Lebaka La go Bo re Tshwanetse go ‘Nna re Disitse’

 1. Tshwantsha kafa go leng botlhokwa ka gone go itse nako le go lemoga se se diregang. (Bona setshwantsho se se simololang setlhogo.)

GO SETSE metsotswana e le metlhano pele thulaganyo ya kopano e simolola. Ke nako ya gore re tseye manno mme re itumelele mmino o o simololang thulaganyo ya kopano. Ke nako ya gore re reetse ka tlhoafalo mmino o o monate o re o baakanyeditsweng ke khwaere ya Watchtower, mme sa botlhokwa le go feta, ke nako ya gore re baakanye megopolo le dipelo tsa rona gore re reetse dipuo tse di latelang. Mme go sa ntse go na le batho ba ba sa boneng gore nako e ile, ba a sasanka kgotsa ba tlotla le ditsala tsa bone, ba sa lemoge gore thulaganyo e tloga e simologa. Ba paletswe ke go ntsha matlho dinameng le go lemoga se se diregang—gore modulasetulo o ntse mo seraleng, mmino o a tshameka le gore bareetsi ba bangwe ba ntse fa fatshe. Se re sa tswang go bua ka sone, se re thusa go lemoga tiragalo e kgolo e e larileng kwa pele, tiragalo e e tla re tlhokang gore re nne re ntshitse matlho dinameng malebana le se se tla diregang mo isagweng. Ke tiragalo efe eo?

 2. Ke eng fa Jesu a ne a bolelela barutwa ba gagwe gore ba ‘nne ba disitse’?

² Fa Jesu Keresete a ne a bua ka “bokhutlo jwa tsamaiso eno ya dilo,” o ne a raya barutwa ba gagwe a re: “Nnang lo lebile, nnang lo tsogile, gonne ga lo itse gore nako e e tlhomilweng e leng.” Morago ga moo, Jesu o ne a ba tlhagisa gape a re: “Nnang lo disitse.” (Math. 24:3; bala Mareko 13:32-37.) Pego ya ga Mathaio le yone e bontsha gore Jesu o ile a tlhagisa balatedi ba gagwe gore ba nne ba disitse, o ne a re: “Jalo, nnang lo disitse, ka gonne ga lo itse gore Morena wa lona o tla ka letsatsi lefe.  . . Itshupeng lo iketleeditse, ka gonne ka ura e lo sa akanyeng gore ke yone, Morwa motho o tla ka yone.” Gape o ne a re: “Jalo, nnang lo disitse, ka gonne ga lo itse letsatsi le fa e le ura.”—Math. 24:42-44; 25:13.

 3. Ke eng fa re tsaya tlhagiso ya ga Jesu tsia?

³ Rona Basupi ba ga Jehofa re tsaya tlhagiso eo tsia. Re a itse gore re tshela mo ‘motlheng wa bokhutlo’ le gore go setse lobaka lo lokhutshwane pele “pitlagano e kgolo” e simologa! (Dan. 12:4; Math. 24:21) Re bona dintwa, boitsholo jo bo sa siamang jo bo ntseng bo oketsega, tlolomolao, tlhakatlhakano mo bodumeding, tlhaelo ya dijo, malwetse a leroborobo le dithoromo tsa lefatshe. Re a itse gore batho ba ga Jehofa mo lefatsheng lotlhe ba dira tiro ya go rera ka Bogosi ka selekanyo se se kwa godimo thata. (Math. 24:7, 11, 12, 14; Luke 21:11) Re swegaswega pelo go bona se go tla ga Morena go tla re leretseng sone le kafa a tla diragatsang boikaelelo jwa Modimo ka gone.—Mar. 13:26, 27.

 4. (a) Ke eng fa re dumela gore gone jaanong Jesu o a itse gore Haramagedona e tla tla leng? (b) Le fa re sa itse gore pitlagano e kgolo e tla simologa leng, ke eng se re tlhomamisegileng ka sone?

⁴ Re a itse gore thulaganyo nngwe le nngwe ya kopano e na le nako e e simololang ka yone. Le fa go ntse jalo, le fa re ka itoma sekgono, ga re ka ke ra itse ngwaga, letsatsi kgotsa ura e pitlagano e kgolo e tlileng go simologa ka yone. Fa Jesu a ne a le mo lefatsheng, o ne a re: “Ka ga letsatsi leo le ura eo ga go na ope yo o itseng, le fa e le baengele ba magodimo kgotsa Morwa, fa e se Rara fela.” (Math. 24:36) Mme Keresete o neilwe maatla kwa legodimong gore a tle go lwa kgatlhanong le lefatshe la ga Satane. (Tshen. 19:11-16) Ka jalo, go a utlwala go swetsa ka gore gone jaanong Jesu o itse gore Haramagedona e tla tla leng. Rona ga re itse sepe. Go botlhokwa fela thata gore re nne re disitse go fitlha pitlagano eo e tla. Mme Jehofa ene o itse nako eo sentle. O itse nako e bokhutlo bo tla tlang ka yone. O ntse a lebile nako fa e ntse e atamela gore pitlagano e kgolo e simologe mme “ga e kitla e tla morago ga nako.” (Bala Habakuke 2:1-3.) Re tlhomamisegile go le kana kang?

 5. Naya sekai se se bontshang gore ka metlha boporofeti jwa ga Jehofa bo diragala ka nako e a e tlhomileng.

⁵ Ka dinako tsotlhe, boporofeti jwa ga Jehofa bo diragala ka nako e a e tlhomileng! Ga bo tle pele ga nako kgotsa morago ga nako. Sekai sa seo ke fa a ne a golola Baiseraele kwa Egepeto. Moshe o ne a porofeta jaana malebana le se se tla diregang ka Nisane 14, 1513 B.C.E.: “Kwa bokhutlong jwa dingwaga di le makgolo a manè le masome a le mararo [430], go ne ga ba ga diragala mo go lone letsatsi leno gore masomosomo otlhe a ga Jehofa a tswe mo lefatsheng la Egepeto.” (Ekes. 12:40-42) Dingwaga tseo tse di “makgolo a manè le masome a le mararo” di ne tsa simologa fa kgolagano ya ga Jehofa le Aborahame e ne e simolola go dira ka 1943 B.C.E. (Bagal. 3:17, 18) Nako nngwe morago ga moo, Jehofa o ne a raya Aborahame a re: “Ruri o ka tswa o itse gore losika lwa gago lo tla nna moagi wa moeng mo lefatsheng le e seng la bone, mme ba tla tshwanelwa ke go ba direla, mme bano ruri ba tla ba bogisa dingwaga di le makgolo a manè [400].” (Gen. 15:13; Dit. 7:6) Go bonala “dingwaga di le makgolo a manè” tsa pogo di ne tsa simolola ka 1913 B.C.E. fa Ishemaele a ne a sotla Isake yo o neng a sa tswa go kgwisiwa, mme di ne tsa khutla fa Baiseraele ba ne ba fuduga kwa Egepeto ka 1513 B.C.E. (Gen. 21:8-10; Bagal. 4:22-29) Jehofa o ne a bolelela pele go gololwa ga batlhanka ba gagwe dingwaga di le makgolo a manè pele go direga!

 6. Ke eng fa re tlhomamisegile gore Jehofa o tla golola batho ba gagwe?

⁶ Joshua yo o neng a le teng fa Baiseraele ba gololwa kwa Egepeto, o ne a ba gakolola jaana: “Lo itse sentle ka dipelo tsa lona tsotlhe le ka meya ya lona yotlhe gore ga go na lefoko le le lengwe le le sa diragadiwang mo mafokong otlhe a a molemo a Jehofa Modimo wa lona a a buileng le lona. A lo diragaletse otlhe fela. Ga go na le fa le le lengwe la one le le sa diragalang.” (Josh. 23:2, 14) Le rona re ka tlhomamisega gore Jehofa o tla re golola mo pitlaganong e kgolo fela jaaka a re solofeditse. Le fa go ntse jalo, fa re batla go falola bokhutlo jwa lefatshe leno, re tshwanetse go nna re disitse.

7, 8. (a) Bogologolo tiro ya molebeledi e ne e le eng, mme re ithuta eng mo ntlheng eo? (b) Naya sekai se se bontshang se se ka diregang fa molebeledi a robetse mo tirong.

⁷ Go sekaseka se se ileng sa direga bogologolo go ka re thusa go ithuta botlhokwa jwa go nna re disitse. Mo metlheng eo, metse e megolo, e e jaaka wa Jerusalema, e ne e sireleditswe ke lobota lo logolo. Mabota ano a ne a sireletsa motse gore o se ka wa tlhaselwa e bile a ne a na le mafelo a motho a neng a kgona go bona sengwe le sengwe fa a le mo go one. Balebeledi ba ne ba nna mo go one le kwa dikgorong tsa motse bosigo le motshegare. Ba ne ba tshwanetse go tlhagisa batho fa ba bona gore motse o tloga o tlhaselwa. (Isa. 62:6) Balebeledi ba ne ba rwele matshelo a batho mo magetleng a bone, ka jalo, ba ne ba tlhoka go nna ba disitse.—Esek. 33:6.

⁸ Rahisitori wa Mojuda e bong Josephus a re ka 70 C.E., masole a Roma a ne a kgona go gapa Tora ya Antonia e e neng e le gaufi le lobota lwa Jerusalema ka gonne balebeledi ba motse oo ba ne ba robetse! Go tloga foo, masole a Roma a ne a tsena mo tempeleng le go e ja ka molelo, mme seo e ne e le setlhoa sa pitlagano e kgolo go di gaisa tsotlhe tse motse wa Jerusalema le setšhaba sa Bajuda ba kileng ba e bona.

 9. Ke eng se batho ba le bantsi ba sa se itseng?

⁹ Dinaga di le dintsi di na le masole a a emang mo melelwaneng mmogo le didirisiwa tsa maemo a a kwa godimo tsa thekenoloji tse di ba thusang go sireletsa dinaga tsa bone. Ba nna ba lebeletse batho ba ba lekang go tlhasela naga. Le fa go ntse jalo, dilo tseno di kgona go ba thusa go bona fela ditlhaselo tse di bakwang ke dipuso le batho. Ga di kgone go bona se se dirwang ke puso ya Modimo e e kwa legodimong e e eteletsweng pele ke Keresete mmogo le katlholo e e tlelang ditšhaba tsotlhe tsa lefatshe. (Isa. 9:6, 7; 56:10; Dan. 2:44) Mme rona fa re nna re disitse, re tla bo re ipaakantse fa letsatsi leo la katlholo le goroga.—Pes. 130:6.

10, 11. (a) Ke eng se re tshwanetseng go se ela tlhoko, mme ka ntlha yang? (b) Ke eng se se dirang gore o dumele gore Diabolo o tlhotlheletsa batho gore ba itlhokomolose boporofeti jwa Baebele?

¹⁰ Akanya ka molebeledi yo o ntseng a disitse bosigo jotlhe a sa robale. Fa nako ya gore a tswe mo tirong e ntse e atamela, o simolola go lapa le go otsela. Ka tsela e e tshwanang, fa bokhutlo jwa lefatshe leno bo ntse bo atamela, go nna thata gore re nne re disitse. Ruri re tla welwa ke matlhotlhapelo a a seng kana ka sepe fa re ka palelwa ke go nna re disitse! A re tlotle ka dilo di le tharo tse di ka dirang gore go nne thata go nna re disitse.

¹¹ Diabolo o dira gore batho ba se ka ba kgatlhegela dilo tsa semoya. Pele Jesu a bolawa, mo makgetlong a le mararo o ne a tlhagisa barutwa ba gagwe ka “mmusi wa lefatshe leno.” (Joh. 12:31; 14:30; 16:11) Jesu o ne a itse gore Diabolo o tla foufatsa megopolo ya batho gore ba se ka ba nna le boikutlo jwa go potlaka jo boporofeti jwa Modimo bo kgothaletsang batho go nna le jone. (Sefa. 1:14) Satane o dirisa mmusomogolo wa lefatshe lotlhe wa bodumedi jwa maaka go foufatsa megopolo ya batho. O lemogile eng fa o ntse o tlotla le batho? A o lemogile gore Diabolo o setse a ‘foufaditse megopolo ya ba ba sa dumeleng,’ gore ba se ka ba lemoga gore lefatshe leno le ya bokhutlong le gore gone jaanong Keresete o busa mo Bogosing Jwa Modimo? (2 Bakor. 4:3-6) Ke ga kae o utlwa batho ba re: “Ga ke kgatlhege”? Gantsi ga ba kgatlhege fa re leka go ba bolelela gore go tlile go direga eng ka lefatshe leno.

12. Ke eng fa re sa tshwanela go letlelela Diabolo gore a re tsietse?

¹² O se ka wa kgobega marapo kgotsa wa tlogela go nna o disitse fa batho ba sa kgatlhegele molaetsa wa rona, ka gonne go farologana le bone, wena o itse boammaaruri. Paulo o ne a kwalela badumedi ka ene a re: “Lona ka bolona lo itse sentle tota gore letsatsi la ga Jehofa le a tla fela jaaka legodu bosigo.” (Bala 1 Bathesalonika 5:1-6.) Jesu o ne a re tlhagisa jaana: “Nnang lo iketleeditse, ka gonne Morwa motho o tla ka nako e lo sa akanyeng gore e ka nna yone.” (Luke 12:39, 40) Go ise go ye kae, Satane o tlile go tsietsa batho ba le bantsi gore ba akanye gore go na le “kagiso le polokesego.” O tla dira gore ba akanye gore tsotlhe di apere tshiamo. Mme go tweng ka rona? Letsatsi la katlholo ga le tlhoke go re ‘wela ka tshoganyetso jaaka le ne le ka wela magodu,’ fa fela re ‘nna re tsogile re bo re nna re thantse mo ditlhaloganyong.’ Ke ka moo re tshwanetseng go bala Lefoko la Modimo letsatsi le letsatsi le go tlhatlhanya ka se Jehofa a re bolelelang sone.

13. Moya wa lefatshe o tlhotlheletsa batho jang, mme re ka o tila jang?

¹³ Moya wa lefatshe leno o rotloetsa batho go robala semoyeng. Batho ba le bantsi ba tshwaregile thata ka ditiro tsa bone mo ba sa ‘tshwenyegeng ka se ba se tlhokang semoyeng.’ (Math. 5:3) Ba tlhomile mogopolo thata mo dikhumong tse di rotloetsang “keletso ya nama le keletso ya matlho.” (1 Joh. 2:16) Mo godimo ga moo, boitlosobodutu jwa lefatshe leno bo rotloetsa batho gore e nne “barati ba menate,” mme dilo di ntse di nnela maswe go ya pele. (2 Tim. 3:4) Ke ka moo Paulo a neng a bolelela Bakeresete gore ba se ka ba “rulaganyetsa dikeletso tsa nama go sa le pele,” tse di ka dirang gore ba swe semoyeng.—Bar. 13:11-14.

14. Ke tlhagiso efe e e mo go Luke 21:34, 35?

¹⁴ Re tila moya wa lefatshe leno mme re amogela moya o Jehofa a o dirisang go re thusa go tlhaloganya ditiragalo tse di larileng kwa pele.^[1] (1 Bakor. 2:12) Mme gone, re a itse gore dilo tse di tlwaelegileng fela mo botshelong di ka dira gore motho a otsele semoyeng fa a di letla gore di tle pele ga dilo tsa semoya. (Bala Luke 21:34, 35.) Batho ba bangwe ba ka re ja ditshego fa ba re bona re ntshitse matlho dinameng mme seo ga se lebaka la gore re emise go nna le boikutlo jwa go potlaka. (2 Pet. 3:3-7) Go na le moo, re tshwanetse gore ka metlha re nne le Bakeresete ka rona kwa dipokanong kwa moya wa Modimo o leng gone.

15. Petere, Jakobe le Johane ba ile ba diragalelwa ke eng, mme le rona re ka diragalelwa jang ke se se tshwanang?

¹⁵ Bosaitekanelang bo ka koafatsa maikaelelo a rona a go nna re disitse. Jesu o ne a itse gore batho ba na le mokgwa wa go ineelela makoa a bone. Ela tlhoko se se neng sa direga mo bosigong jwa pele ga a bolawa. Jesu o ne a kopa Rraagwe yo o kwa legodimong gore a mo neye maatla a go tswelela a ikanyega mo go ene. O ne a kopa Petere, Jakobe le Johane gore ba ‘nne ba disitse’ fa ene a ya go rapela. Le fa go ntse jalo, ba ne ba sa lemoge bomasisi jwa se se tlogang se direga. Go na le gore ba nne ba disitse ba letetse Mong wa bone, ba ne ba ineelela letsapa mme ba robala. Le fa Jesu a ne a lapile, o ne a thantse a rapela Rraagwe ka tlhoafalo. Ke se ditsala tsa gagwe le tsone di neng di tshwanetse go se dira.—Mar. 14:32-41.

16. Go ya ka Luke 21:36, Jesu o ne a re laela gore re ‘nne re tsogile’ jang?

¹⁶ Go ‘nna re tsogile’ semoyeng ga go kaye fela go nna le maikaelelo a a siameng. Malatsi a se kae pele ga tiragalo ya kwa tshimong ya Gethesemane, Jesu o ne a bolelela bone barutwa bao gore ba dire mekokotlelo. (Bala Luke 21:36.) Ka jalo, le rona re tshwanetse go nnela ruri mo thapelong fa re batla go nna re tsogile semoyeng.—1 Pet. 4:7.

17. Re ka tlhomamisa jang gore re ipaakanyeditse se se larileng kwa pele?

¹⁷ E re ka Jesu a ile a re bolelela gore bokhutlo bo tla tla ka ‘ura e re sa akanyeng gore ke yone,’ eno ga se nako ya go robala semoyeng e bile ga se nako ya go ijesa dijo tsa ditoro tse Satane le lefatshe la gagwe di di kgothaletsang batho. (Math. 24:44) Mo Baebeleng, Modimo le Keresete ba re bolelela se se tla diregang mo isagweng e bile ba re thusa go nna re disitse. Re tshwanetse go sireletsa bomoya jwa rona, kamano ya rona le Jehofa le go tlhagafalela dilo tse di direlwang Bogosi. Re tshwanetse go itse nako le ditiragalo gore re kgone go ipaakanyetsa se se larileng kwa pele. (Tshen. 22:20) Eno ke kgang ya botshelo le loso!