Se re Se Ithutang Mo go Jesu

Malebana le Dithapelo Tse Modimo a di Utlwang

Gantsi Jesu o ne a batla lefelo le le kwa thoko gore a rapele, mme o ne a laela balatedi ba gagwe gore ba dire se se tshwanang. Baebele ya re: “Ka nako ya fa a ne a le mo lefelong lengwe a rapela, e rile a fetsa go rapela, mongwe wa barutwa ba gagwe a mo raya a re: ‘Morena, re rute kafa re ka rapelang ka gone’ . . . A ba raya a re: ‘Le fa e le leng fela fa lo rapela, lo re, “Rara, a leina la gago le itshepisiwe.”’” (Luke 5:16; 11:1, 2) Ka jalo, Jesu o ne a bontsha gore re tshwanetse go rapela rraagwe e bong Jehofa fela. Ke ene fela Mmopi wa rona le “Moutlwi wa thapelo.”—Pesalema 65:2.

A dithapelo tsotlhe di itumedisa Modimo?

Dithapelo tse di boaboelediwang e bile di tshwerwe ka tlhogo ga di itumedise Modimo. Jesu o ne a re: “Fa o rapela, o se ka wa boaboeletsa dilo di le dingwe.” (Mathaio 6:7) Re tshwanetse go bua le Rraarona yo o kwa legodimong go tswa pelong. Nako nngwe fa Jesu a ne a buisana le balatedi ba gagwe o ne a gatelela gore Modimo o amogela dithapelo tsa moleofi yo o batlang go fetola botshelo jwa gagwe go na le tsa motho yo o boikgodiso yo o bolokang dingwao tsa bodumedi. (Luke 18:10-14) Ka jalo gore Modimo a utlwe dithapelo tsa rona, re tshwanetse gore ka boikokobetso re leke go dira se a reng re se dire. Tota le Jesu o ne a re: “Ke bua dilo tseno fela jaaka Rara a nthutile . . . Ka metlha ke dira dilo tse di mo itumedisang.” (Johane 8:28, 29) Fa Jesu a rapela o ne a re: “A go diragale thato ya gago, e seng ya me.”—Luke 22:42.

Re tshwanetse go rapelela eng?

E re ka Modimo a sentswe leina, Jesu o ne a re: “Ka jalo, lo rapele ka tsela eno: ‘Rraarona yo o kwa magodimong, a leina la gago le itshepisiwe. A bogosi jwa gago bo tle. A thato ya gago e diragale le mo lefatsheng, jaaka kwa legodimong.’” (Mathaio 6:9, 10) Re tshwanetse go rapelela gore Bogosi jwa Modimo bo tle ka gonne ke puso e Modimo a tla e dirisang go diragatsa thato ya gagwe kwa legodimong le mo lefatsheng. Jesu o ne a re re ka rapelela “senkgwe sa rona sa letsatsi.” Gape re ka rapela Jehofa gore re bone tiro, ntlo, diaparo, le dilo tse di amanang le botsogo le tse dingwe tse re amegileng ka tsone. Mo godimo ga moo, Jesu o ne a re re tshwanetse go rapelela gore re itshwarelwe maleo.—Luke 11:3, 4.

A re tshwanetse go rapelela ba bangwe?

Jesu o ne a rapelela batho ba bangwe. Baebele ya re: “Bana ba babotlana ba ne ba tlisiwa kwa go ene, gore a ba beye diatla mme a ba rapelele.” (Mathaio 19:13) Jesu o ne a bolelela moaposetoloi Petere a re: “Ke go diretse mokokotlelo gore o se ka wa felelwa ke tumelo.” (Luke 22:32) Jesu o ne a kgothaletsa balatedi ba gagwe gore ba rapelele batho ba bangwe, tota le ba ba ba bogisang le ba ba ba tlhapatsang.—Mathaio 5:44; Luke 6:28.

Ke ka ntlha yang fa re tshwanetse go nnela ruri mo thapelong?

Jesu o ne a beela nako kwa thoko ya go rapela mme o ne a kgothaletsa balatedi ba gagwe go “rapela ka metlha le gore ba se ka ba lesa.” (Luke 18:1) Jehofa o re laletsa gore re bontshe gore re a mo tshepa ka go bua le ene gangwe le gape ka dilo tse di re tshwenyang. Jesu o ne a re: “Nnang lo kope, mme lo tla newa.” Mme seno ga se reye gore Jehofa o okaoka go araba batho ba ba mo ratang le ba ba mo tlotlang jaaka Rraabone. Go na le moo, Jesu o ne a re: “Fa lona, le mororo lo le boikepo, lo itse kafa lo ka nayang bana ba lona dimpho tse di molemo ka gone, a bo Rara yo o kwa legodimong bogolo jang a tla naya moya o o boitshepo ba ba mo kopang!”—Luke 11:5-13.

Go bona tshedimosetso e e oketsegileng, bona kgaolo 17 ya buka ya Totatota Baebele e Ruta Eng?a

[Ntlha e e kwa tlase]