Dipotso Tse Di Tswang go Babadi

A Faro tota o ne a nyala Sara, mosadi wa ga Aberahame, jaaka fa go lebega go ntse mo go Genesise 12:19 go ya kafa dithanolo dingwe tsa Bibela di e bayang ka teng?

Nnyaa, Faro o ne a kganelwa gore a se ka a tsaya Sara (Sarai) go nna mosadi wa gagwe. Ka jalo, tlotlego ya ga Sara le seriti sa gagwe ga di a ka tsa nyadiwa.

Re thusiwa go tlhaloganya seno fa re tlhatlhoba boemo mo ditemaneng tse di e dikologileng. Ka ntlha ya leuba Aberahame (Aberame) o ne a patelesega gore a tshabele kwa Egepeto ka lobakanyana. O ne a boifa gore botshelo jwa gagwe bo ne bo tla nna mo kotsing koo ka ntlha ya mosadi wa gagwe yo montle, Sara. Aberahame o ne a ise a tshole ngwana wa mosimane le Sara, ka jalo fa a ne a ka swela kwa Egepeto, lotso lwa Losika lo ne lo tla kgaoga, Losika lo malapa otlhe a lefatshe a neng a tla segofadiwa ka lone. (Genesise 12:1-3) Ka jalo Aberahame o ne a bolelela Sara gore a ipolele gore ke kgaitsadie, ka gonne tota e ne e le kgaitsadie ka rraagwe.—Genesise 12:10-13; 20:12.

O ne a sa boife fela. Mokanoki August Knobel o ne a tlhalosa jaana: “Aberame o ne a kopa Sarai gore a ikitsise e le kgaitsadie kwa Egepeto gore a tle a se ka a bolawa. Fa a ne a ka itsiwe e le mosadi yo o nyetsweng, Moegepeto o ne a ka mmona fela ka gore a bolaye monna wa gagwe yo o leng mong wa gagwe; fa a ne a itsiwe e le kgaitsadie, go ne go ka kgonega gore ba mo tseye mo go kgaitsadie ka kagiso.”

Lefa go ntse jalo, dikgosana tsa Egepeto ga di a ka tsa buisana le Aberahame gore Faro a nyale Sara. Ba ne ba tsaya Sara yo montle fela ba mo isa kwa ntlong ya ga Faro, mme mmusi wa Egepeto o ne a neela Aberahame, yo go neng go twe ke kgaitsadie, dimpho. Mme lefa go ntse jalo e ne ya re morago ga seno, Jehofa a itaya ba ntlo ya ga Faro ka dipetso. Fa boammaaruri bo ne bo senolelwa Faro ka tsela nngwe e e sa bolelwang, o ne a raya Aberahame a re: “O ne o buelang o re, ‘Ke kgaitsadiake,’ mo ke bileng ke ne ke setse ke batla ke mo tsaya go nna mosadi wa me? Jaanong mosadi wa gago ke yo. Mo tseye o tsamaye!”—Genesise 12:14-19, NW.

The New English Bible le dithanolo tse dingwe tsa Bibela di ranola karolo ya temana e e fa godimo e e ditlhaka di sekamesitsweng di re “mo ke bileng ka mo tsaya gore e nne mosadi wa me” kana ka mafoko mangwe a a tshwanang le ao. Le mororo tota e se thanolo e e phoso, mafoko a a ntseng jalo a ka neela kgopolo ya gore tota Faro o ne a nyetse Sara, gore ba ne ba setse ba nyalane. Go ka elwa tlhoko gore mo go Genesise 12:19 lediri la Sehebera le le ranotsweng e le “tsaya” le mo pakeng e e supang tiro e e sa felang. New World Translation e ranola lediri leno la Sehebera ka tsela e e dumalanang le ditemana tse di dikologileng gape e le ka tsela e e bontshang boemo jwa lediri leno ka phepafalo—“mo ke bileng ke ne ke setse ke batla ke mo tsaya go nna mosadi wa me.”a Le mororo Faro a ne a ‘batla a tsaya’ Sara go nna mosadi wa gagwe, o ne a ise a dire mokete kana dithulaganyo dipe tse di tlhokegang.

Gantsi Aberahame a nyalediwa tsela eo a neng a dira dilo ka yone mo kgannyeng eno, mme lefa go ntse jalo o ne a dira jalo a direla Losika lo lo solofeditsweng ka jalo a direla setho sotlhe.—Genesise 3:15; 22:17, 18; Bagalatia 3:16.

Mo boemong jo bongwe jo bo tshwanang le joo jo bo neng bo ka nna kotsi, Isake o ne a dira gore mosadi wa gagwe, Rebeka, a se ka a ipolela gore o nyetswe. Ka nako eo morwabone Jakobe, yo Losika lo neng lo tla tla mo lotsong lwa gagwe, o ne a setse a tshotswe mme go bonala gore e ne e setse e le lekawana. (Genesise 25:20-27; 26:1-11) Lefa go ntse jalo, maikaelelo a kgato eno e e siameng a ka nna a bo a ne a tshwana fela le a ga Aberahame. Ka nako nngwe go le leuba Isake le lelapa la gagwe ba ne ba nna mo nageng ya kgosi ya Bafilisitia e go neng go twe ke Abimeleke. Fa Abimeleke a ne a ka lemoga gore Rebeka o ne a nyetswe ke Isake, o ne a ka nna a bolaya maloko a mangwe otlhe a lelapa la ga Isake, seo se neng se ka raya gore Jakobe o ne a tla bolawa. Mo kgannyeng eno le yone, Jehofa o ne a tsenelela gore a sireletse batlhanka ba gagwe le lotso lwa Losika.

[Ntlha e e kwa tlase]