Tumelo e Dira Gore re Nne Pelotelele le go Rapela ka Metlha

“Supang bopelotelele; nitamisang dipelo tsa lona, ka gonne go nna gone ga Morena go atametse.”—JAKOBE 5:8.

 1. Ke ka ntlha yang fa re tshwanetse go akanya ka Jakobe 5:7, 8?

“GO NNA gone” ga ga Jesu Keresete mo go sa leng ka go letetswe jaanong go diragetse. (Mathaio 24:3-14) Go feta le fa e le leng pele, batho botlhe ba ba bolelang gore ba dumela mo Modimong le mo go Keresete ba na le lebaka le le utlwalang la go akanya ka mafoko ano a morutwa Jakobe: “Supang bopelotelele, bakaulengwe, go fitlha mo go nneng gone ga Morena. Bonang! Molemi o nna a letetse leungo le le botlhokwatlhokwa la lefatshe, a supa bopelotelele malebang le lone go fitlha a bona pula ya ntlha le pula ya morago. Le lona supang bopelotelele; nitamisang dipelo tsa lona, ka gonne go nna gone ga Morena go atametse.”—Jakobe 5:7, 8.

 2. Ke mathata afe a a neng a lebane le batho bao Jakobe a neng a ba kwalela?

² Batho ba Jakobe a neng a ba kwalela lekwalo leno le le tlhotlheleditsweng ba ne ba tlhoka bopelotelele le go rarabolola mathata a a farologaneng. Ba le bantsi ba ne ba dira se se farologaneng le se se neng se lebeletswe mo bathong ba ba bolelang gore ba na le tumelo mo Modimong. Ka sekai, go ne go tlhokega gore go dirwe sengwe ka dikeletso dingwe tse di neng di le teng mo dipelong tsa bangwe. Go ne go tlhokega gore Bakeresete bao ba bogologolo ba boe ba nne le thetebalo. Gape ba ne ba tlhoka kgakololo ka go nna pelotelele le go rapela ka metlha. Jaaka re sekaseka se Jakobe a ba boleletseng sone, a re boneng ka fa re ka dirisang mafoko a gagwe ka teng mo matshelong a rona.

Dikeletso Tse di sa Siamang di a Senya

 3. Ke eng se se neng se baka dikgotlhang mo phuthegong, mme ke eng se re ka se ithutang mo go seno?

³ Bangwe ba bao ba neng ba ipolela gore ke Bakeresete ba ne ba se na kagiso, mme seno se ne se dirwa ke go nna le dikeletso tse di sa siamang. (Jakobe 4:1-3) Dikomang di ne di senya, mme ba bangwe ba ne ba sekisa bakaulengwe ba bone ka tsela e e se nang lorato. Seno se ne se le jalo ka gonne go eletsa go ijesa monate wa senama go ne go lwa le ditokololo tsa mebele ya bone. Rona re ka tlhoka go rapelela thuso gore re tile dikeletso tsa senama tse di jaaka go batla maemo a a kwa godimo, maatla le dithoto gore re se ka ra senya kagiso ya phuthego. (Baroma 7:21-25; 1 Petere 2:11) Bakeresete bangwe ba lekgolo la ntlha la dingwaga ba ne ba simolola go nna le bopelotshetlha jo bo neng jwa gogela kwa letlhoong, le mo moyeng wa go bolaya. E re ka Modimo a ne a ka se diragatse dikeletso tsa bone tse di sa siamang, ba ne ba nnela go lwa gore ba fitlhelele mekgele ya bone. Fa re na le dikeletso tse di tshwanang tse di sa siamang, re ka kopa mme ra se ka ra amogela, ka gonne Modimo wa rona yo o boitshepo ga a arabe dithapelo tse di ntseng jalo.—Dikhutsafalo 3:44; 3 Johane 9, 10.

 4. Ke ka ntlha yang fa Jakobe a ne a bitsa bangwe a re ke “basadi ba baakafadi,” mme mafoko a gagwe a tshwanetse go re ama jang?

⁴ Bakeresete bangwe ba bogologolo ba ne ba na le moya wa lefatshe, go tswela dilo tsa ba bangwe pelo, le boikgogomoso. (Jakobe 4:4-6) Jakobe o bitsa ba bangwe ba bone “basadi ba baakafadi” ka gonne e ne e le ditsala tsa lefatshe mme ka gone ba nna le molato wa go dira boaka jwa semoya. (Esekiele 16:15-19, 25-45) Eleruri, ga re batle go nna ba selefatshe mo boikutlong, mo puong le mo ditirong, ka gonne seo se tla dira gore re nne baba ba Modimo. Lefoko la gagwe le re bontsha gore “tshekamelo ya go tswa pelo” ke karolo ya mokgwa o o bosula kana “moya,” o o leng teng mo bathong ba ba sekametseng mo go direng boleo. (Genesise 8:21; Dipalo 16:1-3; Pesalema 106:16, 17; Moreri 4:4) Ka jalo fa re lemoga gore re tlhoka go lwantsha go tswela dilo tsa ba bangwe pelo, boikgogomoso, kana mokgwa ope o o bosula, a re batleng thuso ya Modimo ya moya o o boitshepo. Maatla ao, a a leng teng ka bopelonomi jwa Modimo jo bo sa re tshwanelang a gaisa “tshekamelo ya go tswa pelo.” Mme e re ka Jehofa a le kgatlhanong le baikgodisi, o tla re neela bopelonomi jo bo sa re tshwanelang fa re lwantsha dilo tse di dirang gore re sekamele mo go direng boleo.

 5. Gore re itumelele bopelonomi jo bo sa re tshwanelang jwa Modimo, ke dilo dife tse di tlhokegang tse re tshwanetseng go di fitlhelela?

⁵ Re ka amogela bopelonomi jwa Modimo jo bo sa re tshwanelang jang? (Jakobe 4:7-10) Gore re nne le bopelonomi jo bo sa re tshwanelang jo bo tswang kwa go Jehofa, re tshwanetse go mo utlwa, go amogela dimpho tsa gagwe, le go ikobela sengwe le sengwe se a se ratang. (Baroma 8:28) Gape re tshwanetse go ‘ganetsa,’ kana ‘go nna kgatlhanong’ le Diabolo. Mme o tla ‘re tshaba’ fa re nitama jaaka batshegetsi ba bolaodi jwa lobopo lotlhe ba ga Jehofa. Re thusiwa ke Jesu, yo o thibelang baemedi ba ba boikepo ba lefatshe gore go se ka ga nna sepe se se ka re utlwisang botlhoko ka bosakhutleng. Mme re se ka ra lebala seno: Ka thapelo, ka kutlo le ka tumelo, re tsalana gaufi thata le Modimo, mme o itshupa a le gaufi le rona.—2 Ditirafalo 15:2.

 6. Ke ka ntlha yang fa Jakobe a bitsa Bakeresete bangwe a re ke “baleofi”?

⁶ Ke ka ntlha yang fa Jakobe a dirisa lefoko “baleofi” mo bathong ba ba ipolelang gore ba na le tumelo mo Modimong? Ka gonne ba ne ba bonwa molato wa “dintwa” le letlhoo le le gogelang kwa go bolayeng—e leng boikutlo jo Bakeresete ba sa tshwanelang go nna le jone. (Tito 3:3) “Diatla” tsa bone, tse di tletseng ditiro tse di bosula, di ne di tlhoka go ntlafadiwa. Gape ba ne ba tlhoka go itshekisa “dipelo” tsa bone, e leng motswedi wa tlhotlheletso. (Mathaio 15:18, 19) Ba ba “sa kgoneng go dira tshwetso” bao ba ne ba etsaetsega gore a ba nne tsala le Modimo kana le lefatshe. E re ka re tlhagisitswe ke sekai sa bone se se bosula, a re nne kelotlhoko re sa kgaotse gore dilo tse di ntseng jalo di se ka tsa senya tumelo ya rona.—Baroma 7:18-20.

 7. Ke ka ntlha yang fa Jakobe a bolelela ba bangwe gore ba ‘hutsafale le go lela’?

⁷ Jakobe o bolelela babadi ba gagwe gore ba ‘simolole go tlhokofala dipelo le go hutsafala le go lela.’ Fa ba ne ba bontshitse khutsafalo ya bomodimo, e ne e tla bo e le go bontsha boikwatlhao. (2 Bakorintha 7:10, 11) Gompieno, bangwe ba ba bolelang gore ba na le tumelo ba nnile ditsala le lefatshe. Fa mongwe wa rona a latela tsela eo, a re ka se hutsafalele bokoa jwa rona jwa semoya mme ra tsaya kgato ka bonako ya go lolamisa dilo? Go dira diphetogo tse di tlhokegang le go itshwarelwa ke Modimo go lere boitumelo ka ntlha ya segakolodi se se phepa le tebelelo e e itumedisang ya botshelo jo bo sa khutleng.—Pesalema 51:10-17; 1 Johane 2:15-17.

Lo se Ka Lwa Atlholana

 8, 9. Ke ka ntlha yang fa re sa tshwanela go bua kgatlhanong le ba bangwe kana go ba atlhola?

⁸ Ke boleo go kgala modumedikawena. (Jakobe 4:11, 12) Le fa go ntse jalo ba bangwe ba tshwaya Bakeresetekabone diphoso, gongwe e le ka gonne ba ipona ba siame kana ka gonne ba batla go itlotlomatsa ka go isa ba bangwe kwa tlase. (Pesalema 50:20; Diane 3:29) Lefoko la Segerika le le ranotsweng ka gore ‘go kgala’ le bontsha letlhoo mme le bontsha gape go latofatsa ka tsela e e feteletseng kana ka maaka. Seno se kaya go atlhola mokaulengwe ka tsela e e botlhoko. Seno se tshwana jang le ‘go kgala le go atlhola molao wa Modimo’? Ebu, bakwadi le Bafarasai ‘ka botlhajana ba ne ba beela kwa thoko taolo ya Modimo’ ba bo ba atlhola ba bangwe ka melao ya bone. (Mareko 7:1-13) Ka mo go tshwanang, fa re ne re ka nyatsa mokaulengwe yo Jehofa a neng a ka se ka a mo nyatsa, a re tla bo re sa ‘atlhole molao wa Modimo’ mme ka go dira jalo re dira boleo jwa go bontsha gore o a tlhaela? Mme ka go tshwaya mokaulengwe wa rona phoso ka tsela e e sa tshwanelang, re tla bo re sa diragatse molao wa lorato.—Baroma 13:8-10.

⁹ A re gakologelweng seno: “Go na le a le mongwe yo e leng moneimolao e bile e le moatlhodi”—Jehofa. ‘Molao wa gagwe o itekanetse,’ ga o tlhaele. (Pesalema 19:7; Isaia 33:22) Ke Modimo fela yo o nang le tshwanelo ya go tlhoma ditekanyetso le melao ya poloko. (Luke 12:5) Ka jalo Jakobe o botsa jaana: “O mang go bo o atlhola moagelani wa gago?” Ga re a tshwanela go atlhola le go nyatsa ba bangwe. (Mathaio 7:1-5; Baroma 14:4, 10) Go akanya ka bolaodi jwa Modimo le go bo a sa tlhaole le ka boleo jwa rona go tshwanetse ga re thusa gore re tile go atlhola ba bangwe ka tsela ya go ipona re siame.

Tila go Itshepa ga go Ikgantsha

10. Ke ka ntlha yang fa re tshwanetse go tsenya Jehofa mo matshelong a rona a letsatsi le letsatsi?

¹⁰ Re tshwanetse go akanya ka Jehofa le ka molao wa gagwe ka metlha. (Jakobe 4:13-17) Motho yo o itshepang thata o bolela jaana fa a itlhokomolosa Modimo: ‘Gompieno kgotsa ka moso re tla ya kwa motseng mongwe, re nne ngwaga gone, re dire kgwebo, le go dira dipoelo.’ Fa re ‘ipeela letlotlo mme re sa huma malebang le Modimo,’ botshelo jwa rona bo ka khutla ka moso mme re ka se nne le sebaka sa go direla Jehofa. (Luke 12:16-21) Jaaka Jakobe a bolela, re tshwana le mouwane wa maphakela “o o bonalang ka lobakanyana mme go tswa foo o bo o nyelela.” (1 Ditirafalo 29:15) Ka go nna le tumelo fela mo go Jehofa re ka bona boitumelo jwa goyagoile le botshelo jo bo sa khutleng.

11. Ke eng se se bolelwang ke go re, “Fa Jehofa a rata”?

¹¹ Go na le gore re tlhokomologe Modimo ka go ikgantsha, re tshwanetse go amogela boemo jono: “Fa Jehofa a rata, re tla tshela re bo gape re dira seno kgotsa sele.” Fa re re “Fa Jehofa a rata” re bontsha gore re leka go dira go dumalana le thato ya gagwe. Go ka nna ga tlhokega gore re dire kgwebo, go tlamela ba lelapa la rona, go tsaya loeto mo tirong ya Bogosi, le tse dingwe. Mme re se ka ra ikgantsha. “Go ikgogomosa . . . mo go ntseng jalo go boikepo” ka gonne go dira gore motho a tlhokomologe go ikaega ka Modimo.—Pesalema 37:5; Diane 21:4; Jeremia 9:23, 24.

12. Ke eng se se kaiwang ke mafoko a ga Jakobe 4:17?

¹² Go bonala Jakobe a wetsa mafoko a gagwe a a malebana le go itshepa le go ikgantsha, a bolela jaana: “Fa mongwe a itse go dira se se siameng mme lefa go ntse jalo a sa se dire, ke boleo mo go ene.” Mokeresete mongwe le mongwe o tshwanetse go lemoga ka boikokobetso gore o ikaegile ka Modimo. Fa a sa dire jalo, “ke boleo mo go ene.” Gone mme, molaomotheo o o tshwanang o dira le fa motho a sa dire se go dumela mo Modimong go se tlhokang mo go rona.—Luke 12:47, 48.

Tlhagiso Malebana le Bahumi

13. Ke eng se Jakobe a se bolelang ka batho ba ba dirisang dikhumo tsa bone ka tsela e e sa siamang?

¹³ E re ka Bakeresete bangwe ba bogologolo ba ne ba rata dilo tse di bonalang kana ba eletsa khumo, Jakobe o bua mafoko a a nonofileng malebana le batho bangwe ba ba humileng. (Jakobe 5:1-6) Batho ba lefatshe ba ba dirisang dikhumo tsa bone ka tsela e e sa siamang ba ne ba tla ‘lela, ba bokolelela masetlapelo a a tlang mo go bone’ fa Modimo a ba duela go ya ka ditiro tsa bone. Mo metlheng eo, batho ba le bantsi ba ne ba humile thata dilo tse di jaaka diaparo, mabele le bojalwa jwa mofine. (Joele 2:19; Mathaio 11:8) Dingwe tsa tsone di ka bola kana tsa ‘jewa ke motoutwane,’ mme Jakobe o gatelela gore khumo ga e na mosola, e seng gore e ka senyega motlhofo. Le mororo gouta le selefera di sa ruse, fa re ka di kokoanya, di ka felelwa ke boleng jaaka dilo tse di rusitseng. “Ruse” e bontsha gore dikhumo di ne di sa dirisiwe sentle. Ka gone, rotlhe re tshwanetse go gakologelwa gore “sengwe se se tshwanang le molelo” ke se batho ba ba ikanyang dithoto tsa bone ‘ba se ipoloketseng mo malatsing a bofelo’ fa bogale jwa Modimo bo tla mo go bone. E re ka re tshela mo “motlheng wa bokhutlo,” mafoko a a ntseng jalo a na le bokao jo bo kgethegileng mo go rona.—Daniele 12:4; Baroma 2:5.

14. Gantsi bahumi ba itshwara jang, mme ke eng se re tshwanetseng go se dira ka seo?

¹⁴ Gantsi bahumi ba tsietsa barobi ba bone, ba dituelo tsa bone tse di sa duelweng di ‘goang’ di batla gore di busolosetswe. (Bapisa Genesise 4:9, 10.) Batho ba lefatshe ba ba humileng ba “tshedile mo manobonobong.” Ba ijesa monate ka tsela e e feteletseng, ba nontsha dipelo tse di sa utlweng mme ba tla nna ba ntse ba dira seno go fitlha mo “letsatsing” le le tlhometsweng gore ba tlhabiwe. Ba ‘bona mosiami molato le go mmolaya.’ Jakobe o botsa jaana: “A ga a lo ganetse?” Mme thanolo e nngwe e re, “mosiami; a ga a lo ganetse.” Legale, ga re a tshwanela go kgetholola bahumi. Re tshwanetse go baya dilo tsa semoya kwa pele mo botshelong.—Mathaio 6:25-33.

Tumelo e re Thusa go Nna Pelotelele

15, 16. Ke ka ntlha yang fa go le botlhokwa go nna pelotelele?

¹⁵ Fa Jakobe a se na go akgela ka bahumi ba ba gatelelang ba lefatshe, gape o kgothaletsa Bakeresete ba ba gateletsweng gore ba nne pelotelele. (Jakobe 5:7, 8) Fa badumedi ba itshokela mathata a bone ka bopelotelele, ba tla duelelwa boikanyegi ka nako ya go nna gone ga ga Keresete, fa bagateledi ba bone ba tla bo ba atlholwa. (Mathaio 24:37-41) Bakeresete bao ba bogologolo ba ne ba tlhoka go nna jaaka molemirui yo o emelang dipula tsa sephai tsa letlhabula ka bopelotelele, gore a kgone go lema, le dipula tsa bofelo tsa dikgakologo tse di ungwisang thata. (Joele 2:23) Le rona re tshwanetse go nna pelotelele le go nitamisa dipelo tsa rona, segolo jang e re ka ‘go nna gone ga Morena’ Jesu Keresete go setse go diragala!

¹⁶ Ke ka ntlha yang fa re tshwanetse go nna pelotelele? (Jakobe 5:9-12) Bopelotelele bo re thusa gore re se ka ra sonela kana go fegelwa fa badumedikarona ba re rumola. Fa re “ubugelana” ka moya o o bosula, re tla nyadiwa ke Moatlhodi Jesu Keresete. (Johane 5:22) E re ka jaanong “go nna gone” ga gagwe go simologile e bile a “eme fa pele ga ditswalo,” a re nneng le kagiso ka go nna pelotelele le bakaulengwe ba rona, ba ba lebaneng le diteko tse dintsi tsa tumelo. Tumelo ya rona e a nonotshiwa fa re gakologelwa gore Modimo o ne a duela Jobe ka gonne a ne a itshokela diteko tsa gagwe ka bopelotelele. (Jobe 42:10-17) Fa re na le tumelo e bile re le pelotelele, re tla bona gore “Jehofa o tlekeetso tota mo katamalanong e e bothitho e bile o kutlwelobotlhoko.”—Mika 7:18, 19.

17. Ke ka ntlha yang fa Jakobe a re, “Tlogelang go ikana”?

¹⁷ Fa re se pelotelele, re ka nna ra se dirise loleme sentle fa re le mo kgatelelong. Ka sekai, re ka nna ra itlhaganela go ikana. Jakobe o bolela jaana: “Tlogelang go ikana,” a tlhagisa kgatlhanong le go ikana kwantle ga go akanya pele. Gape go tlhomamisa mafoko ka go ikana ka metlha go lebega e le boitimokanyi. Ka gone, re tshwanetse go bua boammaaruri fela, ee ya rona e reye ee, mme nnyaa ya rona e reye nnyaa. (Mathaio 5:33-37) Gone mme, Jakobe ga a re go ikana gore o bue boammaaruri kwa kgotlatshekelong go phoso.

Tumelo le Dithapelo Tsa Rona

18. Ke mo maemong afe a re tshwanetseng go ‘tswelela pele re rapela’ le go ‘opela dipesalema’?

¹⁸ Thapelo e tshwanetse ya nna le seabe se segolo mo botshelong jwa rona fa re batla go laola puo ya rona, go nna pelotelele, le go nna le tumelo e e nonofileng mo Modimong. (Jakobe 5:13-20) Segolo jang fa re le mo tekong re tshwanetse gore re ‘tswelele re rapela.’ Fa re itumetse, re “opele dipesalema,” jaaka Jesu le baaposetoloi ba gagwe ba ne ba dira fa a ne a simolodisa Segopotso sa loso lwa gagwe. (Mareko 14:26, ntlhanyana e e kwa tlase go NW) Ka dinako tse dingwe, re ka nna ra bo re tletse ka ditebogo jaana mo Modimong mo tota re ka nnang ra opela dipako mo pelong. (1 Bakorintha 14:15; Baefeso 5:19) Mme a bo go itumedisa jang ne go baka Jehofa ka pina kwa dipokanong tsa Bokeresete!

19. Ke eng se re tshwanetseng go se dira fa re koafala mo semoyeng, mme ke ka ntlha yang fa re tshwanetse go tsaya kgato eo?

¹⁹ Re ka nna ra se ka ra ikutlwa re batla go opela fa re koafetse mo semoyeng, gongwe ka ntlha ya boitshwaro bongwe jo bo sa siamang kana go palelwa ke go ja ka metlha mo tafoleng ya ga Jehofa. Fa re le mo boemong joo, a re bitseng bagolwane ka boikokobetso gore ba re ‘rapelele.’ (Diane 15:29) Mme gape ba tla re ‘tlotsa ka lookwane mo leineng la ga Jehofa.’ Jaaka lookwane lo lo okobatsang mo nthong, mafoko a bone a a gomotsang le kgakololo ya Dikwalo e tla re thusa go fokotsa go tshwenyega thata mo maikutlong, go belaela, poifo. ‘Thapelo ya tumelo e tla re fodisa’ fa e kopane le tumelo ya rona. Fa bagolwane ba bona gore bolwetse jwa rona jwa semoya bo bakwa ke boleo bongwe jo bo masisi, ba tla re bolelela ka bopelonomi gore phoso ya rona ke eng ba bo ba leka go re thusa. (Pesalema 141:5) Mme fa re ikwatlhaya, re tla dumela gore Modimo o tla utlwa dithapelo tsa bone a bo a re itshwarela.

20. Ke ka ntlha yang fa re tshwanetse go ipolela maleo a rona le go rapelelana?

²⁰ ‘Go ipolelana maleo a rona ka tshosologo’ go tla re thibela go tswelela pele re leofa. Go tla dira gore re utlwelane botlhoko, e leng nonofo e e tla re tlhotlheletsang gore re “rapelelane.” Re ka nna le tumelo ya gore seno se ka nna mosola ka gonne thapelo ya “motho yo o siameng”—yo o nang le tumelo e bile Modimo a mo tsaya a thokgame—e fitlhelela mo gontsi mo go Jehofa. (1 Petere 3:12) Moporofeti Elija o ne a na le makoa jaaka rona, dithapelo tsa gagwe di ne di na le matswela. O ne a rapela, mme pula ya se ka ya na ka dingwaga tse tharo le sephatlo. Fa a rapela gape, pula e ne ya na.—1 Dikgosi 17:1; 18:1, 42-45; Luke 4:25.

21. Ke eng se re ka kgonang go se dira fa Mokeresetekarona a “timetse mo boammaaruring”?

²¹ Go tweng fa leloko la phuthego le “timetse mo boammaaruring,” le fapogile mo thutong e e siameng le mo boitshwarong? Re ka nna ra kgona go mo tlogedisa phoso ya gagwe ka kgakololo ya Baebele, thapelo le ka thuso e nngwe. Fa re atlega, seno se mo tlisa mo thekololong ya ga Keresete mme se mmoloka gore a se bone loso lwa semoya le go atlholelwa tshenyego. Ka go thusa motho yo o leofileng, re bipa bontsi jwa maleo a gagwe. Fa moleofi yo o kgalemetsweng a tlogela tsela ya gagwe e e sa siamang, a ikwatlhaya, a bo a batla go itshwarelwa, re tla itumelela gore re dirile gore re bipe maleo a gagwe.—Pesalema 32:1, 2; Jude 22, 23.

Sengwe Se se Kwaletsweng Rona Rotlhe

22, 23. Mafoko a ga Jakobe a tshwanetse go re ama jang?

²² Go phepafetse gore lekwalo la ga Jakobe le na le sengwe se se mosola mo go rona rotlhe. Le re bontsha kafa re ka lebanang le diteko ka gone, le re gakolola gore re se ka ra kgetholola ba bangwe, mme le re kgothaletsa gore re dire ditiro tse di thokgameng. Jakobe o re kgothaletsa go laola loleme, go ganana le tlhotlheletso ya lefatshe, le go nna le kagiso. Gape mafoko a gagwe a tshwanetse go re dira gore re nne pelotelele le go ikaega ka thapelo.

²³ Ke boammaaruri gore lekwalo la ga Jakobe kwa tshimologong le ne la romelelwa Bakeresete ba bogologolo ba ba tloditsweng. Le fa go ntse jalo, rotlhe re tshwanetse go letla kgakololo ya lone e re thusa go ngaparela tumelo ya rona. Mafoko a ga Jakobe a ka nonotsha tumelo e e re tlhotlheletsang go tsaya kgato e e tlhomameng mo tirelong ya Modimo. Mme lekwalo leno le le tlhotlheleditsweng ke Modimo le aga tumelo e e tla nnelang ruri e e dirang gore re nne Basupi ba ga Jehofa ba ba pelotelele, ba ba rapelang ka metlha gompieno, mo nakong ya ‘go nna gone ga Morena’ Jesu Keresete.

O ne O Tla Araba Jang?

◻ Ke ka ntlha yang fa Bakeresete bangwe ba bogologolo ba ne ba tlhoka go fetola boikutlo le boitshwaro jwa bone?

◻ Ke tlhagiso efe e Jakobe a e neelang bahumi?

◻ Ke ka ntlha yang fa re tshwanetse go nna pelotelele?

◻ Ke ka ntlha yang fa re tshwanetse go rapela ka metlha?

[Motswedi wa Setshwantsho mo go tsebe 19]

Pictorial Archive (Near Eastern History) Est.

[Setshwantsho mo go tsebe 23]

Bakeresete bangwe ba bogologolo ba ne ba tlhoka go nna pelotelele mo badumeding ka bone

[Setshwantsho mo go tsebe 24]

Bakeresete ba tlhoka go nna pelotelele, go nna lorato, le go rapela ka metlha