Botshelo le Bodihedi tsa ga Jesu

Go Ipelela Kamano E Lo Atamalaneng Thata

JESU o ne a ntse a kgothatsa baaposetoloi ba gagwe ka puo e e tswang mo pelong morago ga dijo tsa segopotso. E ka tswa e setse e fetile nako ya bosigogare. Ka jalo Jesu o ba raya a re: “Nanogañ re cweñ mono.” Lefa go ntse jalo, pele ba tsamaya, Jesu o tlhotlhelediwa ke lorato lwa gagwe mo go bone, mme o tswelela go bua le bone a ba naya setshwantsho se se rotloetsang tota.

“Ke nna mofine oa amarure, me Rrè ke èna Mmaakanyi oa tshimo,” o simolola jalo. Molemi o Mogolwane, Jehofa Modimo, o ne a jala mofine ono wa tshwantshetso fa a ne a tlotsa Jesu ka moya o o boitshepo fa a ne a kolobediwa mo letlhafuleng la 29 C.E. Mme Jesu o tswelela go bontsha gore mofine o tshwantshetsa sengwe se segolwane, a ba tlhokomedisa jaana:

“Kala ñwe le ñwe e e mo go nna, e e sa uñweñ, oa e tlosa: me kala ñwe le ñwe e e uñwañ, oa e ntlahatsa, gore e uñwè bogolo. . . . Yaka kala e sa kake ea uñwa ka eosi, ha e sa nne mo mofineñ; go nntse yalo le lona, ha lo sa nne mo go nna. Ke nna mofine, lona lo dikala.”

Baaposetoloi le ba bangwe ba fetoga dikala tsa mofine malatsi a le 51 moragonyana ka Pentekosete fa ba tshololelwa moya o o boitshepo. Kgabagare, batho ba le 144 000 ba fetoga dikala tsa mofine ono wa tshwantshetso. Bano mmogo le kutu, Jesu Keresete ba dira mofine wa tshwantshetso oo o ntshang maungo a Bogosi jwa Modimo.

Jesu o tlhalosa sekopololo sa go ntsha maungo jaana: “Eo o nnañ mo go nna, le nna mo go èna, ke èna eo o uñwañ segolo: gonne kwa ntlè ga me ga lo kake loa diha sepè.” Lefa go ntse jalo, Jesu o bolela gore fa motho a palelwa ke go ntsha maungo, “o latlhèlwa kwa ntlè yaka kala, me e omelele; me batho ba di kgobokanye ba di latlhèle mo moleloñ, me di yewe ke molelō.” Kafa letlhakoreng le lengwe, Jesu o solofetsa jaana: “Ha lo nna mo go nna, le mahoko a me a nna mo go lona, lōpañ se lo se ratañ, me lo tla se dihèlwa.”

Jesu o tswelela go bontsha baaposetoloi ba gagwe seo se galaletsang Rraagwe, eleng gore, “ha lo uñwa segolo; me yalo lo tla nna barutwa ba me.” Loungo loo Modimo o lo batlang mo dikaleng ke gore di supe dinonofo tse di tshwanang le tsa ga Keresete, segolobogolo lorato. Mo godimo ga moo, ereka Keresete e ne e le mmoledi wa Bogosi jwa Modimo, maungo a a tlhokegang gape a akaretsa tiro ya go dira barutwa jaaka a ne a dira.

“Lo tla nna mo loratoñ lwa me,” Jesu jaanong o ba kgothatsa jalo. Lefa go le jalo, baaposetoloi ba gagwe ba ka dira seo jang? “Ha lo tshegetsa ditaolō tsa me,” o bolela jalo, “lo tla nna mo loratoñ loa me.” Fa a tswelela Jesu o tlhalosa jaana: “Taolō ea me ke e, gore lo ratanè, hèla yaka le nna ke lo ratile. Ga go opè eo o nañ le loratō lo lo hetañ lo, ha motho a ka beèla ditsala tsa gagwè botshelō yoa gagwè.”

Jesu o tlile go supa lorato lono lo logolo ka go neela botshelo jwa gagwe mo boemong jwa baaposetoloi ba gagwe, mmogo le ba bangwe botlhe bao ba tla dumelang mo go ene mo dioureng di sekae tse di tlang. Sekai sa gagwe se tshwanetse go tlhotlheletsa balatedi ba gagwe go ratana ka lorato lo lo tshwanang lwa go intsha setlhabelo. Lorato lono lo tla ba supa gore ke bomang, fela jaaka Jesu a ile a bua pelenyana a re: “Batho botlhe ba tla itse ha lo le barutwa ba me ka mo, ha lo ratana.”

Fa a supa gore bao e leng ditsala tsa gagwe ke bomang, Jesu o bua jaana: “Lona lo ditsala tsa me, ha lo diha dilō tse ke di lo laolèlañ. Ga ke tlhole ke lo bitsa batlhanka; gonne motlhanka ga a itse se morèna oa gagwè o se dihañ: me ke lo biditse ditsala; gonne dilō cotlhe tse ke di utlwileñ mo go Rrè, ke di lo itsisitse.”

Abo seo e le kamano e e molemo jang ne go nna nayo—go nna ditsala tse di atamalaneng thata le Jesu! Mme gore ba tswelele ba ipelela kamano eo, balatedi ba gagwe ba tshwanetse go “uñwa.” Fa ba dira jalo, Jesu a re, “se lo se lōpañ Rara, leha e ka nna eñ, ka leina ya me, a se lo neè.” Abo ruri go ungwa loungo lwa Bogosi go duelwa thata jang ne!

Morago ga go kopa barutwa ba gagwe gape gore ba “ratanè,” Jesu o ba tlhalosetsa gore lefatshe le tla ba ila. Lefa go le jalo, o ba gomotsa jaana: “Ha lehatshe le lo ila, loa itse ha le nkidile pele, le e se le lo ile.” Morago Jesu o senola lebaka la go bo lefatshe le tlhoile balatedi ba gagwe fa a re: “Ereka lo se ba lehatshe, me ke lo itshenketse mo lehatshiñ, ke gōna lehatshe le lo ilañ.”

Fa a tlhalosa ka mo go oketsegileng lebaka la go bo ba tlhoilwe ke lefatshe, Jesu o tswelela a re: “Me dilō cotlhe tse, ba tla di lo dihèla ka ntlha ea leina ya me, ka go bo ba sa itse [Jehofa Modimo] eo o nthomileñ.” Totatota dikgakgamatso tseo Jesu a di dirileng di pega bao ba mo tlhoileng molato, jaaka a akgela jaana: “Ha ke ka bo ke se ka ka diha mo go bōnè ditihō tse opè o sele o se kañ a di diha, ba ko ba sena boleo: me yanoñ ba mponye, me ba bile ba idile nna le Rrè.” Ka gone, jaaka Jesu a bua, go diragadiwa lokwalo lo lo reng: “Ba nkidile ka boomo hèla.”

Jaaka a ne a dira pelenyana, Jesu o ba gomotsa gape ka go ba solofetsa go ba romelela mogomotsi, moya o o boitshepo, oo eleng maatla a a dirang a a nonofileng a Modimo. “Èna o tla shupa kaga me: Me le lona loa shupa.” Yohane 14:31–15:27; 13:3, 35; Bagalatia 6:16; Pesalema 35:19; 69:4.

▪ Jehofa o ne a jala leng mofine wa tshwantshetso, mme batho ba bangwe ba fetoga karolo ya mofine leng le gone jang?

▪ Kgabagare, mofine wa tshwantshetso o nna le dikala di le kae?

▪ Ke loungo lofe lo Modimo o lo batlang mo dikaleng?

▪ Re ka nna ditsala tsa ga Jesu jang?

▪ Ke ka ntlhayang fa lefatshe le ila balatedi ba ga Jesu?