Tla Kopanong ya Kgaolo ya “Tumelo mo Lefokong la Modimo”!

DIMILIONEMILIONE tsa batho di tla bo di le gone kwa mafelong a le makgolokgolo mo lefatsheng lotlhe. Mo Afrika Borwa go rulagantswe gore go tshwarwe dikopano tse dikgolo mo kgweding ya December. Gongwe nngwe ya dikopano tseno tsa malatsi a mararo—go tloga ka Labotlhano go ya go Sontaga—di tlile go tshwarelwa kwa toropokgolong e e seng kgakala le legae la gago.

O tla solegelwa molemo ke thuto e e molemo e ntsi ya Baebele. Mo mafelong a le mantsi thulaganyo e tla simolola mo mosong mongwe le mongwe ka mmino ka 9:30. Ka Labotlhano mo mosong go tla bo go botsolotswa batho ba matshelo a bone a neng a amiwa thata ke go dumela ga bone mo Lefokong la Modimo ka metsotso e le 25. Thulaganyo eo ya ntlha e tla konelwa ka puo ya setlhogo, e e reng “Go Tsamaya ka Tumelo, e Seng ka Pono.”

Puo ya ntlha ka Labotlhano mo thapameng e tla sekaseka karolo e e botlhokwa e basha ba nang le seabe mo go yone mo phuthegong ya Bokeresete. Simphosiamo se se latelang se se kgaogantsweng ka dikarolo di le tharo se bolela ka melao ya Baebele gore e amana jang le boitshwaro jwa Bokeresete mo puong, mo maitseong le mo tebegong ya motho ka namana. Dipuo tse di latelang tsa “Itiseng mo go Tlhokeng Tumelo” le ya “Lefoko la Modimo le a Tshela” di gatelela thata ka tlhagiso e e molemo e e mo go Bahebera kgaolo 3 le 4. Thulaganyo ya Labotlhano e tla konela ka puo e e reng “Buka ya Batho Botlhe.”

Puo ya ntlha ka Matlhatso mo mosong ya re “Tumelo Fa e Se na Ditiro e Sule.” Puo e nngwe e e botlhokwa mo mosong oo ke e e reng “Nnang lo Itsetsepetse le go Nitama mo Boammaaruring,” e tlhalosa ka fa go gola mo semoyeng go ka fitlhelelwang ka gone. Thulaganyo e tla konela ka karolo e e tlwaelegileng ya kopano e kgolo, “Tumelo mo Lefokong la Modimo e Isa Kolobetsong,” mme morago ga moo go tla baakanyediwa gore barutwa ba basha ba kolobediwe.

Puo e e simololang ka Matlhatso thapama e e reng, “Lwelang Tumelo ka Natla,” e tlhalosa tlhagiso ya buka ya Baebele ya Jude. Simphosiamo se se tsayang ura se se nang le setlhogo se se reng “A re Yeng Kwa Ntlong ya ga Jehofa” se tla sekaseka melemo ya dipokano tsa Bokeresete. Thulaganyo ya letsatsi leo e tla konela ka puo e e reng “Boleng Jwa Tumelo ya Gago—Bo Lekwa Gone Jaanong.”

Thulaganyo ya mo mosong ya Sontaga e bontsha simphosiamo se se kgaogantsweng ka dikarolo di le tharo se se tla tlotlang ka buka ya Baebele ya Joele, mmogo le gore e dira jang mo motlheng wa rona. Go tswa foo go tla latela terama ya Baebele e e nang le setlhogo se se reng “Leitlho la Gago le se Raraane.” Puo ya phatlalatsa thapama e e reng “Tumelo le Isagwe ya Gago” e tla bo e le e e tlhomologileng thata mo kopanong eno.

Eleruri o tla nonotshiwa mo semoyeng fa o ka nna gone. O tla amogelwa ka tsela e e lorato mo thulaganyong nngwe le nngwe. Dira dithulaganyo gone jaanong gore o nne gone. Gore o itse ka lefelo le le gaufi thata le legae la gago, ya kwa Holong ya Bogosi ya Basupi ba ga Jehofa e e mo lefelong la lona kana o kwalele bagatisi ba makasine ono.