Jesu O Naya Kgakololo Ka Dikhumo

Fa Jesu a ntse a ja kwa ntlong ya Mofarasai, batho ba le bantsi ba ne ba mo letetse kwa ntle. Go ne ga direga se se tshwanang fa a ne a le kwa Galalea. (Mareko 1:33; 2:2; 3:9) Fa a le mo Judea, bontsi jwa batho ba batla go mmona le go mo reetsa, mme batho bano ga ba itshware jaaka Bafarasai ba ne ba itshwere fa a le kwa dijong.

Se Jesu a se buang la ntlha fano se botlhokwa thata mo barutweng ba gagwe: “Elang tlhoko sebediso sa Bafarasai, e leng boitimokanyi.” Jesu o ne a ba neile kgakololo eno pelenyana, mme se a se bonang fa ba ja se bontsha gore kgakololo eno e sa ntse e le botlhokwa. (Luke 12:1; Mareko 8:15) Bafarasai ba ne ba fitlha bosula jwa bone ka go itira se ba seng sone, mme gone ba kotsi thata mo ba tlhokang go senolwa. Jesu o tlhalosa jaana: “Sengwe le sengwe se se subilweng ka kelotlhoko se tla senoga, e bile sephiri sengwe le sengwe se tla itsiwe.”—Luke 12:2.

Gongwe bontsi jwa batho ba ba kokoanetseng Jesu ke Bajudea ba ba iseng ba mo utlwe a ruta mo Galalea. Ka jalo, o boeletsa se a neng a se bua pelenyana. O bolelela bareetsi ba gagwe a re: “Lo se ka lwa boifa ba ba ka lo bolayang mme morago ga moo ba bo ba sa kgone go dira se se fetang seo.” (Luke 12:4) Jaaka a ile a bua mo nakong e e fetileng, o gatelela botlhokwa jwa gore balatedi ba gagwe ba tshepe gore Modimo o tla ba tlhokomela. Ba tshwanetse go lemoga Morwa motho le go ela tlhoko gore Modimo o tla ba thusa.—Mathaio 10:19, 20, 26-33; 12:31, 32.

Monna mongwe mo gare ga batho bao o mo raya a re: “Moruti, bolelela morwarre gore a kgaogane boswa le nna.” (Luke 12:13) Molao wa ga Moshe o bontsha gore morwa wa leitibolo o tshwanetse go amogela dikarolo tse pedi tsa boswa, ka jalo ga go a tshwanela go nna le dikgogakgogano. (Duteronome 21:17) Mme go lebega monna yono a batla go newa se se fetang se a tshwanetseng go se newa go ya ka molao. Jesu ka botlhale o gana go tsaya letlhakore. Ka jalo o mmotsa jaana: “Monna, ke mang yo o ntlhomileng gore ke nne moatlhodi kgotsa motsereganyi wa lona?”—Luke 12:14.

Jesu o ba naya kgakololo eno: “Nnang lo butse matlho lo bo lo ikele tlhoko gore lo se ka lwa nna pelotshetlha, ka gonne tota le fa motho a na le dilo tse dintsi, botshelo jwa gagwe ga bo a ikaega ka dilo tse a nang le tsone.” (Luke 12:15) Go sa kgathalesege gore motho o humile go le kana kang, fa a swa o tlogela dilo tseo kwa morago. Jesu o gatelela ntlha eno ka go dira setshwantsho se se bontshang botlhokwa jwa go itirela leina le le molemo le Modimo, a re:

“Masimo a monna mongwe yo o humileng a ne a ungwa thata. Ka jalo, o ne a simolola go ipolelela a re, ‘Ke tla dirang jaanong ka gonne ga ke na fa nka phuthelang dilo tse ke di robileng gone?’ Go tswa foo, o ne a re, ‘Ke tla dira jaana: Ke tla thuba mabolokelo a me ke bo ke aga a magolwane, mme ke tla phuthela dilo tsotlhe tse ke di robileng le dilo tse dingwe tsotlhe mo go one, mme ke tla ipolelela jaana: “Ke na le dilo tse di molemo di le dintsi tse di tla ntsayang dingwagangwaga; ka jalo, mma ke ikhutse, ke je, ke nwe, ke ijese monate.”’ Le fa go ntse jalo, Modimo o ne a mo raya a re, ‘Seeleele ke wena, mo bosigong jono o tlile go swa. Jaanong ke mang yo o tla tsayang dilo tse o di bolokileng?’ Go nna fela jalo ka motho yo o ipolokelang letlotlo mme a sa huma mo matlhong a Modimo.”—Luke 12:16-21.

Barutwa ba ga Jesu le batho ba bangwe ba ba mo reeditseng ba ka wela mo seraing sa go ipatlela kgotsa go ikokoanyetsa dithoto tse dintsi. Kgotsa ba ka nna ba itewa tsebe ke dilo dingwe tse ba di dirang mme tsa ba kgoreletsa go direla Jehofa. Ka jalo, Jesu o boeletsa kgakololo e e molemo e a kileng a e ba naya mo e ka nnang ngwaga le halofo pelenyana mo Therong ya Kwa Thabeng, a re:

“Tlogelang go tlhobaela ka matshelo a lona ka ga gore lo tla ja eng kgotsa ka mebele ya lona gore lo tla apara eng. . . . Elang tlhoko magakabe: Ga a jale e bile ga a robe; ga a na mabolokelo; le fa go ntse jalo, Modimo o a a fepa. A ga lo botlhokwa thata go feta dinonyane? . . . Elang tlhoko kafa malômô a masoma a golang ka gone: Ga a dire ka natla e bile ga a roke diaparo; mme ke a lo bolelela, tota le Solomone mo kgalalelong yotlhe ya gagwe o ne a sa kgabe jaaka one. . . . Ka jalo, tlogelang go batla se lo tla se jang le se lo tla se nwang, gape tlogelang go tlhobaela thata . . . Rraalona o a itse gore lo tlhoka dilo tseno. . . . Nnang lo batle Bogosi jwa gagwe, mme dilo tseno lo tla di okelediwa.”—Luke 12:22-31; Mathaio 6:25-33.

Ke bomang ba ba tla batlang Bogosi Jwa Modimo? Jesu o bontsha gore palo e nnye ya batho ba ba ikanyegang ba a ba bitsang “letsomanyane,” ke yone e e tla dirang jalo. Moragonyana go ne go tla tlhalosiwa gore palo ya bone ke 144 000. Ba lebile pele go dira eng? Jesu o ba tlhomamisetsa jaana: “Rraalona o itumeletse go lo naya Bogosi.” Ga ba kitla ba tlhoma mogopolo mo go ikokoanyetseng matlotlo mo lefatsheng kwa magodu a ka utswang gone. Go na le moo pelo ya bone e tla nna kwa letlotlong “le le kwa magodimong le le ka se kang la senyega,” kwa ba tla busang le Keresete gone.—Luke 12:32-34.