Baebele e a Reng ka Tlhaelo ya Metsi?

Rotlhe re tlhoka metsi a a phepa gore re kgone go tshela. Mme gone, Motsamaisimogolo wa UN e bong António Guterres a re: “E re ka go na le tlhokafalo e kgolo ya metsi mo lefatsheng lotlhe, seo se dira gore go nne le tlhaelo e kgolo ya metsi. Batho ba le bantsi mo lefatsheng ga ba kgone go bona metsi a a phepa.”

Mosimane o belege mosimanyana ba le fa metsing a leswe.

A re tla tsamaya re nna le metsi a a lekaneng? Kgotsa a re tla tswelela re tshwaragane le bothata jono jwa tlhaelo ya metsi? Baebele e a reng?

Se Baebele e se solofetsang ka maemo a metsi

Baebele e a re nako nngwe re tla bo re sa tlhole re na le tlhaelo ya metsi. Tota e bile, go tla bo go na le metsi a mantsi e bile a le phepa.

“Gonne metsi a tla pomponyega mo nageng, le melatswana e tla pomponyega mo sekakeng. Mmu o o omeleditsweng ke mogote o tla nna jaaka mogobe o o tletseng lotlhaka, le mmu o o nyorilweng o tla nna jaaka metswedi ya metsi.”—Isaia 35:6, 7.

Goreng re ka dumela tsholofetso eo ya Baebele? Bona kafa Baebele e tlhalosang tsela e polanete ya rona e dirilweng ka yone.

Se Baebele e se buang ka lefatshe le modikologo wa metsi

‘Modimo ga a bopela lefatshe lefela, mme o le bopetse gore le nniwe.’—Isaia 45:18.

E re ka Modimo a dirile lefatshe gore batho le diphologolo ba kgone go tshela mo go lone, o dirile gore go nne le dilo tsa tlhago tse di dirang gore go nne le metsi a mantsi a a phepa.

“[Modimo] o gogela marothodi a metsi kwa godimo; a fetoga pula e e tswang mo mouwaneng wa gagwe; go tswa foo, maru a rothisa pula, a e nesetsa batho.”—Jobe 36:27, 28.

Temana eno e tlhalosa tsela e Modimo a dirileng modikologo wa metsi ka yone. Metsi a tlhatlogela kwa godimo e le mouwane a tswa mo lefatsheng le mo mawatleng, mouwane oo o bo o fetoga maru go tswa foo pula e bo e na, seo se dira gore batho le diphologolo ba nne ba na le metsi a a phepa.—Moreri 1:7; Amose 5:8.

“Ke tla lo nesetsa dipula tsa medupe ka dinako tsa tsone, mme lefatshe le tla ungwa le ditlhare tsa naga di tla ntsha maungo a tsone.”—Lefitiko 26:4.

Modimo o ile a solofetsa Baiseraele gore o tla dira gore dijalo tsa bone di tlhoge ka go ba naya metsi. O a itse gore re tlhoka pula e e lekaneng ka nako e e siameng gore re nne le dijo.

Go ise go ye kae, Modimo o tla re direla se a ileng a se direla Baiseraele ba bogologolo. (Isaia 30:23) Gompieno mo dikarolong tse dintsi tsa lefatshe go na le tlhaelo e kgolo ya metsi mme lengwe la mabaka ke gore pula ga ene. Baebele ya re mathata a metsi a tla rarabologa jang?

Tlhaelo ya metsi e tla fela jang?

Baebele e tlhalosa gore Modimo o tla dirisa Bogosi jwa gagwe go rarabolola mathata a a mo polaneteng ya rona go akareletsa le a metsi. (Mathaio 6:9, 10) Bogosi jwa Modimo ke puso e e kwa legodimong e e tla busang mo lefatsheng lotlhe. (Daniele 2:44; Tshenolo 11:15) Mo godimo ga moo, bogosi joo bo tla dira se dipuso tsa batho di palelwang ke go se dira, e leng go rarabolola bothata jwa metsi.

Setshwantsho: 1. Lefatshe le le tlhasetsweng ke komelelo le setlhare se se omeletseng. 2. Metsi a morwalela a khurumeditse bontlhabongwe jwa ntlo.

Bothata: Go fetofetoga ga maemo a bosa go kgoreletsa modikologo wa metsi. Seno se dira gore go nne le komelelo le merwalela ka ntlha ya dipula tse di maatla kgotsa go penologa ga lewatle.

Tharabololo: Bogosi Jwa Modimo bo tla baakanya tshenyo yotlhe e e diragetseng mo tikologong gore polanete ya rona e kgone go boa e siama. Modimo o solofeditse jaana: “Ke dira dilo tsotlhe disha.” (Tshenolo 21:5) Mafelo a a omeletseng a tla nna le metsi a mantsi mme seo se bo se dira gore go tlhoge dijalo tota le kwa mafelong a go sa nniweng kwa go one. (Isaia 41:17-20) Kgosi ya Bogosi Jwa Modimo e bong Jesu Keresete, o tla kgona go laola maatla a tlholego mo lefatsheng.

Fa Jesu a le mo lefatsheng o ne a kgalemela phefo e e maatla, mme ka go dira jalo o ne a re bontsha lemmenyana la maatla a Modimo a mo neileng one. (Mareko 4:39, 41) Fa Jesu a busa e le Kgosi go tla bo go sa tlhole go na le masetlapelo a tlholego. Batho ba tla bo ba tshela ka kagiso ba sireletsegile mme go sena masetlapelo ape.

Madirelo a tshololela leswe mo metsing a a phepa.

Bothata: Dinoka le metsi a a ka fa tlase ga lefatshe a kgotlelwa ke dikgwebo le batho ba ba ikakanyetsang ba le nosi mme seo se dira gore go nne le tlhaelo ya metsi a a phepa.

Tharabololo: Modimo o tla baakanya lefatshe a bo a dira gore dinoka, mawatle le mmu di nne phepa. Lefatshe le tla nna paradaise. Fa Baebele e bua ka kgang eno e a re: “Naga le lefatshe le le omeletseng di tla itumela, e bile sekaka se tla itumela se bo se ntsha malômô jaaka saferone.”—Isaia 35:1.

Go tla diragala eng ka batho ba ba sa kgathaleng ka tikologo ya bone le ka batho ba bangwe? Modimo a re o tla ‘senya ba ba senyang lefatshe.’—Tshenolo 11:18; Diane 2:21, 22.

Bothata: Batho ga ba dirise metsi sentle, ba dirisa metsi a mantsi go feta a lefatshe le re nayang one.

Tharabololo: Re itumelela gore Bogosi Jwa Modimo bo tla dira gore ‘thato ya Modimo e diragale mo lefatsheng’ mme e seng ya batho ba ba ikakanyetsang ba le nosi. (Mathaio 6:9, 10) Bogosi Jwa Modimo bo tla naya babusiwa ba jone thuto ya maemo a a kwa godimo. Isaia 11:9 e a re: “Lefatshe le tla bo le tletse kitso ya ga Jehofa.”a Batho ba tla tlhokomela polanete ya bone le dilo tsa tlhago tse di leng mo go yone, ba thusiwa ke thuto eo ya maemo a a kwa godimo le tsela e ba ratang Modimo ka yone le dilo tse a di dirileng.

Go ithuta mo go oketsegileng ka se Bogosi Jwa Modimo bo tla se dirang bona setlhogo se se reng, “Bogosi Jwa Modimo bo Tla Dira Eng?”
Bona gore Modimo o tla dira jang gore lefatshe e nne paradaise ka go bala buka ya Baebele ya Isaia kgaolo 35.
Go Ithuta mo go oketsegileng ka maikaelelo a Modimo ka lefatshe le batho leba bidio ya setlhogo se se reng, Goreng Modimo a Ile a Bopa Lefatshe?

a Jehofa ke leina la Modimo. (Pesalema 83:18) Bona setlhogo se se reng, “Jehofa ke Mang?”