Ke Dithapelo tsa Bomang Tse Di Arabiwang?

JEHOFA ke Modimo o o arabang dithapelo. Mme ebile, Lefoko la gagwe ebong Bibela, le mmitsa “Eo u utlwañ thapèlō.” (Pesalema 65:2) O nna a iketleeditse go araba dithapelo. Mme lefa go ntse jalo, totatota o araba dithapelo tsa bomang?

Modimo o araba dithapelo tsa batho bao ba mo itumedisang. Ba na le boikutlo jwa tlotlo jo mopesalema a neng a na najo fa a ne a bolela jaana: “Yaka kwalata e hemahemèla melacwana ea metse, mōea oa me o gu hemahemèla yalo Modimo. Mōea oa me o nyōrèlwa Modimo, eboñ Modimo o o tshedileñ.” (Pesalema 42:1, 2) Lefa go le jalo, ke bosupi bofe jo bo leng teng jo bo supang gore Jehofa o araba dithapelo tsa baobamedi ba gagwe ba boammaaruri?

Bosupi jwa Gore Modimo O Araba Dithapelo

Bibela e na le dilo tse dintsi tse di kwadilweng tseo di supang gore Jehofa o araba dithapelo tsa batlhanka ba ba ikanyegang ba gagwe. Ka sekai, fa Kgosi Jehoshafate wa Juda a ne a rapelela gore a gololwe, Modimo o ne a araba thapelo ya gagwe mme a dira gore baba ba gagwe ba bolaane ka bobone. (2 Ditihalō 20:1-26) Fa Kgosi Hesekia le ene a ne a lebane le masole a a boifisang, o ne a rapela Modimo ka boikokobetso gore o mo thuse. Hesekia o ne a bona gore Jehofa o a boloka fa moengele a ne a bolaya Baasiria ba le 185 000 mo bosigong bo le bongwe.—Isaia 37:14-20, 36-38.

Ke ka ntlha yang fa Modimo o ne wa araba dithapelo tseo? Mo makgetlong oomabedi, dikgosi tseno di ne tsa bolela gore leina la ga Jehofa le tla senngwa fa di ne di ka fenngwa mo dintweng tseo. (2 Ditihalō 20:6-9; Isaia 37:17-20) Ba ne ba amegile thata ka gore leina la gagwe le tla senngwa. “Boikaelelo jo bogolo jwa thapelo,” go bolela jalo The International Standard Bible Encyclopedia, “ga se fela gore mokopi a bone molemo mme ke gore leina la Modimo le tlotliwe.” Ka gone, batlhanka ba ba ikanyegang ba ga Jehofa ba ka tlhomamisega gore o tla ba thusa “ka ntlha ea leina ya gagwè.” Dipego tseno tse di supang gore dithapelo tse di ntseng jalo di ne tsa arabiwa di naya batho ba Modimo tsholofelo ya gore o utlwa dithapelo tsa bone.—Pesalema 91:14, 15; 106:8; Diane 18:10.

Lefa go ntse jalo, le eleng lefa maemo a ama leina la ga Jehofa, Modimo ke ene a dirang tshwetso ya gore a o tla araba dithapelo tse dingwe kana nnyaa. A ka nna a tswa a na le mabaka a a utlwalang a go se arabe dithapelo tse dingwe. Fa re ikutlwa gore dithapelo tsa rona ga di utlwiwe, go tla bo go le molemo gore re tlhatlhobe lebaka la go bo go ntse jalo.

Lebaka la Go Bo Dithapelo Tse Dingwe Di Sa Arabiwe

“E, e tla re lo diha merapèlō e le mentsi, ga nketla ke utlwa,” Jehofa o kile a bolelela Baiseraele jalo. O ne a tswelela jaana fa a ne a bolela lebaka la seo: “Diatla tsa lona di tladikilwe madi thata.” (Isaia 1:15) Tota motho a ka tlhokomologa jang melao ya ga Jehofa lefa go le jalo a bo a lebelela gore o tla mo reetsa? Seane sengwe sa Bibela se araba ka phepafalo fela jaana: “Eo o ithuhulañ, gore a se utlwe molaō, le e leñ morapèlō oa gagwè ke sehedisa pelo hèla.”—Diane 28:9.

Bibela e re naya lebaka le lengwe la go bo dithapelo tse dingwe di sa arabiwe fa e bolela jaana: “Loa lōpa, me ga lo amogele, ka go bo lo lōpa ka go hosa, gore lo tlè lo itihèlè ka gōna mo dikgatlhegoñ tsa lona.” (Yakobe 4:3) Nnyaa, Jehofa ga a kitla a araba dithapelo tse di kopelwang go dira dilo tse di phoso. Re tshwanetse go gakologelwa gape gore Modimo ga o laolwe ke batho, jaaka go ne go ka tualo. Ke ene a dirang tshwetso ya gore o tla araba dithapelo tsa rona jang.

Dithapelo tseo eleruri di tla arabiwang ke Modimo ke tseo di tswang mo pelong e e phepa, tse di dirwang ka maikaelelo a a molemo, le ka tsela e a e tlhomileng—ka Jesu Keresete. (Yohane 14:6, 14) Mme le eleng bao dithapelo tsa bone di dirwang go ya ka ditsela tse di batlegang tseo ka dinako dingwe ba ile ba ikutlwa gore ga ba reediwe. Ke ka ntlha yang fa Modimo o sa arabe dithapelo dingwe tsa batlhanka ba gagwe ka bonako?

Jehofa o itse nako e e molemo thata ya go araba dithapelo. Lemororo mosimane a ka kopa baesekele, rraagwe a ka nna a se ka a e mo rekela go fitlha fa ngwana a godile ka mo go lekaneng gore a ka e kgweetsa ka pabalesego. Go ka nna jalo gape ka dithapelo tsa bao ba ratang Modimo. Ereka a itse dilo tse di leng molemo thata mo go bone, o ba naya dilo tse di ba di tlhokang ka nako e e ba tshwanetseng thata.

Lefa go le jalo, batlhanka ba ga Jehofa ga ba ke ba bona sengwe le sengwe se ba se rapelelang. Ereka ba sa itekanela, ba ka nna ba eletsa dilo tseo di sa ba siamelang. Rraabone yo o lorato wa selegodimo ga a kitla a ba naya selo sepe fela seo se leng kotsi, ka go bo ke Monei wa “nèō ñwe le ñwe e e molemō, le se se molemō señwe le señwe se se tletseñ.” (Yakobe 1:17) Ka tsela e e tshwanang, Modimo ga a kake a re naya sepe seo ene a bonang re sa se tlhoke. (Bapisa 2 Bakorintha 12:7-10.) O araba dithapelo go dumalana le thato le boikaelelo jwa gagwe ka batho ba gagwe.—1 Yohane 5:14, 15.

Jesu ‘O Ne A Utlwiwa’

Jesu e ne e le motho yo o ratang go rapela. (Mathaio 6:9-13; Yohane 17:1-26) O ne a na le tsholofelo e e tletseng gore Rraagwe wa selegodimo o ne a tla utlwa dithapelo tsa gagwe a bo a di arabe. Jesu o kile a re: “Rara, . . . ke itse ha u nkutlwa galè.” (Yohane 11:41, 42) Mme a Jesu ga a ka a ikutlwa a swabile kwa bokhutlong jwa botshelo jwa gagwe jwa mo lefatsheng? A ga a ka a tlhaeletsa jaana: “Modimo oa me, Modimo oa me, u ntatlhetseñ?”—Mathaio 27:46.

Fa Jesu a ne a bolela mafoko ao, go lebega a ne a diragatsa boperofeti jo bo neng bo bolela kaga loso lwa gagwe. (Pesalema 22:1) Ka tsela nngwe, Jesu a ka tswa a ne a kaya gore Jehofa o ne a tlogetse go mo sireletsa mme a letlile Morwawe gore a swe loso lo lo botlhoko le lo lo tlhabisang ditlhong gore a kgone go leka bothokgami jwa gagwe. Fa re tlhatlhoba ditiragalo tsa letsatsi leo la bofelo la botshelo jwa ga Jesu jwa mo lefatsheng re lemoga gore Modimo o ne wa utlwa dithapelo tsa gagwe.

Mo bosigong jo a neng a tshwarwa ka jone, Jesu o ne a rapela mo tshimong ya Gethesemane. O ne a kopa jaana ka makgetlo a mararo: “Rra wè, ha go ka nna yalo, a senwèlō se, se mphetè.” (Mathaio 26:39, 42, 44) Jesu o ne a sa ikgogone go ntsha botshelo jwa gagwe jaaka thekololo ya batho ba ba dumelang. Nnyaa, mme go lebega a ne a amegile tota kaga gore Rraagwe yo a neng a mo rata thata o ne a ka nna a tlontlololwa fa a swela mo mokgorong wa pogisetso jaaka mokgadi yo o hutsitsweng. A Jehofa o ne a utlwa thapelo ya ga Jesu?

Moaposetoloi Paulo o ne a kwala jaana dingwaga moragonyana: “(Eboñ Yesu,) eo e rileñ mo metlheñ ea gagwè a le mo nameñ, a sena go isa merapèlō le mekokotlèlō e e nañ le selelō se se tona le dikeledi kwa go èna eo o nonohileñ go mo golola mo loshuñ, me ea re a sena go utlwiwa ka ntlha ea go boiha Modimo ga gagwe.” (Bahebera 5:7; Luke 22:42, 44) Ee, Jesu o ne a “utlwiwa” mo bosigong jo bo botlhoko thata jwa pele ga loso lwa gagwe. Mme jang?

Jehofa o ne a romela moengele wa gagwe yoo a neng a ‘bonala kwa go [Jesu], a mo thatafatsa.’ (Luke 22:43) Ereka a ne a thatafaditswe jalo, Jesu o ne a kgona go lebagana le loso a le mo koteng eo ya pogisetso. Go lebega gore Jehofa o ne a mo tlhomamisetsa gore go swela ga gagwe mo koteng ga go kitla go lere kgobo mo leineng la bomodimo mme gore kgabagare e tla nna gone go go neng go tla le itshepisa. Eleruri, loso lwa ga Jesu mo thupeng ya pogisetso lo ne lwa bula tsela gore Bajuda bao ka tsela nngwe ba neng ba hutsitswe go ya ka Molao ba falodiwe katlholo ya loso.—Bagalatia 3:11-13.

Malatsi a le mararo moragonyana, Jehofa o ne a tsosa Jesu mme a tlosa tatofatso epe ya gore o a kgoba ka go mo naya maemo a a kwa godimo thata a selegodimo. (Bafilipi 2:7-11) Abo e ne e le tsela e e molemolemo jang ne ya go araba thapelo ya ga Jesu kaga “senwèlō”! Jehofa o ne a araba thapelo eo ka tsela ya gagwe. Mme Jesu o ne a bona masego a a molemolemo tota gonne o ne a raya Rraagwe wa selegodimo a re: “Eseñ go rata ga me, me a go rata ga gago go dihalè.”—Luke 22:42.

Kafa Jehofa A Arabang Dithapelo ka Teng Gompieno

Fela jaaka Jesu, bao ba batlang go itumedisa Jehofa gompieno ba tshwanetse ka metlha ba kopa gore go dirwe go rata ga Modimo. Ba tshwanetse go dumela gore Jehofa o tla araba dithapelo tsa bone ka tsela eo e tla ba solegelang molemo thata. Totatota, o tla ‘ba direla segolo thata bogolo go tsotlhe tse ba di lopang le tse ba di gopolang.’—Baefesia 3:20.

Mosadi mongwe yo mmotlana wa Mokeresete yo o neng a nna le batsadi ba gagwe ba ba sa dumelang o ne a bona kafa lokwalo loo lo leng boammaaruri ka gone. Mo lekwalong le le neng le tswa kwa Mokgatlhong wa Watch Tower, o ne a kopiwa gore a akanyetse ka thapelo gore a go ka kgonega gore a amogele kabelo e e kgethegileng ya borongwa. Lemororo go tswa mo pelong ya gagwe a ne a eletsa go nna kwa gae mme a thuse batsadi ba gagwe gore e nne Bakeresete, o ne a botsa Modimo jaana mo thapelong: “O rata ke dira eng? A o rata ke amogela taletso eno lemororo batsadi ba me ba ganetsa, kana a o rata ke tswelela go thusa batsadi ba me ka go tswelela ke nna le bone?” Nako le nako fa a ne a rapela, segakolodi sa gagwe se ne se mmolelela gore a amogele taletso eo. O ne a swetsa ka gore seno e ne e le karabo ya ga Jehofa.

Modimo o ne a naya mosadi yono nonofo ya gore a kgomarele tshwetso ya gagwe. Fa a ne a kopiwa go fudugela kwa Setlhaketlhakeng sa Awaji, kwa Japane, batsadi ba gagwe ba ne ba gakgamala thata mme ba mo ganetsa le go feta. Lefa go ntse jalo, ereka ba ne ba sa kgone go mo dira gore a fetole mogopolo, mmaagwe o ne a swetsa gore o tla ithuta Bibela e le fela gore a bone lebaka la go bo morwadie a dirile tshwetso e e ntseng jalo. Batsadi ba gagwe ba ne ba mo etela dikgwedi di le tharo moragonyana. Fa ba bona kafa Basupi ba bangwe ba ga Jehofa ba neng ba mo tlhokomela ka teng, rraagwe o ne a kgatlhega tota mme a lela a le esi. Ka bonakonyana fela o ne a simolola go ithuta Bibela. Kgabagare batsadi ba lekgarebe leno ba ne ba kolobediwa mme ba simolola go direla Jehofa ka boikanyegi. A Jehofa Modimo ga a ka a segofatsa mosadi yono wa Mokeresete ka tsela e kgolo go gaisa?

Dithapelo tsa Bone Di A Arabiwa

A o gakologelwa mafoko a mosadi yo o neng a umakiwa kwa tshimologong ya setlhogo se se fetileng? O ne a ise a ko a itumelele go bona dithapelo tsa gagwe di arabiwa. Lefa go le jalo, moragonyana o ne a lemoga gore Modimo o ne a araba dithapelo tsa gagwe. Mosadi yono o ne a kwadile dilo tse dikgolo tse a neng a di rapelela. Letsatsi lengwe o ne a leba mo bukeng eo a kwalang dintlha mo go yone mme a lemoga gore Jehofa o ne a utlwile dithapelo tse dintsi tsa gagwe, le eleng tseo ene ka boene a neng a di lebetse! Ka gone o ne a itse gore Modimo o amega ka ene le gore o ne a araba dithapelo tsa gagwe ka tsela e e lorato e e neng e mo solegela molemo thata.

Fa o ikutlwa gore dithapelo tsa gago ga di arabiwe, ipotse jaana: ‘A ke atamalane thata le Jehofa, “eo o utlwañ thapèlō”? Fa go sa nna jalo, a ke tsaya dikgato go ithuta ka ene le go nna motlhanka yo o ineetseng wa gagwe?’ O araba dithapelo tsa bao ba mo ratang le ba ba dirang thato ya gagwe. Ba ‘nnela ruri mo thapelong’ mme ba reediwa fela jaaka Jesu a ne a reediwa. (Baroma 12:12) Ka jalo, “tshelañ dipelo tsa lona ha pele” ga Jehofa mme lo dire se a se ratang. (Pesalema 62:8) He dithapelo tsa lona di tla utlwiwa.

Gompieno, dimilione tsa batho di rapelela sengwe se se kgethegileng. Ee, ebile dithapelo tsa bone di a utlwiwa. A re boneng lebaka la go bo re ka tlhomamisega gore dithapelo tse di ntseng jalo di tla arabiwa.