Botshelo le Bodihedi tsa ga Jesu

Go Okwa le go Tshwarwa

GO SETSE go fetile nako ya bosigogare mme Judase o tsena mo tshimong ya Gethesemane a eteletse boidiidi jo bogolo jwa masole, baperesiti ba bagolo, Bafarisai le batho ba bangwe pele. Baperesiti ba dumalane le Judase go mo naya dipapetlana tse 30 tsa selefera gore a oke Jesu.

Pelenyana ga foo, fa Judase a ne a tloga kwa dijong tsa Tlolaganyo, go lebega a ne a tlhamalalela kwa baperesiting ba bagolo. Ba ne ba kokoanya maotlana a bone, mmogo le setlhopha sa masole ka bonako. Go lebega Judase a ne a ba isa pele kwa Jesu le baaposetoloi ba gagwe ba neng ba jela Tlolaganyo gone. E ne ya re fa a ba fitlhela ba tsamaile, boidiidi jo bogolo joo jo bo neng bo tshotse dibolao le dilampa le dipone bo ne jwa sala Judase morago jwa tswa ka Jerusalema bo kgabaganya Mokgatšha wa Kiderone.

Judase fa a ntse a eteletse mokoloko oo pele jaana go tlhatloga Thota ya Diolefa, o tlhomamisegile tota gore o itse koo a ka bonang Jesu gone. Mo bekeng e e fetileng fa Jesu le baaposetoloi ba ne ba ntse ba tsamaya gangwe le gape fa gare ga Bethania le Jerusalema, ba ne ba tlhola ba ema fa tshimong ya Gethesemane go ikhutsa gone le go tlotla. Mme jaanong, masole a ne a tla bona jang Jesu ereka a ne a sa bonale mo lefifing kafa tlase ga ditlhare tsa motlhware? Ba ka tswa ba ne ba ise ba ko ba mmone pele. Judase o ba naya sesupo a ba raya a re: “Leha e le mañ eo ke tla mo atlañ, ke èna, lo chwareñ èna. Lo mo gōgèlè koñ ka tiishō.”

Judase o eteletse pele boidiidi jwa batho go tsena mo tshimong, o bona Jesu le baaposetoloi ba gagwe, mme o tlhamalalela kwa go ene. “Dumèla, Moruti”! o bua jalo a bo a mo atla ka go mo neneketsa.

“Tsala, [u tlile go dira eng, NW]?” Jesu o botsa jalo. Morago o ikaraba ka go bua jaana: “Yudasa, a u ōka Morwa Motho ka katlō?” Go ne go lekane mooki wa gagwe! Jesu o ema mo leseding la dipone le dilampa tse di tukang a bo a botsa jaana: “Lo batla mañ?”

“Yesu oa Nasaretha,” ba araba jalo.

“Ke nna,” Jesu o a araba a eme ka bopelokgale fa pele ga bone botlhe. Ereka ba ne ba gakgamadiwa ke bopelokgale jwa gagwe mme ba sa itse se se ka diragalang, banna bano ba katogela kwa morago ba bo ba wela fa fatshe.

“Ke lo boleletse ha e le nna: me ka re, ha lo batla nna, lesañ ba ba tsamaeè.” Lobakanyana pele ga foo, fa ba ne ba le kwa kamoreng e e kwa godimo, Jesu o ne a bolelela Rraagwe mo thapelong gore o ne a bolokile baaposetoloi botlhe ba gagwe mme go ne go se ope yo o latlhegileng fa e se “ñwana oa tatlhègō hèla.” Ka jalo, gore lefoko la gagwe le tle le diragadiwe, o kopa gore balatedi ba gagwe ba tlogelwe.

Fa masole a sena go rarabologelwa, a ema, mme a simolola go bofa Jesu, baaposetoloi ba lemoga se se tla tlogang se diragala. “Morèna, a ke re rèmè ka chaka?” ba a mmotsa. Pele Jesu a araba, Petere o somola nngwe ya ditšhaka tse pedi tseo baaposetoloi ba tlileng le tsone, o tlhasela Maleko, motlhanka wa moperesiti yo mogolo. Petere o fosa tlhogo ya motlhanka yono mme o mo kgaola tsebe ya moja.

“Mmañ ke dihè yana,” Jesu o bua jalo a tsereganya. O ama tsebe mme o fodisa ntho. Morago ga foo o ruta thuto e e botlhokwa thata a raya Petere a re: “Ba u shomèlè chaka ea gago mo bonnoñ yoa eōna: gonne botlhe ba ba tsaeañ chaka ba tla nyèlèla ka chaka. Kgotsa a ua itlhoma, go re, ke sa kake ka rapèla Rrè, me e re hèla yana a rome bogolo go mephatō e le shomè le bobedi ea baengele go nthusa?”

Jesu o iketleeditse go golegwa. Ka go bo o tlhalosa jaana: “Me hoñ dikwalō di ne di tla dihala yañ, ka di re, Go na le go nna yana?” Mme o oketsa jaana: senwèlō se Rara o se nneileñ, a ga nketla ke se nwa?” O dira tumalanong le sotlhe seo thato ya Modimo e leng sone ka ena!

Morago ga moo Jesu o bua le setlhopha. “A lo tsile yaka ekete lo chologetse senokwane ka dichaka le melamu go nchwara?” o a ba botsa. “Ke nntse ka nna ka dula ka malatsi aotlhe mo tempeleñ, ke ruta, me lo se ka loa nchwara. Me gotlhe mo go dihetse, gore dikwalō tsa baperofeti di dihalè.”

Fa a rialo setlhopha sa masole le molaodi wa masole mmogo le balaodi ba Bajuda ba tshwara Jesu ba mo golega. Fa ba bona seno, baaposetoloi ba tlogela Jesu mme ba a sia. Lefa go ntse jalo, lekawana lengwe—go lebega e le morutwa Mareko—o sala a ntse mo boidiiding joo jwa batho. A ka tswa a ne a le gone kwa ntlong eo Jesu a neng a tshwaretse Tlolaganyo kwa go yone mme a ile a sala boidiidi jwa batho morago go tloga koo. Lefa go ntse jalo, jaanong, ba a mmona, mme ba leka go mo tshwara. Mme o latlha kobo ya gagwe ya leloba mme o tshaba a sa apara. Mathaio 26:47-56; Mareko 14:43-52; Luke 22:47-53; Yohane 17:12; 18:3-12.

◆ Ke ka ntlha yang fa Judase a ne a tlhomamisegile gore o tla fitlhela Jesu kwa tshimong ya Gethesemane?

◆ Jesu o supa jang gore o amega ka baaposetoloi ba gagwe?

◆ Petere o dira eng go sireletsa Jesu, mme Jesu o mo raya a reng?

◆ Jesu o senola jang gore o dumalana ka botlalo le seo Modimo o ratang gore a se dire?

◆ Ke mang yo o salang fa baaposetoloi ba tlogela Jesu, mme o diragalelwa ke eng?