Ke Eng fa o Tshwanetse go Boloka Ditsholofetso Tsa Gago?

“TLHOPHA motho yo o solofetsang dilo di sekaenyana fela; a ka se go swabise,” go ne ga bolela jalo moswi Bernard Baruch yo e neng e le mogakolodi wa moporesidente. Gompieno mo lefatsheng go bonala ditsholofetso di dirwa ka boikaelelo jwa gore di se bolokwe. E ka tswa e le maikano a lenyalo, ditumalano tsa kgwebo, kana ditsholofetso tsa go ipha nako e ntsi o na le bana. Go tlhokomologiwa thata selo se se kaiwang ke sekapuo se se tlwaelegileng se se reng, “Motho o botlhokwa fa a diragatsa se a se buileng.”

Legale, batho ba le bantsi ga ba ikemisetse go boloka ditsholofetso tsa bone. Batho ba bangwe ba potlakela go dira ditsholofetso tse ba sa kgoneng go di diragatsa kana ga ba dire se ba se solofeditseng fela ka go bo seo e le tsela e e motlhofo ya go dira dilo.

Ke boammaaruri gore go boloka tsholofetso go ka nna boima fa go ka tlhaga maemo a a sa lebelelwang. A mme tota tsholofetso e e sa dirwang e ka baka mathata a mantsi? A o tshwanetse go tsaya ditsholofetso tsa gago ka tsela e e masisi? Go tlhatlhoba ka bokhutshwane sekao sa ga Jehofa Modimo go tla re thusa go bona lebaka la go bo re tshwanetse go tsaya kgang eno masisi.

Jehofa o Diragatsa Ditsholofetso Tsa Gagwe

Re obamela Modimo yo leina la gagwe le amanang le go diragadiwa ga ditsholofetso tsa gagwe. Mo metlheng ya go kwalwa ga Baebele gantsi leina le ne le tlhalosa mong wa lone. Go ntse jalo le ka leina la ga Jehofa, le le kayang “O Dira Gore go Diragale.” Ka gone leina la Modimo le na le kgopolo ya gore Modimo o tla diragatsa ditsholofetso tsa gagwe le maikaelelo a gagwe.

Go dumalana le leina la gagwe, Jehofa o ile a diragatsa tsholofetso nngwe le nngwe e a e dirileng le setšhaba sa Iseraele wa bogologolo. Kgosi Solomone o ne a bolela jaana malebana le ditsholofetso tseno: “A go bakwe Jehofa yo o neileng batho ba gagwe Baiseraele boikhutso, ka fa go tsotlhe tse o di ba solofeditseng; ga go a tlhaela lefoko lepe la tsholofetso yotlhe ya gagwe e e molemo, e o ne a e solofetsa Moše motlhanka wa gagwe ka yone.”—1 Dikgosi 8:56.

Boikanyego jwa ga Jehofa ke jo moaposetoloi Paulo a neng a bo bolela jaana: “E rile Modimo o solofetsa Aborahame, e re ka o ne o sa ka ke wa ikana ka ope yo mogolwane, o ne wa ikana ka one.” (Bahebera 6:13) Ee, leina la ga Jehofa le botho jwa gagwe di tlhomamisa gore a ka se fetole ditsholofetso tsa gagwe le mororo di ka nna tsa mo tlhoka dilo di le dintsi. (Baroma 8:32) Lebaka la go bo Jehofa a diragatsa ditsholofetso tsa gagwe le re neela tshepo ya gore ke tshetledi ya moya wa rona, kana ya botshelo jwa rona.—Bahebera 6:19.

Ditsholofetso Tsa ga Jehofa le Isagwe ya Rona

Tsholofelo ya rona, tumelo ya rona, le botshelo jwa rona tsotlhe fela di ikaegile ka go diragadiwa ga ditsholofetso tsa ga Jehofa. Re na le tsholofelo efe? “Go na le magodimo a masha le lefatshe le lesha tse re di letetseng go ya ka tsholofetso ya [Modimo], mme ruri go tla nna tshiamo mo go tsone.” (2 Petere 3:13) Gape Dikwalo di dira gore re nne le tumelo ya gore “go tlile go nna le tsogo ya ba ba siameng mmogo le ba ba sa siamang.” (Ditiro 24:15) Mme re ka tlhomamisega gore go na le botshelo jo bo gaisang jono jwa gompieno. Ee ruri, se moaposetoloi Johane a se bitsang “selo se se solofeditsweng” ke “botshelo jo bo sa khutleng.” (1 Johane 2:25) Mme ditsholofetso tsa ga Jehofa tse di mo Lefokong la gagwe ga se tsa mo isagweng fela. Di dira gore botshelo jwa rona jwa letsatsi le letsatsi bo nne le bokao gone jaanong.

Mopesalema o ne a opela jaana: “Jehofa o gaufi le botlhe ba ba mmitsang, . . . o tlaa utlwa pitso ya bone.” (Pesalema 145:18, 19) Gape Modimo o re tlhomamisetsa gore “o naya baidibadi thata; le ene yo o se nang thata o mo totisetse nonofo.” (Isaia 40:29) Mme a bo go gomotsa jang ne go itse gore ‘Modimo a ka se re lese re raelwa go feta se re ka se itshokelang, mme mmogo le thaelo gape o tla dira tsela ya go tswa’! (1 Bakorintha 10:13) Fa e le gore re ile ra bona go diragadiwa epe ya ditsholofetso tseno, re a itse gore Jehofa a ka ikanngwa ka botlalo. Ka ntlha ya melemo e re e bonang go tswa mo ditsholofetsong tse dintsi tse Modimo a di dirang le go di boloka, re tshwanetse go leba jang dilo tse re mo solofetsang tsone?

Go Boloka Dilo Tse re di Solofetsang Modimo

Kwantle ga pelaelo boineelo jwa rona go Modimo ke tsholofetso e e botlhokwa thata e re ka e dirang. Ka go tsaya kgato eno, re bontsha gore re batla go direla Jehofa ka bosakhutleng. Le fa gone ditaolo tsa Modimo di se boima, ga se ka dinako tsotlhe go leng motlhofo go dira thato ya gagwe e re ka re tshela mo tsamaisong eno e e boikepo ya dilo. (2 Timotheo 3:12; 1 Johane 5:3) Mme fa re setse re ‘beile seatla sa rona mo mogomeng’ mme re setse re le batlhanka ba ba ineetseng ba ga Jehofa le barutwa ba ga Morwawe, Jesu Keresete, ga re a tshwanela go leba kwa morago kwa dilong tsa lefatshe tse re di tlogetseng.—Luke 9:62.

Fa re rapela Jehofa, re ka nna ra tlhotlheletsega go mo solofetsa gore re tla lwela go fenya bokoa bongwe, go tlhagolela nonofo nngwe ya Bokeresete, kana go oketsa karolo nngwe ya tiro ya rona ya puso ya Modimo. Ke eng se se ka re thusang go dira ditsholofetso tseno?—Bapisa Moreri 5:2-5.

Ditsholofetso tse di peloephepa di tswa mo pelong le mo mogopolong. Ka gone, a re bontsheng gore re batla go diragatsa dilo tse re di solofetsang Jehofa ka go mmulela dipelo tsa rona ka thapelo, re mo tlhalosetsa dipoifo tsa rona ka boikanyegi, dikeletso, le makoa a rona. Fa re rapelela tsholofetso nngwe go tla nonotsha boikaelelo jwa rona jwa gore re e boloke. Re ka nna ra tsaya dilo tse re di solofeditseng Modimo e le dikoloto. Fa sekoloto se le segolo, re tshwanetse go se duela ka iketlo. Go ntse jalo le ka dilo tse dintsi tse re di solofetsang Jehofa, go ka re tsaya nako go di diragatsa. Mme fa re mo neela se re se kgonang ka metlha, re bontsha gore re dira se re se buileng, o tla re segofatsa ka tsela e e tshwanetseng.

Re ka bontsha gore re tsaya ditsholofetso tsa rona masisi ka go di rapelela gantsi, gongwe letsatsi le letsatsi. Seno se tla bontsha Rraarona wa selegodimo gore re dira jalo ka pelo yotlhe. Gape seo se tla re gakolola ka metlha. Dafide o ne a re tlhomela sekao se se molemo mo ntlheng eno. O ne a rapela Jehofa jaana ka pina: “Utlwa go goa ga me, Modimo; ela morapelo wa me tlhoko. . . . Ke tlaa opelela leina la gago dipako ka bosakhutleng, gore ke nne ke dira[ga]tse maikano a ka malatsi otlhe.”—Pesalema 61:1, 8.

Go Boloka Ditsholofetso Tsa Rona go Dira Gore re Ikanngwe

Fa dilo tse re di solofetsang Modimo re sa tshwanela go di tsaya motlhofo, go ntse jalo le ka se re se solofetsang Bakeresetekarona. Ga re a tshwanela go tshwara Jehofa ka tsela e nngwe mme bakaulengwe ba bangwe re ba tshware ka tsela e sele. (Bapisa 1 Johane 4:20.) Mo Therong ya gagwe ya kwa Thabeng, Jesu o ne a re: “A lefoko la lona la Ee le reye Ee, Nnyaa wa lona, Nnyaa.” (Mathaio 5:37) Fa re tlhomamisa gore lefoko la rona le a ikanngwa ka dinako tsotlhe ke tsela e nngwe ya go ‘dira se se molemo mo go ba ba amanang le rona mo tumelong.’ (Bagalatia 6:10) Tsholofetso nngwe le nngwe e re e bolokang e dira gore re ikanngwe.

Tshenyo e e bakwang ke go sa dire tsholofetso gantsi e bonala thata fa e amana le madi. Mokeresete o tshwanetse go dira se a se solofeditseng, e ka tswa seo se amana le go duela madi a kadimo, go dira tiro nngwe, kana go dira tumalano nngwe ya kgwebo. Seno se itumedisa Modimo e bile se nonotsha go tshepana mo go tlhokegang gore bakaulengwe ba “ag[e] mmogo ka pelo nngwe fela.”—Pesalema 133:1.

Le fa go ntse jalo, go palelwa ke go boloka ditumalano go ka tsenya phuthego mo kotsing mmogo le batho ba ba amegang ka tlhamalalo. Molebedi mongwe yo o etang o bolela jaana: “Dikgotlhang tsa kgwebo—tse gantsi di bakwang ke ditumalano tse gongwe motho yo mongwe a akanyang gore o tsieditswe—gantsi di felela di itsiwe gotlhe. Ka ntlha ya seo, bakaulengwe ba tsaya letlhakore, mme boemo e ka nna jo bo sa iketlang kwa Holong ya Bogosi.” A bo go le botlhokwa jang ne go sekaseka ka kelotlhoko tumalano epe fela e re e dirang mme e bo e kwalwa!a

Gape re tshwanetse go nna kelotlhoko fa re rekisa dilo tse di turang kana re buelela dipeeletso tsa madi, segolobogolo fa re bona morokotso mo ditumalanong tseno. Gape re tshwanetse go nna kelotlhoko thata gore re se ka ra bua melemo ya dilwana dingwe ka tsela e e feteletseng kana dilo tsa boitekanelo kana go solofetsa ba bangwe gore ba tla bona merokotso e e seng kana ka sepe mo dipeeletsong tsa madi. Lorato lo tshwanetse go tlhotlheletsa Bakeresete gore ba tlhalose ka botlalo mathata ape a a ka nnang a tlhaga. (Baroma 12:10) E re ka bontsi jwa bakaulengwe ba sena maitemogelo a a kalo mo kgwebong, ba ka nna ba tshepa kgakololo ya rona ka gonne fela re amana le bone mo tumelong. A bo go ka utlwisa botlhoko jang ne fa tshepo eno e ka se dirisiwe sentle!

Rona Bakeresete re ka se tsenelele mo dikgwebong tse di sa ikanyegeng kana tse di tlhokomologang melemo ya batho ba bangwe. (Baefeso 2:2, 3; Bahebera 13:18) Re tshwanetse ra ikanyega e le gore re amogelwe ke Jehofa jaaka ‘ba ba tlholatlholang mo motlaaganeng wa gagwe.’ ‘Tota le fa re ikutlwisitse botlhoko ka go ikana ga rona, re ka se fetoge.’—Pesalema 15:1, 4.

Moatlhodi Jefetha wa Iseraele o ne a ikana gore fa Modimo a ne a ka dira gore a fenye Baamone, o ne a tla neela Jehofa motho wa ntlha go mo kgatlhantsha fa a boa kwa ntweng e le tshupelo e e fisiwang. Motho yoo e ne ya nna ngwana yo o esi wa ga Jefetha, mme ga a ka a fetoga mo go se a se buileng. E re ka morwadie le ene a ne a dumetse go tswa pelong, o ne a mo ntsha tshupelo gore a ye go direla kwa lefelong le le boitshepo la Modimo ka bosakhutleng—setlhabelo se kwantle ga pelaelo se neng se le botlhoko e bile se mo tlhoka mo gontsi thata.—Baatlhodi 11:30-40.

Balebedi ba phuthego segolobogolo ba na le boikarabelo jwa go kgomarela ditumalano tsa bone. Go ya ka 1 Timotheo 3:2, molebedi o tshwanetse go “nna yo o se nang se a ka tshwaiwang phoso ka sone.” Seno se ranotswe go tswa mo lereong la Segerika le le kayang “yo go ka se kang ga fitlhelwa sepe mo go ene, yo o sa pegweng molato ope, yo o sa kgalweng ka sepe.” Ga le “bolele fela gore motho o na le leina le lentle, mme gape gore le a mo tshwanela.” (A Linguistic Key to the Greek New Testament) E re ka molebedi a tshwanetse go nna yo o se nang se a ka tshwaiwang phoso ka sone, o tshwanetse go diragatsa ditsholofetso tsa gagwe ka metlha.

Ditsela Tse di Dingwe Tse re ka Bolokang Ditsholofetso Tsa Rona ka Tsone

Re tshwanetse go leba jang dilo tse re di solofetsang batho ba e seng Bakeresetekarona? Jesu o ne a re: “A lesedi la lona le phatsime fa pele ga batho, gore ba tle ba bone ditiro tsa lona tse di molemomogolo mme ba neye Rraalona yo o kwa magodimong kgalalelo.” (Mathaio 5:16) Ka go supa gore re diragatsa se re se buileng, re ka nna ra gogela ba bangwe go reetsa molaetsa wa rona wa Bokeresete. Le mororo ditekanyetso tsa go ikanyega di wetse kwa tlase mo lefatsheng lotlhe, batho ba le bantsi ba sa ntse ba tsaya bothokgami bo le botlhokwa. Go boloka ditsholofetso tsa rona ke tsela e nngwe ya go bontsha gore re rata Modimo le moagelani le go kgatlha barati ba tshiamo.—Mathaio 22:36-39; Baroma 15:2.

Mo ngwageng wa tirelo wa 1998, Basupi ba ga Jehofa ba ne ba dirisa diura tse di fetang dikete tsa dimilione ba bolela dikgang tse di molemo tsa Bogosi jwa Modimo phatlalatsa. (Mathaio 24:14) Batho bangwe ba ka tswa ba ile ba tlhokomologa go rera gono fa e le gore re ile ra palelwa ke go diragatsa se re se buileng mo ditirisanong tsa kgwebo kana mo dilong tse dingwe. E re ka re emela Modimo wa boammaaruri, batho ba na le lebaka le le utlwalang la go lebelela gore re ikanyege. Fa re ikanyega, re “kgabis[a] thuto ya Mmoloki wa rona, e bong Modimo, mo dilong tsotlhe.”—Tito 2:10.

Mo bodireding jwa rona, re na le ditshono tsa go diragatsa se re se buileng fa re boela kwa go ba ba kgatlhegelang molaetsa wa Bogosi. Fa re bolela gore re tlile go boela, re tshwanetse go dira jalo. Fa re boela batho jaaka re ba solofeditse, re bontsha ‘gore ba ba tshwanetsweng ke go direlwa molemo, ga re gane ka one.’ (Diane 3:27) Kgaitsadi mongwe o ne a tlhalosa kgang eno jaana: “Mo makgetlhong a le mmalwa, ke ile ka kopana le batho ba ba kgatlhegang ba ba boletseng gore Mosupi mongwe o ne a solofeditse go boela kwa go bone mme a se ka a dira jalo. Ke boammaaruri gore beng ba matlo ba ka tswa ba ne ba se mo gae kana go ile ga tlhaga maemo a a neng a sa letle gore motho a boele. Mme nka se rate fa mongwe a bolela jalo ka nna, ka jalo ke leka ka bojotlhe gore ke fitlhele motho kwa gae gape. Ke dumela gore fa ke swabisa mongwe, seo se ka senya Jehofa le bakaulengwe botlhe leina.”

Mo maemong a mangwe, re ka nna ra se ka ra batla go boela ka gonne re akanya gore motho yono tota ga a kgatlhege. Kgaitsadi yono o tlhalosa jaana: “Ga ke leke go atlhola motho go ya ka kgatlhego e a e bontshang. Ke lemogile gore tsela ya ntlha e ke atlholang motho ka yone e a bo e le phoso. Ka jalo ke leka go leba dilo sentle, ke leba motho mongwe le mongwe e le yo o ka fetogang mokaulengwe kana kgaitsadi.”

Re tshwanetse go bontsha gore se re se buang se ka ikanngwa, fa re le mo bodireding jwa Bokeresete le mo dilong tse dingwe tse dintsi. Ke boammaaruri gore go motlhofo go bua dilo dingwe go na le go di dira. Monna yo o botlhale o ne a bolela jaana: “Bontsi jwa batho bo tle bo ipolele mongwe le mongwe bopelonomi jwa gagwe; monna yo o boikanngo ene o ka bonwa ke mang?” (Diane 20:6) Fa re ititeile sehuba, re ka kgona go ikanyega le go diragatsa ditsholofetso tsa rona.

Masego a Magolo a a Tswang Kwa Modimong

Fa re dira ditsholofetso tsa maaka ka boomo ke go sa ikanyege mme go ka tshwantshiwa le go kwala tšheke mme o se na madi a a lekaneng kwa bankeng. Mme a bo re bona dituelo le masego jang ne fa re boloka ditsholofetso tsa rona! Masego a mangwe a re a bonang fa re ikanyega ke go nna le segakolodi se se siameng. (Bapisa Ditiro 24:16.) Go na le gore re nnele go tshwenyega, re ikutlwa re kgotsofetse e bile re ritibetse. Mo godimo ga moo, fa re diragatsa se re se solofetsang, re dira gore phuthego e nne le kutlwano e e ikaegileng ka go tshepana. Gape “puo e e boammaaruri” e dira gore re tshwanelege go nna badiredi ba Modimo wa boammaaruri.—2 Bakorintha 6:3, 4, 7.

Jehofa o diragatsa se a se solofetsang, mme o ila “loleme lo lo akang.” (Diane 6:16, 17) Fa re etsa Rraarona wa selegodimo, re tsalana thata le ene. Ee ruri, re na le lebaka le le utlwalang la go boloka ditsholofetso tsa rona.

[Ntlha e e kwa tlase]

[Ditshwantsho mo go tsebe 10]

Jefetha o ne a boloka tsholofetso ya gagwe, le mororo go dira jalo go ne ga mo utlwisa botlhoko

[Ditshwantsho mo go tsebe 11]

Fa o solofeditse go boela kwa mothong, ipaakanyetse sentle go dira jalo