“Ke Modimo . . . wa Batshedi”

A loso lo maatla go gaisa Modimo? Le e seng! Loso—kgotsa “mmaba” ope fela—a ka nna maatla jang go gaisa “Modimo Mothatayotlhe”? (1 Bakorintha 15:26; Ekesodo 6:3) Modimo o na le maatla a go fedisa loso ka go tsosa baswi mme o solofetsa go dira jalo mo lefatsheng la gagwe le lesha.a Tsholofetso eo e tlhomamisegile go le kana kang? Morwa Modimo e bong Jesu, o re tlhalosetsa seo ka mafoko a a dirang gore re nne le tsholofelo.—Bala Mathaio 22:31, 32.

Fa Jesu a ne a bua le Basadukae, ba ba neng ba sa dumele mo tsogong ya baswi, o ne a re: “Ka ga tsogo ya baswi, a lo ne lwa se ka lwa bala se se neng sa buiwa le lona ke Modimo, a re, ‘Ke nna Modimo wa ga Aborahame le Modimo wa ga Isake le Modimo wa ga Jakobe’? Ke Modimo, e seng wa baswi, mme wa batshedi.” Fano Jesu o ne a bua ka motlotlo o Modimo a neng a na le one le Moshe mo setlhatshaneng se se shang mo e ka nnang ka 1514 B.C.E. (Ekesodo 3:1-6) Go ya ka Jesu, mafoko ano a Jehofa a neng a a bua le Moshe—“Ke nna Modimo wa ga Aborahame, Modimo wa ga Isake le Modimo wa ga Jakobe”—a bontsha gore tota tsholofetso ya tsogo e tla diragadiwa. Jang?

Ela tlhoko pele se go neng go buiwa ka sone. Ka nako ya fa Jehofa a ne a bua le Moshe, ditlhogo tsa lotso e bong Aborahame, Isake le Jakobe ba ne ba sa bolo go swa—Aborahame o ne a na le dingwaga di le 329 a sule, Isake dingwaga di le 224 mme Jakobe ene dingwaga di le 197. Le fa go ntse jalo, Jehofa o ne a re “Ke nna”—e seng “ke ne ke le”—Modimo wa bone. Jehofa o ne a bua ka ditlhogo tseo tsa lotso tse tharo e kete ba sa ntse ba tshela. Ka ntlha yang?

Jesu o tlhalosa jaana: “[Jehofa] ke Modimo, e seng wa baswi, mme wa batshedi.” A ko o akanye go sekae gore mafoko ao a ne a kaya eng. Fa go se na tsogo ya baswi, Aborahame, Isake le Jakobe ba ka se tlhole ba tsoga. Fa e le gore go ne go ntse jalo, go raya gore Jehofa ke Modimo wa ditopo. Mme seo se ka bo se raya gore loso lo maatla go gaisa Jehofa—e kete o bokoa go ka tsosa batlhanka ba gagwe mo losong.

Ka jalo, re ka swetsa ka goreng ka Aborahame, Isake, Jakobe le batlhanka botlhe ba ba ikanyegang ba ga Jehofa ba ba suleng? Jesu o ne a bua mafoko ano a a maatla: “Botlhe ba a tshela mo go ene.” (Luke 20:38) Ee, boikaelelo jwa ga Jehofa jwa go tsosa batlhanka ba gagwe ba ba ikanyegang ba ba suleng tota bo tla diragadiwa, mo e leng gore o akanya ka bone e le batho ba ba tshelang. (Baroma 4:16, 17) Jehofa o tla boloka batho botlhe ba ba ntseng jalo mo mogopolong wa gagwe o o sa lebaleng go fitlha nako ya gore a ba tsose gape e goroga.

A o itumelela tsholofetso ya gore o tla boa o kopana gape le batho ba o ba ratang ba ba suleng? Fa go ntse jalo, gakologelwa gore Jehofa o maatla thata go gaisa loso. Ga go na sepe se se tla mo thibelang go diragatsa tsholofetso ya gagwe ya go tsosa baswi. Ke eng fa o sa ithute mo go oketsegileng ka tsholofetso ya tsogo ya baswi le ka Modimo yo o tla e diragatsang? Fa o dira jalo, ga go pelaelo gore o tla atamalana thata le Jehofa, “Modimo . . . wa batshedi.”