomo.—Baroma 7:24, 25.

 6. Re ka solegelwa molemo jang fa ka boingotlo re lemoga ditlamorago tsa boleo?

⁶ Ke ka ntlha yang fa go le botlhokwa jaana gore re nne boingotlo re bo re nne le mogopolo o o ikokobeditseng gore re tile boleo jwa ka boomo? Motho yo o boingotlo o lemoga kafa boleo bo ka nnang maatla ka teng. (Pesalema 51:3) Hosea o re thusa go tlhaloganya gore boleo bo ka ngoka motho le gore ka metlha bo na le ditlamorago tse di botlhoko. Ka sekai, Jehofa o ne a solofetsa gore o tla dira gore batho ba gagwe ba bogologolo ba ‘ikarabelele’ go tlhoka kutlo ga bone. A seo se utlwala se kaya gore baleofi bao ba ba seng boingotlo ba ne ba ka tila ditlamorago tsa ditiro tsotlhe tsa bone? Ba ka tswa ba ne ba solofetse jalo ka gonne gantsi boleo bo a tsietsa e bile bo dira motho lekgoba. Se se masisi le go feta, boleo bo dira gore batho bano ba ba leofang ba kgaogane le Modimo, fa gongwe bo dira gore ba fitlhe mo seemong seno se se maswe le go feta: “Ditiro tsa bone ga di ba letle go boela kwa Modimong wa bone.” Go dira boleo ka boomo go ka dira gore moleofi a se ka a tlhola a kgona go dira se se molemo, bo dira gore a nne ‘modiri wa se se gobatsang.’ Mo godimo ga moo, boleo bo dira gore botshelo jwa motho yo o leofang bo se ka jwa atlega. Gone ke boammaaruri gore kwa tshimologong a ka lebega e kete o a atlega, mme motho yo o dirang boleo a sa ikwatlhaye a ka se solofele go amogelwa ke Modimo.—Hosea 1:4; 4:11-13; 5:4; 6:8.

 7. Batho ba ba boingotlo ba dirang ka kaelo ya ga Jehofa?

⁷ Gape batho ba ba boingotlo ba a dumela gore ba tlhoka go kaelwa ke Modimo gore ba se ka ba bona ditlamorago tse di botlhoko tsa boleo. Mika o ne a bonela pele nako—e re leng mo go yone gone jaanong—e ka yone boidiidi jwa batho bo tla bong bo batla ka tlhoafalo go ‘rutiwa ditsela tsa ga Jehofa’ le go “tsamaya mo ditselaneng tsa gagwe.” Batho bano ba ba pelonolo ba batla “molao” le “lefoko la ga Jehofa.” O tshwanetse wa bo o itumelela go nna mo gare ga batho ba ba eletsang go “tsamaya mo leineng la ga Jehofa” ka go dira dilo tse a di batlang. Mme gone, fela jaaka Mika, o ka tswa o kgatlhegela ditsela tse dingwe gape tse di ka dirang gore re nne re le “phepa mo boitsholong.” (Mika 4:1-5; 6:11) Go batla ka boingotlo go dira se Jehofa a se kopang mo go wena go tla go thusa thata.

LWELA GO NNA LE MAITSHOLO A MAEMO A A KWA GODIMO

 8. Ke eng se o se lemogileng ka maitsholo a lefatshe gompieno?

⁸ E re ka Jehofa a batla gore re itekanele semoyeng le mo mmeleng, o re kopa gore re nne phepa mo boitsholong le fa lefatshe le re leng mo go lone le tletse boitsholo jo bo sa siamang. (Malaki 2:15) Gongwe le gongwe kwa re lebang teng, re bona melaetsa ya tlhakanelodikobo. Batho ba le bantsi ba akanya gore go lebelela ditshwantsho le difilimi tsa ditshwantsho tse di hepisang, go bala ka mekgwa e e maswe ya tlhakanelodikobo le go reetsa dipina tse di nang le mafoko a a amanang le tlhakanelodikobo go itshiametse fela. Mo godimo ga moo, banna ba le bantsi ba tlontlolola basadi, ba ba tsaya e le batho fela ba go tlhakanelwang dikobo le bone. Kgotsa basha mo sekolong ba ka dira gore metlotlo ya bone e tlale ka metlae ya matlhapa le dipuo tse di nang le melaetsa ya tlhakanelodikobo. O ka dira jang gore o se ka wa tlhotlhelediwa ke mekgwa eno e e sa siamang?

 9. Batho ba le bantsi ba ne ba sa latele melao ya ga Jehofa ka tsela efe mo motlheng wa baporofeti ba ba 12?

⁹ Baporofeti ba ba 12 ba re tlotlang ka bone ba re naya kgakololo e e mosola tota. Mo motlheng wa bone go ne go ise go nne le mafelo a mantsintsi a bobogelo jwa difilimi le fa e le mabenkele a a hirisang dibidio, mme go ne go na le ditshwantsho tsa dirwe tsa bonna, go na le se go tweng ke boaka jo bo boitshepo jwa go ithekisa mmele, e bile go na le boitsholo jo bo botlhaswa jwa tlhakanelodikobo. (1 Dikgosi 14:24; Isaia 57:3, 4; Habakuke 2:15) O ka bona bosupi jwa seo mo go se baporofeti ba neng ba se kwala: “Fa e le banna, ba ne ba intshetsa kwa thoko le diaka, mme ba ntsha setlhabelo le diaka tsa tempele tsa basadi.” “Motho le rraagwe ba ile kwa mosetsaneng a le mongwe, ka boikaelelo jwa go itshepolola leina la me le le boitshepo.” Bangwe ba ne ba tlhola ba ntsha “tuelo ya seaka” kwa meletlong ya tsalo.a Boaka bo ne bo atile, balekane ba lenyalo ba ba sa ikanyegeng ba “sala morago ba ba [ba] ratang ka lorato lo lo tukang.”—Hosea 2:13; 4:2, 13, 14; Amose 2:7; Mika 1:7, Contemporary English Version.

10. (a) Ke eng selo sefe se segolo se se bakang boitsholo jo bo sa siamang? (b) Batho ba Modimo ba bogologolo ba ne ba dira kgokafalo ya semoya jang?

¹⁰ O ka tswa o lemoga gore boitsholo jo bo sa siamang jwa tlhakanelodikobo bo bontsha gore motho o na le boikutlo le maitlhomo afe. (Mareko 7:20-22) Jehofa o ne a bolela jaana ka batho ba gagwe ba ba nang le boitsholo jo bo sa siamang: “Moya wa kgokafalo [“go eletsa tlhakanelodikobo,” CEV] o dirile gore ba timele, . . . ga ba a dira sepe fa e se boitshwaro jo bo repileng.” (Hosea 4:12; 6:9)b Sekarea o ne a umaka “moya o o itshekologileng.” (Sekarea 13:2) Tsela e batho ba neng ba tshela ka yone e ne e na le go nyatsa, go itlhokomolosa le e leng go tlhoa melao le taolo ya ga Jehofa. Ka jalo, e le gore motho a fetole boikutlo jwa gagwe, a ka tshwanelwa ke go fetola thata tsela e a akanyang ka yone le seemo sa pelo ya gagwe. Fa Bakeresete ba lemoga seno ba anaanela fela thata thuso e ba e newang go tila boitsholo jo bo sa siamang le ditlamorago tsa jone tse di botlhoko.

NNA BOITSHEKO

11. Dingwe tsa ditlamorago tsa boitsholo jo bo sa siamang jwa tlhakanelodikobo ke dife?

¹¹ O ka tswa o lemogile gore gantsi boitsholo jo bo sa siamang bo felela ka gore malapa a thubege, bana ba se ka ba bona kaelo ya batsadi, batho ba tshwarwe ke malwetse a a maswe, le gore ba senye dimpa. Batho ba ba tlhokomologang Mmopi fa go tliwa mo dikgannyeng tsa tlhakanelodikobo gantsi ba gobala mo mmeleng le mo maikutlong. Mika o ne a kwala jaana: “Ka gonne [motho] o itshekologile, go na le tshenyo; mme tiro ya go senya e botlhoko.” (Mika 2:10) Go itse seno go nonotsha maikemisetso a batho ba ba ratang Modimo. Ga ba leswafatse dipelo tsa bone le megopolo ya bone ka go nna ba akantse ka dilo tse di sa itshekang.—Mathaio 12:34; 15:18.

12. Re solegelwa molemo jang fa re amogela tsela e Jehofa a lebang tlhakanelodikobo ka yone?

¹² Bakeresete ga ba dire jalo fela ka gonne ba tshaba bolwetse kgotsa ba sa batle go nna le bana ba dikgora. Ba bona mosola wa go nna le lorato lwa go rata molao wa Modimo le go leba maitsholo a tlhakanelodikobo ka tsela e a a lebang ka yone. Jehofa o dirile gore batho ba nne le keletso ya tlholego ya tlhakanelodikobo gore banyalani ba bontshane lorato ka yone. Joo e ne e le bongwe jwa maikaelelo a Modimo fa a ne a bopa batho. Fa tlhakanelodikobo e dirwa fela ke batho ba ba nyalaneng—jaaka go tshwanetse—e molemo, e nonotsha kamano ya monna le mosadi wa gagwe, mme ka dinako tse dingwe e felela ka gore ba nne le bana. Mme fa tlhakanelodikobo e dirwa ke batho ba ba sa nyalanang, e senya tota, fela jaaka baporofeti ba ba 12 ba bontshitse. Mekgwa ya tlhakanelodikobo e e sa tshwanelang e ne ya dira gore batho ba se ka ba amogelwa ke Modimo. Seo e ne e le diphelelo tse di maswe thata ka nako eo, mme le gompieno e ka nna diphelelo tse di maswe fela jalo mo mothong le fa e le ofe.

13. Re ka ‘tlosa kgokafalo fa pele ga rona’ jang mme ka jalo ra tila go raelwa?

¹³ Hosea o ne a rapela batho ba motlha wa gagwe gore ba ‘tlose kgokafalo fa pele ga bone,’ a raya gore ba tseye kgato ba sa okaoke go sireletsa maitsholo a bone. (Hosea 2:2) Mme le rona go ka nna molemo gore re tile seemo sepe fela se se ka re isang mo thaelong. Ka sekai, o ka nna wa lebana le thaelo e e sa feleng kwa sekolong kgotsa mo baagelaning. O ka nna wa se ka wa kgona go fudugela kwa sekolong se sele, kgotsa go fuduga fa o nnang teng, mme go ka tswa go na le ditsela tse dingwe tse ka tsone o ka tilang maemo a a raelang mme ka jalo wa ‘tlosa kgokafalo fa pele ga gago.’ Dira gore ba bangwe ba itse gore o Mokeresete wa boammaaruri, mongwe wa Basupi ba ga Jehofa. Ba tlhalosetse dilo tse o di tsayang di le botlhokwa le dilo tse o di dumelang, o dira jalo ka tsela e e utlwalang sentle le e e bontshang tlotlo. Tlhomamisa gore ba bangwe ba a lemoga gore o ikemiseditse go tshela ka melao ya ga Jehofa ya maemo a a kwa godimo. (Amose 5:15) Tsela e nngwe ya go ‘tlosa kgokafalo fa pele ga rona’ ke go tila ditshwantsho tse di hepisang le boitlosobodutu jo bo belaetsang. Seo se ka tlhoka gore o latlhe makasine o o nang le ditshwantsho tseno kgotsa o batle ditsala tse disha—tse di ratang Jehofa e bile di dumela gore o tshwanetse wa dira se Jehofa a batlang o se dira. (Mika 7:5) Ee, ka thuso ya ga Jehofa, o ka tila go kgotlelwa ke boitsholo jwa lefatshe jo bo sa siamang!

“RATA BOPELONOMI”

14, 15. (a) Go “rata bopelonomi” go kaya eng? (b) Go rata bopelonomi go re thusa jang gore re se ka ra nna le molato?

¹⁴ Mika o ne a gatelela gore Jehofa o re kopa gore re ‘rate bopelonomi.’ Go nna pelonomi go akaretsa go dira dilo tse di molemo, re sa dire sepe se se kotsi. Bopelonomi bo amana thata le bomolemo le boitsholo jwa maemo a a kwa godimo. Bo re tlhoka gore re ikanyege re bo re nne tshiamiso mo ditirong tsa rona ka namana, le fa re dirisana le ba bangwe. Mo go Kgaolo 6 ya buka eno, re ne ra sekaseka dilo tsa botlhokwa mo botshelong, tse di jaaka dikgang tsa kgwebo le tsa madi tse mo go tsone tshiamiso le boikanyegi di leng botlhokwa thata. Mme tseo ga se tsone fela dikarolo tsa botshelo tse re tshwanetseng go nna tshiamiso, go ikanyega le go nna pelonomi mo go tsone.

¹⁵ Batho ba ba ratang bopelonomi e bile ba batla go direla ba bangwe molemo ba leka gore ba se ka ba nna le molato. Jehofa o ne a bua jaana le Baiseraele ba ba neng ba sa diragatse maikarabelo a bone malebana le go dirisa dithoto tsa bone mo kobamelong e e itshekileng: “Lo a nthukutha.” (Malaki 3:8) A o ka lemoga ditsela tse motho a ka ‘thukuthang’ Modimo ka tsone gompieno? Go tweng fa Mokeresete e le ene a tshwarang madi a a ntshitsweng moneelo go thusa mo tirong ya go rera ka Bogosi e ka tswa e le mo phuthegong ya gagabo kgotsa mo maemong a mangwe? Madi ao ke a ga mang? Tota madi ao ke a ga Jehofa, ka gonne a ntsheditswe go thusa mo kobamelong ya gagwe. (2 Bakorintha 9:7) A go siame gore motho a tseye gore a ka “ikadima” madi ao go a dirisetsa bothata bongwe jo a nang le jone jwa tshoganyetso kgotsa go dirisa meneelo eno ka tsela epe fela kwantle ga tetla? Ruri ga go a siama. Seo e tla bo e le go utswela Modimo! Gape tota e tla bo e se go nna pelontle kgotsa go nna tshiamiso mo bathong ba ba ntshitseng meneelo eo gore e thuse mo tirong ya Modimo.—Diane 6:30, 31; Sekarea 5:3.

16, 17. (a) Batho bangwe ba ne ba bontsha bopelotshetlha jang mo metlheng ya ga Amose le mo metlheng ya ga Mika? (b) Modimo o leba bopelotshetlha jang?

¹⁶ Gape bopelonomi le bomolemo bo tlhotlheletsa Bakeresete gore ba tile go nna pelotshetlha. Mo motlheng wa ga Amose, bopelotshetlha jo bo feteletseng bo ne bo tlwaelegile. Batho ba ba dilalome ba ba sa kgotsofaleng ba ne ba ka nna ba ‘rekisa motho yo o siameng’—modumedi ka bone—“ka seleferanyana fela”! (Amose 2:6) Go ne go ntse jalo le mo motlheng wa ga Mika, fa bahumi ba kwa Juda ba ne ba tsaya naga ya batho ba ba neng ba ka se kgone go iphemela, e bile ba e tsaya jalo ka dikgoka fa go tlhokega. (Mika 2:2; 3:10) Fa ba gapela bangwe ka bone naga, batho bao ba ba pelotshetlha ba ne ba roba Molao wa ga Jehofa: go akaretsa molao wa bofelo wa Melao e e Lesome le melao e e neng e iletsa go rekisa naga ya boswa o e rekisetsa ruri.—Ekesodo 20:13, 15, 17; Lefitiko 25:23-28.

¹⁷ Gompieno go ka tswa go sa tlwaelega gore batho ba rekisiwe kgotsa ba dirwe makgoba jaaka go ne go tlwaelegile mo metlheng ya baporofeti. Le fa go ntse jalo, go tweng ka go ja ba bangwe ntsoma mo go tsa madi? Ruri Mokeresete yo o ratang bopelonomi a ka se ka a ja badumedi ka ene ntsoma. Ka sekai, o lemoga gore go tla bo go sa tshwanela e bile e se bopelonomi go simolola kgwebo kgotsa mokgwa wa go tsadisa madi, a akantse gore o tla dirisa thata badumedi ka ene go itirela madi. E tla bo e le bopelotshetlha, jone jo Bakeresete ba tlhagisiwang ka jone, gore Mokeresete a ikaelele go dira madi ka bofefo ka go ja Bakeresete ka ene ntsoma. (Baefeso 5:3; Bakolosa 3:5; Jakobe 4:1-5) Bopelotshetlha bo ka bonala ka go rata madi, go rata maemo, tota le bopelotshetlha jo bo feteletseng mo dijong le mo dinong, mo tlhakanelodikobong kgotsa mo dilong tse dingwe. Mika o ne a bontsha gore batho ba ba pelotshetlha ba go itebileng bone fela ‘ga ba na go kgotsofala.’ Go ntse jalo le gompieno.—Mika 6:14.

18, 19. (a) Bangwe ba baporofeti ba ba 12 ba ne ba reng ka tsela e Jehofa a amegang ka ‘moagi wa moeng’ ka yone? (b) Go kgatlhegela batho ba bangwe ka lorato go ka thusa jang gore o dirisane botoka le batho ba mo lefelong la lona?

¹⁸ Jehofa o ne a laela batho ba gagwe gore ba se ka ba ‘tsietsa moagi ope wa moeng.’ Mme Modimo o ne a dirisa Malaki go bolela jaana: ‘Ke tla lo atamela gore ke lo atlhole, kgatlhanong le ba ba sa amogeleng moagi wa moeng.’ (Sekarea 7:10; Malaki 3:5) A lefelo le o nnang mo go lone le ntse le fetoga ka ntlha ya batho ba bantsi ba ba fudugelang mo go lone ba tswa dinageng tse dingwe kgotsa e le ba setšhaba kgotsa lotso lo sele? Gongwe ba fudugetse foo ba batla go nna ba sireletsegile, ba batla ditiro kgotsa ba batla botshelo jo bo botoka. O leba jang batho ba ba buang puo e e seng ya gaeno e bile ba sa tshele ka tsela e o tshelang ka yone? A o iphitlhela o na le mekgwa epe ya go tlhaola batho, e e sa tsamaisaneng gotlhelele le bopelonomi?

¹⁹ Akanya fela kafa go tla amang batho ka tsela e e molemo ka teng fa o bontsha gore batho ba dinaga di sele kgotsa ba mafelo a mangwe le bone ba tshwanelwa ke go utlwa boammaaruri jwa Bokeresete. Bopelonomi gape bo tla dira gore re se ka ra nna le maikutlo ape a gore batho bano ba basha ba a kgoreletsa fa ba dirisa Holo ya rona ya Bogosi kgotsa dilo tse dingwe. Moaposetoloi Paulo o ne a gopotsa Bakeresete bangwe ba Bajuda ba lekgolo la ntlha la dingwaga, ba ba neng ba batla ba na le go tlhoa batho ba e seng Bajuda, a ba gopotsa gore tota ga go ope yo o tshwanelwang ke poloko; bopelonomi jo bo sa re tshwanelang jwa Modimo ke jone fela bo dirang gore motho ope a kgone go bona poloko. (Baroma 3:9-12, 23, 24) Go nna pelonomi mo bathong ba bangwe go tla re tlhotlheletsa go ipelela gore jaanong lorato lwa Modimo lo fitlhelela batho ba le bantsi ba pele ba ka tswang ba ne ba se na sebaka sa go utlwa dikgang tse di molemo. (1 Timotheo 2:4) Gantsi batho ba dinaga kgotsa mafelo a mangwe ba humanegile, ka jalo re tshwanetse go bontsha gore re amega ka bone; re ba bontshe bopelonomi, re ba amogele mo gare ga rona, re tshware mongwe le mongwe ‘jaaka motho wa mo lefatsheng la ga rona.’—Lefitiko 19:34.

TSAMAYA LE MODIMO WA BOAMMAARURI

20. Baiseraele bangwe ba ne ba kopa thuso kae?

²⁰ Gape Mika o ne a gatelela gore re tsamaye le Modimo, re mo tseye e le Modimo wa boammaaruri, re batle kaelo ya gagwe. (Diane 3:5, 6; Hosea 7:10) Fa Bajuda ba sena go boa kwa botshwarwa, bangwe ba ne ba ya go kopa thuso kwa dingakeng tsa sedupe, kwa go ba ba bolelelang isagwe pele le kwa medimong ya maaka, gongwe ba kopa thuso ka nako ya leuba. Totatota ba ne ba kopa thuso ya meya e e boikepo, le fa Jehofa a ne a kgadile mekgwa eno yotlhe ka tlhamalalo. (Duteronome 18:9-14; Mika 3:6, 11; 5:12; Hagai 1:10, 11; Sekarea 10:1, 2) Bajuda bao ba ne ba dirisana le dibopiwa tsa semoya tse di neng di emelane le Modimo wa boammaaruri!

21, 22. (a) Go tlwaelegile mefuta efe ya go dirisana le meya mo lefelong la gaeno? (b) Ke ka ntlha yang fa batlhanka ba ga Jehofa ba boammaaruri ba sa dirisane le masaitseweng?

²¹ Gompieno bangwe ba akanya gore meya e e boikepo e e umakiwang mo Dikwalong tota e tshwantshetsa bosula, ga se dibopiwa tse di leng teng. Le fa go ntse jalo, Baebele e senola gore madimona ke dibopiwa tsa mmatota mme ke one a tlhotlheletsang tepodinaledi, boloi le mefuta mengwe ya maselamose. (Ditiro 16:16-18; 2 Petere 2:4; Jude 6) Dikotsi tsa go dirisana le meya le tsone ke tsa mmatota fela jalo. Batho ba ditso tse dintsi ba ikanya bo-shaman, kgotsa dingaka tse di bolelang gore di na le maatla mangwe a a sa tlwaelegang le baloi. Ba bangwe ba batla kaelo mo dihorosekoupong kgotsa ba dirisa di-tarot card, dithobane tse di dupelelang, dimati tsa Ouija, kgotsa maje a a rileng a a phatsimang. E bile go tlwaelegile gore batho ba leke go bua le meya ya baswi. Go begwa gore fa babusi bangwe ba tlhoka go dira ditshwetso ba batla thuso mo bathong ba ba lepang dinaledi le mo bathong ba ba dirisanang le meya. Go bonala sentle gore sotlhe seo ga se tsamaisane le kgakololo ya ga Mika ya gore re tsamaye le Modimo wa boammaaruri, re latele kaelo ya gagwe.

²² Tota wena jaaka motlhanka wa boammaaruri wa ga Jehofa, o tshwanetse wa tila mekgwa e e ntseng jalo. Ruri Modimo ga a ke a dirisa maselamose kgotsa masaitseweng go senola thato ya gagwe kgotsa go dirisa maatla a gagwe. Go na le moo, jaaka Amose 3:7 e re tlhomamisetsa, Jehofa o “senolela batlhanka ba gagwe, e bong baporofeti sephiri sa gagwe.” Mo godimo ga moo, go dirisana le masaitseweng go ka dira gore motho a tlhotlhelediwe a bo a laolwe ke moeteledipele wa madimona, e bong Satane, yo e leng moaki e bile boikaelelo jwa gagwe e le go tsietsa batho. Ene le ba a ba dirisang ba tswa kgakala le bosetlhogo, ka jalo ba ikaeletse go utlwisa batho botlhoko le e leng go ba bolaya. (Jobe 1:7-19; 2:7; Mareko 5:5) Go a utlwala go bo Mika a ne a kgala go laola ka bola le boloi fa a ne a re rotloetsa gore re tsamaye le Modimo wa boammaaruri.

23. Ke mang fela yo o ka re nayang dilo tse di siameng tse re ka di lopang?

²³ Kaelo ya boammaaruri mo dilong tsa semoya e ka bonwa fela mo go Jehofa le mo kobamelong ya gagwe e e itshekileng. (Johane 4:24) Moporofeti Sekarea o ne a kwala jaana: “Lopang Jehofa.” (Sekarea 10:1) Tota le fa o tlhaselwa kgotsa o raelwa ke meya e e boikepo, gakologelwa gore “mongwe le mongwe yo o bitsang leina la ga Jehofa o tla falola.” (Joele 2:32) Mafoko ano a a kgothatsang a botlhokwa fa re ntse re gopotse letsatsi la gagwe le legolo.

24. O ithutile eng mo go Mika 6:8?

²⁴ Ruri mafoko a a mo go Mika 6:8 a dira gore re akanye tota. E le gore re nne re na le boitsholo jo bo molemo, re tshwanetse go nna le maitlhomo a a siameng le dinonofo tsa bomodimo. Hosea o ne a re kgothatsa rona ba re tshelang mo “bokhutlong jwa metlha.” O ne a bolela gore mo motlheng wa rona, batho ba ba boifang Modimo ba ne ba tla batla bomolemo jwa ga Jehofa. (Hosea 3:5) Amose le ene o ne a bontsha gore Modimo o re laletsa gore re dire fela jalo: “Batlang se se molemo, . . . gore lo nne lo tshele.” Gape re rotloediwa jaana: “Lo rate se se molemo.” (Amose 5:14, 15) Fa re dira jalo, re tla itumedisiwa ke go dira se Jehofa a batlang re se dira.

[Dintlha tse di kwa tlase]

O KA ITHUTANG . . .

• mo kopong ya ga Jehofa ya gore o tshele go ya ka melao ya gagwe?—Sekarea 6:15; Malaki 3:16, 18.

• ka go tlhatlhanya ka se boleo e leng sone le ditlamorago tsa jone tse di botlhoko?—Malaki 4:1; Baroma 6:12-14; 1 Bakorintha 6:18.

• mo diphosong tsa boitsholo tsa batho ba Modimo ba bogologolo?—Hosea 8:7; 10:12; 14:9.

O KA SOLEGELWA MOLEMO JANG . . .

• ke go leba boitsholo jwa tlhakanelodikobo ka tsela e Jehofa a bo lebang ka yone?—Hosea 3:3; 4:11.

• ke go dirisa kgakololo ya baporofeti ba ba 12 ya gore re se ka ra nna pelotshetlha le go iteba rona fela?—Mika 7:5-7; Bafilipi 2:4.

• ke go ikela tlhoko mo mekgweng ya go dirisana le meya le masaitseweng?—Mika 5:12; Nahume 3:4; Malaki 3:5.

[Lebokoso mo go tsebe 100]

O TLHOMILE SEKAO SA GO NNA BOINGOTLO LE GO BUA A SA FITLHE SEPE

Jona o ne a bua a sa fitlhe sepe e bile a le boingotlo ka tsela e e sa dirweng ke bakwadi ba e seng ba Baebele. O ne a bua a sa fitlhe sepe ka ga go tlhoka kutlo ga gagwe le ka ga dinako tse a neng a sa ikanye Jehofa ka tsone. Ga a ka a leka go fitlha tsela e e sa siamang e a neng a ikutlwa ka yone fa a romiwa kgotsa e a neng a ikutlwa ka yone fa Modimo a ne a boloka Baninife. A bo seo e le sekao se se molemo jang ne sa boingotlo se re ka se etsang!

[Setshwantsho mo go tsebe 98]

Jehofa o kgona go bona fa go dirwa bosula le tshiamololo

[Setshwantsho mo go tsebe 104]

Go dira gore batho ba itse dilo tsa Bokeresete tse o di dumelang go tla go sireletsa

[Setshwantsho mo go tsebe 106]

Bakeresete ba le bantsi ba tlhokomela batho ba ditšhaba di sele ka dilo tsa semoya ka lorato

[Ditshwantsho mo go tsebe 109]

Batlhanka ba Modimo ba tshwanetse ba tila mekgwa ya masaitseweng