Nna o Ntse o Atamalane le Jehofa

“Lo nnèlè rure mo thapeloñ.”—BAROMA 12:12.

 1. Ke eng seo Jehofa a se batlang mabapi le thapelo, mme moaposetoloi Paulo o ne a kgothatsa jang mabapi le thapelo?

JEHOFA ke “Modimo oa cholohèlō” mo bathong ba gagwe botlhe ba ba ikanyegang. Jaaka “eo u utlwañ thapèlō,” o a ba reetsa fa ba mo kopa gore a ba thuse go fitlhelela tsholofetso e e itumedisang eo a e beileng fa pele ga bone. (Baroma 15:13; Pesalema 65:2) Mme o kgothatsa batlhanka botlhe ba gagwe ka Lefoko la gagwe, Bibela, gore ba mo atamele nako le nako fela fa ba eletsa jalo. O teng ka metlha, a batla go utlwa dilo tse ba amegileng ka tsone thata. Ebile tota, o ba kgothatsa gore ba “nnèlè rure mo thapeloñ” ke gore ba ‘rapele ka go bisa go khutla.’a (Baroma 12:12; 1 Bathesalonia 5:17) Jehofa o batla gore Bakeresete botlhe ba mo rapele ba sa kgaotse, ba mo tshololele dipelo tsa bone ba dira jalo ka leina la Morwawe yo o rategang, Jesu Keresete.—Yohane 14:6, 13, 14.

 2, 3. (a) Ke ka ntlha yang fa Modimo a ne a re kgothaletsa gore re “nnèlè rure mo thapeloñ”? (b) Ke eng se se re tlhomamisetsang gore Modimo o batla gore re rapele?

² Ke ka ntlha yang fa Modimo o re kgothatsa ka tsela eno? Gonne mathata a botshelo le boikarabelo jwa jone di ka re imela thata mo e leng gore re ka nna ra lebala go rapela. Kana mathata a ka re fekeetsa mme a re dira gore re se ka ra tlhola re itumelela tsholofelo ya rona mme re tlogele go rapela. Ka ntlha ya dilo tseno, re tlhoka dikgakololo tseo di re kgothaletsang go rapela mme re atamalane thata le motswedi wa thuso le kgomotso, Jehofa Modimo wa rona.

³ Morutwa Jakobe o ne a kwala jaana: “Atamèlañ Modimoñ, me o tla lo atamèla.” (Yakobe 4:8) Ee, Modimo ga a kwa godimo thata kana kgakala thata gore a ka re utlwa fa re bua le ene, lemororo re le batho ba ba sa itekanelang. (Ditihō 17:27) Mo godimo ga moo, ga a re itlhokomolose kana gone go se amege ka rona. Mopesalema o bolela jaana: “Matlhō a ga Yehofa a mo go ba ba mmoihañ, le ditsèbè tsa gagwè di kwa go goeñ ga bōnè.”—Pesalema 34:15; 1 Petere 3:12.

 4. Re ka tshwantsha jang tsela eo Jehofa a reetsang thapelo ka yone?

⁴ Jehofa o laletsa batho gore ba mo rapele. Re ka tshwantsha seno le koo batho bangwe ba sekae ba kopaneng teng go tla go bua. O teng koo, o reeditse ba bangwe fa ba bua. O lebile fela. Mme mongwe o retologela mo go wena, a go bitsa ka leina, a bo a bua le wena. Seno se dira gore o mo sekegele tsebe ka tsela e e kgethegileng. Modimo o reetsa batho ka kelotlhoko ka tsela e e tshwanang ka metlha gongwe le gongwe kwa ba ka tswang ba le teng. (2 Ditihalō 16:9; Diane 15:3) Ka jalo o utlwa mafoko a rona, a re lebile jalo a re sireleditse ebile a re kgatlhegela, jaaka go ne go ka tualo. Lefa go ntse jalo, fa re bitsa Modimo ka leina mo thapelong, o re sekegela tsebe, mme o re ela tlhoko ka tsela e e kgethegileng tota. Ka gonne a na le thata, Jehofa o kgona go lemoga le go tlhaloganya dilo tse motho a ka di kopang mo botennye jwa pelo le mo kakanyong ya gagwe ntswa a sa di bolele ka molomo. Modimo o re tlhomamisetsa gore o tla atamela botlhe ba ba bitsang leina la gagwe ba tlhoafetse ebile ba batla go atamalana le ene.—Pesalema 145:18.

Karabo E E Dumalanang le Boikaelelo jwa Modimo

 5. (a) Kgakololo ya go ‘nnela ruri mo thapelong’ e supa eng mabapi le dithapelo tsa rona? (b) Modimo o araba jang dithapelo?

⁵ Kgakololo ya go ganelela mo thapelong e bontsha gore ka dinako tse dingwe Jehofa a ka nna a re letla gore re rapelele sengwe ka lobakanyana pele re ka bona karabo. Re ka nna ra sekamela mo go reng re lape go kopa gore Modimo a re neye sengwe kana go kopa bopelonomi jwa gagwe jo bo lorato joo re ka bonang re bo tlhoka thata mme bo diega gore re bo newe. Ka gone, Jehofa Modimo o re kopa gore re se ka ra ineela mo go sekameleng go dira jalo mme re nne re rapele ka metlha. Re tshwanetse ra tswelela re mo kopa dilo tse di re tshwenyang, re tlhomamisegile gore o ela tlhoko thata dithapelo tsa rona le gore o tla re naya dilo tse ruri re di tlhokang, eseng fela tseo re ka tswang re di akantse. Ga go na pelaelo gore Jehofa Modimo o re naya dilo tse re di kopang go ya ka boikaelelo jwa gagwe. Ka sekai, go ka tswa go na le ba bangwe bao ba amiwang ke kopo ya rona. Re ka tshwantsha kgang eno ka rre yo morwa wa gagwe a mo kopang baesekele. Rre o itse gore fa a rekela morwawe baesekele eo, morwawe yo mongwe le ene o tla e batla. Ereka morwa yo mongwe a ka tswa a le mmotlana thata gore a ka newa baesekele, rre a ka nna a swetsa gore a se ka a reka epe ka nako eo. Ka tsela e e tshwanang, Rraarona wa selegodimo o dira tshwetso ya go re naya se se tla re solegelang molemo thata mmogo le ba bangwe a dira jalo go ya ka boikaelelo jwa gagwe ebile e le ka nako e e tshwanetseng seo.—Pesalema 84:8, 11; bapisa Habakuke 2:3.

 6. Ke setshwantsho sefe seo Jesu a neng a se dira mabapi le thapelo, mme go ganelela mo thapelong go bontsha eng?

⁶ Sengwe se se kgatlhang thata ke setshwantsho sa ga Jesu se se neng se supa gore barutwa ba gagwe “ba chwanetse go rapèla ka metlha eotlhe ba sa ñosele.” Motlholagadi mongwe, yo a neng a sa direlwe tshiamo, o ne a nna a ganelela mo go kopeng moatlhodi go fitlha fa kgabagare a mo direla ka tshiamo. Jesu o ne a oketsa jaana: “Me Modimo ōna, a ga o ketla o sekèla ba e leñ baitshenkedwi ba ōna.” (Luke 18:1-7) Go ganelela mo thapelong go bontsha gore re na le tumelo, re ikaegile ka Jehofa, le gore re batla go nna re atamalane le ene le go nna re mo kokotlelela, re tlogelela go bona matswela ape fela mo diatleng tsa gagwe.—Bahebera 11:6.

Dikao tsa Bao Ba Neng Ba Nna Ba Atamalane le Jehofa

 7. Re ka etsa tumelo ya ga Abele ka go nna re atamalane le Jehofa jang?

⁷ Bibela e tletse ka dipego tsa dithapelo tse di neng tsa rapelwa ke batlhanka ba Modimo. Tseno “di kwadilwe gore di re rutè, gore re bōnè cholohèlō ka pelotelele le ka kgomoco ea dikwalō.” (Baroma 15:4) Tsholofelo ya rona e a nonofa fa re sekaseka dikao tsa bao ba neng ba nna ba ntse ba atamalane le Jehofa. Abele o ne a ntshetsa Modimo setlhabelo se o neng wa se amogela, mme lemororo go sa begiwa gore o ne a rapela, ga go na pelaelo ya gore o ne a kopa Jehofa ka thapelo gore a amogele setlhabelo sa gagwe. Bahebera 11:4 e bolela jaana: “Ka tumèlō Abele a isetsa Modimo setlhabèlō se se gaisañ sa ga Kaine; me a shupiwa ka gōna ha a le tshiamō.” Abele o ne a itse ka tsholofetso ya Modimo e e mo go Genesise 3:15, mme fa re tshwantsha seo le se re se itseng jaanong, o ne a itse go le gonnye thata. Lefa go le jalo, Abele o ne a tsaya kgato go ya ka seo a neng a se itse. Ka jalo gompieno, bangwe ba batho bao e leng gone ba kgatlhegelang boammaaruri jwa Modimo ga ba ise ba nne le kitso e ntsi mme ba rapela le go dirisa bontsi jwa kitso e ba nang le yone, fela jaaka Abele a ne a dira. Ee, ba dira ka tumelo.

 8. Re ka tlhomamisega jang gore Aberahame o ne a nna a ntse a atamalane le Jehofa, mme re tshwanetse go ipotsa potso efe?

⁸ Motlhanka yo mongwe yo o ikanyegang wa Modimo e ne e le Aberahame, “rra botlhe ba ba dumèlañ.” (Baroma 4:11) Gompieno, re tlhoka go nna le tumelo, ebile re tlhoka go rapela ka tumelo go gaisa lefa e le leng pele, fela jaaka Aberahame a ne a dira. Genesise 12:8 e bolela gore o ne a “agèla Yehofa sebesho gōna, a bitsa leina ya ga Yehofa.” Aberahame o ne a itse leina la Modimo ebile a mmitsa ka lone fa a rapela. O ne a tlhola a rapela kgapetsa ka tlhoafalo, a bitsa “leina ya ga Yehofa, Modimo o o sa khutleñ.” (Genesise 13:4; 21:33) Aberahame o ne a bitsa Modimo ka ntlha ya tumelo eo a neng a itsege thata ka yone. (Bahebera 11:17-19) Thapelo e ne ya thusa Aberahame go nna a itumelela tsholofetso ya Bogosi thata. A re latela sekao sa ga Aberahame sa go ganelela mo thapelong?

 9. (a) Ke ka ntlha yang fa dithapelo tsa ga Dafide di solegela batho ba Modimo molemo thata jaana gompieno? (b) Re ka bona matswela afe fa re rapela jaaka Dafide gore re nne re atamalane le Jehofa?

⁹ Dafide o ne a tlhomologile thata mo go ganeleleng mo thapelong, ebile le dipesalama tsa gagwe di supa seo se ka bolelwang mo thapelong. Ka sekai, batlhanka ba Modimo ba ka rapelela dilo tse di tshwanang le go bolokwa kana go gololwa (3:7, 8; 60:5), gore a ba kaele (25:4, 5), gore a ba sireletse (17:8), gore ba itshwarelwe maleo (25:7, 11, 18), gore ba nne le pelo e e itshekileng (51:10). Fa Dafide a ne a na le matlhoko mangwe, o ne a rapela jaana: “Itumedisè mōea oa motlhanka oa gago.” (86:4) Re ka rapela ka tsela e e tshwanang gore dipelo tsa rona di itumele, re itse gore Jehofa o batla gore re itumelele tsholofelo ya rona. Dafide o ne a nna a atamalane le Jehofa mme o ne a rapela jaana: “Mōea oa me o gu latèla ka thata; seatla sa gago se se siameñ se ntshegeditse.” (63:8) A re tla nna re atamalane le Jehofa, jaaka Dafide a ne a dira? Fa re dira jalo, le rona o tla re tshegetsa.

10. Ke dikgopolo dife tse di phoso tseo mopesalema Asafe a neng a nna natso ka nako nngwe, mme o ne a lemoga eng moragonyana?

¹⁰ Re tshwanetse gore re tile go eletsa matshelo a baikepi a boitaolo le a go rata dilo tse di bonalang fa re batla go nna re ntse re atamalane le Jehofa. Mopesalema Asafe ka nako nngwe o ne a ikutlwa gore go direla Jehofa ga go na molemo ope, ka go bo baikepi ba ne ba nna “ba nntse ba le mo boiketloñ ka metlha eotlhe.” Mme o ne a lemoga gore tsela e a neng a akanya ka yone e ne e le phoso mme gore baikepi ba mo “marelediñ.” Lefa go ntse jalo, o ne a lemoga gore ga go sepe se se gaisang go nna gaufi le Jehofa, mme o ne a bolelela Modimo ka tsela eno: “Ke nntse ke na nau ka metlha eotlhe: u nntse u chwere seatla sa me se segolo. Gonne bōna, ba ba leñ kgakala nau ba tla nyèlèla: . . . Me mo go nna go molemō go atamèla Modimo: Ke dihile Yehofa, Modimo, botshabèlō yoa me, gore ke tlè ke bolèlè kaga ditihō tsa gago cotlhe hèla.” (Pesalema 73:12, 13, 18, 23, 27, 28) Go na le gore re eletse botshelo jwa baikepi jwa go tshela ka go ithatela, ebile e le batho ba ba senang tsholofelo epe, a re direng jaaka Asafe mme re nne re ntse re atamalane le Jehofa.

11. Ke ka ntlha yang fa Daniele e le sekao se se molemo sa motho yo a neng a atamalane le Jehofa, mme re ka mo etsa jang?

¹¹ Daniele o ne a rapela ka metlha a ititeile sehuba, le fa a ne a lebane le kotsi ya go tsenngwa mo mongobong wa ditau ka ntlha ya go bo a ne a tlhokomologile thibelo ya semolao ya gore a se ka a rapela. Mme Jehofa ‘o ne a roma moengele wa gagwe mme a momisa ditau melomo,’ a golola Daniele. (Daniele 6:7-10, 22, 27) Daniele o ne a segofadiwa thata ka go ganelela ga gagwe mo thapelong. A le rona re ganelela mo thapelong, segolobogolo fa re ganediwa fa re rera ka Bogosi?

Jesu, Sekao sa Rona

12. (a) Kwa tshimologong ya bodihedi jwa gagwe, Jesu o ne a tlhoma sekao sefe mabapi le thapelo, mme seno se ka solegela Bakeresete molemo jang? (b) Ke eng seo thapelo ya ga Jesu ya sekao e se senolang kaga thapelo?

¹² Jesu o ne a bonwa a rapela go tloga fela kwa tshimologong ya bodihedi jwa gagwe mo lefatsheng. Boikutlo jwa gagwe jwa go rata go rapela fa a ne a kolobediwa bo ne jwa tlhomela bao ba kolobediwang ka metsi mo metlheng eno ya segompieno sekao se se molemo thata. (Luke 3:21, 22) Motho a ka nna a rapelela gore Modimo o mo thuse gore a kgone go dira seo se tshwantshediwang ke go kolobediwa ka metsi. Jesu le ene o ne a thusa ba bangwe gore ba kgone go rapela Jehofa. Ka nako nngwe fa Jesu a ne a le kwa lefelong lengwe a rapela, mongwe wa barutwa ba gagwe o ne a bua le ene jaana fa a fetsa: “Morèna, re rutè go rapèla.” Jesu o ne a ba bolelela seo ka tlwaelo se itsegeng jaaka thapelo ya sekao, eo go ya ka tatelano ya se se buiwang mo go yone e bontshang gore leina la Modimo le boikaelelo jwa gagwe di tshwanetse tsa tla pele. (Luke 11:1-4) Ka gone, re tshwanetse ra leba dilo ka tsela e di leng ka yone tota le ka tekatekano, re sa tlhokomologe “dilō tse di molemō.” (Bafilipi 1:9, 10) Gone mme go na le dinako tseo go tlhokegang dilo tse di kgethegileng kana go nang le mathata a a kgethegileng a a tshwanetseng go rarabololwa. Jaaka Jesu, Bakeresete ba ka ya kwa Modimong ka thapelo go kopa maatla a go dira kabelo nngwe kana go lebana le teko kana sengwe se se kotsi. (Mathaio 26:36-44) Ebile tota, dithapelo tsa botho di ka akaretsa karolo nngwe le nngwe ya botshelo.

13. Jesu o ne a bontsha botlhokwa jwa go rapelela ba bangwe jang?

¹³ Jesu o ne a re bontsha ka sekao sa gagwe se se molemo gore go botlhokwa gore re rapelele ba bangwe. O ne a itse gore balatedi ba gagwe ba ne ba tlile go ilwa le go bogisiwa fela jaaka ene. (Yohane 15:18-20; 1 Petere 5:9) Ka gone, o ne a kopa Modimo gore “u ba dibèlè mo go eo o boshula.” (Yohane 17:9, 11, 15, 20) Mme ereka a ne a itse ka teko e e kgethegileng e Petere a neng a tlile go lekwa ka yone o ne a mo raya a re: “Me ke gu rapeletse gore tumèlō ea gago e se tlhaele.” (Luke 22:32) Abo go le molemo jang ne fa le rona re ganelela mo go rapeleleng bakaulengwe ba rona, re akanya ka ba bangwe eseng fela ka mathata a rona kana dilo tse re di kgatlhegelang!—Bafilipi 2:4; Bakolosa 1:9, 10.

14. Re itse jang gore Jesu o ne a nna a ntse a atamalane le Jehofa mo bodiheding jotlhe jwa gagwe jwa mo lefatsheng, mme re ka mo etsa jang?

¹⁴ Mo bodiheding jotlhe jwa gagwe, Jesu o ne a ganelela mo thapelong, a nna a ntse a atamalane le Jehofa. (Bahebera 5:7-10) Moaposetoloi Petere o tsopola Pesalema 16:8 mo go Ditihō 2:25-28 a bo a bolela jaana a supa gore e ne e raya Morena Jesu Keresete: “Dafide o bua kaga gagwè, a re, Ke nntse ka bōna Yehofa ha pele ga sehatlhōgō sa me ka metlha eotlhe; gonne o kaha cogoñ ya me ye legolo, gore ke se ka ka tshikinyèga.” Re ka dira ka tsela e e tshwanang. Re ka rapela Modimo gore o re atamele, mme re ka supa fa re ikanya Jehofa tota ka go nna re akantse ka ene. (Bapisa Pesalema 110:5; Isaia 41:10, 13.) He re tla tila mathata a mefuta yotlhe, ka go bo Jehofa o a re tshegetsa, ebile ga re kitla re wa.

15. (a) Ga re a tshwanela le ka motlha ra palelwa ke go ganelela mo thapelong mabapi le eng? (b) Ke tlhagiso efe e re e newang mabapi le go leboga?

¹⁵ A le ka motlha re se ka ra palelwa ke go lebogela Jehofa bomolemo jotlhe jwa gagwe, ee, “bopelonomi jo bogolo jo bo sa re tshwanelang jwa Modimo,” joo bo akaretsang neo e a e re fileng ya go ntsha Morwawe setlhabelo sa thekololo sa maleo a rona. (2 Bakorintha 9:14, 15, NW; Mareko 10:45; Yohane 3:16; Baroma 8:32; 1 Yohane 4:9, 10) Eleruri, a ‘Modimo ebong Rara a lebogwe ka dilo tsotlhe,’ ka leina la ga Jesu. (Baefesia 5:19, 20; Bakolosa 4:2; 1 Bathesalonia 5:18) Re tshwanetse go ela tlhoko gore re se ka ra nna lobaka re ise re bolele fa re leboga gonne re ne re tshwenyegile thata ka seo re se nang naso kana ka mathata a rona ka namana.

Go Latlhela Merwalo ya Rona mo go Jehofa

16. Re tshwanetse ra dira eng fa go na le bothata bongwe jo bo re tshwenyang?

¹⁶ Go ganelela mo thapelong go supa selekanyo se segolo se re ineetseng ka sone. Fa re bitsa Modimo, seo se re solegela molemo le pele a re araba. Fa go na le bothata jo bo tshwenyang dikakanyo tsa rona, re ka nna re atamalane le Jehofa ka go latela kgakololo eno: “Latlhèla morwalō oa gago mo go Yehofa, me o tla gu kokotletsa.” (Pesalema 55:22) Fa re latlhela merwalo yotlhe ya rona—dilo tse re tlhobaetseng ka tsone, matshwenyego, go swabisiwa, go boifa, le tse dingwe—mo Modimong, re dumela ka botlalo mo go ene, re tla kgona go ritibala dipelo, re bone “kagishō ea Modimo e e hetañ tlhaloganyō eotlhe.”—Bafilipi 4:4, 7; Pesalema 68:19; Mareko 11:24; 1 Petere 5:7.

17. Re ka bona kagiso ya Modimo jang?

¹⁷ A kagiso eno ya Modimo e tla fela ka bonako? Lemororo re ka kgona go imologa ka bonako, seo Jesu a neng a se bolela kaga go rapelela moya o o boitshepo se boammaaruri le fano: “Lopañ, me lo tla nèwa; batlañ, me lo tla bōna; kgwanyakgwanyañ, me lo tla bulèlwa.” (Luke 11:9-13) Ereka moya o o boitshepo e le one oo re tlosang ditlhobaelo tsa rona ka one, re tshwanetse go nna re kopa kagiso ya Modimo le gore a re thuse go rwala merwalo ya rona. Re ka tlhomamisega gore fa re ganelela mo thapelong, re tla kgona go gololesega le go ritibala mo pelong.

18. Ke eng seo Jehofa a se re direlang fa re sa itse tota gore re ka rapelela eng mo maemong a a rileng?

¹⁸ Mme go tweng fa re sa itse tota gore re rapelele eng? Dilo tse di re utlwisang botlhoko tota gantsi ga re di bolele gonne re sa tlhaloganye boemo jwa rona ka botlalo, kana re sa itse gore re ka bolelela Jehofa eng. Moya o o boitshepo o ka re buelela mo maemong ano. Paulo o ne a kwala jaana: “Mōea le ōna o thusa thetelèlō ea rona ka mokgwa o o nntseñ yalo: gonne ga re itse go rapèla yaka re chwanetse.” (Baroma 8:26) Jang? Go na le boperofeti le dithapelo tse di tlhotlheleditsweng mo Lefokong la Modimo tseo di amang maemo a rona. O letla gore di re buelele, jaaka go ne go ka tualo. O di amogela jaaka seo re neng re ka se rapelela fa re ne re itse gore di kaya eng mo go rona, mme o re di direla fela ka tshwanelo.

Thapelo le Tsholofelo ya go Tswelela Pele

19. Ke ka ntlha yang fa thapelo le tsholofelo di tla tswelela di le teng ka bosakhutleng?

¹⁹ Re tla tswelela re ntse re rapela Rraarona wa selegodimo ka bosakhutleng, segolobogolo re lebogela lefatshe le lesha le masego otlhe a lone. (Isaia 65:24; Tshenolō 21:5) Gape re tla tswelela re itumelela tsholofelo ya rona, gonne tsholofelo eno ka tsela nngwe e tla tswelela e ntse e le teng ka bosakhutleng. (Bapisa 1 Bakorintha 13:13.) Ga re kgone le go akanya fela gore ke dilo dife tse disha tseo Jehofa a tla di lereng mo lefatsheng fa a sa tlhole a le mo letsatsing le a le itlhometseng la boikhutso la Sabata. (Genesise 2:2, 3) Mo lobakeng lotlhe lo lo senang bokhutlo, o tla naya batho ba gagwe dilo tse di gakgamatsang tse di supang lorato, mme isagwe e ba tsholetse dilo tse di molemo thata tse ba tla di dirang ba dira go rata ga gagwe.

20. Re tshwanetse ra ititaya sehuba gore re tla dira eng, le gone ka ntlha yang?

²⁰ Ereka re na le dilo tse di kgatlhang jalo tse re di solofetseng fa pele ga rona, ekete rotlhe re ka nna re atamalane le Jehofa ka go ganelela mo thapelong. Ekete re ka se ka ra tlogela go leboga Rraarona wa selegodimo ka masego otlhe a gagwe. Ka nako e e tshwanetseng dilo tse re di lebeletseng di tla diragadiwa ka tsela e e itumedisang, le eleng go feta ka tsela e re neng re e akantse kana re e lebeletse, ka go bo Jehofa ‘o nonofile go dira segolo thata bogolo go tsotlhe tse re di lopang le tse re di gopolang kafa nonofong e e dirang mo go rona.’ (Baefesia 3:20) Re akantse ka seno he, a re galaletseng Jehofa Modimo wa rona, “eo u utlwañ thapèlō” re bo re mo tlotle le go mo leboga ka bosakhutleng!

[Ntlha e e kwa tlase]

O Ne O Tla Araba Jang?

◻ Ke ka ntlha yang fa re tlhoka go ganelela mo thapelong?

◻ Ke eng seo re se ithutang go tswa mo dikaong tsa dithapelo tsa batho ba pele ga Bokeresete?

◻ Ke eng seo re se ithutang go tswa mo sekaong sa ga Jesu sa thapelo?

◻ Re ka latlhela merwalo ya rona mo go Jehofa jang mme seo se ka felela ka eng?

[Setshwantsho mo go tsebe 17]

Daniele o ne a ganelela mo thapelong lemororo a ne a tshosediwa ka gore o tla latlhelwa mo mongobong wa ditau