Kafa Moya wa Modimo O ka Go Tlhotlheletsang ka Gone

“E RILE mo tshimologoñ Modimo oa tlhōla legodimo le lehatshe. Me lehatshe ya bo le tobekanye hèla, go sa itsege sepè: me lehihi ya bo le nntse ha godimo ga boteñ: me Mōea oa Modimo oa elama ha godimo ga metse.” (Genesise 1:1, 2) Polelwana eno ya Dikwalo e gatelela tsela e e tlhomologileng eo mongwe le mongwe yo o tshelang a ileng a solegelwa molemo ka yone ke moya o o boitshepo. Moya oo o ne o dira ka nako ya popo, mme re itumelela seo o neng wa se dira, gonne lefatshe le ne la nna legae le le kgatlhang tota la batho.

Mme moya o o boitshepo o ka solegela batho molemo ka tsela e e oketsegileng. Seane se se tlhotlheleditsweng se bolela jaana: “Shokologañ ka kgalemō ea me: bōnañ, ke tla thèla mōea oa me mo go lona, ke tla lo itsise mahoko a me.” (Diane 1:23) Mo motlheng ono wa rona, “mahoko” a a sobokantsweng a Modimo a gone jaaka Bibela e e Boitshèpō, e e kwadilweng ke banna bao ba neng ba “tlhotlhelediwa ke Mōea o o Boitshèpō.” (2 Petere 1:21; Mareko 12:36; 2 Timotheo 3:16) Nako le nako fa motho yo o boikokobetso a bala Bibela, moya o o boitshepo o mo direla molemo mongwe.

Moya O O Boitshepo le Tiro ya go Rera

Moya o o boitshepo o ka tlhotlheletsa botshelo jwa gago ka tsela nngwe fa mongwe wa Basupi ba ga Jehofa a etela kwa ntlong ya gago go tla go bua le wena ka mafoko a a molemo a Bogosi. Re itse seo jang? Fa Jesu Keresete a ne a simolola go rera mafoko a a molemo o ne a bolela fa mafoko ano a ga moperofeti Isaia a dira mo go ene ka go bolela jaana: “Mōea oa ga Yehofa o mo go nna, ka gonne o ntloleditse go rèrèla bahumanegi Mahoko a a Molemō; . . . Go bolèla ñgwaga o o lebosègañ oa ga Yehofa.” (Luke 4:18, 19; Isaia 61:1, 2) Ee, Jesu o ne a tlodiwa ka moya o o boitshepo gore a rere mafoko a a molemo.

Mo godimo ga moo, Jesu o ne a bolelela pele gore go rerwa ga mafoko a a molemo go ne go tla nna go tswelela le fa a sena go swa. O ne a perofesa jaana: “Me Mahoko a a Molemō a, a bogosi, a tla rèrwa mo lehatshiñ yeotlhe, go nna chupō mo merahiñ eotlhe; hoñ ke gōna bokhutlō bo tla tlañ.” (Mathaio 24:14) Jesu o ne a naya balatedi ba gagwe taolo eno ka bonako fela pele a tlhatlogela kwa legodimong: “Tsamaeañ, lo dihè merahe eotlhe barutwa, lo ba kolobetsè mo ineñ ya Rara, le ya Morwa, le ya Mōea o o Boitshèpō: Lo ba rutè go tlhōkōmèla dilō cotlhe tse ke di lo laoletseñ.” (Mathaio 28:19, 20) Ka gone, fa Keresete a sena go tlhatlogela kwa legodimong, barutwa ba gagwe ba ne ba tsweledisa tiro eo e neng e kaelwa ke moya ya go rera le go ruta. Basupi ba ga Jehofa gompieno ba etsa barutwa bao ba pele ka go rera mafoko a a molemo mo lefatsheng lotlhe.

Kolobetso le Moya O O Boitshepo

Jesu o ne a bolela gore motho yo o amogelang mafoko a a molemo, o ne a tla kolobediwa “mo ineñ ya Rara, le ya Morwa, le ya Mōea o o Boitshèpō.” Ka jalo barutwa ba basha ba tswelela go tlhotlhelediwa ke moya o o boitshepo. Polelwana “mo ineñ ya” totatota e kaya “ka tlhotlheletso ya” kana “go lemoga boemo jwa.”a Ka gone, go kolobediwa mo leineng la ga Rara go kaya go amogela kwantle ga pelaelo gore Modimo o laola matshelo a rona. Go kolobediwa ka leina la Morwa go kaya go amogela Jesu jaaka Mogolodi, Motlhomasekao, le Kgosi. Mme go kolobediwa mo leineng la moya o o boitshepo go kopanyeletsa go ikaega ka moya le go ineela mo taolong ya one.b

Moya O O Boitshepo mo Botshelong jwa Gago

Se se utlwisang botlhoko ke gore, go sa ikanyegeng, boitsholo jo bo sa siamang jwa tlhakanelodikobo, thuba- kanyo, le go sa ikobele molao ka kakaretso fela tseo re di bonang mo mafatsheng a “Bokeresete” di supa ntlha ya gore bontsi jwa bao ba ipolelang gore ke Bakeresete totatota ga ba dire tumalanong le moya o o boitshepo. Mme bao ba ineelang mo go one ba segofadiwa tota. Selo sa botlhokwa ke gore ba tsaya masisi seo ba se balang mo Bibeleng e e tlhotlheleditsweng ke moya mme ba se dirisa mo matshelong a bone. Ka gone, ba na le botlhale, temogo, ba kgona go atlhola sentle, ba matsetseleko, ba na le kitso, ebile ba kgona go akanya. (Diane 1:1-4) Dilo tseno di botlhokwa thata mo metlheng eno ya rona e e nang le mathata.

Moya o o boitshepo gape o thusa batho ba ba ntseng jalo go fenya mathata a a bokete tota. Mo metlheng ya bogologolo, Modimo o ne wa bontsha batho ba gagwe kafa ba neng ba ka kgona go dira tiro nngwe le nngwe fela e e bokete ka gone ka katlego. Jehofa o ne a bolela gore e ne e tla dirwa eseng “ka thata, leha e le ka nonohō, ha e se ka mōea oa [gagwe].” (Sekaria 4:6) Fa re ineela mo Modimong le mo moyeng wa gagwe, re tla thusiwa gape go dira ditiro le go fenya mathata ao ka tsela nngwe a neng a tla re fekeetsa.—Mathaio 6:33; Bafilipi 4:13.

Mo godimo ga moo, moya wa Modimo o re thusa go ipelela kgololesego eo lefatshe lotlhe le sa e itseng. Moaposetoloi Paulo o ne a kwala jaana: “Me kwa Mōea oa Morèna o gōna, ke gōna kwa go nañ le kgololèsègō.” (2 Bakorintha 3:17) Bao ba ineelang mo moyeng wa Modimo ba gololesega mo bodumeding jwa maaka, mo tumelabotlhoding, go boifa se se tlang mo isagweng, le dilo tse dingwe fela tseo di ka ba golegang. Eleruri moya wa Modimo o molemo tota! O kgona le go fetola batho. Bibela e umaka seno fa e bolela jaana: “Louñō loa Mōea ke loratō, le boitumèlō, le kagishō, le bopelotelele, le bopelonomi, le molemō, le boikañō, le boiñōtlō, le boikgapō: dilō tse, ga di añwe ke molaō opè.” (Bagalatia 5:22, 23) Abo lefatshe leno le ka bo le ntse ka tsela e sele jang ne fa mongwe le mongwe a ne a ineela go tlhotlhelediwa ke moya wa Modimo!

Bakeresete ba mmatota, jaaka setlhopha ba itumelela “boñwe hèla yoa Mōea mo tumalanoñ le kagishō.” (Baefesia 4:3) Kutlwano le kagiso ga di bonwe motlhofo gompieno. Mme di nna gone koo moya wa Modimo o dirang gone. Eleruri, mo Basuping ba ga Jehofa maatla a a kopanyang a moya o o boitshepo a kopantse batho ba ditso tsotlhe, ba dipuo, le ba merafe go nna ‘bakaulengwe’ ba mmatota.—1 Petere 2:17.

Moya wa Modimo le Wena

A o bona molemo wa go nna le botlhale jo bo tswang kwa Modimong le go ipelela kgololesego ya boammaaruri? A go ka se nne molemo tota fa o ka bona thuso ya bomodimo mo go rarabololeng mathata le go tlhagolela lorato, boitumelo, kagiso, bopelotelele, bopelonomi, molemo, tumelo, bonolo, le boikgapo? He ineele mo maatleng a moya o o boitshepo wa Modimo. Mme motho a ka dira seno jang?

Letla Lefoko la Modimo, Bibela, le tlhotlheletse kakanyo ya gago le pelo ya gago. Kopanela le bao ba letlang moya o o boitshepo go tlhotlheletsa matshelo a bone. Tsayang dikgato jaanong go ithuta le go dira se se ratwang ke Modimo. He, “a Modimo oa cholohèlō o lo tlatsè boitumèlō le kagishō mo go dumeleñ, gore lo totohalèle mo choloheloñ, ka thata ea Mōea o o Boitshèpō.”—Baroma 15:13.

[Dintlha tse di kwa tlase]