Kgosi E E Se Nang Molato E Kokotelwa Mo Koteng

Jesu o isiwa kwa lefelong le ene le dinokwane tse pedi ba tlileng go bolaelwa kwa go lone mme ga le kgakala le motse. Lefelo leno le bidiwa Gologotha kgotsa Felo ga Logata, mme o kgona go le bona o le “kgakajana.”—Mareko 15:40.

Banna bano ba bararo ba ba atlholetsweng loso ba apolwa diaparo. Go tswa foo, ba newa beine e e tlhakantsweng le molemo o o dirilweng ka boreku jo bo nkgang monate le santlhoko e e bogalaka. Go bonala basadi ba Jerusalema e le bone ba dirileng motswako ono, mme Baroma ga ba gane gore batho ba ba bolawang ba newe motswako ono o o okobatsang ditlhabi. Le fa go ntse jalo, fa Jesu a sena go latswa motswako ono o gana go o nwa. Goreng? O batla gore ditemotshi tsa gagwe di bo di bereka mo nakong eno ya teko e kgolo. O batla gore a se ka a nna mo maibing gore a nne a ikanyega go fitlha a swa.

Masole a rapamisa Jesu mo koteng. (Mareko 15:25) A kokotela dipekere mo diatleng le mo dinaong tsa gagwe, di phunya nama le mesifa di bo di mmakela botlhoko jo bo seng kana ka sepe. Fa kota eno e emisiwa, o utlwa botlhoko jo bo ngomolang pelo le go feta fa bokete jwa mmele wa gagwe bo gagola dintho tse di phuntsweng ke dipekere. Le fa go ntse jalo, Jesu ga a omanye masole ano. O rapela a re: “Rara, ba itshwarele, ka gonne ga ba itse se ba se dirang.”—Luke 23:34.

Baroma ba tlwaetse go baya letshwao le le bontshang gore senokwane se se atlholetsweng loso se dirile molato ofe. Mo lekgetlong leno, Pilato o beile letshwao le le reng: “Jesu wa Monasaretha Kgosi ya Bajuda.” Le kwadilwe ka Sehebera, Selatine le Segerika gore batho ba le bantsi ba kgone go le bala. Se Pilato a se dirileng se bontsha gore o nyatsa Bajuda ba ba pateleditseng gore Jesu a bolawe. Baperesiti ba bagolo ba tshogile, ka jalo ba goa ba re: “O se ka wa kwala o re, ‘Kgosi ya Bajuda,’ mme o kwale gore ke ene a rileng, ‘Ke nna Kgosi ya Bajuda.’” Le fa go ntse jalo, e re ka Pilato a sa tlhole a batla gore ba mo goge ka nko, o ba raya a re: “Ga nkitla ke fetola se ke se kwadileng.”—Johane 19:19-22.

Baperesiti bano ba ba galefileng, ba boeletsa bosupi jwa maaka jo bo neng bo ntshitswe pelenyana fa Jesu a ne a sekisiwa ke Sanehederine. Ga go gakgamatse go bo bafetikatsela ba tshikinya ditlhogo ba bo ba sotla Jesu ba re: “Wai, wena yo o neng o re o ka digela tempele fa fatshe o bo o e aga mo malatsing a le mararo, ipoloke mme o fologe mo koteng ya tlhokofatso.” Ka tsela e e tshwanang, baperesiti ba bagolo le bakwadi ba raana ba re: “A jaanong Keresete Kgosi ya Iseraele a fologe mo koteng ya tlhokofatso, gore re bone seo, ke gone re tla mo dumelang.” (Mareko 15:29-32) Tota le dinokwane tse pedi tse di kokotetsweng gaufi le ene di a mo sotla, le fa gone e le ene a se nang molato.

Masole a Roma a le manê le one a sotla ka Jesu. Ba ka tswa ba nwa beine e e bogalaka, mme go bonala ba e tsholeletsa fa pele ga gagwe e le fela go mo sotla ka gonne a ka se kgone go otlolola letsogo gore a e tseye. Baroma ba bua mafoko a a kgobang ka letshwao le le fa godimo ga tlhogo ya ga Jesu, ba re: “Fa e le gore o Kgosi ya Bajuda, ipoloke.” (Luke 23:36, 37) Ako o akanye fela! Monna yo o itshupileng gore ke tsela le boammaaruri le botshelo, jaanong o bogisiwa le go sotliwa ka tsela eno e e sa tshwanelang. Le fa go ntse jalo o itshoketse dilo tseno tsotlhe, a sa kgobe Bajuda ba ba mo lebileng, masole a Roma a a mo sotlang kgotsa dinokwane tse pedi tse di kokotetsweng mo dikoteng go bapa le ene.

Masole ao a manê a tsaya diaparo tsa ga Jesu tsa ka fa ntle a bo a di kgaoganya dikarolo di le nnê. Ba latlhela bola gore ba bone gore mang o tla tsaya karolo efe. Le fa go ntse jalo, seaparo sa ga Jesu sa ka fa teng ke sa boleng jo bo kwa godimo, ‘se se se nang moroko, se se logilweng go tswa kwa godimo go ya kwa tlase.’ Masole ano a raana a re: “A re se ka ra se gagola, mme a re tsheleng bola gore re bone gore e tla nna sa ga mang.” Ka jalo, ba diragatsa lokwalo lo lo reng: “Ba ne ba kgaogana diaparo tsa me, e bile diaparo tsa me ba ne ba di tshelela bola.”—Johane 19:23, 24; Pesalema 22:18.

Fa nako e ntse e ya, senokwane se sengwe se lemoga gore tota Jesu e tshwanetse ya bo e le kgosi. Se kgalemela senokwane se sengwe, se re: “E re ka jaanong katlholo ya gago e tshwana le ya gagwe, a ga o boife Modimo? Mme rona go a tshwanela go bo re atlhotswe jalo, ka gonne re amogela se se re tshwanetseng ka ntlha ya dilo tse re di dirileng; mme monna yono ene ga a dira sepe se se phoso.” Go tswa foo o kopa Jesu a re: “O nkgopole fa o tsena mo Bogosing jwa gago.”—Luke 23:40-42.

Jesu o mo raya a re: “Ammaaruri ke a go bolelela gompieno, o tla nna le nna,” e seng mo Bogosing, mme “mo Paradaiseng.” (Luke 23:43) Tsholofetso eno e farologana le se Jesu a ileng a se bolelela baaposetoloi ba gagwe, fa a ne a ba raya a re ba tla nna mo ditulong tsa bogosi ba na le ene mo Bogosing. (Mathaio 19:28; Luke 22:29, 30) Le fa go ntse jalo, senokwane seno sa Mojuda se ka tswa se kile sa utlwa ka Paradaise ya mo lefatsheng e Jehofa a neng a e dirile kwa tshimologong gore e nne legae la ga Adame le Efa, le bana ba ba neng ba tla nna le bone. Jaanong senokwane seno se ka swa se na le tsholofelo ya gore se tla tshela mo Paradaiseng eo.