Saulo o Kopana le Ditsala Tsa Gagwe Tsa Pele le Baba ba Gagwe ba Pele

SAULO yo moragonyana a neng a nna moaposetoloi Paulo o tshwanetse a bo a ne a tshogile fa a ne a boela kwa Jerusalema e le la ntlha fa a se na go sokologela mo Bokereseteng.a Dingwaga di le tharo pele ga moo o ne a tswa mo motseng oo, a tshosesa barutwa ba ga Jesu e bile a re o tla ba bolaya. O ne a neilwe tetla ya gore a tshware Mokeresete ope fela yo a neng a ka mo fitlhela mo Damaseko.—Ditiro 9:1, 2; Bagalatia 1:18.

Fa Saulo a ne a nna Mokeresete o ne a bolela ka bopelokgale gore o na le tumelo mo go Mesia yo o neng a tsositswe. Ka ntlha ya seo, Bajuda ba kwa Damaseko ba ne ba batla go mmolaya. (Ditiro 9:19-25) A tota o ne a ka lebelela gore Bajuda ba pele e neng e le ditsala tsa gagwe kwa Jerusalema ba mo amogele ka diatla tse pedi? Le fa go ntse jalo, se Saulo a neng a tshwenyegile thata ka sone e ne e le go ikgolaganya le balatedi ba ga Keresete kwa Jerusalema. Seo e ne e se na go nna kgetsi e potlana.

“Fa a goroga kwa Jerusalema a dira maiteko a go ikopanya le barutwa; mme botlhe ba ne ba mo tshaba, ka gonne ba ne ba sa dumele gore o ne a le morutwa.” (Ditiro 9:26) Go a utlwala go bo ba ne ba ikutlwa jalo. Se ba neng ba se itse ka ene ke gore e ne e le mmogisi yo o setlhogo. Go bo jaanong a ipolela gore ke Mokeresete go ka lebega e le leano la go tsena mo phuthegong ka maikaelelo a a sa siamang. Ka jalo, Bakeresete ba kwa Jerusalema ba ne ba sa mmatle gaufi le bone.

Le fa go ntse jalo, go na le mongwe wa bone yo o neng a thusa Saulo. Baebele ya re Barenabase o ne a isa motho yono yo e neng e le mmogisi “kwa baaposetoloing,” ba go lebegang e ne e le Petere (Kefase) le Jakobe, morwarraagwe Morena, a ba bolelela ka go sokologa ga ga Saulo le ka go rera ga gagwe kwa Damaseko. (Ditiro 9:27; Bagalatia 1:18, 19) Ga re tlhalosediwe gore go tlile jang gore Barenabase a tshepe Saulo. A boobabedi ba ne ba tlwaelane, mme seno se ne se dirile gore Barenabase a tlhatlhobe maitlhomo a ga Paulo ka kelotlhoko mme a tlhomamisege gore a ka ikanngwa? A Barenabase o ne a itse Bakeresete bangwe kwa Damaseko mme a itse ka go sokologa ga ga Saulo? Le fa lebaka e ka tswa e le lefe mo go ao, Barenabase o ne a okobatsa dipelaelo tse di neng di le teng kaga Saulo. Ka jalo Saulo o ne a nna le moaposetoloi Petere malatsi a le 15.

Malatsi a le Lesome le Botlhano le Petere

Saulo o ne a neilwe thomo ya gagwe ke Jesu ka tlhamalalo mme go ne go sa tlhokege gore a newe tetla ke batho jaaka a ile a tlhalosetsa Bagalatia. (Bagalatia 1:11, 12) Mme ga go na pelaelo gore Saulo o ne a lemoga botlhokwa jwa go itse dilo tse dintsi ka bodiredi jwa ga Jesu. Go nna ga gagwe le Petere go ne go tla mo naya nako e ntsi ya go dira jalo. (Luke 24:12; 1 Bakorintha 15:3-8) Saulo o ne a tla nna le dilo tse dintsi tse a neng a tla di botsa Petere le Jakobe mme le bone ba ne ba tla botsa Saulo dipotso malebana le ponatshegelo ya gagwe le thomo ya gagwe.

A o Faloditswe mo Ditsaleng Tsa Gagwe Tsa Pele?

Setefane o bidiwa moswelatumelo wa ntlha wa Mokeresete. Batho ba Setefane a neng a kile a ganetsana le bone pele e ne e le “bao ba tswang kwa go se go tweng Sinagoge ya Bagololesegi . . . , le ba Bakurene le Baalekesanderia le ba bao ba tswang Kilikia le Asia.” Jaanong Saulo o ne a “ganetsana le Bajuda ba ba buang Segerika,” a ba rerela ka bopelokgale. Ba ne ba arabela jang? Ba ne ba batla go mmolaya.—Ditiro 6:9; 9:28, 29.

Go ne go ka itiragalela fela gore Saulo a batle go tlhalosa phetogo eno e kgolo mo botshelong jwa gagwe le go leka go ruta batho ba pele e neng e le ditsala tsa gagwe ka Mesia. Le fa go ntse jalo, Bajuda bano ba Bagerika ba ne ba bontsha letlhoo mo go Saulo yo ba neng ba mo tsaya e le motsietsi.

A Saulo o ne a lemoga gore o mo kotsing go le kana kang? Re bala gore fa a ne a rapela kwa tempeleng, o ne a tshwarwa ke tsitego mme a bona Jesu, yo o neng a mo raya a re: “Itlhaganele mme o tswe mo Jerusalema ka bofefo, ka gonne ga ba na go dumela bosupi jwa gago kaga me.” Saulo o ne a re: “Morena, bone ka bobone ba itse sentle gore mo disinagogeng ka go latelana ke ne ke tle ke latlhele mo kgolegelong ke ba ke kgwathisa ba ba dumelang mo go wena; mme fa madi a ga Setefane mosupi wa gago a ne a tshololwa, le nna ka bonna ke ne ke eme gaufi mme ke amogela.”—Ditiro 22:17-20.

Bangwe ba tsaya gore karabo ya ga Saulo e ne e raya gore o ne a lemoga kotsi. Ba bangwe ba akanya gore o ne a re: ‘Ke ne ke le mmogisi jaaka bone, mme ba itse seo. Ka jalo ba tshwanetse go dumela tota gore ke sokologile. Gongwe nka kgona go ba thusa.’ Le fa go ntse jalo, Jesu o ne a itse gore Bajuda bao ba ne ba ka se tlhoke bosupi jwa “motlhanogi.” O ne a raya Saulo a re: “Tsamaya, ka gonne ke tla go romela kwa ditšhabeng tse di kgakala thata.”—Ditiro 22:21, 22.

Fa Bakeresete ba bangwe ba ne ba lemoga kotsi eno ba ne ba itlhaganelela kwa go Saulo kwa boemakepeng jwa Kaesarea mme ba mo romela mo loetong lwa dikilometara di le 500 go ya kwa Tareso, kwa motseng wa gagabo. (Ditiro 9:30) Saulo o ne a boela kwa Jerusalema morago ga dingwaga di le mmalwa.

Go tsamaya ga gagwe jalo ka lepotlapotla go ka tswa go ne go sireletsa phuthego ya Bokeresete. Go nna teng ga motho yono yo pele e neng e le mmogisi go ne go ka baka mathata a magolo. Fa Saulo a sena go tsamaya, “phuthego mo Judea yotlhe fela le Galalea le Samarea ya tsena mo lobakeng lwa kagiso, e agiwa; mme ka e ne e tsamaya ka go boifa Jehofa le ka go gomodiwa ke moya o o boitshepo e ne ya nna ya ntsifala.”—Ditiro 9:31.

Re Ithuta go Nna Kelotlhoko

Jaaka mo lekgolong la ntlha la dingwaga, gompieno go ka nna le maemo a mo go one re tlhokang go nna kelotlhoko. Ga go tlhokege gore re belaele batho ba re sa ba itseng ka tsela e e feteletseng. Le fa go ntse jalo, go na le dinako tse batho ba ba nang le mekgwa e e sa siamang ba kileng ba leka go tsietsa batho ba ga Jehofa, e ka tswa e le ka gonne ba batla go solegelwa molemo ka bobone kana ka maikaelelo a go senya phuthego. Ka jalo, re dirisa temogo gore re se ka ra tsiediwa ke maferefere.—Diane 3:27; 2 Timotheo 3:13.

Tsela e Saulo a neng a dira dilo ka yone fa a ne a rera kwa Jerusalema ke tsela e nngwe e Bakeresete ba ka nnang kelotlhoko ka yone. Go rera mo mafelong a a rileng kana go rerela batho ba ba rileng, go akaretsa batho ba pele e neng e le ditsala tsa rona, go ka nna kotsi—mo mmeleng, mo semoyeng kana le e leng mo boitsholong. Re tshwanetse go nna kelotlhoko, mme seno re ka se dira ka go tlhopha lefelo le nako e re rerang ka yone.—Diane 22:3; Mathaio 10:16.

Re ka tlhomamisega gore dikgang tse di molemo tsa Bogosi jwa Modimo di tla rerwa pele ga bokhutlo jwa tsamaiso eno e e bosula bo tla. Saulo o re tlhometse sekao se se molemo mo go seno, “a bua ka bopelokgale mo leineng la Morena” a bua le batho ba pele e neng e le ditsala tsa gagwe le ba e neng e le baba ba gagwe!—Ditiro 9:28.

[Ntlha e e kwa tlase]

[Setshwantsho mo go tsebe 16]

Fa Saulo a ne a goroga kwa Jerusalema, o ne a rerela Bajuda ba ba buang Segerika ka bopelokgale