Baithuti ba ba Atlegang ba Nna Barongwa ba ba Atlegang

“KE SA ntse ke sa dumele gore re nnile le tshiamelo eno!” Will o ne a tlhaeletsa jalo fa a ne a bua ka thapiso e ene le mosadi wa gagwe Patsy ba neng ba sa tswa go e wetsa e le baithuti ba setlhopha sa bo103 sa Sekolo sa Baebele sa Watchtower sa Gileate. Zahid le Jeni le bone ba ne ba dumalana. Ba ile ba bolela jaana: “Re ikutlwa re na le tshiamelo go bo re le fano.” Baithuti botlhe ba ne ba dirile sentle mo sekolong seno. Jaanong ba ne ba gakaletse go simolola tiro ya bone ya borongwa. Le fa go ntse jalo, sa ntlha ba ne ba tla amogela kgakololo e e neng e tla ba thusa go atlega mo dikabelong tsa bone tsa borongwa kwa thulaganyong ya kaloso ka September 6, 1997.

Modulasetulo wa thulaganyo e ne e le Theodore Jaracz, leloko la Setlhopha se se Laolang. O ne a tlhalosa gore—lelapa la Bethele mmogo le baemedi ba le 48 ba makala a Mokgatlho wa Watch Tower—ditsala le ba losika go tswa kwa Canada, Yuropa, Puerto Rico le United States ba ne ba le teng go ema baithuti nokeng le go ba bontsha lorato lwa bone. Mokaulengwe Jaracz o ne a bolela gore barongwa ba ba romelwang ke dikereke tsa Labokeresete gantsi ba ile ba iteega tsebe mo tirong ya bone ya borongwa mme ba simolola go batla thutego kana ba bo ba inaakanya le dipolotiki. Go farologana le bone, baalogi ba Gileate ba dira se ba se thapiseditsweng. Ba ruta batho Baebele.

Morago ga moo Robert Butler go tswa kwa ofising ya Mokgatlho ya kwa Brooklyn o ne a bua ka setlhogo se se reng, “Dira Gore Tsela ya Gago e Atlege.” O ne a tlhalosa gore le fa batho ba lekanyetsa katlego go ya ka madi kana dilo tse dingwe tse motho a nang natso, tota se se leng botlhokwa ke gore Modimo o lekanyetsa katlego jang. Jesu o ne a atlega mo bodireding jwa gagwe, ka go bo a ne a ikanyega mo kabelong ya gagwe e seng ka gonne a ne a sokolola batho ba le bantsi. Jesu o ne a dira gore Jehofa a galalediwe mme a nne a sa leswafadiwe ke lefatshe. (Johane 16:33; 17:4) Dilo tseno ke tse Mokeresete mongwe le mongwe a ka kgonang go di dira.

“Nnang Makgoba a Batho Botlhe,” Robert Pevy, yo e kileng ya bo e le morongwa kwa dinageng tsa Botlhaba o ne a gakolola jalo. Moaposetoloi Paulo e ne e le morongwa yo o neng a atlega. O ne a thusiwa ke eng? O ne a itira lekgoba la batho botlhe. (1 Bakorintha 9:19-23) Sebui se ne sa tlhalosa jaana: “Moalogi wa Gileate yo o nang le boikutlo joo a ka se ka a leba tiro ya gagwe ya borongwa e le tsela nngwe ya go fiwa maemo a a kwa godimo mo tirong nngwe, e le tsela ya go bona maemo a a botlhokwa mo phuthegong. Morongwa o ya kwa kabelong ya gagwe ka boitlhomo bo le bongwe fela—go direla ba bangwe, ka gonne seo ke se makgoba a se dirang.”

A theile kgakololo ya gagwe thata mo go 2 Bakorintha kgaolo 3 le 4, Gerrit Lösch yo e leng mongwe wa Setlhopha se se Laolang o ne a kgothaletsa baithuti gore ba “Phatsimise Kgalalelo ya ga Jehofa Jaaka Diiponi.” O ne a ba gakolola gore kitso ya Modimo e ntse jaaka lesedi le le phatsimisang Mokeresete fa a bula pelo ya gagwe go e amogela. Re phatsimisa lesedi leo ka go rera dikgang tse di molemo le ka go itshwara ka tsela e e molemo. “Ka dinako tse dingwe o ka nna wa ikutlwa o sa tshwanelege,” o ne a bolela jalo. “Fa o nna le maikutlo a a ntseng jalo, ikaege ka Jehofa, ‘gore maatla a a fetang a a tlwaelegileng e nne a Modimo.’” (2 Bakorintha 4:7) Go gatelela mafoko a ga Paulo a a kwadilweng mo go 2 Bakorintha 4:1, Mokaulengwe Lösch o ne a kopa baithuti jaana: “Lo se ka lwa lesa kabelo ya lona ya borongwa. Bolokang diiponi tsa lona di phatsima!”

Karl Adams, yo e leng leloko la lephata la thuto ya Gileate, o ne a bua ka setlhogo se se kgatlhang se se reng “Jehofa o Kae?” Potso eno ga e bue ka bonno jwa Modimo mo lobopong, mme e bua ka botlhokwa jwa go akanya ka tsela e Jehofa a lebang dilo ka yone le ditsela tse a kaelang ka tsone. O ne a bolela jaana: “Fa motho a ngomogile pelo, tota le fa a na le nako e telele a direla Jehofa a ka nna a lebala seo.” (Jobe 35:10) Go tweng ka motlha wa rona? Ka 1942, batho ba Modimo ba ne ba tlhoka kaelo. A tiro ya go rera e ne e fela, kana a go ne go na le tiro e e oketsegileng e e neng e tshwanetse go dirwa? Go rata ga ga Jehofa e ne e le eng ka batho ba gagwe? Fa ba ntse ba ithuta Lefoko la Modimo, karabo e ne ya phepafala sentle. Mokaulengwe Adams o ne a bolela jaana: “Pele ga ngwaga wa khalendara o fela, go ne go setse go dirilwe dithulaganyo tsa Sekolo sa Baebele sa Watchtower sa Gileate.” Eleruri Jehofa o segofaditse tiro ya barongwa ba ba neng ba rongwa go tswa kwa sekolong seo.

Mark Noumair e ne ya nna mokaedi wa bobedi yo o neng a bua. Mo puong ya gagwe e e nang le setlhogo se se reng, “O Tla Dirisa Jang Talenta ya Gago?,” o ne a kgothaletsa baithuti gore ba dirise thapiso e ba e boneng mo Gileate ka bonako fa ba fitlha kwa kabelong ya bone e ntšha. O ne a bolela jaana: “Leka ka natla go kgatlhegela ba bangwe. Ba tlwaele. Tlhoafalela go itse ditlwaelo, hisitori le dilo tse di tshegisang batho ka koo. Fa o ithuta puo ya teng ka bonako, o tla tlwaela ka bonako.”

Baithuti ba ba Tlhagafetseng ba Itumelela Bodiredi

Mo godimo ga gore ba dire ka natla mo dithutong tsa bone fa ba le kwa Gileate, baithuti ba ne ba abelwa kwa diphuthegong tse di gaufi di le 11. Ka mafelobeke, ba ne ba nna le seabe ka tlhagafalo mo tirong ya go rera. Wallace Liverance wa lephata la thuto ya Gileate o ne a kopa ba le mmalwa ba bone gore ba anele bareetsi mangwe a maitemogelo a bone. Boitumelo jwa bone bo ne jwa bonala fa ba ntse ba anela maitemogelo a ba nnileng le one fa ba ne ba neela bosupi mo marekisetsong, mo dikoloi di emisiwang gone, mo mafelong a dikgwebo, mo mmileng le ka ntlo le ntlo. Bangwe ba ne ba batla ditsela tse ba ka kgonang go fitlhelela batho ba ba buang puo e sele ba ba neng ba nna le go dira mo tshimong ya phuthego ya bone. Maloko a setlhopha sa bo103 a ile a tshwara bobotlana dithuto tsa Baebele tsa legae di le lesome mo dikgweding di le tlhano tsa thapiso ya bone.

Barongwa ba Nako e Telele ba Bolela Ditsela Tsa go Atlega

Morago ga karolo e e monate eno ya thulaganyo, Patrick Lafranca le William Van de Wall ba ne ba kopa maloko a le supa a Komiti ya Lekala go tlhalosa dithuto tse ba di ithutileng mo tirong ya bone ya borongwa gore setlhopha se solegelwe molemo. Ba ne ba kgothaletsa baalogi gore ba lebe kabelo ya bone e le e e tswang kwa go Jehofa le gore ba ititeye sehuba go ngaparela kabelo ya bone. Ba ne ba bua ka matswela a a molemo a barongwa ba ba thapisitsweng kwa Gileate ba ileng ba nna le one mo tirong kwa dinageng tse dingwe.

Ke eng se se ileng sa thusa maloko ano a Komiti ya Lekala go direla ka masome a dingwaga e le barongwa ba ba itumetseng ba ba nang le matswela? Ba ne ba dira thata le bakaulengwe ba lefelo mme ba ithuta mo go bone. Ba ne ba dira gotlhe mo ba ka go kgonang gore ba ithute puo ya koo ka bonako ka mo go ka kgonegang ka teng fa ba fitlha kwa dikabelong tsa bone. Ba ne ba ithuta go fetofetoga le maemo le go tlwaela ditlwaelo tsa lefelo. Charles Eisenhower, yo e leng moalogi wa setlhopha sa ntlha sa Gileate e bile a ile a nna morongwa ka dingwaga di le 54, o ne a tlhalosa “ditsela” tse tlhano tsa go atlega tse barongwa ba di ithutileng: (1) Ithute Baebele ka metlha, (2) ithute puo ya koo, (3) nna tlhaga mo bodireding, (4) leka gore go nne le kagiso mo legaeng la barongwa o bo o (5) rapele Jehofa ka metlha. Baithuti ba ile ba kgatlhiwa e seng fela ke kgakololo e e mosola e ba e filweng mme le ke boitumelo jo bo bonalang sentle jo barongwa ba ba nang le maitemogelo ba nang le jone mo tirelong ya ga Jehofa. Jaaka Armando le Lupe ba tlhalosa, “ba itumela fa ba bua ka matshelo a bone.”

Morago ga dipotsolotso tseno, go ne go setse puo e le nngwe. Albert Schroeder, leloko la Setlhopha se se Laolang, o ne a tlhopha setlhogo se se reng “Go Nna Balebalebi ba ba Ikanyegang ba Lefoko la Modimo go Senola Dilo Tsa Botlhokwatlhokwa Tsa Boammaaruri.” E re ka Baebele e le buka ya konokono ya Sekolo sa Gileate, baithuti ba ne ba kgatlhega thata go utlwa se a neng a tla se bolela. Mokaulengwe Schroeder o ne a tlhalosa gore fa go simololwa go ranolwa New World Translation of the Holy Scriptures dingwaga tse 50 tse di fetileng, maloko a a tloditsweng a Komiti ya Thanolo ya Baebele ya Lefatshe le Lesha a ne a se ka a batla go kgatlha batho mme a ne a ikaegile ka kaelo ka moya o o boitshepo. (Jeremia 17:5-8) Le fa go ntse jalo, bosheng jaana, bakwadi bangwe ba ne ba lemoga matsetseleko a New World Translation e ranotsweng ka one. Mo lekwalong lengwe le le kwaletsweng Mokgatlho, mokanoki mongwe o ne a kwala jaana: “Ke kgona go lemoga kgatiso fa e le ya maemo a a kwa godimo fa ke e bona, mme ‘Komiti ya lona ya Thanolo ya Baebele ya Lefatshe le Lesha’ e dirile tiro e e molemo thata.”

Morago ga puo eno, baithuti ba ne ba amogela didipoloma, mme bareetsi ba ne ba itsisiwe dikabelo tsa bone. E ne e le nako e e amang maikutlo a maloko a setlhopha seno thata. Fa moemedi wa setlhopha a ne a bala lekwalo la ditebogo, ba le bantsi ba ne ba tlalelana le go tlala dikeledi mo matlhong a bone. Baithuti bangwe ba ne ba ntse ba ipaakanyetsa tiro ya borongwa ka dingwaga di le dintsi. Fa bangwe ba lemoga gore khoso ya Gileate e tla bo e tshwarwa ka Seesemane, ba le mmalwa ba ne ba tshwanelwa ke go fudugela kwa diphuthegong tse go buiwang Seesemane mo go tsone gore ba tlhaloganye puo botoka. Ba bangwe ba ne ba fudugela kwa babulatsela ba tlhaelang gone, e ka tswa e le mo nageng ya bone kana go sele. Mme ba bangwe ba ne ba ipaakanya ka go bala maitemogelo, ba dira dipatlisiso, kana ka go lebelela khasete ya bidio ya Mokgatlho ya To the Ends of the Earth gangwe le gape.

Will le Patsy, ba ba umakilweng kwa tshimologong, ba ne ba itumelela thata go bona kafa baithuti ba neng ba kgatlhegelwa thata ka teng. “Tota le batho ba re neng re sa ba itse ba ne ba re tlamparela le go re tsaya dinepe. Leloko lengwe la Setlhopha se se Laolang le ne la re tshwara ka letsogo mme la re, ‘Re ipela ka lona!’” Ga go na pelaelo epe, ruri baithuti ba setlhopha sa bo103 ba a ratiwa. Ba thapisitswe sentle. Thuto e ba e amogetseng kwa Gileate e tla ba thusa go fetoga mo go nneng baithuti ba ba atlegang gore e nne barongwa ba ba atlegang.

[Lebokoso mo go tsebe 22]

Dipalopalo Tsa Setlhopha

Palo ya dinaga tse di emetsweng: 9

Palo ya dinaga tse ba abetsweng kwa go tsone: 18

Palo ya baithuti: 48 Palo ya banyalani: 24

Palogare ya dingwaga tsa bone: 33

Palogare ya dingwaga tsa bone ba le mo boammaaruring: 16

Palogare ya dingwaga tsa bone ba le mo bodireding jwa nako e e tletseng: 12

[Setshwantsho mo go tsebe 23]

Setlhopha se se Alogang sa bo103 sa Sekolo sa Baebele sa Watchtower sa Gileate

Mo lenaaneng le le fa tlase leno, dinomoro tsa mela eno di kwadilwe di balwa go tswa kwa pele go ya kwa morago, mme maina a thathamisitswe go tswa kafa molemeng go ya kafa mojeng wa mola mongwe le mongwe.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S.(2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K.(3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H.(4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J.(5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R.(6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Setshwantsho mo go tsebe 24]

Re ya kae?