Go Farologanya Bokoa, Boikepo, le Boikwatlhao

BOLEO ke selo se Bakeresete ba se tlhoileng—go tlhaela go dira dilo tse di siameng tse Jehofa a di batlang. (Bahebere 1:9) Ka maswabi, rotlhe re a tle re leofe ka nako nngwe. Rotlhe re kgaratlha le bokoa le bosaitekanelang jo re bo ruileng. Lefa go ntse jalo, mo mabakeng a le mantsi fa re bolelela Jehofa maleo a rona mme re leka ka pelo yotlhe gore re seka ra boa ra a dira gape, re tla kgona gore re mo atamele ka segakolodi se se phepa. (Baroma 7:21-24; 1 Johane 1:8, 9; 2:1, 2) Re leboga Jehofa go bo a amogela tirelo ya rona e e boitshepo ka ntlha ya setlhabelo sa thekololo lefa re na le makoa.

Fa motho a leofa mo go masisi ka ntlha ya bokoa jwa nama o tlhoka kaelo ya bodisa ka bofefo e e tlhalositsweng mo go Jakobe 5:14-16: “A mongwe mo go lona o a lwala [ka tsela ya semoya]? A a bitse bagolwane ba phuthego . . . Fa a leofile, o tla go itshwarelwa. Ke gone lo ipolelelane dibe, lo rapelelane, gore lo tle lo fodisiwe.”

Ka jalo, go tlhokega se se fetang go ipolela mo go Jehofa fa Mokeresete mongwe yo o ineetseng a dirile boleo jo bo masisi. E re ka bophepa le kagiso ya phuthego bo nna mo kotsing, bagolwane ba tshwanetse go tsaya dikgato dingwe. (Mathaio 18:15-17; 1 Bakorinthe 5:9-11; 6:9, 10) Bagolwane ba ka nna ba tshwanelwa gore ba tlhomamise gore: A motho yo o leofileng o a ikwatlhaya? Ke eng se se ileng sa dira gore a leofe? A e ne e le ka ntlha ya bokoa bongwe jwa nakwana fela? A o ne a setse a tlwaetse go dira boleo? Gantsi ga go motlhofo go lemoga le go bona dilo tseno mme go tlhoka gore motho a nne le temogo e ntsi.

Lefa go ntse jalo, go tweng fa e le gore motho o ile a leofa ka ntlha ya go nna le mokgwa o o sa siamang le go itshwara ka tsela e e bosula? Fa go ntse jalo, go phepafetse gore boikarabelo jwa bagolwane ke bofe. Fa moaposetoloi Paulo a ne a kaela kafa go tshwanetseng ga rarabololwa kgang e e masisi ka teng mo phuthegong ya kwa Korinthe, o ne a re: “Tlosang motho yo o bosula mo gare ga lona.” (1 Bakorinthe 5:13) Batho ba ba boikepo ga ba batlege mo phuthegong ya Bokeresete.

Go Atlhola Selekanyo sa Bokoa, Boikepo, le Boikwatlhao

Bagolwane ba ka itse jang gore motho o a ikwatlhaya?a Potso eno ga e motlhofo. Ka sekai, akanya kaga Kgosi Dafite. O ne a dira boaka, mme le tota go bolaya motho. Mme lefa go ntse jalo, Jehofa o ne a mo letla gore a tswelele pele a tshela. (2 Samuele 11:2-24; 12:1-14) Mme o akanye kaga Ananiase le Safira. Ba ne ba bua maaka, ba itimokanya, ba leka go tsietsa baaposetoloi ka go dira e kete ba molemo thata. A seno se ne se le masisi? Ee. Se le bosula fela jaaka go bolaya motho le go dira boaka? Le e seng! Lefa go ntse jalo, Ananiase le Safira ba ne ba tshwanelwa ke go swa ka ntlha ya tiro eo.—Ditiro 5:1-11.

Ke ka ntlha yang fa go na le ditsela tse di farologaneng tsa go atlhola? Dafite o ne a dira boleo jo bo masisi ka ntlha ya bokoa jwa nama. Fa a ne a bodiwa kaga se a neng a se dirile, o ne a ikwatlhaya, mme Jehofa a mo itshwarela— lefa gone a ne a otlhaiwa botlhoko ka go nna le mathata mo lelapeng la gagwe. Ananiase le Safira ba ne ba leofa ka gonne ba ne ba bua maaka ka boitimokanyi, ba leka go tsietsa phuthego ya Bokeresete mme ka go dira jalo ba ‘aketsa moya o o boitshepo le Modimo.’ Seno se ne sa supa gore ba ne ba na le pelo e e bosula. Ka jalo, ba ne ba otlhaiwa botlhoko go feta.

Mo mabakeng oomabedi Jehofa e nnile ene yo o neng a dira katlholo, e bile katlholo ya gagwe e ne e siame ka gonne o kgona go leka dipelo. (Diane 17:3) Bagolwane ba batho ga ba kgone go dira jalo. Ka jalo bagolwane ba ka lemoga jang gore a boleo jo bo masisi jo bo dirilweng bo supa thata gore o bokoa go na le gore o boikepo?

Tota boleo jotlhe bo bosula, mme ga se baleofi botlhe ba ba leng bosula. Maleo a a tshwanang e ka nna ka ntlha ya bokoa mo mothong yo mongwe mme e nne ka ntlha ya bosula mo mothong yo mongwe. Mme gone, gantsi motho o a tle a leofe ka ntlha ya bokoa mmogo le boikepo jwa gagwe. Tsela e le nngwe e seno se ka farologanngwang ka yone ke tsela e motho yo o leofileng a lebang se a se dirileng ka yone le gore o ikaeletse go dira eng kaga gone. A o bonala a na le moya wa boikwatlhao? Bagolwane ba tlhoka temogo gore ba kgone go tlhaloganya seno. Ba ka bona jang temogo eno? Moaposetoloi Paulo o ne solofetsa Timotheo jaana: “O akanye se ke se buang; gonne Morena o tla go naya tlhaloganyo mo dilong tsotlhe.” (2 Timotheo 2:7) Bagolwane ba tla bona temogo e ba e tlhokang go leba batho ba ba leofang mo phuthegong ka tsela e e siameng fa ka boikokobetso ba nna ba ntse ba ‘akantse’ kaga mafoko a a tlhotlheleditsweng a ga Paulo le bakwadi ba bangwe ba Baebele. Fa ba dira jalo, he, ditshwetso tse ba di dirang di tla supa fa ba dirisa mogopolo wa ga Jehofa mme e seng wa bone.—Diane 11:2; Mathaio 18:18.

Ba ka dira seno jang? Tsela e le nngwe ke go sekaseka gore Baebele e tlhalosa batho ba ba bosula jang mme ba bo ba tlhatlhobe gore a motho yo ba dirisanang le ene o ntse jalo.

Dumela Molato le go Ikwatlhaya

Adame le Efa e nnile batho ba ntlha go tlhopha tsela e e bosula. Ba ile ba tsuololela bolaodi jwa bomodimo le mororo ba ne ba itekanetse e bile ba na le kitso e e feletseng kaga melao ya ga Jehofa. Ba ile ba arabela ka tsela e e gakgamatsang fa Jehofa a ne a ba botsa kaga se ba neng ba se dirile—Adame o ne a pega Efa molato mme Efa a pega noga molato! (Genesise 3:12, 13) A o ko o bapise seno le kafa Dafite a neng a le boikokobetso thata ka teng. Fa a ne a bontshiwa boleo jwa gagwe jo bo masisi, o ne a dumela se a se dirileng mme a kopa boitshwarelo a re: “Ke leofetse Jehofa.”—2 Samuele 12:13; Pesalema 51:4, 9, 10.

Fa bagolwane ba lebane le kgang e go dirilweng boleo jo bo masisi mo go yone, segolobogolo fa e le motho yo o godileng, ba tla bo ba dira sentle fa ba akanya ka dikai tse pedi tseno. A motho yo o leofileng—fela jaaka Dafite fa a sena go tlhomamisega gore o leofile—o dumela ka tlhamalalo fela gore o leofile, mme ka go ikwatlhaya a batla gore Jehofa a mo thuse le go mo itshwarela, kana a o batla go nyenyefatsa se a se dirileng, kana gongwe a batla go pega motho o sele molato? Gone ke boammaaruri gore motho yo o leofang o ka nna a batla go tlhalosa gore ke eng se se dirileng gore a leofe e bile go ka nna ga bo go na le mabaka a jaanong kana a nako e e fetileng, ao go ka tlhokegang gore bagolwane ba a akanyetse fa ba tlhatlhoba gore ba ka mo thusa jang. (Bapisa Hosea 4:14.) Mme o tshwanetse gore a dumele gore ke ene yo o leofileng e bile ke ene yo o ikarabelang fa pele ga Jehofa. Gakologelwa: “Jehofa o gaufi le ba ba pelo e phatlogileng, o boloka ba ba mowa o o ngomogileng.”—Pesalema 34:18.

Go Dira se se Bosula

Go buiwa thata kaga batho ba ba bosula mo bukeng ya Dipesalema. Dikwalo tse di ntseng jalo le tsone di ka thusa bagolwane gore ba lemoge gore a tota motho o bosula kana o bokoa. Ka sekai lebelela thapelo e e tlhotlheleditsweng ya ga Kgosi Dafite: “O se ka wa nkgogolela le baikepi, le ba ba dirang tshiamololo; ba ba buang kagiso le ba ga bone, mme go senya go le mo pelong tsa bone.” (Pesalema 28:3) Tlhokomela gore baikepi ba umakiwa mmogo le batho “ba ba dirang tshiamololo.” Motho yo o leofang ka ntlha ya bokoa jwa nama gantsi o tla tlogela fela fa a itemoga. Mme lefa go ntse jalo, fa motho a ‘dira’ se se bosula mme seno e nna karolo ya botshelo jwa gagwe, seno se ka na sa bontsha gore o na le pelo e e bosula.

Mo temaneng eo Dafite o ne a umaka selo se sengwe se se ka bontshang gore motho o boikepo. Motho yo o bosula o bua dilo tse di molemo mme o na le dilo tse di maswe mo pelong ya gagwe fela jaaka Ananiase le Safira. O ka nna a bo a le motho yo o itimokanyang—fela jaaka Bafarasai ba nako ya ga Jesu bao ‘ka fa ntle ba neng ba bonala mo bathong jaaka e kete ba siame, mme mo teng ba ne ba tletse boitimokanyo, le boikepo.’ (Mathaio 23:28; Luke 11:39) Jehofa o tlhoile boitimokanyo. (Diane 6:16-19) Fa ka boitimokanyi motho a leka go ganetsa gore o leofile mo go masisi lefa a setse a buisana le komiti ya boatlhodi tota, kana a dumela fela se batho ba setseng ba se itse, a gana go ipolela gotlhelele, seno se ka nna sa bontsha sentle gore o na le pelo e e bosula.

Go Nyatsa Jehofa ka Boikgogomoso

Dilo tse dingwe tse di tlhalosang motho yo o boikepo di umakiwa mo go Pesalema 10. Koo re bala jaana: “Mohumanegi o khukhelwa ka tlhoafalo ka boikgodiso jwa baikepi; . . . o kgala Jehofa.” (Pesalema 10:2, 3) Re tshwanetse go leba jang Mokeresete yo o ineetseng mme a ikgogomosa e bile a nyatsa Jehofa? Ruri megopolo eno ke e e bosula. Motho yo o leofang ka ntlha ya bokoa jwa gagwe, o tla ikwatlhaya le go leka ka thata go fetola botshelo jwa gagwe fela fa a sena go lemoga boleo jwa gagwe kana a sena go bo bontshiwa. (2 Bakorinthe 7:10, 11) Go farologana le seo, ke eng se se tla thibelang motho go boela gangwe le gape mo tseleng ya gagwe e e boikepo fa e le gore o ile a leofa ka ntlha ya go bo a nyatsa Jehofa tota? Ke jang motho yoo a ka nnang le boikokobetso jo a bo tlhokang gore a ikwatlhaye ruri fa e le gore o bontsha moya wa go ikgogomosa le mororo a gakololwa ka moya wa boikokobetso?

A jaanong re tlhatlhobeng mafoko a ga Dafite moragonyana mo go yone pesalema eo: “Ana moikepi o nyaletsang Modimo; a ithaya mo pelong a re: ‘Ga o ketla o go lefetsa’?” (Pesalema 10:13) Motho yo o bosula mo phuthegong ya Bokeresete o itse pharologano fa gare molemo le bosula, mme ga a etsaetsege go dira bosula fa a gopola gore ga a kitla a lemogiwa. O dira fela se a se batlang a laolwa ke dikeletso tsa gagwe tsa boleo fa go sena tsela epe e a ka lemogiwang ka yone. Ga a kitla a tshwana le Dafite mme ene o loga maano a go tila go otlhaiwa fa boleo jwa gagwe bo lemogiwa. Motho yo o ntseng jalo o nyatsa Jehofa tota. “Ga go na poifo ya Modimo fa pele ga matlho a gagwe. . . . ga a feretlhwe ke bosula.”—Pesalema 36:1, 4.

Go Utlwisa ba Bangwe Botlhoko

Gantsi boleo ga bo ame motho a le mongwe fela. Ka sekai, motho yo o dirang boaka o leofela Modimo; o utlwisa mosadi le bana ba gagwe botlhoko; mme fa motho yo a dirileng le ene boaka e le motho yo o nyetsweng, o utlwisa ene le lelapa la gagwe botlhoko; mme o senya leina le lentle la phuthego. O leba sotlhe seno jang? A o bonala a hutsafetse tota e bile a ikwatlhaya ruri? Kgotsa a o bontsha moya o o tlhalosiwang mo go Pesalema 94: “Badira tshiamololo botlhe ba a ipelafatsa. Ba phatlakanya batho ba gago, Jehofa; ba tlhokofatsa boswa jwa gago. Ba tle ba bolaye mosadi wa motlholagadi le moeng ba swe, ba matle masiela. Mme ba re: ‘Jehofa ga a ketla a bona, le gone Modimo wa ga Jakobe ga o ketla o tlhokomela’”?—Pesalema 94:4-7.

Gone maleo a go tla dirisanwang le one mo phuthegong a ka nna a seke a akaretse polao. Lefa go ntse jalo, moya o o tla bong o bontshiwa ka nako eo—moya wa go batla go utlwisa ba bangwe botlhoko gore motho ka esi a solegelwe molemo—o ka nna wa lemogiwa ke bagolwane fa ba ntse ba tlhatlhoba boleo bongwe jo bo dirilweng. Seno le sone ke boikgantsho, e leng bosupi jwa gore motho o bosula. (Diane 21:4) Seno se farologane gotlhelele le moya wa Mokeresete wa boammaaruri, yo o iketleeditseng go beela bakaulengwe ba gagwe botshelo jwa gagwe.—Johane 15:12, 13.

Go Dirisa Melaometheo ya Modimo

Dikaelo tse di mmalwa tseno ga di a fiwa gore di nne melao. Lefa go ntse jalo, di dira gore re bone dilo dingwe tse Jehofa a di lebang di le bosula tota. A motho o gana go dumela molato wa sengwe se se bosula se a se dirileng? A motho yo o leofileng o ile a gana go amogela kaelo eo a neng a e newa mo nakong e e fetileng mo go yone kgang eo? A o setse a go ntshitse mokgwa go dira boleo jo bo masisi? A motho yo o leofileng o bontsha gore o nyatsa molao wa ga Jehofa gotlhelele? A o ile a dira matsapa a magolo gore a fitlhe boleo jwa gagwe mme gongwe ka go dira jalo a leofisa le ba bangwe? (Jude 4) A o dira matsapa le e leng go feta pele, fela fa a bona gore boleo jwa gagwe bo a senoga? A motho yo o leofileng o bontsha gotlhelele gore ga a kgathalele go bo a ile a direla ba bangwe bosula mmogo le go tlhapatsa leina la ga Jehofa? Go tweng ka mokgwa o a itshwarang ka one? A o a ikgogomosa kana o a ikgantsha fa a sena go newa kgakololo ya Dikwalo? A o bontsha fa a sena keletso epe e e tswang mo pelong ya gore a tile go dira boleo jo bo tshwanang mo nakong e e tlang? Fa bagolwane ba lemoga dilo tseno mo mothong yo o leofileng, tse di supang gore ga a na boikwatlhao bope, ba ka nna ba swetsa gore motho yoo o ile a leofa ka ntlha ya boikepo e seng ka ntlha ya bokoa jwa gagwe jwa nama fela.

Bagolwane ba nna ba ntse ba kgothatsa motho gore a dire dilo tse di siameng lefa motho yoo a lebega a tlwaetse go dira dilo tse di bosula. (Bahebere 3:12) Batho ba ba boikepo ba ka nna ba ikwatlhaya mme ba fetoge. Fa e le gore go ne go se jalo, ke ka ntlha yang fa Jehofa a ne a tlhotlheletsa Baiseraele jaana: “A moikepi a latlhe tsela ya gagwe, le motho yo o sa siamang kgopolo tsa gagwe; a a boele kwa go Jehofa, mme o tlaa mo utlwela botlhoko; le kwa Modimong wa rona, gonne o tlaa itshwarela ka botlalo”? (Isaia 55:7) Gongwe bagolwane ba ka bona fa motho yono a fetotse maikutlo a gagwe a bontsha fa a na le mokgwa wa boikwatlhao fa ba ntse ba le mo pokanong ya boatlhodi.

Jaaka bagolwane e le badisa, le ka yone nako ya fa ba kgaola motho ba tla mo kgothatsa gore a ikwatlhaye mme a leke gore a boe a amogelwe ke Jehofa. Gakologelwa “motho yo o bosula” wa kwa Korinthe. Go bonala sentle gore o ne a fetola ditsela tsa gagwe, mme moragonyana Paulo o ne a dumela gore a busediwe. (2 Bakorinthe 2:7, 8) Akanya gape ka Kgosi Manase. O ne a le boikepo tota, mme Jehofa o ne a mo amogela fa kgabagare a sena go ikwatlhaya.—2 Dikgosi 21:10-16; 2 Ditirafalo 33:9, 13, 19.

Gone ke boammaaruri, go na le boleo jo bo se kitlang bo itshwarelwa—e leng go leofela moya o o boitshepo. (Bahebere 10:26, 27) Ke Jehofa fela yo o itseng gore ke mang yo o dirileng boleo jo bo ntseng jalo. Batho ga ba na maatla a go dira jalo. Bagolwane ba na le maikarabelo a go tshwara phuthego e le phepa le go thusa baleofi ba ba ikwatlhaileng gore ba boele mo phuthegong. Jehofa o tla segofatsa karolo eno ya tiro ya bone ya bodisa fa ba e dira ka temogo le boikokobetso, ba dira gore ditshwetso tsa bone di bontshe botlhale jwa ga Jehofa.

[Ntlha e e kwa tlase]

[Setshwantsho mo go tsebe 29]

Ananiase le Safira ba ne ba aketsa moya o o boitshepo ka boitimokanyi, mme ka go dira jalo ba bontsha gore ba na le pelo e e bosula