Kgaolo ya Botlhano

Thapisa Ngwana wa Gago go Tloga Boseeng

1, 2. Batsadi ba tshwanetse go senka thuso mo go mang fa ba godisa bana ba bone?

“BANA ke boswa jwa Jehofa,” go ne ga bolela jalo motsadi mongwe a itumetse, dingwaga tse di ka nnang 3 000 tse di fetileng. (Pesalema 127:3) Eleruri, boitumelo jo motsadi a nnang najo ke tuelo e e tlhwatlhwakgolo thata e e tswang mo Modimong, eo banyalani ba bantsi ba e bonang. Lefa go ntse jalo, bao ba nang le bana ba lemoga ka bonako fela gore boitumelo joo jwa go nna motsadi bo lere boikarabelo.

² Go godisa bana ke tiro e kgolo thata, segolobogolo gompieno. Lefa go ntse jalo, go na le ba bantsi ba ba ileng ba atlega e bile mopesalema yo o tlhotlheleditsweng o supa kafa o ka kgonang go dira seno ka teng fa a re: “Fa Jehofa a sa age ntlo, ba ba e agang ba direla lefela.” (Pesalema 127:1) O tlile go nna motsadi yo o botoka tota fa o latela ditaelo tsa ga Jehofa sentle. Baebele ya re: “O ikanye Jehofa ka pelo yotlhe ya gago, o se ka wa ikaega [ka] tlhaloganyo ya gago fela.” (Diane 3:5) A o iketleeditse go reetsa kgakololo ya ga Jehofa fa o simolola tiro eno ya dingwaga tse 20 ya go godisa ngwana?

GO AMOGELA KGOPOLO E E MO BAEBELENG

 3. Borre ba na le boikarabelo bofe mo go godiseng bana?

³ Mo malapeng a mantsi mo lefatsheng lotlhe, banna ba leba go thapisa bana e le tiro ya basadi. Ke boammaaruri gore Lefoko la Modimo le bolela gore tiro e kgolo ya monna ke go tlamela lelapa ka dijo. Lefa go ntse jalo, gape e bolela gore o na le boikarabelo mo lelapeng. Baebele ya re: “Baakanya tiro ya gago e e kwa ntle, mme o e iketleeletse kwa nageng; mme morago ga moo, o age ntlo ya gago.” (Diane 24:27) Go ya kafa Modimo o lebang dilo ka teng, borre le bommè ba tshwanetse go tshwaraganela go thapisa bana.—Diane 1:8, 9.

 4. Ke eng fa re sa tshwanela go leba bana ba basimane ba le botlhokwa go feta ba basetsana?

⁴ O leba bana ba gago jang? Dipego tsa kwa Asia di bolela gore “gantsi masea a basetsanyana ga a ratiwe.” Dipego tsa kwa Latin America di bolela gore basetsanyana ba santse ba sa ratiwe tota le mo “malapeng a barutegi.” Lefa go ntse jalo, boammaaruri ke gore basetsana ga se bana ba maemo a a kwa tlase. Jakobe, rre yo o itsegeng thata wa metlha ya bogologolo o ne a bitsa bana botlhe ba gagwe, go akaretsa le basetsana bape fela ba ba neng ba setse ba tshotswe ka nako eo a re ke “bana ba Modimo o ba [nneileng].” (Genesise 33:1-5; 37:35) Jesu le ene o ne a segofatsa “banyana” botlhe (basimane le basetsana) ba ba neng ba tlisiwa kwa go ene. (Mathaio 19:13-15) Re ka tlhomamisa gore o ne a supa tsela e Jehofa a ba lebang ka yone.—Duteronome 16:14.

 5. Ke dilo dife tse banyalani ba tshwanetseng go di akanyetsa fa ba dira tshwetso ya palo ya bana ba ba batlang go nna nabo?

⁵ A mo tikologong e o nnang kwa go yone go lebeletswe gore mosadi a tshole bana ba bantsi kafa go ka kgonegang ka teng? Mme gone, banyalani ke bone ba itlhophelang gore ba batla go nna le bana ba bakae. Go tweng he, fa batsadi ba sa kgone go fepa, go apesa le go ruta bana ba bantsi ba ba nang nabo? Tota ruri, banyalani ba tshwanetse go akanyetsa seno fa ba dira tshwetso ya palo ya bana. Banyalani bangwe ba neela ba losika boikarabelo jwa go godisa bana ba bangwe fa ba palelwa ke go ba tlamela botlhe. A go dira jaana go siame? E seng jalo tota. E bile ga go role batsadi boikarabelo jwa bone mo baneng ba bone. Baebele e bolela jaana: “Fa mongwe a sa tlamele ba ga gabo, bogolo ba e leng ba ntlo ya gagwe, o latotse tumelo.” (1 Timotheo 5:8) Banyalani ba ba nang le boikarabelo ba leka go rulaganya gore ba batla “lelapa” le le kana kang gore ba kgone go ‘tlamela ba e leng ba ga bone.’ A ba ka dirisa dithibelapelegi gore ba kgone go dira seno? Seo le sone ke tshwetso e ba tshwanetseng go e itirela, e bile fa banyalani ba swetsa go dira jaana, ke bone ba tla itlhophelang gore ba dirisa mofuta ofe wa go thibela pelegi. “Motho mongwe le mongwe o tlaa ithwalela morwalo wa gagwe.” (Bagalatia 6:5) Lefa go ntse jalo, go thibela pelegi ka ditsela tse di akaretsang go senya mpa ga go dumelelwe ke melaometheo ya Baebele. Jehofa Modimo ke “motswedi wa botshelo.” (Pesalema 36:9) Ka jalo, fa o ka nyeletsa botshelo bo setse bo imilwe o tla bo o supa fa o sa tlotle Jehofa e bile go tshwana fela le go bolaya.—Ekesodo 21:22, 23; Pesalema 139:16; Jeremia 1:5.

GO NAYA NGWANA WA GAGO TSE A DI TLHOKANG

 6. Ngwana o tshwanetse go thapisiwa go tloga leng?

⁶ Diane 22:6 ya re: “Godisetsa ngwana ka thuto mo tseleng e o tshwanetseng go e tsamaya.” Go thapisa bana ke nngwe ya ditiro tse dikgolo tsa batsadi. Gone mme, thapiso eo e tshwanetse go simolola leng? Ba santse ba le babotlana thata. Moaposetoloi Paulo o ne a bolela gore Timotheo o ne a thapisiwa go tswa “mo bonyaneng.” (2 Timotheo 3:15) Lefoko la Segerika le le dirisitsweng fano le ka kaya lesea kana le e leng ngwana yo o iseng a tsholwe. (Luke 1:41, 44; Ditiro 7:18-20) Ka jalo, Timotheo o ne a thapisiwa go tloga fa a santse a le mmotlana thata—mme e bile go ne go siame. O tshwanetse go simolola go thapisa ngwana e santse e le lesea thata. Tota le lesea le lennye le nyoretswe kitso.

 7. (a) Ke eng fa go le botlhokwa gore batsadi boobabedi ba nne le botsalano jo bo atamalaneng thata le lesea la bone? (b) Jehofa le Morwawe yo o tsetsweng a le esi ba ne ba na le botsalano jo bo ntseng jang?

⁷ “Ke ne ka rata lesea la me fela fa ke le bona la ntlha,” go ne ga bolela jalo mmè mongwe. Go ntse fela jalo le ka bommè ba bantsi. Botsalano jo bo itumedisang jwa mmè le lesea bo a gola fa ba ntse ba nna nako e ntsi ba le mmogo morago ga tsalo. Go anyisa ngwana go nonotsha katamalano eo. (Bapisa 1 Bathesalonika 2:7.) Fa mmè a ntse a solasola lesea la gagwe e bile a le buisa o a bo a dira selo sa botlhokwa thata se se itumedisang lesea. (Bapisa Isaia 66:12.) Mme go tweng ka rre? Le ene o tshwanetse go tsalana le lesea le lesha leno la gagwe thata. Jehofa ke sekao sa seno ka boene. Mo bukeng ya Diane, re ithuta ka botsalano jwa ga Jehofa le Morwawe yo o tsetsweng a le esi, yoo a tshwantshediwang a re: “Jehofa o ne a na le nna mo tshimologong ya tsela ya gagwe . . . ke le natefelo ya gagwe ka malatsi otlhe.” (Diane 8:22, 30; Johane 1:14) Ka tsela e e tshwanang, rre yo o molemo o dira gore a tsalane le bana ba gagwe ka boitumelo le ka lorato go tloga fela fa ngwana a tsholwa. “Mmontshe lorato tota,” go bolela jalo motsadi mongwe. “Ga go na ngwana yo o kileng a bolaiwa ke go tlamparelwa le go atliwa thata.”

 8. Batsadi ba tshwanetse go nna bofefo go rotloetsa tlhaloganyo ya lesea ka tsela efe?

⁸ Lefa go ntse jalo, masea a tlhoka se se fetang foo. Go tloga fela fa ba tsholwa, maboko a bone a setse a siametse go amogela le go boloka tshedimosetso e bile ba utlwa bontsi jwa yone mo batsading ba bone. Tsaya puo jaaka sekai. Go ya ka babatlisisi “go akanngwa gore tsela e batsadi ba buisanang ka yone le ngwana wa bone go tloga fa a santse a le monnye,” ke yone e laolang gore o tla ithuta go bua le go bala sentle go le kana kang. Bua le ngwana wa gago o bo o mmalele e santse e le lesea. O tlile go go etsa ka bonako, e bile ga go ne go tsaya lobaka pele o mo ruta go bala. E bile a ka nna a bo a kgona go bala pele a tsena sekolo. Seo se tla thusa thata fa o nna kwa nageng e barutisi ba leng mmalwa fela kana ditlelase tsa teng di tlala thata.

 9. Ke mokgele ofe o o botlhokwatlhokwa oo batsadi ba tlhokang go o gakologelwa?

⁹ Selo se batsadi ba Bakeresete ba tshwenyegang thata ka sone ke go naya ngwana dilo tse a di tlhokang semoyeng. (Bona Duteronome 8:3.) Ka boikaelelo bofe? Go thusa bana ba bone go nna le botho jo bo tshwanang le jwa ga Keresete, e bile tota ke go ba thusa gore ba apare “motho yo moša.” (Baefeso 4:24) Gore ba dire seno, ba tlhoka go senka didirisiwa tse di siameng tsa go aga le go aga ka ditsela tse di tshwanetseng.

RUTA NGWANA WA GAGO BOAMMAARURI

10. Bana ba tshwanetse go nna le dinonofo dife?

¹⁰ Boleng jwa kago bo ikaegile thata ka mefuta ya didirisiwa tse e agilweng ka tsone. Moaposetoloi Paulo o ne a bolela gore didirisiwa tse di gaisang tse di ka bopang botho jwa Mokeresete ke “gouta, le selefera, le maje a a tlhokegang.” (1 Bakorinthe 3:10-12) Tseno di emela dinonofo tse di tshwanang le tumelo, botlhale, temogo, boikanyego, tlotlo le go rata Jehofa le melao ya gagwe ka boitumelo. (Pesalema 19:7-11; Diane 2:1-6; 3:13, 14) Batsadi ba ka thusa bana ba bone jang gore ba ithute go nna le dinonofo tseno e santse e le masea? Ka go latela thulaganyo e e tlhomilweng bogologolo.

11. Batsadi ba Baiseraele ba ne ba thusa bana ba bone jang go nna le botho jwa bomodimo?

¹¹ Jehofa o ne a bolelela batsadi ba Baiseraele jaana pele fela fa setšhaba sa Iseraele se tla tsena mo Nageng e e Solofeditsweng: “Mafoko a ke a go laolelang gompieno a nne mo pelong ya gago. O a rute bana ba gago ka tlhoafalo, o bue ka ga one fa o dutse mo ntlong ya gago, le fa o tsamaya mo tseleng, le fa o rapame, le fa o rapamologa.” (Duteronome 6:6, 7) Ee, batsadi ba tshwanetse go nna dikao, ditsala, ba simolole dipuisano le go nna barutisi.

12. Ke eng fa go le botlhokwa gore batsadi e nne dikao tse di molemo?

¹² Nna sekao. Sa ntlha, Jehofa o ne a re: “Mafoko a . . . a nne mo pelong ya gago.” Morago o ne a oketsa jaana: “O a rute bana ba gago ka tlhoafalo.” Ka jalo batsadi ba tshwanetse gore ba nne le dinonofo tsa bomodimo pele mo dipelong tsa bone. Motsadi o tshwanetse go rata boammaaruri a bo a tshele tumalanong le jone. O tla kgona go ama pelo ya ngwana fela fa a ka dira jalo. (Diane 20:7) Ka ntlha yang? Gonne bana ba tlhotlhelediwa thata ke se ba se bonang go na le se ba se utlwang.—Luke 6:40; 1 Bakorinthe 11:1.

13. Batsadi ba Bakeresete ba ka etsa sekao sa ga Jesu jang sa go nna fa fatshe le bana ba bone?

¹³ Nna tsala. Jehofa o ne a raya batsadi ba Baiseraele a re: ‘Bua le bana ba gago fa o dutse mo ntlong ya gago le fa o tsamaya mo tseleng.’ Seno se tlhoka gore batsadi ba senye nako le bana ba bone lefa ba ka tswa ba na le ditiro tse dintsi go le kana kang. Go bonala sentle gore Jesu o ne a lemoga gore o tlhoka go senya nako nngwe ya gagwe le bana. Mo malatsing a bofelo a bodiredi jwa gagwe, batho ba ne “ba lere banyana kwa go ene gore a ba ame.” Jesu o ne a dira eng? “Mme a ba tsaya mo mabogong a gagwe, a ba segofatsa.” (Mareko 10:13, 16) Akanya fela, diura tsa bofelo tsa botshelo jwa ga Jesu di ne di ntse di feta. Mme lefa go ntse jalo, o ne a ipha nako ya go nna fa fatshe le bana. A thuto e e molemo ruri!

14. Ke eng fa go le mosola gore ba iphe nako ya go nna fa fatshe le bana ba bone?

¹⁴ Buisana le bone. Fa o ipha nako ya go nna le ngwana wa gago go tla go thusa gore o buisane le ene. Fa lo ntse lo buisana, o tla kgona go lemoga gore o ntse a nna le botho jo bo ntseng jang. Lefa go ntse jalo, gakologelwa gore go buisana ga se go bua fela. “Ke ne ka tshwanela gore ke ithute go reetsa, go reetsa ke tsenya mo pelong,” go ne ga bolela jalo mmè mongwe wa kwa Brazil. Bopelotelele jwa gagwe bo ne jwa mo solegela molemo fa morwa wa gagwe a ne a simolola go mmolelela kafa a ikutlwang ka teng.

15. Ke eng se ba tshwanetseng go nna ba se gakologetswe fa go tla mo boitapolosong?

¹⁵ Bana ba tlhoka gore go nne le “motlha wa go tshega . . . le motlha wa go bina,” o e leng nako ya go itapolosa. (Moreri 3:1, 4; Sekaria 8:5) Boitapoloso bo solegela molemo fa batsadi le bana ba go dira mmogo. Selo se se utlwisang botlhoko ke gore malapa a mantsi a itapolosa fela ka go leba thelebishene. Lefa gone dithulaganyo dingwe tsa thelebishene di kgatlha, bontsi jwa tsone bo senya mekgwa e mentle e bile di kgoreletsa puisano mo lelapeng. Ka gone, ke eng fa lo sa tlhame sengwe fela se lo ka se dirang le bana ba lona? Opelang, tshamekang, itumeleng le ditsala, etelang mafelo a a kgatlhang. Ditiro tse di ntseng jalo di dira gore lo buisane.

16. Batsadi ba tshwanetse go ruta bana ba bone eng kaga Jehofa mme ba tshwanetse go dira seno jang?

¹⁶ Ba rute. “[Mafoko ano] o a rute bana ba gago ka tlhoafalo,” Jehofa o ne a bolela jalo. Ditemana tse di dikologileng di go bolelela gore o ka ruta eng le gone jang. Sa ntlha, “o rate Jehofa Modimo wa gago ka pelo yotlhe ya gago, le ka mowa otlhe wa gago, le ka nonofo ya gago yotlhe fela.” (Duteronome 6:5) Morago ga foo, “mafoko a . . . o a rute bana ba gago ka tlhoafalo.” Ba rute ka boikaelelo jwa gore ba rate Jehofa le melao ya gagwe ka moya otlhe. (Bapisa Bahebere 8:10.) Polelwana eno, “ruta ka tlhoafalo” e kaya go ruta selo o se boaboeletsa. Ka jalo, totatota, Jehofa o go bolelela gore tsela e kgolo e o ka thusang bana ba gago go nna le botho jwa bomodimo ka yone ke go bua le bone ka ene o sa kgaotse. Seno se akaretsa go ithuta Baebele le bone ka metlha.

17. Batsadi ba ka ka nna ba tshwanela go ruta bana ba bone gore ba nne le eng? Mme ka ntlha yang?

¹⁷ Batsadi ba bantsi ba itse gore ga go motlhofo go tsenya tshedimosetso mo pelong ya ngwana. Moaposetoloi Petere o ne a kgothatsa Bakeresetekaene jaana: “Fela jaaka banyana ba e leng gone ba tsalwang, lo tlhologelelwe maši a semowa a a se nang boferefere.” (1 Petere 2:2) Polelwana e e reng “lo tlhologelelwe” e supa gore ka tlholego fela ba le bantsi ga ba ke ba eletsa dijo tsa semoya. Batsadi ba ka nna ba tshwanela go senka ditsela tsa go dira gore bana ba bone ba di tlhologelelwe.

18. Ke mekgwa efe e Jesu a neng a ruta ka yone e batsadi ba kgothalediwang go e etsa?

¹⁸ Jesu o ne a ama dipelo tsa batho ka go dirisa ditshwantsho. (Mareko 13:34; Luke 10:29-37) Mokgwa ono wa go ruta o mosola thata fa o ruta bana. Ba rute melaometheo ya Baebele o dirisa ditshwantsho tse di mebalabala, tse di kgatlhang, gongwe tse di tlhagang mo kgatisong ya Buka ya Me ya Dipolelo tsa Bibela.a Dira gore bana ba nne le seabe. Dira gore ba tshwantshe ditshwantsho le go itirela diteramanyana tsa ditiragalo tsa Baebele. Jesu o ne a dirisa le dipotso. (Mathaio 17:24-27) Dirisa mokgwa ono wa gagwe mo thutong ya lelapa. Go na le gore o bolele fela gore molao mongwe wa Modimo wa reng, botsa dipotso tse di tshwanang le, Ke eng fa Jehofa a re tlhometse molao ono? Go tlile go diragala eng fa re o boloka? Go tlile go diragala eng fa re o tlola? Dipotso tse di ntseng jalo di thusa ngwana gore a akanye le go lemoga gore melao ya Modimo e ka kgona go ikobelwa le gore e molemo.—Duteronome 10:13.

19. Fa batsadi ba latela melaometheo ya Baebele fa ba dirisana le bana ba bone, ke melemo efe e bana ba tla e bonang?

¹⁹ Fa o tlhomela ngwana wa gago sekao, o le tsala ya gagwe, o buisana le ene e bile o mo ruta, o ka kgona go mo thusa gore a nne le botsalano jo bo atamalaneng thata le Jehofa Modimo a santse a le mmotlana. Botsalano jono bo tla kgothaletsa ngwana wa gago gore e nne Mokeresete yo o itumetseng. O tla leka go tshelela tumelo ya gagwe le fa balekane ba mo gatelela le go mo leka. Mo thuse ka metlha go itumelela botsalano jono jo bo botlhokwatlhokwa.—Diane 27:11.

KGALEMELO E BOTLHOKWA E BILE E A TLHOKEGA

20. Kgalemelo ke eng, mme e tshwanetse go dirwa ka tsela efe?

²⁰ Kgalemelo ke thapiso e e sokololang tlhaloganyo le pelo. Bana ba e tlhoka ka metlha. Paulo o gakolola borre gore ba “godisetse [bana ba bone] mo kwatlhaong le mo taong ya Morena.” (Baefeso 6:4) Batsadi ba tshwanetse go kgalemela ka lorato, fela jaaka Jehofa a dira. (Bahebere 12:4-11) Fa o kgalema ka lorato o ka dira seo ka go ntsha mabaka. Ke gone ka moo re bolelelwang gore re “reetse kgalemelo.” (Diane 8:33, NW) O tshwanetse go kgalemela ka tsela efe?

21. Ke melaometheo efe e batsadi ba tshwanetseng go nna ba e gakologetswe fa ba kgalemela bana ba bone?

²¹ Batsadi ba bangwe ba akanya gore go kgalemela ngwana ke go bua le ene ka lentswe le le mo tshosang, o mo kgala kana o mmuisa ka mafoko a a tlhabang. Lefa go ntse jalo, Paulo o tlhagisa jaana: “Lona borrabana, lo se ka lwa rumola bana ba lona go ba gakatsa.” (Baefeso 6:4) Mokeresete mongwe le mongwe o kgothalediwa gore a nne “bonolo fela mo go botlhe . . . a le boikokobetso, a sokolola ba ba ikgantshang.” (2 Timotheo 2:24, 25) Batsadi ba Bakeresete ba leka go nna ba gakologetswe mafoko ano fa ba kgalemela bana ba bone mme ba ntse ba lemoga gore ba tshwanetse go gagamala. Lefa go ntse jalo, ka dinako tse dingwe, go tlhalosa mabaka ga go a lekana e bile o ka tlhoka gore o mo otlhaye ka tsela nngwe.—Diane 22:15.

22. Fa ngwana a tlhoka go otlhaiwa, o tshwanetse go thusiwa gore a tlhaloganye eng?

²² Bana ba tlhoka go kgalemelwa ka tsela e e sa tshwaneng ka gonne ga ba tshwane. Ba bangwe ga ba ‘siamisiwe ka puo fela.’ Bao bone, ke ba matshelo a bone a ka bolokiwang fa ba otlhaiwa nako le nako fa ba tlhoka kutlo. (Diane 17:10; 23:13, 14; 29:19) Lefa go ntse jalo, ngwana o tshwanetse go tlhaloganya lebaka la go bo a otlhaiwa. “Thupa le kgalemelo di naya motho botlhale.” (Diane 29:15, mokwalo o o sekameng ke wa rona; Jobe 6:24.) Mo godimo ga moo, kotlhao ga e a tshwanela go fetelediwa. “Ke tlaa go [itaya] ka tekanyo,” Jehofa o ne a raya batho ba gagwe jalo. (Jeremia 46:28b, mokwalo o o sekameng ke wa rona.) Baebele ga e go letle go itaya ngwana o galefile kana botlhoko thata, mo o mo ntshang matsadi kana o mo gobatsa.—Diane 16:32.

23. Ngwana o tshwanetse gore a kgone go lemoga eng fa batsadi ba gagwe ba mo otlhaya?

²³ Jehofa o ne a bolela jaana la ntlha, fa a ne a tlhagisa batho ba gagwe gore o tla ba otlhaya: “O se ka wa boifa . . . gonne ke na nao.” (Jeremia 46:28a) Ka tsela e e tshwanang, fa motsadi a otlhaya ngwana, lefa a ka tswa a mo otlhaya ka tsela efe e e siameng, seo ga se a tshwanela go dira gore ngwana a ikutlwe a sa batliwe. (Bakolosa 3:21) Go na le moo, ngwana o tshwanetse go lemoga gore motsadi o mo otlhaya ka gore ‘o na nae,’ o mo letlhakoreng la gagwe.

SIRELETSA NGWANA WA GAGO GORE A SE KA A UTLWA BOTLHOKO

24, 25. Bana ba tlhoka go sirelediwa mo go eng se se maswe thata gompieno?

²⁴ Batho ba bantsi ba gakologelwa gore ba ne ba itumetse fa e santse e le bana. Ba gakologelwa ba ne ba ikutlwa ba sireletsegile, ba tlhomamisa gore batsadi ba bone ba tla ba tlhokomela lefa go ka diragala eng. Batsadi ba batla gore bana ba bone ba ikutlwe jalo, mme mo lefatsheng leno le le tletseng boitsholo jo bo maswe, go bokete thata go boloka bana ba sireletsegile.

²⁵ Kotsi e nngwe e e maswe thata e e ntseng e gola thata mo dingwageng tsa bosheng ke go sotliwa ga bana ka tlhakanelodikobo. Dipego di bolela gore go sotliwa ga bana ka tlhakanelodikobo go ile ga oketsega ganè kwa Malaysia mo lobakeng lwa dingwaga di le lesome. Kwa Jeremane, bana ba ba ka nnang 300 000 ba sotliwa ka tlhakanelodikobo ngwaga le ngwaga fa patlisiso ya kwa nageng nngwe ya Amerika Borwa, e fopholetsa palo e e kwa godimo ya 9 000 000 ngwaga le ngwaga! Selo se se botlhoko ke gore, bontsi jwa bana bano go tlhakanelwa dikobo le bone mo magaeng a bone go dirwa ke batho bao ba ba itseng e bile ba ba ikanya. Mme bana ba tshwanetse go sirelediwa ke batsadi ba bone. Batsadi ba ka ba sireletsa jang?

26. Bana ba ka bolokiwa ba sireletsegile ka tsela efe, mme kitso e ka sireletsa ngwana jang?

²⁶ E re ka maitemogelo a supa gore bana ba ba tlhaselwang motlhofo ke ba ba itseng go le gonnye ka tlhakanelodikobo, kgato e e ka tsewang go thibela seno ke go ruta ngwana, lefa a santse a le monnye. Kitso e ka sireletsa “mo tseleng ya bosula, mo banneng ba ba buang dilo tsa lesoko.” (Diane 2:10-12) Kitso efe? Kitso ya melaometheo ya Baebele, ya se se molemo le se se bosula. Kitso ya gore bagolo bangwe ba dira ditiro tse di maswe le gore bana ga ba a tshwanela go reetsa fa motho a batla ba dira tiro nngwe e e phoso. (Bapisa Daniele 1:4, 8; 3:16-18.) Se mo rute seo ka go bua le ene gangwe fela. Bana ba bantsi ba bannye ba kgona go gakologelwa thuto sentle fa o e boaboeletsa gantsi. Fa bana ba ntse ba gola, rre yo o lorato ga a kitla a tsena fela fa morwadie a itswaletse mo sephiring le mmè ga a kitla a dira jalo ka morwawe—ka gone o gatelela mo ngwaneng gore dilo di tshwanetse go dirwa ka tsela efe. Mme e bile, tsela e e molemo thata ya go ba sireletsa gore ba se ka ba sotliwa ka tsela epe ke go ba baya leitlho thata.

DIRA GORE O KAELWE KE MODIMO

27, 28. Ke mang Mothusi yo mogolo wa batsadi fa ba lebane le kgwetlho ya go godisa bana?

²⁷ Ka boammaaruri, go thapisa ngwana go tloga mo boseeng go gwetlha tota mme batsadi ba ba dumelang ga ba lebane le seno ba le nosi. Bogologolo mo metlheng ya Baatlhodi, e ne ya re fa monna mongwe yo o neng a bidiwa Manoa a utlwa gore o tlile go nna le ngwana, a kopa Jehofa gore a mo kaele gore a godise ngwana wa gagwe jang. Jehofa o ne a araba thapelo ya gagwe.—Baatlhodi 13:8, 12, 24.

²⁸ Ka tsela e e tshwanang le gompieno, batsadi ba ba dumelang le bone ba ka bua le Jehofa ka thapelo fa ba ntse ba godisa bana ba bone. Go nna motsadi ke tiro e e bokete tota, mme go duela fela thata. Banyalani bangwe ba Bakeresete ba kwa Hawaii ba bolela jaana: “O tshwanetse wa dira tiro ya gago mo dingwageng tse 12, pele dingwaga tsa bolesome tsa mathata di simolola. Mme fa o ile wa dirisa melaometheo ya Baebele, eno ke nako ya go itumela le go nna le kagiso fa ba dira tshwetso ya go direla Jehofa go tswa mo pelong.” (Diane 23:15, 16) O tlile go tlhotlheletsega go tlhaeletsa jaana fa ngwana wa gago a dira tshwetso eo: “Bana ke boswa jwa ga Jehofa.”

[Ntlha e e kwa tlase]

MELAOMETHEO ENO YA BAEBELE E KA THUSA . . . BATSADI JANG MO GO THAPISENG BANA?

Ikanye Jehofa.—Diane 3:5.

Dira maikarabelo a gago.—1 Timotheo 5:8.

Jehofa ke Rre yo o lorato.—Diane 8:22, 30.

Batsadi ba na le boikarabelo jwa go kaela bana.—Duteronome 6:6, 7.

Kgalemelo e a tlhokega.—Baefeso 6:4.

[Lebokoso mo go tsebe 61]

GO KGALEMELA KA TSELA E E SOLEGELANG MOLEMO

Tsela e e mosola thata ya go kgalemela ke go dira gore ngwana a hutsafadiwe ke matswela a boitshwaro jo bo sa tshwanelang. (Bagalatia 6:7; bapisa Ekesodo 34:6, 7.) Ka sekai, fa ngwana wa gago a sena go kgotlela, o tla rutega fa e ka nna ene a tlosang leswe leo. A o diretse mongwe sengwe se se sa siamang? Fa o mmolelela gore a ikope maitshwarelo go tla mo thusa gore a fetole mokgwa oo o o sa siamang. Tsela e nngwe e o ka kgalemelang ka yone ke fa o mo tima ditshiamelo dingwe ka lobaka lo lo rileng gore a kgone go lemoga dilo sentle. Tsela eno e thusa ngwana go ithuta go kgomarela melaometheo e e siameng.

[Ditshwantsho mo go tsebe 57]

Batsadi, tlhomang sekao, nnang ditsala lo bo lo ba rute