Go Ithuta Boammaaruri ka Dihele go go Ama Jang?

BATHO ba ba rutang gore dihele ke lefelo la tlhokofatso ba rotloetsa thuto ya maaka ka Jehofa Modimo le dinonofo tsa gagwe. Ke boammaaruri gore Baebele ya re Modimo o tla nyeletsa baikepi. (2 Bathesalonika 1:6-9) Mme go galefa ka tsela e e siameng ga se nonofo e e tlhomologileng ya Modimo.

Modimo ga a setlhogo e bile ga a ipusulosetse. Tota e bile o botsa jaana: “A ke itumelela gore baikepi ba swe?” (Esekiele 18:23, King James Version) Fa e le gore Modimo ga a itumelele loso lwa baikepi, a ka itumelela jang go ba bona ba tlhokofadiwa ka bosakhutleng?

Nonofo e e tlhomologileng ya Modimo ke lorato. (1 Johane 4:8) Eleruri, “MORENA o molemo mo go botlhe; o kutlwelobotlhoko mo go tsotlhe tse a di bopileng.” (Pesalema 145:9, The Holy Bible—New International Version) Modimo le ene o batla gore re mo rate go tswa pelong.—Mathaio 22:35-38.

Go Boifa Dihele Kgotsa go Rata Modimo—Ke Eng Se se Go Tlhotlheletsang?

Thuto ya gore meya e a boga kwa diheleng e dira gore re boife Modimo ka tsela e e feteletseng. Go farologana le moo, motho yo o ithutang boammaaruri ka Modimo a bo a mo rata, o tla mmoifa ka tsela e e tshwanetseng. Pesalema 111:10 ya re: “Poifo ya MORENA ke tshimologo ya botlhale; go botlhale botlhe ba ba tshelang ka yone.” (The New American Bible) Poifo eno ya Modimo ga se go boifa Mmopi ka tsela e e feteletseng mme ke go mo tlotla. E dira gore re mmoife ka tsela e e tshwanetseng gore re se ka ra dira se se sa mo itumediseng.

Ela tlhoko kafa go ithuta boammaaruri ka dihele go ileng ga ama Kathleen wa dingwaga di le 32 ka gone, yo pele a neng a dirisa diokobatsi. O ne a tshela botshelo jwa go ya diphathing, jwa thubakanyo, boitsholo jo bo sa siamang e bile a sa ithate. O ne a re: “Ke ne ke tle ke lebe morwadiake yo o nang le ngwaga ke bo ke akanya jaana, ‘A o ko o bone se ke se dirang morwadiake. Ke tlile go tuka kwa diheleng ka ntlha ya seno.’” Kathleen o ne a leka go tlogela go dirisa diokobatsi, mme o ne a se ka a kgona. O ne a re: “Ke ne ke batla go nna motho yo o siameng mme sengwe le sengwe mo botshelong jwa me le mo lefatsheng se ne se swabisa tota. Ka jalo go ne go bonala go se na lebaka la gore ke nne motho yo o siameng.”

Morago ga moo, Kathleen o ne a kopana le Basupi ba ga Jehofa. A re: “Ke ne ka ithuta gore ga go na dihele tse di tukang. Bosupi jwa Dikwalo bo ne bo utlwala sentle. Go itse gore ga nkitla ke tuka kwa diheleng go ne ga dira gore ke wele makgwafo.” Gape o ne a ithuta gore Modimo o solofetsa gore batho ba tla tshelela ruri mo lefatsheng le le se nang boikepo. (Pesalema 37:10, 11, 29; Luke 23:43) O ne a re: “Jaanong ke na le tsholofelo ya mmatota—go tshela ka bosakhutleng mo Paradaiseng!”

A Kathleen o ne a ka kgona go tlogela go dirisa diokobatsi fa a ne a sa boife molelo wa dihele? O ne a tlhalosa jaana: “Fa ke ne ke na le keletso e e maatla ya go dirisa diokobatsi, ke ne ke rapela Jehofa Modimo, ke mo kopa gore a nthuse. Ke ne ke akanya ka tsela e a lebang mekgwa eno e e leswe ka yone, mme ke ne ke sa batle go mo swabisa. O ne a araba dithapelo tsa me.” (2 Bakorintha 7:1) Go boifa go se itumedise Modimo go ne ga dira gore Kathleen a tlogele go dirisa diokobatsi.

Ee, go rata Modimo le go mmoifa ka tsela e e tshwanetseng—e seng go boifa go tlhokofadiwa kwa diheleng—go ka re tlhotlheletsa go dira thato ya Modimo gore re nne le boitumelo jo bo sa feleng. Mopesalema o ne a kwala jaana: “Go sego mongwe le mongwe yo o boifang Jehofa, yo o tsamayang mo ditseleng tsa gagwe.”—Pesalema 128:1, American Standard Version.

[Lebokoso/Ditshwantsho mo go tsebe 9]

KE BOMANG BA BA TLA GOLOLWANG KWA DIHELENG?

Dithanolo dingwe tsa Baebele di tlhakatlhakanya dilo ka go ranola mafoko a mabedi a a sa tshwaneng a Segerika—Geʹen·na le Haiʹdes—ka lefoko le le lengwe e leng “dihele.” Mo Baebeleng lefoko Geʹen·na le raya go nyelediwa ruri, o se na tsholofelo ya tsogo. Go farologana le seo, ba ba kwa Haiʹdes, kgotsa Hadese, ba na le tsholofelo ya gore ba tla tsosiwa.

Ka jalo, fa Jesu a sena go swa le go tsosiwa, moaposetoloi Petere o ne a tlhomamisetsa bareetsi ba gagwe gore Jesu “o ne a sa tlogelwa kwa diheleng.” (Ditiro 2:27, 31, 32; Pesalema 16:10; King James Version) Lefoko le le ranotsweng go twe “dihele” mo temaneng eno ke lefoko la Segerika e leng Haiʹdes. Jesu ga a ka a ya kwa lefelong lengwe le le tukang molelo. Hadese kgotsa “dihele” e ne e le lebitla. Mme Modimo ga a golole Jesu fela kwa Hadese.

Fa Baebele e bua ka tsogo ya re: “Loso le dihele di ne tsa ntsha baswi ba ba mo go tsone.” (Tshenolo 20:13, 14, KJ) Go ntsha batho ba ba mo ‘diheleng’ go raya gore go tla tsosiwa botlhe ba Modimo a ba tsayang ba tshwanelwa ke go tsosiwa. (Johane 5:28, 29; Ditiro 24:15) Ruri eno ke tsholofelo e e molemo ya isagwe—go bona baratiwa ba rona ba ntshiwa mo mabitleng! Jehofa, Modimo yo o nang le lorato lo lo sa feleng o tla dira seno.