Tsaya Kgato e e Siameng gore O Tle O Gatele Pele Ka mo Go Oketsegileng

¹ Gone jaanong jaana, ba le bantsi ba rona ba feditse go bala 1992 Yearbook. Go ithuta ka tlhora ya ngwaga wa 1991 ya lefatshe ka bophara ya baboledi ba ba fetang dimilione di le nne le kotara mo mafatsheng a le 211—eleng koketsego ya 6,5 lekgolong—go ne ga dira gore dipelo tsa rona di phophome ka boitumelo! Ga go na pelaelo epe gore koketsego ya Bogosi eo gone jaanong jaana e diragalang go dikologa lefatshe e neela bosupi jo bo kgatlhang tota jwa go diragadiwa ga lekwalo la Isaia 2:2-4 le Mika 4:1-4.

² Le mororo pego ya ngwaga wa tirelo wa 1992 e sa felela, bosupi bo phepafetse gore Jehofa o dira gore ngwaga ono wa tirelo o wele ka dikoketsego tse di tlhomologileng. Go laletsa batho gore ba tle go nna seoposengwe le bakaulengwe ba rona ba meraferafe go santse go tswelela pele. Dipalo tsa bao ba neng ba le gone mo Segopotsong le mo dikopanong tsa kgaolo di bontsha gore batho ba le dimilionemilione ba tlhwaela molaetsa wa Bogosi tsebe. Go tswa mo merafeng yotlhe, ba arabela taletso e e tlhotlheleditsweng e e kuang mokgosi o o reng: “Ntloñ, a re tlhatlogeleñ kwa thabeñ ea ga Yehofa, kwa tluñ ea Modimo oa ga Yakobe; me o tla re ruta ditsela tsa gagwè, me re tla sepela mo ditselaneñ tsa gagwè.”

³ Ititeye Sehuba gore O Tlile go Gatela Pele: Phuthego ya ga Jehofa e gatela pele. Jaaka fa batho ba le bantsi thata ba basha ba ntse ba tlhatlogela kwa thabeng ya kobamelo ya boammaaruri ya ga Jehofa, go botlhokwa fela thata gore mongwe le mongwe wa rona a tseye kgato e e siameng gore a tle a gatele pele ka mo go oketsegileng semoyeng mme morago ga moo a leke go thusa bao ba santseng ba le basha gore le bone ba dire se se tshwanang. Botlhokwa jwa go dira kgatelopele e e ntseng jalo bo bontshiwa mo polelong e e bontshang gore bao ba arabelang taletso eno ya gore ba tlhatlogele kwa thabeng ya ga Jehofa ba raya ba bangwe ba re, “Tla.” Moaposetoloi Johane o ne a bega sengwe se se tshwanang le seno jaana mo go Tshenolō 22:17: “Me Mōea le monyadwi ba re, Tla. Le eo o utlwañ, a a kè a re, Tla.”

⁴ Jesu o ne a bontsha kafa taletso eno e tshwanetseng ya dirwa ka gone. Ka nako ya fa batho ba ne ba arabela thuto ya gagwe, o ne a ba laletsa gore ba tle go nna le seabe mmogo nae mo bodiheding jwa gagwe a bo a ba ruta kafa ba neng ba ka dira seo ka gone. (Math. 4:19; 10:5-7, 11-14) Barutwa ba gagwe ba ne ba ithuta mekgwa e e mosola eo a neng a e dirisa ka go tsamaya le ene le go tlhokomela kafa a neng a dira dilo ka gone. Morago ga moo ba ne ba dira gore bodihedi jwa bone bo tshwane le jwa gagwe. Ba ne ba ithuta ka botlalo mekgwa eo a neng a e dirisa mo e leng gore go neela ga bone bosupi ka bopelokgale go ne ga gapa tlhokomelo ya baganetsi bao ba neng ba lemoga ka phepafalo gore e ne e le barutwa ba ga Jesu. Ditihō 4:13 e bega jaana: “Me yana ea re ba bōna bopelokgale yoa ga Petere le Yohane, . . . ba ba lemoga ha ba kile ba ne ba nna le Yesu.”

⁵ Pele ga fa a boela legodimong, Jesu o ne a ntsha taolo ya gore barutwa ba gagwe ba tshwanetse gore ba tsweledisetse bodihedi jwa Bokeresete pele ka go dira barutwa ba basha, ba ba rute ka tsela e e tshwanang fela le eo bone ba ileng ba rutwa ka yone. Jesu o ne a laela jaana mo go Mathaio 28:19, 20, “Ke gōna tsamaeañ, lo dihè merahe eotlhe barutwa, . . . lo ba rute go tlhōkōmèla dilō cotlhe tse ke di lo laoletseñ.” Ebile go bontsha gore o ne a kaya gore tiro eno e tswelele pele go tla go fitlha mo motlheng ono wa rona, o ne a tlhomamisa jaana ka mo go oketsegileng: “Bōnañ, ke bo ke nntse ke na le lona ka metlha eotlhe, le go ea bokhutloñ yoa metlha.”

⁶ Barutwa ba boammaaruri ba ga Jesu Keresete ga ba a palelwa ke go ikobela ditaolo tsa gagwe tsa gore ba rute barutwa ba basha dilo tsotlhe tseo a di laoletseng. Lefa go ntse jalo, koketsego e e tlhomologileng e e diregang mo phuthegong ya Basupi ba ga Jehofa lefatshe ka bophara e re tlhoka gore ka metlha re akanye ka dilo tse di kgethegileng tseo di tlhokwang ke maloko a phuthego ao a sa tswang go kolobediwa le ke baboledi bao ba iseng ba kolobediwe mmogo le tseo di tlhokwang ke batho bao ba ithutang Bibela le rona le bao gongwe ba simololang go nna teng mo dipokanong tsa phuthego.

⁷ Mo tshimologong ya ngwaga wa tirelo wa 1992, mo e batlang e nna mmoledi a le 1 mo go bangwe le bangwe ba le 9, o ile a fetsa ngwaga o le mongwe a tlhagafetse mo bodiheding. Mo godimo ga moo, a le 1 mo go ba le 6 o ile a fetsa dingwaga di le tharo kana kafa tlase ga tsone a bolela mafoko a a molemo; mme a le 1 mo go ba le 4 o ile a nna le seabe mo bodiheding ka sebaka se se sa feteng dingwaga di le tlhano. Le mororo ba le bantsi bao ba santseng ba le basha ba dirile kgatelopele e e molemo fa esale go simolola ka nako ya fa ba ne ba fetoga go nna maloko a phuthego, ga go na pelaelo epe gore go ba thusa mo dilong dingwe tse di rileng go tla thusa mo go direng gore kgolo ya bone ya semoya e akofe.

⁸ Bahebera 6:1 e kgothaletsa botlhe gore ba ‘gagamalele pele go ya kgolong.’ (NW) Bogodi jwa Bokeresete bo feta kgakala go ntsha fela pego ya tirelo. Bo akaretsa go gatela pele mo go ithuteng ka namana le go nna teng ka metlha mo dipokanong mmogo le go nna le seabe ka tlhoafalo mo bodiheding jwa tshimo. Gape, go akaretsa go thusa batho ba bangwe gore ba itse boammaaruri gore ba tle ba bolokwe. Re tshwanetse ra leka thata gore re tokafatse ditsela tsa rona tse di botswerere tsa ‘go ntsha mabaka a a tswang mo Dikwalong.’ (Dit. 17:2) Go gagamalela pele go ya kgolong go tlhoka nako, ebile go ikaegile fela thata ka go ineela ga rona mo Modimong le go bapala ga rona boitemogelo jo bo mosola jo bo ka re thusang mo tshimong. Le mororo go ikaegile ka rona gore re ineela mo Modimong go le go kana kang, go botlhale go letla bakaulengwe le bokgaitsadi ba bangwe ba ba godileng gore ba re thuse go bapala boitemogelo jo bo mosola. Re ka kgona go ithuta go tswa mo boitemogelong jo ba nang najo, segolobogolo mo bodiheding jwa tshimo. Ga re a tshwanela go ithuta sengwe le sengwe ka borona ka go lekeletsa dilo le go dira diphoso.

⁹ Go Thusa Bao Ba Senang Maitemogelo: Go na le sekai sa go thusa ba bangwe seo se neng sa tlhomiwa fa phuthego ya Bokeresete e ne e simolola. Jesu o ne a tlhatlhelela barutwa ba gagwe. (Mareko 3:14; Luke 9:1; 10:1) Mme le bone ba ne ba ruta ba bangwe. Timotheo o ne a kgothadiwa ka tsela e e kgethegileng le go thusiwa ke moaposetoloi Paulo, mme morutwa Apolose ene o ne a tswelela pele ka thuso eo a neng a e bone ka namana go tswa mo go Akwila le Peresila bao ba neng ba na le maitemogelo a a oketsegileng. (Dit. 18:24-27; 1 Bakor. 4:17) Maloko a a godileng a phuthego ya Bokeresete a latela dikai tseo gompieno, ka go ruta le go kgothatsa bao ba senang maitemogelo, segolobogolo bao ba sa tswang go kopanela mmogo le basha. Jaaka fa Baroma 15:1, 2 e bolela, “Me yana rona ba re leñ thata, re chwanetse go pepetletsa dithetelèlō tsa ba ba bokōa.”

¹⁰ Batsadi ba na le boikarabelo jwa go tsaya kgato e e siameng gore ba thuse bana ba bone gore ba gatele pele semoyeng. Seno se akaretsa go nna le thuto ya lelapa, go ruta bana kafa ba ka ithutang ka namana ka gone, go nna teng kwa dipokanong ka metlha le go nna le seabe mo go tsone, le go nna le maitemogelo mo go diriseng seo ba se ithutang. (Baef. 6:4; 1 Tim. 5:8) Batshwari ba Thuto ya Buka ya Phuthego e tshwanetse gore segolobogolo e nne bone bao ba etelelang pele mo go direng dithulaganyo tsa gore ba thuse botlhe bao ba leng mo ditlhopheng tsa bone tsa thuto ya buka le tsa tirelo ya tshimo gore ba gatele pele semoyeng. Molebedi wa tirelo le bagolwane ba bangwe mmogo le batlhanka ba bodihedi le maloko a mangwe a phuthego le one a ka nna a thusa.

¹¹ Tlamela ka Seo Se Tlhokegang: Go ka nna ga tlhokega gore mongwe a thusiwe ka karolo nngwe fela e e rileng ya ditiro tsa Bokeresete, e e ntseng jaaka go ithuta ka namana. Motho a ka nna a tlhoka go fiwa dikakantsho tsa kafa a ka itirelang ka gone thulaganyo e e mosola ya go ithuta. Motho mongwe o sele a ka nna a tlhoka go thusiwa malebana le go baakanyetsa dikarabo kana dikabelo. Gongwe bangwe ba tlhoka go ithuta kafa ba ka dirang patlisiso ya ditlhogo tsa Bibela ka gone.

¹² Ba le bantsi bao ba sa ntseng ba le basha ba tlhoka go thusiwa mo bodiheding jwa tshimo. Mmoledi a ka nna a batla gore a nne setswerere ka mo go oketsegileng mo tirong ya ka ntlo le ntlo, mo go direng maeto a go boela, kana mo go simololeng thuto ya Bibela le go e tshwara. Dithulaganyo di le mmalwa tsa go itshuga go dirisiwa diketapele tse di akantshitsweng le dilo tseo di ka buiwang kwa tshimong tse di tswang mo bukeng ya Go Fetolana kana go tswa mo go Tirelo ya Rona ya Bogosi di ka nna tsa thusa mo go direng seno. Ka dinako tse dingwe, sotlhe seo mongwe a ka nnang a tswa a se tlhoka e ka nna ya nna go newa dikakantsho tsa gore a itirele thulaganyo e e mosola ya tirelo ya tshimo le go thusiwa gore a e ngaparele. Go dira dithulaganyo tse di tlhomameng tsa go bereka le mongwe yo o tlhokang go thusiwa go tla mo thusa gore a gatele pele gore a fitlhelele mekgele e e kgethegileng.

¹³ Lefoko la Modimo le re kgothaletsa gore re dire gore batho ba bangwe ba bone botswelelopele jwa rona. Eno ke kgakololo eo Paulo a neng a e kwalela modiri ka ene ebong Timotheo. (1 Tim. 4:15) Tumalanong le kgothatso eo, moaposetoloi o ne a gatelela botlhokwa jwa gore re ithapise gore re tle re nne le seabe mo kgaisanong ya diatleletiki kana gore re tle re nne le seabe ka katlego mo ntweng ya semoya. (1 Bakor. 9:24-27; 2 Bakor. 10:5, 6) Re tshwanetse gore re nne bonako go dirisa dilo tsotlhe tseo re di ithutang kaga thato ya Modimo e le gore batho bao ba re tlhokometseng ba tle ba kgone go bona dikai tsa mmatota tsa tumelo ya boammaaruri ya Bokeresete mo go rona. Ka tsela e e tshwanang, re tshwanetse ra bo re gatela pele mo bokgoning jwa rona jwa go ruta ba bangwe gore ba fetoge go nna barutwa ba ba ineetseng ba ga Jesu Keresete.—Yak. 1:22-25; 1 Tim. 4:12-16.

¹⁴ Go Gatela Pele Go Akaretsa go Itshokela Diteko: Le eleng Jesu Keresete o ile a ithuta dithuto tse di solegelang molemo go tswa mo dilong tseo a ileng a di boga. (Baheb. 5:8) Ka jalo, le rona re ka kgona go dira jalo. Ka gone, go gatela pele semoyeng go a oketsega fa re nna le boikutlo jo bo siameng joo re gakololwang mo go Yakobe 1:2, 3 gore re nne najo: “Ba ga echo, lo kaeè ha e le boitumèlō hèla, mogañ lo wèlañ mo ditekoñ di le dintsi; lo nntse lo itse ha go lekwa ga tumèlō ea lona go tlo go cose bopelotelele.” Ka gone, lefa e ka tswa e le gore gongwe re tshwanetse ra lebana le kgwetlho ya bolwetse jo bo re tshwarang nako e telele, mathata a tsa itsholelo, go tshela mo lelapeng le le sa utlwaneng, go ganediwa mo tshimong, kana maemo ape fela a mangwe a le mmalwa a a utlwisang botlhoko, Jehofa o re tlhomamisetsa gore ka thuso ya gagwe re ka kgona go a fenya le go tswelela pele re gatela pele mo go mo obameleng. (1 Bakor. 10:13; 2 Bakor. 12:9; 1 Pet. 5:8-11) Re ka kgona go atlega fa re nna re ntse re nitame kafa tlase ga maemo otlhe, ‘re bua mafoko a a boitshepo a Modimo ebile re direla ba bangwe go ya ka nonofo eo Modimo a e re nayang gore Modimo a tle a galalediwe mo dilong tsotlhe ka Jesu Keresete.’—1 Pet. 4:11.

¹⁵ Amogela Thuso gore O Tle O Gatele Pele Ka Mo Go Oketsegileng: Fa e le gore o tlhoka go thusiwa gore o tle o gatele pele ka mo go oketsegileng semoyeng, iketleeletse go amogela thuso go tswa mo lelokong la phuthego le le nang le maitemogelo ka mo go oketsegileng. Le eleng fa ope a ise a tle mo go wena a tla go ithaopela go go thusa, ga o a tshwanela go letla go nna ditlhong gore go go amoge tshono eno ya go ka thusiwa. Kopa thuso. O se ka wa tshaba go batla thuso ya motho ope fela mo phuthegong yo o nang le maitemogelo. Kana o ka nna wa kopa Motshwari wa lona wa Thuto ya Buka ya Phuthego, molebedi wa tirelo, kana ope fela wa bagolwane ba bangwe gore a go neye thuso eo o e tlhokang.—Bapisa Genesise 32:26; Mathaio 7:7, 8.

¹⁶ Ga go na pelaelo epe gore ke tshiamelo e e molemolemo go akarediwa mo ‘boidiiding jo bogolo’ jwa meraferafe jo bo ntseng bo oketsegela pele fela jo bo tlhatlogelang kwa thabeng ya ga Jehofa ya kobamelo e e itshekileng. (Tshen. 7:9) Gape, go laletsa ba bangwe gore ba tle go tlhatloga le rona ke tshiamelo. Ka kanaanelo e e tswang pelong, ekete re ka tswelela pele go tsaya kgato e e siameng gore re gatele pele ka mo go oketsegileng, re age bomoya mo go rona le go dira seo re ka se kgonang go thusa ba bangwe gore ba gatele pele mmogo le rona mo go direleng Jehofa.