Tlhotlheletsanang ka Tlhoafalo mo Ditirong Tse di Molemo

Bahebera 10:24 e re kgothaletsa go ‘akanyetsana gore re tlhotlheletsane mo loratong le mo ditirong tse di molemo.’ Re ka tlhotlheletsa bakaulengwe ba rona ka go ba tlhomela sekao se se molemo le ka go bontsha tumelo. Bolelela ba bangwe mo phuthegong ka maitemogelo a a molemo a o nnileng le one. Dira gore ba bone gore o itumelela go direla Jehofa. Le fa go ntse jalo, tila go ipapisa le bone kgotsa go ba bapisa le bakaulengwe ba bangwe go sa tlhokege. (Bagal. 6:4) Leka go dirisa maitemogelo a gago go tlhotlheletsa ba bangwe “mo loratong le mo ditirong tse di molemo,” e seng go dira gore ba ikutlwe ba le molato. (Bona buka ya Sekolo sa Bodiredi, ts. 158, ser. 4.) Fa re ba tlhotlheletsa mo loratong, ba tla kgona go dira ditiro tse di molemo, tse di jaaka go thusa batho ba bangwe ka dilo tse ba di tlhokang kgotsa go ba rerela.—2 Bakor. 1:24.