Baebele ya Reng

A Isagwe ya Gago e Laoletswe E sa Le Gale?

Batho ba le bantsi ba dumela gore botshelo le isagwe ya bone di laoletswe e sa le gale ke maatla mangwe a a kwa godimo. Ba akanya gore go tswa fa motho a sena go imiwa go fitlha a swa, o latela thulaganyo nngwe e e setseng e kwadilwe mo mogopolong wa Modimo. Ba bolela gore ‘kana e bile Modimo ke mothatayotlhe mme o itse dilo tsotlhe ka jalo o tshwanetse a bo a itse sengwe le sengwe ka dilo tse di fetileng, tse di diragalang le tse di tla diragalang.’

WENA o akanya eng? A Modimo o laolela e sa le gale tsela ya rona ya botshelo mme kgabagare bokhutlo jwa rona? Ka mafoko a mangwe, a tshwanelo ya go itlhophela ke selo sa boammaaruri kgotsa ke toro fela? Baebele ya reng?

A Modimo o Itse Sengwe le Sengwe E sa Le Gale Kgotsa se a Tlhophang go se Itse Fela?

Baebele e tlhalosa sentle gore Modimo o kgona go itse dilo go sa le gale. Isaia 46:10 ya re, o itse “bokhutlo go tswa kwa tshimologong.” E bile o ne a dirisa bakwaledi ba batho gore ba kwale dipolelelopele tse dintsi. (2 Petere 1:21) Mo godimo ga moo, dipolelelopele tseo di ne di diragala ka metlha, ka gonne Modimo o na le botlhale le maatla a go dira gore sengwe le sengwe se a se buileng se diragale. Ka gone, Modimo ga a itse fela e sa le gale se se tla diragalang mme gape o laolela pele ditiragalo fa a tlhopha go dira jalo. Le fa go ntse jalo, a Modimo o laolela e sa le gale se se tla diragalang ka mongwe le mongwe kgotsa a e bile o laolela pele gore ke palo e kana kang ya batho ba ba tla bolokwang? E seng go ya ka se Baebele e se bolelang.

Baebele e ruta gore Modimo o tlhopha gore o laolela isagwe pele jang. Ka sekai, Modimo o ne a bolelela pele gore “boidiidi jo bogolo” jwa batho ba ba siameng ba tla falola fa go senngwa batho ba ba bosula kwa bokhutlong jwa tsamaiso eno ya dilo. (Tshenolo 7:9, 14) Le fa go ntse jalo, ela tlhoko gore Modimo ga a re naya palo e e tlhomameng ya boidiidi joo jo bogolo. Lebaka ke lefe? Ga a laolele isagwe ya batho pele. Modimo o tshwana le rre yo o lorato yo o nang le lelapa le legolo. O itse gore bobotlana bangwe ba bana ba gagwe ba tla bontsha go amogela lorato lwa gagwe mme ga a laolela pele gore e tla nna ba ba kae.

Bapisa tsela e Jehofa a dirisang bokgoni jwa gagwe jwa go laolela dilo e sa le gale le kafa a dirisang maatla a gagwe ka gone. E re ka e le Mothatayotlhe, Modimo o na le maatla a a feletseng. (Pesalema 91:1; Isaia 40:26, 28) Mme a o dirisa maatla a gagwe ka tsela e e sa laolegeng? Nnyaa. Ka sekai, o ne a tlhopha gore a se ka a dirisa maatla a gagwe kgatlhanong le Babelona, e e neng e le mmaba wa Iseraele wa bogologolo go fitlha fa nako e ne e tshwanela. Modimo o ne a re: “Ke ne ka nna ka ikgapa.” (Isaia 42:14) O dirisa molaomotheo o o ntseng jalo le mo kgannyeng ya go itse dilo go sa le gale le go di laolela pele. Jehofa o bontsha boikgapo e le gore a tlotle kgololosego ya go itlhophela e a re neileng yone.

Go kgona go laola maatla ga Modimo ga go dire gore a nne motho yo o sa itekanelang. Tota e bile, go tlotlomatsa bogolo jwa gagwe mme go dira gore re mo rate ka gonne go bontsha gore bolaodi jwa gagwe ga bo bontshiwe ka go itse dilo tsotlhe le ka maatla mme bo bontshiwa ka lorato le go tlotla kgololesego ya go itlhophela ya dibopiwa tsa gagwe tse di botlhale.

Kafa letlhakoreng le lengwe, fa Modimo a ka bo a laolela pele sengwe le sengwe go akaretsa le dikotsi tse di boifisang le sengwe le sengwe se se bosula se se diragetseng, a go tla bo go sa siama gore re mo pege molato ka ntlha ya masetlapelo otlhe le pogo tse di leng mo lefatsheng? Ka jalo, fa re tlhatlhoba sentle thuto eno ya taolelogale, ga e tlotle Modimo go na le moo e a mo tlontlolola. E mmontsha a le setlhogo, a tlhoka tshiamiso e bile a se na lorato—e leng sengwe se se farologaneng tota le se Baebele e se bolelang ka ene.—Duteronome 32:4.

Tlhopho ke ya Gago

Modimo o ne a bolelela setšhaba sa gagwe sa Iseraele jaana a dirisa motlhanka wa gagwe Moshe: “Ke beile botshelo le loso fa pele ga gago, . . . mme o tlhophe botshelo . . . ka go rata Jehofa Modimo wa gago, ka go reetsa lentswe la gagwe le ka go mo ngaparela; gonne ke ene botshelo jwa gago le boleele jwa malatsi a gago.” (Duteronome 30:19, 20.) Fa Modimo a ka bo a ne a laoletse pele gore Moiseraele mongwe le mongwe a mo rate mme a bone botshelo kgotsa a se ka a mo rata mme a swe, mafoko a gagwe a ne a tla bo a se na bokao e bile a sa bontshe lorato. A o dumela gore Modimo yo e leng “morati wa tshiamiso” e bile e le mothofatso wa lorato a ka dira dilo ka tsela e e sa akanyetseng jalo?—Pesalema 37:28; 1 Johane 4:8.

Go ikuela ga Modimo mo batlhankeng ba gagwe gore ba tlhophe botshelo go dira thata mo go rona gompieno, ka ntlha ya gore go diragadiwa ga boporofeti jwa Baebele go bontsha gore bokhutlo jwa tsamaiso eno ya dilo bo atamela ka bofefo. (Mathaio 24:3-9; 2 Timotheo 3:1-5) Re tlhopha jang botshelo? Re dira jalo ka tsela e e tshwanang le e Baiseraele ba neng ba dira ka yone.

O ka ‘Tlhopha Botshelo’ Jang?

Re tlhopha botshelo ka go “rata Jehofa,” ka go “reetsa lentswe la gagwe,” le ka “go mo ngaparela.” Gone mme, re ka kgona fela go dira dilo tseno fa re itse Modimo e le motho mme re tlhaloganya se a batlang gore re se dire. Fa Jesu Keresete a ne a rapela Modimo o ne a re: “Botshelo jo bo sa khutleng ke jo, gore ba go itse, wena, Modimo o o osi, o o boammaaruri, le ene yo o mo romileng, e bong Jesu Keresete.”—Mokwalo o o sekameng ke wa rona; Johane 17:3, Baebele e e Boitshepo.

Kitso eno e e botlhokwa e ka bonwa mo ditsebeng tsa Baebele e e Boitshepo e e bidiwang Lefoko la Modimo. (Johane 17:17; 2 Timotheo 3:16) Eleruri, mpho eno ya semoya ke bosupi jo bo bonalang sentle jwa gore Modimo ga a laolele isagwe ya rona pele mme o batla gore re itirele ditshwetso re na le kitso e e tswang mo tshedimosetsong e a re neileng yone.—Isaia 48:17, 18.

Mo Baebeleng Modimo o re bolelela jaana: ‘Boikaelelo jwa me ka batho le lefatshe ke jo, mme o tshwanetse go dira seno gore o bone botshelo jo bo sa khutleng. Go mo go wena gore o swetse gore a o batla go ntheetsa kgotsa nnyaa.’ Ee, a bo Modimo a lekalekanya maatla a gagwe a go laolela dilo go sa le gale le go tlotla kgololosego ya rona ya go itlhophela sentle jang ne! A o tla tlhopha botshelo “ka go reetsa lentswe la [Modimo] le ka go mo ngaparela”?

A O KILE WA IPOTSA GORE. . .

◼ Modimo o dirisa bokgoni jwa gagwe jwa go itse dilo go sa le gale go ya bokgakaleng bofe?—Duteronome 30:19, 20; Isaia 46:10.

◼ Ke ka ntlha yang fa Modimo a ka se ka a laolela sengwe le sengwe e sa le gale go akaretsa le dilo tse di bosula tse di diragalelang batho?—Duteronome 32:4.

◼ Kgabagare isagwe ya rona e ikaegile ka eng?—Johane 17:3.

[Mafoko a a mo go tsebe 13]

Baebele e ruta gore Modimo o tlhopha gore o laolela isagwe pele jang