Ba ne Ba Dira go Rata ga ga Jehofa

Mosamarea o Itshupa e le Moagelani yo o Molemo

MO MOTLHENG wa ga Jesu, go ne go na le letlhoo le legolo fa gare ga Bajuda le Baditšhaba. Fa nako e ntse e tsamaya, Mishnah ya Sejuda e ne ya bo ya dira molao o o neng o thibela basadi ba Baiseraele go thusa go belegisa basadi ba e neng e se Bajuda, e re ka seno e ne e tla bo e le go thusa fela go tlisa Moditšhaba yo mongwe mo lefatsheng.—Abodah Zarah 2:1.

Basamarea ba ne ba amana thata le Bajuda go na le Baditšhaba, ka bodumedi le ka lotso. Le fa go ntse jalo, le bone ba ne ba lejwa jaaka dilatlhiwa. Moaposetoloi Johane o ne a kwala jaana: “Bajuda ga ba dirisane le Basamarea.” (Johane 4:9) Eleruri, Talmud e ne e ruta gore “borotho jo bo tswang mo Mosamareeng bo ne bo se phepa bo gaisiwa ke nama ya kolobe.” Bajuda bangwe tota e bile ba ne ba dirisa lereo “Mosamarea” e le lefoko le le bontshang lenyatso le go kgala.—Johane 8:48.

Ka ntlha ya seemo seno, mafoko a Jesu a neng a a bolelela monna mongwe yo o neng a itse molao wa Sejuda sentle, a ruta tota. Monna yono o ne a atamela Jesu mme a botsa jaana: “Moruti, ke tla rua botshelo jo bosakhutleng ka go dira eng?” Fa a araba, Jesu o ne a mo gakolola Molao wa ga Moshe, o o laelang gore o ‘rate Jehofa ka pelo ya gago yotlhe, ka moya otlhe, ka nonofo yotlhe, le ka mogopolo otlhe,’ le go ‘rata moagelani wa gago jaaka o ithata.’ Morago ga moo, moitsemolao yono o ne a botsa Jesu jaana: “Ke mang tota yo o leng moagelani wa me?” (Luke 10:25-29; Lefitiko 19:18; Duteronome 6:5) Go ya ka Bafarisai, lereo le le reng “moagelani” le ne le raya fela batho ba ba neng ba boloka dingwao tsa Sejuda—tota le ne le sa reye Baditšhaba kana Basamarea. Fa e le gore moitsemolao yono yo o botsang thata jaana o ne a akanya gore Jesu o tla tshegetsa kgopolo eo, o ne a tla gakgamala.

Mosamarea yo o Kutlwelobotlhoko

Jesu o ne a araba potso ya monna yono ka go bolela setshwantsho sengwe.a O ne a bolela jaana: “Monna mongwe o ne a fologa a tswa Jerusalema a ya Jeriko.” Sekgala fa gare ga Jerusalema le Jeriko e ne e le dikilometara di ka nna 23. Tsela e e neng e kopanya metse eno e mebedi e ne e le metsopodia e e kotsi e bile e na le mafika, mo go neng go le motlhofo gore magodu a iphitlhe gone, a tlhasele le go tshaba. Ga diragala gore motsamai yo o mo setshwantshong sa ga Jesu “a [wele] gareng ga dithukuthi, tse di neng tsa mo tlhobola tsa ba tsa mo itaaka ka dititeo, mme tsa tswa tsa tsamaya, di mo tlogela a le gaufi le go swa.”—Luke 10:30.

Jesu o ne a tswelela pele jaana: “Ga diragala gore moperesiti mongwe a bo a fologa ka tsela eo, mme, e rile a mmona, a feta fela kafa letlhakoreng le lengwe. Molefi le ene ka tsela e e tshwanang, e rile a fitlha mo lefelong leno mme a mmona, a feta fela kafa letlhakoreng le lengwe.” (Luke 10:31, 32) Baperesiti le Balefi e ne e le barutisi ba Molao—go akaretsa le molao wa go rata moagelani. (Lefitiko 10:8-11; Duteronome 33:1, 10) Eleruri, e ne e le bone ba ba neng ba tshwanetse go ikutlwa ba tlhotlheletsega go thusa motsamai yono yo o gobetseng.

Jesu o ne a tswelela pele jaana: “Mosamarea mongwe yo o neng a tsamaya mo tseleng a tshogana ka a le fa go ene.” Kwantle ga pelaelo go umaka fela Mosamarea go tshwanetse ga bo go ile ga dira gore moitsemolao yono a kgatlhegele seno thata. A Jesu o ne a ka amogela pono eno e e sa siamang ya lotso lono? Se se farologaneng le seno, fa a bona motsamai yono yo o madimabe, Mosamarea o ne a “tlhomoga pelo.” Jesu o ne a bolela jaana: “Jalo a mo atamela mme a hapa dintho tsa gagwe, a di tshela lookwane le beine. Go tswa foo a mo pega mo godimo ga phologolo ya gagwe mme a mo tlisa mo ntlong ya baeti a mo tlhokomela.b Mme letsatsi le le latelang a ntsha didenario di le pedi, a di naya mong wa ntlo ya baeti, mme a re, ‘Mo tlhokomele, mme lefa e le eng se o se dirisang mo godimo ga seno, ke tla go duela fa ke boela fano.’”—Luke 10:33-35.

Jesu jaanong o botsa mmotsisi yono jaana: “Ke mang wa ba bararo bano yo mo go wena a bonalang a itirile moagelani wa monna yo o neng a wela gareng ga dithukuthi?” Moitsemolao o ne a itse karabo, le fa go ntse jalo o ne a okaoka gore ke “Mosamarea.” Go na le moo, o ne a araba fela jaana: “Ke ene yo o mo diretseng ka kutlwelobotlhoko.” Go tswa foo Jesu o ne a bolela jaana: “Tsena mo tseleng mme le wena o dire fela jalo.”—Luke 10:36, 37.

Thuto mo go Rona

Monna yo o neng a botsa Jesu o ne a dira jalo ka boikaelelo jwa “go itshupa e le yo o siameng.” (Luke 10:29) Gongwe o ne a akanya gore Jesu o ne a tla mmaka ka gonne a ne a utlwa Molao wa ga Moshe ka tsela e e feteletseng. Mme motho yono yo o ikgodisang o ne a tlhoka go ithuta boammaaruri jwa seane seno sa Baebele: “Tsela nngwe le nngwe ya motho e siame mo matlhong a gagwe; mme Jehofa o lekanya dipelo bokete.”—Diane 21:2.

Setshwantsho sa ga Jesu se bontsha gore motho yo o siameng tota ga se yo o utlwang melao ya Modimo fela mme gape o tshwanetse go etsa dinonofo tsa gagwe. (Baefeso 5:1) Ka sekai, Baebele e re bolelela gore “Modimo ga o tlhaole.” (Ditiro 10:34) A re etsa Modimo mo ntlheng eno? Setshwantsho sa ga Jesu se se re amang thata se bontsha gore boagelani jwa rona bo tshwanetse go feta melelwane ya botšhaba, lotso le ya bodumedi. Tota, Bakeresete ba rutiwa gore ba “[dire] se se molemo mo go botlhe”—e seng fela mo bathong ba maemo a a lekanang le a bone, lotso, kana morafe mme e seng fela mo badumeding ka bone.—Bagalatia 6:10.

Basupi ba ga Jehofa ba gagamalela go latela tlhagiso eno ya Dikwalo. Ka sekai, fa masetlapelo a tlholego a tlhasela, ba direla badumedikabone dilo tse di molemo mmogo le batho ba e seng Basupi.c Mo godimo ga moo, fa ba kopane ba dirisa diura tse di fetang sekete sa milione ngwaga le ngwaga ba thusa batho gore ba itse Baebele botoka. Ba gagamalela go fitlhelela mongwe le mongwe ka molaetsa wa Bogosi, ka gonne thato ya Modimo ke gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.”—1 Timotheo 2:4; Ditiro 10:35.

[Dintlha tse di kwa tlase]