A o A Gakologelwa?

A o ile wa itumelela go bala dimakasine tsa bosheng tsa Tora ya Tebelo? Fa go ntse jalo, bona gore a o ka kgona go araba dipotso tse di latelang:

● Ke eng se se ileng sa dira gore Keresemose e amogelwe motlhofo kwa Korea?

Go ne go na le tumelo ya bogologolo kwa Korea le kwa dinageng tse dingwe ya modimo wa kitsi yo go neng go akanngwa gore o ne a tla ka sentshamosi mme a tlise dimpho ka December. Gape, morago ga Ntwa ya Lefatshe II, masole a United States, a ne a aba dimpho a bo a neela thuso mo dikerekeng tsa lefelo leo.—12/15, ditsebe 4, 5.

● Mo go diragadiweng ga Isaia 21:8, Modimo o ile a nna le “molebedi” ofe mo motlheng wa rona?

Bakeresete ba ba tloditsweng ka moya, ba e leng setlhopha sa molebedi, ba ile ba tlhagisa batho ka se ditiragalo tsa lefatshe tse di diragatsang boporofeti jwa Baebele di se kayang. Mme gape ba ile ba thusa baithuti ba Baebele gore ba lemoge le go tila dithuto le mekgwa e e seng ya dikwalo.—1/1,

● “Ba-Polish Brethren” e ne e le bomang?

E ne e le setlhotswana sa bodumedi mo lekgolong la bo16 le la bo17 la dingwaga kwa Poland se se neng se kgothaletsa gore go latelwe Baebele mme ka gone se gana dithuto tsa dikereke tse di neng di le gone tse di jaaka Tharonngwe, go kolobediwa ga masea le molelo wa dihele. Fa nako e ntse e ya, ba ne ba bogisiwa thata mme ba patelesega go anamela kwa dinageng tse dingwe.—1/1, ditsebe 21-3.

● Ke eng fa re tshwanetse go ikanya boporofeti jwa Baebele go na le go ikanya dipolelelopele tsa baitseanape ba isagwe kana balepadinaledi?

Batho bano ba ba ipitsang baporofeti ga ba ikanyege ka gonne ba itlhokomolosa Jehofa le Baebele. Ke boporofeti jwa Baebele fela jo bo ka go thusang go itse kafa ditiragalo di tsamaisanang le maikaelelo a Modimo ka teng, kafa wena le lelapa la gago lo ka solegelwang molemo ka teng goyagoile.—1/15, tsebe 3.

● Dingwe tsa dilo tse di bontshang gore re tshela mo malatsing a bofelo ke dife?

Re kgona go bona matswela a go lelekwa ga ga Satane kwa legodimong. (Tshenolo 12:9) Re tshela mo motlheng wa “kgosi” ya bofelo e e umakiwang mo go Tshenolo 17:9-11. Palo ya Bakeresete ba boammaaruri ba ba tloditsweng e a fokotsega, le fa go ntse jalo, go bonala fa bangwe ba bone ba tla bo ba sa ntse ba le mo lefatsheng fa pitlagano e kgolo e simologa.—1/15, ditsebe 12, 13.

● Buka ya Habakuke e kwadilwe leng, mme ke eng fa re tshwanetse go e kgatlhegela?

Buka eno ya Baebele e ne ya kwalwa mo e ka nnang ka 628 B.C.E. E na le dikatlholo tsa ga Jehofa kgatlhanong le Juda wa bogologolo le Babelona. Mme gape e bua ka katlholo ya Modimo e e tla tlogang e diragadiwa mo tsamaisong eno e e boikepo.—2/1, tsebe 8.

● Ke kae mo Baebeleng mo re ka bonang kgakololo e e botlhale ya mmè mo basading ba ba nang le bokgoni teng?

Mo kgaolong ya bofelo ya buka ya Diane, kgaolo 31, ke mo re ka bonang kgakololo e e molemolemo e e ntseng jalo teng.—2/1, ditsebe 30, 31.

● Ke eng fa re tshwanetse go leboga Jehofa go bo a re senoletse “mogopolo wa ga Keresete”? (1 Bakorintha 2:16)

Ka pego ya Efangele, Jehofa o ile a dira gore re kgone go ithuta ka megopolo, maikutlo, ditiro le dilo tse di neng di tla pele mo botshelong jwa ga Jesu. Se se ka re thusa gore re tshwane thata le Jesu, segolobogolo ka go tsaya tiro e e bolokang botshelo ya go rera e le botlhokwa.—2/15, tsebe 25.

● A Modimo o araba dithapelo gompieno?

Ee. Le fa gone Baebele e bontsha gore Modimo ga o arabe dithapelo tsotlhe, maitemogelo a motlha wa rona a bontsha gore gantsi o ile a araba dithapelo tsa batho ba ba ileng ba mo rapela gore a ba gomotse le go ba thusa mo dikgannyeng tse di jaaka go rarabolola mathata a lenyalo.—3/1, ditsebe 3-7.

● Ke eng se re ka se dirang go bona nonofo ya Modimo?

Re ka e kopa ka thapelo, re ka bala Baebele go bona maatla a a nonotshang a semoya e bile re ka nonotshiwa ka go kopana le Bakeresete.—3/1, tsebe 15, 16.

● Batsadi ba ka thusa jang bana ba bone gore ba solegelwe molemo mo dipokanong tsa Bokeresete?

Ba ka thusa bana ba bone gore ba se ka ba otsela, gongwe ka go dira gore ba robale pele ga dipokano. Bana ba ka kgothadiwa gore ba kwale “dintlha,” gongwe ka go tshwaya mo pampiring lefoko kana leina lengwe le lengwe le ba le itseng.—3/15, ditsebe 17, 18.

● Dingwe tsa dilo tse re ka di ithutang mo sekaong sa ga Jobe ke dife?

Jobe o ne a dira gore botsalano jwa gagwe le Modimo bo tle pele, a dirisana ka tekatekano le batho ba bangwe, a leka go ikanyega mo molekaneng wa gagwe wa lenyalo, a amega ka bomoya jwa lelapa la gagwe, a ba a itshoka ka boikanyegi fa a ne a lekwa.—3/15, ditsebe 25-7.

● A Baebele e na le mokwalo o o fitlhegileng o o dirang gore re tlhaloganye melaetsa e e fitlhegileng?

Nnyaa. Go ka nna ga bolelwa gore le dibuka tse dingwe di na le mokwalo o o fitlhegileng. Mekwalo e e fitlhegileng e go tweng e teng mo Baebeleng ga e ne e nna le bokao bope fa go akanngwa ka ditsela tse dintsi tse di farologaneng tsa go peletiwa ga mafoko mo mekwalong ya seatla ya Sehebera.—4/1, ditsebe 30, 31.